Job 42
42
Job ya yal ay sp'ijil yo'tan te Diose
1Te Job la sjac'be sc'op te Jehová, hich la yal:
2Ya jna' te spisil ya xhu' awu'un,
soc te ma xhu' ta comel te bin anopoje.
3La ajoc'oy: ¿Mach'a a te mayuc sp'ijil yo'tan
te ya slajimbe sc'oblal te j'ac'-o'tanil cu'un? xchihat.
Ha la jcal te bin ma ba jna'oj,
ha te bintic jelawen yutsil
te ma ba la jna'be scuentahil.
4La awalbon: A'iya awa'iy, ya jc'oponat;
ya joc'obat, ha'at yac asuhtesbon, xchihat.
5La jca'iybat ac'oblal ta jchiquin,
pero yo'tic ya quilatix ta jsit.
6Ha yu'un ya quihlay jba
soc ya jsuhtes co'tan
ta ts'u'lum soc ta tan,
xchi te Job.
Slajibal c'op
7Ta patil, te c'alal hich halbot yu'un Jehová te Job, te Jehová hich la yalbe te Elifaz te talem ta Temán: Tihl quilimba ta atojol soc ta stojol te cheb amohloltac, como ma stojiluc la awalbonic jc'oblal, hich te bin ut'il la yal te ca'bat Job. 8Ha yu'un yo'tic ya me atsaquic huqueb jcolel torohetic soc huqueb tat tuminchijetic, bahanic ta stojol te ca'bat Job, ac'ahic scohtol chic'bil mahtanil ta acuentahic. Te ca'bat Job ya sc'opombeyex Dios, soc ya quich'be ta cuenta te sc'op scuenta yu'un ma ba ya ca'beyex awocolic yu'un te ma ba stojil la awalbonic jc'oblal, hich te bin ut'il la yal te ca'bat Job, xchi.
9Ha yu'un te Elifaz te talem ta Temán, Bildad te talem ta Súa, soc Zofar te talem Naamat, baht spasic te bin halbotic yu'un te Jehová. Hich te Jehová la yich'be ta cuenta te sc'op te Job.
Job ya sta xan sc'ulejal
10Te c'alal la sc'opombeyix Dios a yu'un te yamigotac a te Job, te Jehová la slecubtes a te ta swocol, soc la ya'be xan sc'ulejal cheb buelta te bin ut'il ta nahil to. 11Talic ta stojol spisil te sbanquil yihts'in soc spisil te mach'atic la sna'beyic sba ta nahil to, we' uch'ic ta sna. Pajal la smel yo'tanic yu'un soc la smuc'ubtesbeyic q'uinal ya'iy yu'un spisil swocol a'bot yu'un Jehová. Ta jujutuhl la ya'beyic taq'uin soc jujun ch'ocowil oro.
12Te Jehová c'ax hich la ya'be bendición a te Job te bin ut'il ay ta nahil to. Ay jpic soc ho'lajunbahc' (14,000) tuminchijetic, ho'lajunbahc' (6,000) camellohetic, lajunwinic yoxbahc' (1,000) ta chahp j'a'tel-wacaxetic, soc lajunwinic yoxbahc' (1,000) me' burrahetic.
13Soc ayin huctuhl queremetic soc oxtuhl ach'ixetic yu'un. 14Te wixile la ya'be sbihilin Jemima,#42.14 Stsuhmut, xchi. te schebale, Cesia,#42.14 Canela, xchi. te yoxebale, Keren-hapuc.#42.14 Yawil sbonil yelaw antsetic, xchi.
15Mayuc yan antsetic hich st'ujbilalic ta bahlumilal a te bin ut'il te yantsil-nich'nab Job. Te static pajal la ya'be yich' sq'uinalic soc te yermanotaque.
16Ta patil cuxaj hucwinic (140) xan ha'bil te Job, la to yil te snich'nab soc te smamatac c'alal ta schancajal sts'umbal.
17Mero mamalix a te cham te Job.
Currently Selected:
Job 42: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
