Job 41
41
1¿Ya bal xhu' yac aluc loq'uel ta anzuelo te Leviatán,#41.1 Ilawil te nota ta 3.8.
o ya bal xhu' yac achucbe yac' ta lazo?
2¿Ya bal xhu' yac ac'asesbe lazo ta sni',
o ya bal xhu' yac asohltesbe gancho ta yahlan-e?
3¿Ya bal xbic'talti'ij ta atojol?
¿Ya bal sc'oponat ta c'unil c'op?
4¿Ya bal achap ac'op soc
yu'un yac amosohin spisil ora?
5¿Ya bal x'ixtajat soc hich te bin ut'il tut ha'mal mut,
o ya bal achucbe yixtalan atut ach'ix?
6Te jchombajeletic ¿ya bal spasic trato ta stojol?
¿Ya bal sesenic yu'un ya schonic?
7¿Ya bal xhu' yac alowbe snuhculel ta lanza,
o ya bal alow ta slowojibal chay te sjole?
8Teme yac awac' ac'ab ta stojol,
¡ya me ana' te tsactamba ta guerra,
ma ba yac apasix yan buelta!
9Tojol ya smuc'ulin awo'tan te yac awalbe stsaquel,
yu'un tic' ya xch'ay awo'tan a teme yac awile.
10Mayuc mach'a te hich ay yip yo'tan
te ya stij hahchel.
Teme hiche, ¿mach'a c'an hu'uc yu'un
te ya stehc'an sba ta jtojol hiche?
11¿Mach'a ay bin la ya'bon
yu'un ya sc'an ya jsutbe sjelol?
¡Spisil bintic ay ta ye'tal ch'ulchan ho'on cu'un!
12Ma ba ya xquechajon ta yalbeyel sc'oblal te yoc sc'ab,
soc te yip soc te st'ujbilal.
13¿Mach'a ya sloq'uesbe te smahquil?
¿Mach'a ya xnohpoj bahel ta ya'beyel freno?
14¿Mach'a ya xhu' ya sjambe sti'il ye?
¡Te chohlolchohl sbaquel ye ya yaq'uic xiwel!
15Ta spat ay chohlochohl mahquilaletic
te sjaloj sbahic ta maquel.
16Mero slac'oj sbahic,
ma xc'ax ic' tey a.
17Slap'ticlanej sbahic;
slapticlanej sbahic, ma xhu' ya yich'ic jamel.
18Ya shu'xiy tsantsehwal ta sni';
te site hich sts'anabul te bin ut'il
sjahts' c'ahc'al te ya xloc' tal ta sab.
19Ya xloc' yat c'ahc' ta ye;
ya xloc' nich c'ahq'uetic a.
20Ya xloc' ch'ahil ta sni',
hich te bin ut'il oxom yac ta buhl ya'lel.
21Ta yic'al sni' ya stihltes ac'al,
soc ya xloc' c'ahc' ta ye.
22Ay ta snuc' te yipe;
ay xiwel ta stojol.
23Te wec'ajtic snuhculel slac'ticlanej sbahic;
tulanic, ma stij sbahic.
24Tulan yo'tan hich te bin ut'il ton,
tulan hich te bin ut'il ye molino.
25Te c'alal ya xhahch, ya xiwic te mach'atic ay yipic;
ya xloq'uic ta ahnel ta scaj te ya slihlin sba.
26Mayuc bin ya xpasbot teme ya xtahot yu'un espada,
o lanza, ya'tejibaluc t'ihmalte', o tut lanza.
27Te taq'uin hich c'ohem yu'un te bin ut'il ac,
te bronce hich c'ohem yu'un te bin ut'il c'a'al te'.
28Ma ba ya xloc' ta ahnel yu'un te ya'tejibalul t'ihmalte',
te tonetic yu'un jihmuch'il
hich c'ohem yu'un te bin ut'il suhlil trigo.
29Te maz hich c'ohem yu'un te bin ut'il sahmul-te';
ya stse'lay te xjanlajan sc'op tut lanza.
30Xet'emtic te ye'tal sch'uht,
scholet ya xhil yoc ta lum
hich te bin ut'il yoc swuyojibal trigo.
31Ya yac' buhlanuc te sc'ubulil mar
hich te bin ut'il ha' ta oxom;
ya yac' te hich ya xc'oht
te bin ut'il oxom banti ya yich' capel poxetic.
32Saclimlim ya xhil yu'un te ha' te banti ya xbaht,
hich c'ohem te sac sjol te sc'ubulil mar.
33Mayuc yan ta bahlumilal te pajal soc;
ha chambahlam te ma xiw.
34Mayuc sc'oblal ta yo'tan
spisil yantic chambahlametic te ya stoy sbahic;
ha ajwalil yu'un spisil jtoyba chahmbahlametic,
xchi te Jehová.
Currently Selected:
Job 41: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
