مارکوس 6

حضرت عیسیٰ سی سیوا ماچوس۔

1حضرت عیسیٰ مسیح تیکانے لوبٹوگسگون نیامپو کھونگرانگی ڈونگکھیر ناصرة لا سکیودس۔ 2شابّاد آرام چوچیسی جاگّا، کھونگی مجلِسی نانّگا لابجا سالچیس گوزوگ، یانگ کھونّگا تشورکھان مانگپوے ہالاستے ٹیس، ”ای میبوا ای تشانگما کانے تھوبکیاگ؟ کھوا ایتسوگس شیسرابس سوی تانگسکیاگ؟ کازوگی کھوے ایتسوگس معجزہ گون ستانّانوگ؟ 3کھو شینگکھانبو مانوگا؟ کھو حضرت مریم می بُوژا یانگ یعقُوبؔ ، حضرت یُوسفؔ ، یہُوداؔہ تانگ، شمعُوؔن گُونی فونو مانوگا؟ کھوے سترِنگمو گون ایکا نگاتانگون نیامپو میدّا؟“ کھونگون تشیگچیسپوے کھونگی کا ایمان ماچوس۔

4حضرت عیسیٰ سی کھونگونلا مولس، ”پیغمبر جیگّا رانگی ڈونگکھیر، نینڈونگ تانگ رانگی نانگتشانگسّی نانّگا مانے، جان کارونگسا سیوا چوروگ۔ 5کھونگونی ایمان میچوچیسپوے جاستے، کھونگی کھونگونی ٹوا زُومو یونگکھان کھاچیگیکا کھونگرانگی چھاگ بورتے پھانچوگا زادچیس ماستوگس، جانیانگ چانگ معجزہ مازادس۔“ 6یانگ کھونگونی ایمان میدچیسپو زیگستے کھونگ ہالاس۔

حضرت عیسیٰ سی چوگنییسپو لامچوگا زادس۔

تینے حضرت عیسیٰ سی لابجا سالّالا گامیول چیگنے چیگّا سکیودس۔ 7کھونگی لوبٹوگس چوگنییسپوا بودّا زادس، یانگ نییسنییس چوستے ردود ژوگسکھانگونّی نانگنے ردود پھینگچیسّی وانگچھا سالّا زادتے کھونگون لامچوگا زادس۔ 8کھونگی کھونگونلا لابجا سالتے مولس، ” کھیرانگونّی بیسّی پھیا ڈولچیسّی بیرگا ماستوگس، کھارجی، جولا تانگ سکیگوی نانّگا پینے ماکھور۔ 9پابُو گُون اِین نانگ کوسلاگ سپوچیس ماکھور۔“

10”کھیوجا دوگسا تانگکھانّی تینّا کھانگپے نانّگا دوگ نامتشوگپا تے ڈونگکھیرنے بینگتے میچھا۔ 11کالتیس ڈونگکھیرجیگی نانّگا سوجیگیانگ کھیوجا گاسوس ماچونا، یا کھیوجے زیرکھانبوا مانیانّا، تینے بینگتے چھا زانے، رانگی کانگپے تھالبا ثوگستے کھونگون خُدے چھادپے پھیا بورکھانبو ستون۔“

12تینے کھونگون سکیودتے میگونلا دِیگپے کانے گیودپا چوستے خُدے چھوگسلا سیمس گیورچیسلا چھوس شادس۔ 13کھونگونی ردود مانگپو پھینگستے زُومو یونگکھان مانگپوجیگّا ذیتونی مار سکوستے پھانچوگس۔

غوتا سالکھان حضرت یُوؔحنّا ٰ ڈونگس۔

14حضرت عیسیٰ مسیح تشان مینگچان گیورچیسپوے گیالپو ہیرودِیس کھونگی سکورلا تشور۔ کھاچیگی زیرّادپین، ”غوتا سالکھان حضرت یُوؔحنّا ٰ شیکھانگونّی ٹونے سونتیا لانّگا زاد پاسانگ کھونّگا زادپا ستانچیسّی کھیود یودتے اینوگ۔“ 15جانگونّی زیرس، ”کھونگ نی پیغمبر حضرت اِلیاس اینوگ۔“ یانگ جانگونّی، ”سنگونمے پیغمبر تسوگسلا کھونگ پیغمبر جیگ اینوگ۔“

16تیگون تشورّاچیگ، ہیرودِیس زیرس، ”نگے گو چادچوگکھانّی حضرت یُوؔحنّا ٰ، شیکھانگونّی ٹونے سونتیا لانّگا زادتے اینوگ۔“

17ہیرودِیس حضرت یُوؔحنّا ٰ زومستے لچاگتھاگا تاگستے تسونکھانّگا کاگچیسلا کا تانگستے اینپین۔ کھوے تیبو کھورانگی فونو فِلپُسی ناما ہیرودیاسی پھیا چوس، ہیرودِیس کھو نیامپو ناما چوستے اینپین۔ 18یوحنّانی ہیرودِیس لا مولّادپین، ” کھیرانگی فونو سی ناما نیامپو ناما چوچیسپو خُدے شریعتی گیابگال اینوگ۔“ 19ہیرودیاسی حضرت یُوؔحنّا ٰ ناپھراد چوستے کھونگ سادنیین یودپین، اِین نانگ کھوا چانگ چو مانیان، 20چیازیرنا ہیرودِیس حضرت یُوؔحنّا ٰ می زانگپو تانگ ہلژخمہ اینکھانبو شیسپا، سیوا تانگ جیگسّی نانّگا کھونگ سکیوبستے بورس۔ یوحنّانی مولکھانگون نیان زانے، گیالپو ہیرودالا سیمسّی نانّگا میدیچیس یونگنانگ کھو یوحنّانی مولکھانگون نیانچیسلا تھادّادپین۔

21اِین نانگ گیالپو ہیرودِیس سکییجاگی جاگّا ہیروداسلا سکابس تھوب۔ تے جاگّا ہیرودِیس کھورانگی لاسمی اُسکیونگ، ماگمی سپونبوگون تانگ، گلِیلی سپونبوگون ڈونلا بودتے یودپین۔ 22ہیرودیاسی بومو یونگستے سیس ما لدیمو تانگسپا، ہیرودِیس تانگ کھونگی ڈونپوگون ثانٹے تھاد۔ گیالپوے بوموبوا زیرس، ”کھیورانّگا دودپا یودکھانبو نگا شود، یانگ نگے تیبو کھیورانّگا تانگین۔“ 23کھوے نا کھورتے زیرس، ” کھیرانگی چیجیگ تونگ زیرنانگ، نگے تانگین، نگے گیالثیدّی پھیدپوانگ۔“

24کھو پھیلوگا سونگتے کھورانگی اما ٹیس، ”نگے چی تونگ زیر۔“ امے کھوا زیرس، ”غوتا سالکھان یوحنّانی گو تونگ زیر۔“ 25تینّامالّا بومو گیالپو یودسا گیوگسپا سونگتے زیرس، ”داگسارانگ نگا غوتا سالکھان یوحنّانی گو تھالّیجیگیکا گوسّاد۔“

26گیالپو ماثانٹے تشیر اِین نانگ ڈونپوگونّی لدُونلا ناکھورکھانبوے جاستے، کھوے بوموا مان زیر مانیان۔ 27تینے کھوے تینّامالّا می سادچیسّی لاس چوکھانّی میبو تسونکھانّگا یوحنّانی گو کھیونگچیسلا لامچوگس۔ کھو سونگتے تسونکھانگی نانّگا یوحنّانی گو چادس۔ 28کھوے کھونگی گوبو تھالّیجیگیکا کھیونگستے، بوموبوا تانگس، تینے کھوے کھورانگی اما تانگس۔ 29تیبو تشورّاچیگ، یوحنّانی لوبٹوگسگون یونگستے کھونگی جنازہ بو کھیرتے قبرستانی نانّگا بورس۔

حضرت عیسیٰ سی می ستونگ ثنا زاچیس سالّا زادس۔

30رسُول گُون حضرت عیسیٰ مسیح یودسا لوگستے یونگس، یانگ کھونگونی چوسکھان تانگ لابکھان تشانگمے سکورلا شادس۔ 31می مانگپو چھین یونگین دوگسپا، حضرت عیسیٰ تانگ کھونگی رسُول گُونلا آرام چوستے دونتانگ دونچیسّی توس ماتھوب۔ تیبویپھیا حضرت عیسیٰ سی مولس، ”یونگشیگ نگاتانگرانگ سوانگ میدسے ناسّاجیگّا سونگتے آرام این۔“

32تینے کھونگون ٹُھوزینگجیگی نانّگا ژونتے سوانگ میدسے ناسّاجیگّا سکیودس۔ 33اِین نانگ می مانگپوجیگی کھونگون تیکانے سکیودّالا تھونگ یانگ نگوشیس۔ گیاتشوے تھاما یودکھانّی ڈونگکھیر تشانگمانے میگون بانگتانگاین سونگتے کھونگونی سانگ سنگونلا تے ناسّیکا لیب۔ 34ٹُھوزینگنے بابستے حضرت عیسیٰ سی میتشوگس چھینمو زیگسّاچیگ، کھونّگا کھونگّونّیکا سنینگرجے سکییا زادس چیازیرنا کھونگون لُوگ زی میدکھانّی لُوگ ژوگس یودپین۔ یانگ کھونگی کھونگونلا لابجا مانگپو سالچیس گوزوگس۔

35نییما گورگورلا حضرت عیسیٰ سی لوبٹوگسگون کھونگ یودسا یونگستے زیرس، ”نگاتانگون چانگ میدسے ریستونگی نانّگا اینوگ یانگ مونچوانگ روبکییس دوگ۔ 36نییکھورّی ناسّا تانگ گامیولگونلا سونگتے کھورانگونّی پھیا زان نیوچیسلا میتشوگسپو لامچوگا زادّانگ۔“

37اِین نانگ حضرت عیسیٰ سی مولس، ”کھیوجے کھونگونلا زاچیس تونگ۔“

کھونگونی لانتانگس، ”ای میتشانگما کھارجی تانگچیسّی پھیا لزاوا 8 ای لاچھا ڈانڈے پینے گوسّوگ۔ نگاجا سونگتے تیزامشیگی پینے سکیاگستے کھونگونلا کھارجی زاچیس نیوا؟“

38کھونگی ٹیا زادس، ”کھیوجے لاگا تاگی تسام یود۔ سونگتے ستوس؟“

کھونگون سونگتے ستاس یانگ زیرس، ”تاگی ثنا تانگ نیا نیس دوگلے۔“

39تینے حضرت عیسیٰ سی لوبٹوگس گونلا میگون سدیسدے چوستے سا سنگونپویکا دوگچوگچیسّی پھیا مولس۔ 40میگون 50 یا 100 سدے چوستے سیکا دُوگس۔

41حضرت عیسیٰ سی تاگی ثنا تانگ نیا نیسپو چھاگّا نامس یانگ نامکھا زیگستے خُدا شُکر جْوس ، تاگی چاگستے میتشوگسلا گوچیسّی پھیا لوبٹوگس گونلا سالّا زادس۔ تینّا تسوگسلا کھونگی نیابوانگ گوستے کھونگ تشانگمالا سالّا زادس۔ 42کھونگ تشانگما ڈانگس ڈانگس زوس 43یانگ لوبٹوگسگونّی تاگی تانگ نیے لاگلوسگون لدوسپا پاگتسے چوگنییس گانگ۔ 44تاگی تانگ نیا زاکھانگونّی ٹوا لدانکھانّی بُوژا ستونگ ثنا یودپین۔

حضرت عیسیٰ سی چھوی کھیتھوگّا جابڈول زادس۔

45تینّامالّا حضرت عیسیٰ مسیح میتشوگسپو لوگستے لامچوگا زاد زانے، کھونگی لوبٹوگسگون کھونگرانگی سانگ سنگونلا ٹُھوزینگی نانّگا تشوے چھوگسلا بیت صیدے ڈونگکھیرلا لامچوگا زادس۔ 46میتشوگس سونگ تشارتے ستینگنے کھونگ ریکا دُعا جوا سکیودس۔

47مونچوروبّاچیگ لوبٹوگسگون ٹُھوزینگی نانّگا تشوے سکییلّا، یانگ حضرت عیسیٰ سی ریکا چیگپو یودپین۔ 48گولوگ چھوگسنے لونگسپو ٹاگپو یونگسپا کھونگونلا ٹُھوزینگ ثولچیسلا ناگس مانگپو تھونگین یودکھانبو حضرت عیسیٰ سی زِیگس۔ ہالام نگاتوگ چھوتشود سومپاجیگیکا حضرت عیسیٰ سی تشوے کانے جابڈُولّا کھونگونی چھوگسلا سکیودس، یانگ کھونگونی لدونے سکیودچیس یودپین۔ 49اِین نانگ کھونگونی کھونگ تشوے کانے جابڈُولّا سکیودین تھونّگاچیگ، شینڈے اینوگ سامستے کھونگونی کُوچو تانگس۔ 50حضرت عیسیٰ سی تھونّگاچیگ، کھونگ تشانگما ماثانٹے جیگس۔ تینّامالّا حضرت عیسیٰ سی کھونگونلا مولس، ”جیگس ماجیگس نگا این“ ہامپا چوس۔ 51تینے حضرت عیسیٰ سی ٹُھوزینگی نانّگا ژونّا زادس، یانگ لونگسپوبو چھاد۔ کھونگ تشانگما پاد ہالاس۔ 52کھونگونلا حضرت عیسیٰ سی تاگی نیامپو زادپا زادکھانبو تھونگتیانگ کھونگ سو جُوگستے اینکھانبو تارُوانگ ہاماگوا، کھونگی سنینگّون ما سکیونگپو یودپین۔

53کھونگون تشوے چھوگسلا سکیودس یانگ چھوی تھاما گنّیسرت ڈونگکھیرلا لیبّاچیگ ٹُھوزینگبو لدامس۔ 54ٹُھوزینگنے پھیلوگا بینّگاچیگ، میگونّی حضرت عیسیٰ سی اینکھانبو نگوشیس۔ 55کھونگون یولجونگس گانگپوے نانّگا بانگتانگاین سونگتے زُومو یودکھانگون مالتسیکا کھورتے حضرت عیسیٰ سی جُوگستے دوگ زیرسے ناسّیکا کھیونگس۔ 56کھونگ گامیول، ڈونگکھیر یا ڈونگسیب کارُو سکیودنانگ میگونّی زُومو یودکھانگون، ٹھومسّی نانّگا پھیلوگا پھینگستے کھیونگس۔ کھونگونی زُومو یودکھانگونلا حضرت عیسیٰ سی نامزے ڈوجیگّا لاگپا سے چوگّا زادچیسلا جوجو زیرین جُووا پھولس، یانگ کھونگی نامزا لاگپا سیکھان تشانگما پھان۔

Currently Selected:

مارکوس 6: LBJNT

Highlight

Copy