مارکوس 8
8
حضرت عیسیٰ سی می ستونگژیا کھارجی سالّا زادس۔
1ہالام تینّاتوسشیگّا جانیانگ میتشوگس چھینموجیگ دزومس، میگونلا زاگیو میدپا، حضرت عیسیٰ مسیح لوبٹوگسگون بودّا زادتے مولس، 2”ای میگون نگا نیامپو دُوگستے جاگما سوم سونگ یانگ زاچیسلا چانگ مید پاسانگ، نگا سنینگرجیا سکییاراگ۔ 3کالتیس نگے کھونگون کھانگپا ستوگریا لامچوگنا، کھونگون لامبارلا گویونگ کھورتے گییلاین، چیازیرنا کھونگونی ٹوا ما تھاگرینگنے یونگسکھان کھاچیگّانگ یودتے اینوگ۔“
4کھونگی لوبٹوگسگونّی لانتانگس، ”نگاتانّگا ای میگونلا تانگچیسّی پھیا تاگی ای ریستونگی نانّگا کانے تھوبین؟“
5حضرت عیسیٰ سی کھونگونلا ٹیا زادس، ”نگاتانگی لاگا تاگی تسام یود۔“ کھونگونی لانتانگس، ”تاگی ردون یودلے۔“
6تینے حضرت عیسیٰ سی میتشوگسپوا سیکا دوگچیسلا مولس۔ کھونگی تاگی ردونبو نامسّا زادتے خُدا شُکر جْوس ، یانگ تیگون چاگستے گوچیسّی پھیا لوبٹوگس گونلا سالس، یانگ کھونگونی میتشوگسلا گوستے تانگس۔ 7کھونگونی لاگا نیا چھونگون کھاچیگّانگ یودپین، حضرت عیسیٰ سی تیگونّی پھیانگ شُکر جْوس تے کھونگرانگی لوبٹوگس گونلا گوستے تانگچیسّی پھیا مولّا زادس۔
8کھونگونی تشیمستشیمس زوس۔ ستینگنے لوبٹوگسگونّی لاگما لوسکھانّی تاگی گُون دومسپا پاگتسے چھینمو ردون گانگ۔ 9تے میتشوگسّی نانّگا می لتونگ جی زامشیگ یودپین۔ میگون کھانگپا لوگستے لامچوگا زادتے 10حضرت عیسیٰ سی لوبٹوگسگون نیامپو ٹُھوزینگی نانّگا ژونتے دالمانوتھا یولجونگسلا سکیودس۔
فریسی پاگونّی ستاس ستانچیسلا زیرس۔
11فریسی پاگون یونگستے حضرت عیسیٰ مسیح تشودلتاستے کھونّگا خُدے وانگچھا سالکھانبو تانتان چوچیسلا نامکھے ستاگس شیگ ستون زیرتے وتسوگ تانگس۔
12تیبو سانّاچیگ کھونگی سنیینگشوگس تانگستے مولس، ”چیپھیا ای میرابسپوے نامکھے ستاگس ستون زیرّانوگ؟ نگے کھیوجا لدینبا زیرّاد، نگے ای میرابسپوا تیتسوگس ستاگس شیگ مانے میستان۔“ 13تینے کھونگون بورتے کھونگ تشوے چھوگسلا ٹُھوزینگی نانّگا ژونتے سکیودّا زادس۔
فریسی پاگون تانگ ہیرودِیس گیابگالّا شانگ سکولّا زادس۔
14لوبٹوگس گونلا تاگی کھورّالا رجید، ٹُھوزینگی نانّگا کھونگونی لاگا تاگی چیگ مانے میدپین۔ 15حضرت عیسیٰ مسیح کھونگونلا سپانگپودّا زادتے مولس، ”فریسی پاگون تانگ ہیرودِیس سکیورنے شانگ چوس۔“
16کھونگونی چیگ تانگ چیگّا زیرس، ”نگاتانگی تاگی کھورتے میدپا، کھونگی تیبو مولتے اینّوگا؟“ 17حضرت عیسیٰ سی تیبو کھیینتے ٹیا زادس، ”تاگی میدکھانّی سکورلا کھیوجاگونّی چیا سپیرا تانّگاد؟ تارُوانگ، کھیوجاگونلا ماتھونّگا یا ہاماگوا؟ کھیوجاگونّی سنینگ تیتسام سکیونگپو اینّا؟ 18کھیوجاگونلا میگ یودتیانگ تھونگتھوبّا میراگّا؟ نامچھوگ یودتیانگ، تشورتھوبّا میراگّا؟ چی کھیوجاگونلا چانگ ایدتو میراگّا؟ 19نگے تاگی ثنا نے می ستونگ ثنا ڈانگسچوگستے کھیوجے لوسکھانّی تاگی لدوسپا پاگتسے تسام گانگ؟“
کھونگونی زیرس، ”چوگنییسلے۔“
20”یانگ تاگی ردونّے می ستونگژی ڈانگسچوگستے کھیوجے لوسکھانّی تاگی لدوسپا پاگتسے تسام گانگ؟“
کھونگونی زیرس، ”ردونلے۔“
21کھونگی کھونگونلا ٹیا زادس، ”تارُوانگ کھیوجاگونلا ہاگوا میراگّا؟“
جاراجیگ پھانچوگا زادس۔
22کھونگون بیت صیدا ڈونگکھیرلا لیبّاچیگ، می کھاچیگی جاراجیگ حضرت عیسیٰ سی یودسا کھیونگس، یانگ جوجو جوین کھوا چھاگسیا زادچیسلا جُووا پھولس۔ 23حضرت عیسیٰ سی جارا بوا لاگپا تھامستے ڈونگکھیرنے پھیلوگا کھیرّا زادس۔ کھوے میگیکا تھوگیابستے کھونگرانگی چھاگ کھویکا بورتے ٹیا زادس، ”کھیورانّگا چیتونگشیگ تھونگدوگّا؟“
24کھوے ینگوا ستاس یانگ زیرس، ”نگا میگون تھونگدوگلے، اِین نانگ سالپو مانپا، لچانگما ڈولکھان تسوگسریگ۔“
25حضرت عیسیٰ سی یانگسکیار کھونگرانگی چھاگ کھوے میگونّیکا بورّا زادس۔ تینے کھوے میگون بیتے کھوا تھونگچیسّی کھیود پو لوگستے تھوب، یانگ کھوا چیتشانگما سالپو چوستے تھونگ۔ 26کھو کھانگپا لامچوگا زادِین حضرت عیسیٰ سی مولس، ” کھیرانگ لوگستے چھا زانے، ڈونگکھیرّی نانّگا ماچھا۔“
حضرت عیسیٰ سی سو اینکھانبو حضرت پطرؔس سی شادس۔
27حضرت عیسیٰ مسیح تانگ کھونگی لوبٹوگسگون گلِیل نے قَیصرؔیہ فِلپّی نییکھورّی ڈونگسیبگونلا سکیودس۔ کھونگون سکیود زانے لامّا کھونگی لوبٹوگس گونلا ٹیا زادس، ”میگونّی نگا سو اینوگ زیردوگ؟“
28کھونگونی لانتانگس، ”کھاچیگی غوتا سالکھان حضرت یُوؔحنّا ٰ، کھاچیگی پیغمبر حضرت اِلیاس، یانگ جانماگونّی پیغمبر گونّی ٹونے چیگ چیگ جُوگستے اینوگ زیردوگ۔“
29تینے کھونگی کھونگونلا ٹیا زادس، ”اینّانگ کھیوجے نگا سو اینوگ زیرّاد؟“ حضرت پطرؔس سی لانتانگس، ”نیرانگ خُدے لدامّا زادکھانّی مسیحا جُوگستے اینوگ۔“
30اِین نانگ حضرت عیسیٰ سی کھونگونلا کھونگی سکورلا سوانگ ماشاد مولتے کا سالس۔
حضرت عیسیٰ سی کھونگرانگ ڈونگشیسّی سکورلا لونگستان زادس۔
31تینے یہُودی پے اُسکیونگون، اِمام کُنی چھونمو گونتانگ شریعتی عالِم گونّی کانے اِبنِ آدم ردوگنگال مانگپو نیونگستے سادگوشیس یانگ جاگ سومی ستینگنے شیکھانگونّی ٹونے سونتیا لانگسشیسّی سکورگون حضرت عیسیٰ مسیح لوبٹوگس گونلا لابچیس گوزوگ زادس۔ 32تیبوے سکورلا کھونگی سالپو چوستے شادّا زادپا، حضرت پطرؔس سی کھونگ سوسوا کھیرتے کھاسکییس۔
33اِین نانگ حضرت عیسیٰ سی گیورّا زادتے لوبٹوگس گونلا زیگسین حضرت پطرؔس لا کھاسکییا زادِین مولس، ”شیطان، نگانے تھاگرینّگا سونگ۔ کھیرانگی سامتشول خُدے چھوگسنے مانپا، میی چھوگسنے اینوگ۔“
34تینے میتشوگس تانگ لوبٹوگس گونلا کھونگ یودسا دزومچیسلا بودّا زادس یانگ مولس، ”نگے ستینگرانگنے یونّگا تھادکھانگون، رانگدود پھانگستے رانگی ردوگنگالّی کیانگشینگ کھورتے نگا ڈانگسگوس۔ 35رانگثوگ سکیوبنیین یودکھانگونّی لدینبے میتشے سکیالاین، اِین نانگ نگاتانگ گاموےناتسُولّی تونلا کھورانگی سروک سکیالکھانگونّی لدینبے میتشیبو سکیوبین۔ 36میجیگّا دُنیا گانگپو تھوبتیانگ رانگی تھامیدپے میتشے سکیالنا چی پھانتھوگس؟ 37می سروک چیکگی تشابسلا میجیگی چی تانگین؟ 38ای میرابس خُدے گیابنے ڈولچیس پھانگسکھان تانگ دِیگپاچان گُونی ٹوا کالتیس سوجیگی نگاتانگ نگے لابجے گواہ تانگچیسلا ٹھیلبا تشورنا، نگا اِبنِ آدم نگارانگی یابّی شان ّی نانّگا ہلژخمہ فرشتاگون نیامپو لوگستے یونگ زانے، نگیانگ کھوا ٹھیلبا تشورین۔“
Currently Selected:
مارکوس 8: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
