Salmos 5
5
Sc'oponel Dios yu'un sc'anel canantayel
Yu'un jach-c'ayoj; soc flautas. Ha salmo yu'un David.
1A'iybon awa'iy jc'op, Jehová,
ich'bon ta cuenta te ahcan cu'une.
2A'iybon awa'iy te caw,
Ajwalilat soc Diosat cu'un,
como ha'at ya jc'oponat.
3Jehová, ta sab yac awa'iybon jc'op;
ta sab ya calbat te bin ya jc'ambat,
soc ya jmahliy te suhtibe.
4Como ha'at Diosat
te ma lecuc awo'tan yu'un te bin chopole,
te mach'a chopol ma ba ya xnahin ta ats'ehl.
5Ma ba ya x'ayinic ta atojol te mach'atic jtoybahetic,
yac ap'aj spisil mach'atic ya spasic te bin chopole.
6Yac alajinlan te mach'atic ya ya'iyic lot,
yac awihlay te jmilaw soc te jlo'loywanej.
7Yan te ho'one, ta scuenta bayel sc'uxul awo'tan
ya x'ochon ta Na awu'un;
ta scuenta quich'belat ta muc' ya jquejan jba
ta stojol te ch'ul Templo awu'une.
8Tojobtesawon bahel, Jehová, ta scuenta stojil awo'tan,
ta scaj te jcontratac;
tojobtesa ta jtojol te be awu'une.
9Mayuc smelelil te bin ya yalic;
nojel ta mulil te yo'tanique;
ha jamal muquenal te yehic;
ay bahba-c'op ta yehic.
10¡Ac'ticlambeya castigo, Dios cu'un!
¡Ac'a yahluquic yu'un te bin ha nix schapojique!
Loq'uesa bahel ta scaj bayel smulic,
como stoyoj sbahic ta atojol.
11Pero tse'eluc me yo'tanic
spisil mach'atic ya smuc'ulinat yo'tanic;
spisiluc ora ac'a c'ayojinuc soc yutsil yo'tanic,
como ha'at yac acanantay;
tse'el yo'tanic ta acuenta
te mach'atic c'ux ta yo'tanic te abihile.
12Ha'at, Jehová, yac awa'be bendición
te mach'a toj yo'tan;
hich te bin ut'il mahquilal
yac ajoytay a ta yutsil awo'tan ta stojol.
Currently Selected:
Salmos 5: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
