یوہانان 5

بیت صیدے زینگیکا نادپا گیالچوگّا زادس۔

1تے ستینگنے یہُودی پاگونّی توسچھینجیگی توس حضرت عیسیٰ مسیح یروشالیم گیالسا سکیودس۔ 2یروشالیمّی نانّگا لُوگ زیرکھانّی گیاسگھوے نیموا زینگچیگ یودپین، کابوا عِبرانی سکادلا بیت صیدا زیرّادپین، یانگ تیبوا تھوگ یودکھانّی یابس ثن٘ے سکورتے یودپین۔ 3تے یابسگونّیکا نادپا۔ کھونگسکھان، جارا تانگ جاؤ مانگپوجیگ نیالتے یودپین۔ 4#5‏:4 سنگونمے یُونانی شوقبُوئ نانّگا 5: 3 b نے 4 گُون میدپا اینوگ، کابوے نانّگا زیرتے دوگ ”مسیح خُدے فرشتا ہونمیدلا پارپارلا سکیودتے تے زینگبوا چھوبو سکولّادکیاگ۔ تیبویپھیا نادپا مانگپوجیگ تے زینگبوا چھوبو گولچیسلا ثونگستے دوگادپین چیازیرنا تے چھوبو چاب گولّادانگ سو نادپاجیگ تے زینگبوا نانّگا گومارانگ ژوگسنیانّا تیبوا چی نادچیگ یودنانگ گیالّادکیاگ“ 5تیکا کھونگستے لو 38 چھاکھانّی میجیگ یودپین۔ 6حضرت عیسیٰ سی کھو زیگستے لو مانگپوجیگنے پھارلا کھونگستے یودکھانبو کھیینّا زادپا کھونگی کھوا ٹیا زادس، ” کھیرانگ ای زومونے پھانّا تھادّا راگا؟“

7کھوے زیرس، ”مسیح، زینگی چھوبو سروک زانے نگا ای نانّگا جُوگسشیسلا روگس چوکھان سوانگ مید، یانگ نگا لدُونلا لیبّی سانگ سنگونلا یانگسوجیگ تینانّگا ژوگس تشاردوگ۔“

8حضرت عیسیٰ سی کھوا مولس، ”لونگس، رانگی مالتسا کھور یانگ ڈول۔“

9کھو تینّامالّا گیال، رانگی نیالستان کھورتے ڈولچیس گوزوگ، تے زادپابو شابّادّی آرام چوچیسی جاگّا جُونگستے اینپین۔ 10تینّابویپھیا یہُودی پے اُسکیونگونی گیالچوگّا زادکھانّی میبوا زیرس، ”دیرینگ شابّادّی آرام چوچیسی جاگّا کھیرانگی لاس چومیچھوگ۔ چھوسٹھیمس نانگجین کھیورانّگا نیالستان کھورچیسّی گونگسپا می تانگ۔“

11کھوے کھونگونلا لانتانگس، ”نگا پھانچوگا زادکھانّی می بوے مولّاراگ ’رانگی نیالستان کھورتے ڈول‘۔“

12کھونگونی کھوا ٹیس، ”کھیورانّگا نیالستان کھورتے ڈول زیرکھانبو سو اینوگ؟“

13کھوا کھو پھانچوگکھانبو سو این گیُوس میدپین، چیاجونا حضرت عیسیٰ تیرو میتشوگسّی نانّگا ستور سونگ۔ 14ستینگنے حضرت عیسیٰ سی کھو بیت المقدِس سی نانّگا زِیگس یانگ کھوا مولس، ”ستوس تا کھیرانگ گیالتے اینوگ۔ دِیگپا چوچیس پھونگ، تے مانّا کھیورانّگا ای سانگ تھوا جونگثیدچیس اینوگ۔“ 15تینے کھو یہُودی پے اُسکیونگونیکا سونگتے زیرس، ”نگا پھانچوگا زادسکھانبو نی حضرت عیسیٰ اینوگ۔“

خُدےبوژا وانگچھا۔

16حضرت عیسیٰ مسیح تینّا تسوگسّی معجزہ گون شابّادّی آرام چوچیسی جاگّا زاد پاسانگ، یہُودی پے اُسکیونگونی کھونگی مولکھان تانگ زادکھان گُونی گیابگال چوچیس گوزوگ۔ 17اِین نانگ حضرت عیسیٰ سی کھونگونلا مولس، ”نگے یاب خُدے توسگیون چھاگلاس زادچیسپوے، نگیانگ چواد۔“ 18یہُودی پاگونّی کھونگ سادچیسّی سونڈوس مانّگا ثانٹے چوس، چیازیرنا حضرت عیسیٰ سی یہُودی پوے شابّادّی جاگی شریعت پو چاگچیس، ماتشاد کھونگی خُدا کھونگرانگی یاب مولتے کھونگرانگ خُدے ڈانڈا تھیا زادس۔

19حضرت عیسیٰ سی کھونگونلا لانسالس، ”نگے کھیوجا لدینبا لدینبا زیرّاد، بُوژا کھورانگ چیگپوا چانگ چونیانّا مانوگ۔ یاب خُدے زادکھان کھوے تھونگکھانبو مانے بُوژے چوا مانوگ۔ یابّی چی چوا زادنانگ بُوژےانگ چوانوگ۔ 20یابّی ثاسلا چامسپا زادچیسپوے کھونگی چھاگلاس ژانگما ثاسلا ستانّا زادّانوگ۔ یابّی ایگونّی سانگ جیگسپو لاسگون ثاسلا چوچیسلا ستانّا زادِین، تینے کھیوجاگون مانّگا ہالاسین۔ 21سپیرنا کازوگ یابّی شیکھانگون سونتیا لانّگا زادتے سروک سالّاد، تینّا تسوگسلا بُوژےانگ کھورانگ تھادکھانگونلا میتشے تانگین۔ 22یابّی سوجیگّانگ شاگس مازادّا، شاگس چادچیسّی وانگ ژانگما ثاسلا سالّا زادتے این۔ 23تے وانگبو سالّا زادچیسّی گیونتشانبو نی، کازوگی یابّا می تشانگمے سیوا چواد تینّا تسوگسلا می تشانگمے ثاسلانگ سیوا تانگچیسپو اینوگ۔ ثاسلا سیوا ماچوکھانگونّی تانتانلا بُوژا کالا زادکھانّی یابّانگ سیوا ماچوا اینوگ۔

24نگے کھیوجا لدینبا لدینبا زیرّاد، نگے لونگونلا نیانتے نگا کالکھانّی خُدے کا ایمان کھیونگکھانگونلا تھامیدپے میتشے یود، یانگ کھونگونی دِیگپاگونلا چھادپا میپھوگ۔ کھونگون شیچیسنے تھارتے تھامیدپے میتشے نانّگا لیبتے اینوگ۔“

25نگے کھیوجا لدینبا لدینبا زیرّاد، توسپو لیبچیس یود ماتشاد لیب تشارتے این، نام رُوحانی تھوگنے شیکھانگونّی، خُدےبوژاے سکاد تشورین۔ یانگ تشورتے ایمان چوکھانگون سونتیا لوسین۔ 26کازوگی یابّا سروک سالچیسّی وانگ یود، تینّا تسوگسلا کھونگی ثاسلا سروک تانگچیسّی وانگبو سالّا زادتے این۔ 27کھو نی اِبنِ آدم این پاسانگ، یابّی کھوا شاگس چادچیسّی وانگچھا ستادا زادتے این۔ 28نگے زیرکھانبوا ہا مالاسشیگ، تیتوسپو لیبچیس یود، نام شیکھان تشانگمے قبرستانی نانّگا خُدےبوژاے سکادپو تشورتے 29قبرستانی گونّے بینگتے یونگین۔ لاس زانگپو چوکھانگون توسگیونّی سونتیا پھیا، یانگ نگانپا چوکھانگون تھامیدپے چھادپے پھیا لانگین۔ 30نگا نگارانّگا چانگ چو مینیان، خُدے مولکھان نانگجینلا شاگس تانّگاد، یانگ نگے شاگسگونّی ٹانگپو این چیازیرنا نگے نگارانگ تھادکھان نانگجین مانپا، نگا کالا زادکھانّی یابّی تھوگستھاد نانگجین چواد۔

حضرت عیسیٰ مسیح سکورلا گواہ۔

31حضرت عیسیٰ مسیح تارُوانگ مولس، ”کالتیس نگے نگارانگی سکورلا گواہ تانّگادنا نگے گواہ بوا جانماگون دِین میشیس۔ 32جانماجیگی نگے سکورلا گواہ سالّاد، یانگ نگا گیوسیود کھونگی نگے سکورلا سالکھانّی گواہ ٹانگپو این۔ 33کھیوجے یوحنّانیکا میگون ٹیالا کالسپا، کھونگی نگے سکورلا لدینبے گواہ تانگس۔ 34نگا میگونّی گواہ راگلاستے مید، اِین نانگ کھیوجاگونلا تھارپا تھوبچیسّی پھیا یوحنّانی سپانگپوے سکورلا شادّاد۔ 35حضرت یُوؔحنّا ٰ نی اوت لدانگشان بارین یودکھانجیگ اینپین، یانگ کھیوجاگون سکابسّتوگسشیگ تے اوت پوے لدانگسّی نانّگا دُوگستے تھادپو چوس۔ 36نگے لاگا یوحنّانی سپانگپوے سانگ جیگسپو گواہ جیگ یود، یاب خُدے نگا ڈوبچوگچیسلا ستادا زادکھانّی لاسگون نگے چوین یود یانگ تینّا لاسگون، نگا یابّی کالا زادکھانبوے گواہ این۔ 37نگا کالا زادکھانّی یابّی، نگے سکورلا گواہ سالتے این۔ کھیوجاگونّی کھونگی سونگسکاد مانے ماتشورّا یا کھونگی ییبس مانے ماجالّا اینوگ۔ 38کھونگی لون کھیوجاگونّی سنینگی نانّگا لوسّا میدوگ، چیازیرنا کھیوجاگونّی نگا خُدے کالا زادکھانبویکا دِین ماشیس۔“

39”کھیوجے ہلژخمہ شوقبُو لا ما جیبسال نیامپو لوبجونگ چوروگ، چیازیرنا کھیوجاگونّی ہلژخمہ شوقبُو گیُودتے تھامیدپے میتشے تھوبّانوگ سامدوگ۔ تینّا شوقبُو بوے نگے سکورلا گواہ تانّگانوگ۔ 40تینیانگ نگیکا ایمان چوستے تھامیدپے میتشے تھوبچیسلا کھیوجا تھادّا میدوگ۔“

41”نگا نی میگونّی ستودپا تانگچیسپوا تھادّامید، 42اِین نانگ کھیوجاگونّی سیمسّی نانّگا خُدے پھیا چامسپا میدکھانبو نگا گیوسیود۔ 43نگا نگارانگی یابّی وانگچھے نانّگا یونگنانگ کھیوجاگونّی نگا گاسوس ماچوس۔ کالتیس ژانجیگ کھورانگی وانگچھے نانّگا یونگنا کھیوجاگونّی کھوا گاسوس چوین۔ 44کھیوجاگونّی کازوگی نگیکا ایمان کھیونگین، نام کھیوجاگون چیگ تانگ چیگنے ستودپا تھوبچیسلا تھادّوگ، اِین نانگ خُدے چیگ چیگپوے ستودپا تھوبچیسپو ژالّا میدوگ۔“

45”کھیوجے ماسامشیگ یابّی سکوندونلا نگے کھیوجاگونلا سکیون کالین ۔ کھیوجاگونلا سکیون کالکھانبو کھیوجارانگی ریوا بورکھانّی حضرت مُوسیٰؔ اینوگ۔ 46کالتیس کھیوجاگونّی حضرت مُوسیٰؔ سی کا ایمان چوسپینّا، نگیکانگ ایمان چوستے یودڈو، چیازیرنا کھونگی نگے سکورلا ڈِیازادتے اینوگ۔ 47کھیوجاگونّی حضرت مُوسیٰؔ سی ڈِیا زادکھانبوا اید ماشیس پاسانگ، نگے زیرکھانگونلا کھیوجے کازوگی لدینشیسین۔“

Currently Selected:

یوہانان 5: LBJNT

Highlight

Copy