مارکوس 7
7
ژانگما تانگ تشیتو۔
1یروشالیمّی گیالسانے یونگسکھانّی فریسی پا تانگ شریعتی عالِم کھاچیگ حضرت عیسیٰ مسیح یودسا دزومس۔ 2کھونگونی حضرت عیسیٰ سی لوبٹوگس کھاچیگی کھارجی زے سانگ سنگونلا یہُودی پے لوگثول نانگجین لاگپا ماٹھوکھانبو تھونگ۔ 3(یہُودی پا، میگسالّی فریسی پاگونّی، کھورانگونّی اتا اپو ے لوگثول نانگجین لاگپا غوتا تے مانے زان زامیدپین۔ 4کھونگون ٹھومسنے یونگستے، کھورانگونّی لوگثول نانگجین لاگپا غوتا تے مانے، زان زامیدپین۔ کھونگونی یانگ لوگثول مانگپوجیگ ثونّگادپین سپیرنا، کورے، چھونود تانگ ٹھاق و ٹھوچیسگون)۔
5تیبویپھیا فریسی پا تانگ شریعتی عالِم گُونی حضرت عیسیٰ سی ٹیس، ”نیرانگی لوبٹوگسگونّی لاگپا ماٹھوا زان زوستے چیا نگاتانگی اتا اپو ے لام لوگثولّیکا ڈولّا مانوگ؟“
6حضرت عیسیٰ سی لانسالّا زادس، ”ریاکاری کھیوجے سکورلا خُدے حضرت یسعیاہ گیُودتے ماونگ لونگستان سالکھانبو لدینبا اینوگ، کابوے نانّگا،
’ای میگونّی کھانے نگا سیوا چونانگ
کھونگونی سنینگّون نگانے تھاگرینگ دوگ۔
7کھونگونی نگا چولچیسپو پھانمیتھوگس اینوگ،
چیازیرنا کھونگونی خُدے شریعتی تشابسلا
کھونگرانگونّی چوکھانّی شریعت گون لابدوگ۔‘ #7:7 حضرت یسعیاہ شوقبُوئ 29۔ 13
8کھیوجاگونّی، خُدے شریعت سنانگمید چوستے تیبوے تشابسلا کھیوجارانگی لوگثولگون ثونگدوگ۔“
9تینے حضرت عیسیٰ سی مولس، ”کھیوجے، کھیوجارانگی لام لوگثول ثونگچیسلا تھابس کھاسپا نیامپو خُدے شریعت گُون پھانگدوگ۔ 10سپیرنا حضرت مُوسیٰؔ سی زیرس، رانگی ابا تانگ اما سیوا چوس، یانگ رانگی ابا یا اما نگان تابسکھانگون سادگوس۔ 11اِین نانگ کھیوجے میگونلا کھورانگی ابا یا اما، نگے نیرانّگا روگس چوگوشیسپو کوربان (یانگنا خُدا پھولین زیرتے وعدہ) چوستے این زیرچیس لابدوگ۔ 12تیزوگ چوچیسنے کھیوجاگونّی کھونگونلا رانگی ابا یا اما روگس چو ماچوگّا اینوگ، 13تینّابویپھیا کھیوجارانگی لام لوگثول ثونگچیسّی نانّگا کھیوجے خُدے حُکم چاگچیس ماتشاد جان تیتسوگسی لاس مانگپو چوانوگ۔“
14تینے حضرت عیسیٰ سی میتشوگسلا بودّا زادتے مولس، ”کھیوجا تشانگمے، نگے زیرکھانبو نیانتے ہاگوچیسّی سونڈوس چوس۔ 15پھیلوگنے زوگسپوے نانّگا چھاکھانگونّی، کھیوجا تشیتو گیورچوگّا مانوگ، اِین نانگ کھیوجاگونّی سیمسنے بینگکھانبوے، کھیوجاگون تشیتو گیور چوگّانوگ۔“ 16#7:16 سنگونمے یُونانی سکادّی مارکُوسّی شوقبُوئ نانّگا 7۔ 16 ”نامچھوگ یودکھانگونّی نگے زیرکھانلا گیالّا چوستے نیونشیگ“ میدپا اینوگ۔
17تینے حضرت عیسیٰ سی میتشوگسنے بیتے کھانگپاجیگی نانّگا سکیودس، کھونگی لوبٹوگسگونّی کھونّگا، سپے سالکھانبو ہاگوچوگچیسلا زیرس۔ 18کھونگی ٹیا زادس، ”کھیوجا ہاماگوا؟ تھونّگا میدوگّا، کھیوجے زاکھانّی کھارجیبوے کھیوجاگون تشیتو گیورچوگّا مانوگ، 19کھارجی کھیوجے سنینگی نانّگا ماچھا ٹودپے نانّگا لیبتے زوگسپونے پھیلوگا بینّگانوگ“ (تیزوگ مولچیسپوے حضرت عیسیٰ سی زاچیسّی ریگس تشانگما ژانگما اینکھانبو، ہاگوچوگّا زادس)۔
20کھونگی مولس، ”کھیوجے نانگنے بینگکھانبوے کھیوجاگون تشیتو گیور چوگّانوگ، 21چیازیرنا میجیگی سیمسنے سامبا نگانپا، لوسڈیل نگانپا، کوچیس، می سادچیس، 22رانگی جیدماد مانپا جانما نیامپو لوسڈیل چوچیس، نابس، نگانسیمس، گوبسکورچیس، توسگیون لوسڈیل نگانپے دودپا، تشیگچیس، جانمے سچودپے سکورلا نگانپا زیرچیس، پھوسو تانگ سامبا میدکھان گُون بینّگانوگ۔ 23تے تشانگما نانگکوگنے بینگستے کھیوجاگون تشیتو گیور چوگّانوگ۔“
یہُودی مانکھان ّی بوموجیگی ایمان۔
24تیکانے بینگتے حضرت عیسیٰ مسیح صُور گیالسے چھوگسلا سکیودس۔ کھونگ جُوگستے یودسے کھانگپابو سوجیگّانگ گیُوس چھاچوگنیین میدپین، اِین نانگ تیبو سانگوے نانّگا بور مانیان۔ 25ردود جُوگستے یودکھان بومو چھونگونّی اما حضرت عیسیٰ سی سکیودتے دوگ زیرتے تشورّاچیگ، کھو یونگستے کھونگی جابسّی لدُونلا گییلتے 26کھوے ٹھوگوی نانگنے ردود پو پھینّگا زادچیسلا جوجو جوین کھونّگا جُووا پھولس۔ کھو سیرییے یولجونگسّی پھونیشیے گیالسے نانّگا سکیستے یہُودی پا مانپین۔
27حضرت عیسیٰ سی کھوا مولس، ”گوما نگے خُدے ٹھوگو، بنی اِسرائیل پاگونلا ڈانگس ڈانگس زاچوگ گوس۔ ٹھوگوی تاگی بو لینتے کھییا پھانگنا ماڈیگّا اینوگ۔“
28کھوے لانتانگس، ”لدینبا اینوگ مسیح لے، اِین نانگ ٹھوگوگونّی کھارجی بودکھانگون چوگتسے یوگا یودکھانّی کھیی چھونگونگونّیانگ زادّوگ۔“
29کھونگی مولس، ”تا کھانگپا سونگ، کھیرانگی لان گیالّا تانگچیسپوے، ردود کھیرانگی بوموے نانگنے بینگتے مید۔“ 30کھو کھانگپا لیبّاچیگ، کھوے بومو چھونگونبو مالتسیکا نیالتے ردود بینگستے میدکھانبو تھونگ۔
حضرت عیسیٰ، رگودشیگ پھانچوگا زادس۔
31حضرت عیسیٰ مسیح صُور نے بینگستے صیدا یولجونگس گیُودتے گیالسا دِکپُلِسی یولجونگسّی نانّگا گلِیلی تشو چھوگسلا سکیودس۔ 32می کھاچیگی ماتشورکھان تانگ سپیرا سالپو تانگ مانیانکھانّی میجیگ کھونگ یودسا کھیونگس، یانگ حضرت عیسیٰ سی جوجو جوین کھونگی چھاگ کھویکا بورّا زادچیسلا جُووا پھولس۔
33حضرت عیسیٰ سی میبو میتشوگسنے ازامّا کھیرّا زادتے کھونگرانگی دزیگوگون کھوے نامچھوگّونّی نانّگا چوگس، تیستینگنے کھونگرانگی دزیگوگونّیکا تھوگیابستے کھوے لچیا تھوگ چوگّا زادس۔ 34تینے کھونگی کیینلا نامکھا زیگستے سنیینگشوگس نیامپو مولس، ”ایپھاتھا“ کابوے تونتاگپو ”بیشیگ“ اینوگ۔ 35تینّامالّا میبوا گیالّا چوستے تشور یانگ کھوے لچیبو ٹولتے کھوا سپیرا سالپو تانگنانگ۔
36حضرت عیسیٰ سی میتشوگسلا سوانگ میشادچیسلا کا سالس۔ تسامشیگ مانّگا کھونگی میشادچیسلا مولنانگ میگونّی مانّگا مانگپو ناتشولبو پھیلچوگس۔ 37میگون ماثانٹے ہالاستے زیرس، ”کھونگی چی زادنانگ ہالاسشیس یونگدوگ۔ کھونگی، ماتشورکھانلا تشورچوگچیس تانگ سپیرا تانگ مانیانکھانلا سپیرا تانگ چوگّا زادّوگ۔“
Currently Selected:
مارکوس 7: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
