یوہانان 6

حضرت عیسیٰ مسیح می ستونگ ثنا ڈانگسشوگّا زادس۔

1جاگبانشیگی ستینگنے حضرت عیسیٰ مسیح ٹُھوزینگی نانّگا ژونّا زادتے، گلِیلی تشوے پھارکا سکیود کابوا تبریاسی تشوانگ زیرّانوگ۔ 2میتشوگس چھینموجیگ کھونّگا ڈانگستے یونگس، چیازیرنا کھونگونی حضرت عیسیٰ سی نادپا پھانچوگا زادکھانّی معجزہ تھونگتے اینپین۔ 3حضرت عیسیٰ سی ریا دزاگستے سکیودتے کھونگرانگی لوبٹوگسگون نیامپو سیکا ژوگس۔ 4یہُودی پے پیساگی توسچھین نیمو یودپین۔ 5حضرت عیسیٰ سی او ستاگس پا میتشوگس چھینمو کھونگ چھوگسلا یونگین زِیگس یانگ کھونگی فِلپُسب لا مولس، ”ای می ژانگما زالا تانگچیسّی تاگی نگاتانگی کانے نیواین۔“ 6حضرت عیسیٰ سی کھوے چی زیردوگ ستاچیسلا تیبو ٹیا زادس، چیازیرنا کھونگی چوا زادچیسپو کھونّگا تھوگیوس یودپین۔

7فِلپُسی کھونّگا زیرس، ”کالتیس جاگما نییبگیی لاچھے پینے تاگی نیونانگ اِمی ژانگمالا کھامبو ریرے تاگی میتھوب۔“

8حضرت عیسیٰ سی یانگ لوبٹوگس چیگ، حضرت شمعُوؔن حضرت پطرؔس سی نو حضرت اندرؔیاس سی کھونّگا زیرس، 9”ایکا ٹھوگوجیگی لاگا ناسّی تاگی ثنا تانگ نیا چھونگون نیس دوگ، اِین نانگ تیبوے ایزامشیگی میا چی چوین؟“

10حضرت عیسیٰ سی مولس، ”میگون سیکا دوگچوگ۔“ تیرو سپانگ سنگونپو مانگپو یودپین۔می ژانگما سیکا دُوگس، تے میتشوگسّی نانّگا بُوژا لدانکھان چیگپو ستونگ ثنا زامشیگ یودپین۔ 11حضرت عیسیٰ سی تاگی گُون چھاگّا نامس یانگ خُدا شُکر جْوس تے، دُوگستے یودکھان ژانگمالا رانگرانگی گھوسدوم نانگجین گوستے تانّگا سالس، تینّا ژوگس نیاگون نیامپو زادس۔ 12کھونگ ژانگما زوستے تشیمسّاچیگ، حضرت عیسیٰ سی لوبٹوگس گونلا مولس، ”گودلا چانگ میچھاچیسّی پھیا لاگماگون لدوستے کھیونگ۔“ 13تینے میگونّی ناسّی تاگی ثن٘ے کانے زوستے لاگما بورکھان کھونگونی لدوسپا تسیپو چوگنییس گانگ۔

14میگونّی کھونگی معجزہ بو تھونّگاچیگ، ”تانتانلا نگاتانگ ثونگستے یودکھانّی پیغمبر، اینّابو اینوگ“ زیرس۔ 15کھونگونی حضرت عیسیٰ سی زومستے وانگ نیامپو کھورانگونّی گیالپوا سکوچیسپو کھونگی کھیین پاسانگ چوبچادتے میتشوگسّی نانگنے بینگتے کھونگرانگ چیگپو ریکا دزاگستے سکیودس۔

حضرت عیسیٰ مسیح چھویکا ڈولّا زادس۔

16مونچوروبّاچیگ کھونگی لوبٹوگسگون تُھورلا بابستے تشوے چھوگسلا سکیودس، 17یانگ تشوے پھارکا کفرنحُوم مّی گیالسا لوگستے چھاچیسلا ٹُھوزینگی نانّگا جونس۔ تا مونچو روبستے یودپین۔یانگ حضرت عیسیٰ مسیح کھونگون نیامپو ماسکیودّا اینپین۔ 18ہونمیدلا گیاتشوے نانّگا لونگراگ یونگستے چھولباگ ٹاگپو لانگس۔ 19ٹُھوزینگبو تشوے تھامانے کیلومیٹار ثنا یا ڈوگ زامشیگ تھاگرینّگا لیبستے یود زانے لوبٹوگسگونّی حضرت عیسیٰ سی ٹُھوزینگ چھوگسلا چھویکا جابڈُولّا سکیودّا تھونگتے ماثانٹے جیگس۔ 20اِین نانگ حضرت عیسیٰ سی کھونگونلا بودّا زادتے مولس، ”جیگس ماجیگس نگا این۔“ 21تینے کھونگونی حضرت عیسیٰ سی ٹُھوزینگی نانّگا سکیودچوگس، کھونگونی ٹُھوزینگبو تینّامالّا انگولدوی پھارکا لیب کارُو کھونگون چھاچیس اینپین۔ 22ستینگماجاگپو تشوے پھارکا دُوگستے یودکھانّی میتشوگسپوا تیرو ٹُھوزینگ چیگ چیگ مانے میدکھان یانگ حضرت عیسیٰ سی کھونگرانگی لوبٹوگسگون نیامپو تے ٹُھوزینگی نانّگا ماسکیودکھانبو گیوسّونگ۔ 23تینے تبریاسی گیالسانے جان ٹُھوزینگ ریگ لیبستے تینّا ناسّابوا دُوگس، کارُو مسیح دونکییرّی پھیا شُکر پھولتے یانگ میتشوگسگونّی زوستے اینپین۔ 24میتشوگسّی حضرت عیسیٰ سی یا کھونگی لوبٹوگسگون تیکا میدکھانبو ہاگواچیگ، کھونگون ٹُھوزینگّونّی نانّگا ژونتے، کفرنحُوم مّی گیالسا حضرت عیسیٰ سی ژالّا سونگ۔

حضرت عیسیٰ نی ثو ک سالکھانّی دونکیر۔

25تشوے پھارکا میتشوگسلا حضرت عیسیٰ مسیح تھوبّاچیگ زیرس، ”رابّی، نیرانگ ایکا نام سکیودپین؟“

26حضرت عیسیٰ سی کھونگونلا لانسالس، ”نگے کھیوجا لدینبا لدینبا زیرّاد، کھیوجے نگے معجزہ گون ہاگوچیسپوے مانپا نگے کھیوجا زاچیسلا تاگی تانگس پاسانگ نگا ژالتے اینوگ۔ 27رولچیسچان مانپا، تھامیدپے میتشے تھوبچیسّی زان ژالچیسلا سونڈوس چوشیگ، تیبو اِبنِ آدمی کھیوجاگونلا تانگین چیازیرنا یاب خُدے تیبو تانگچیسّی وانگچھا کھوا سالّا زادتے این۔“

28کھونگونی حضرت عیسیٰ سی زیرس، ”خُدے تھوگستھاد چوگچیسلا نگاجے چی لاس ریگ چوگوس؟“

29حضرت عیسیٰ سی کھونگونلا مولس، ”خُدے تھوگستھادکھانّی لاسپو نی کھونگی کالا زادکھانبویکا ایمان چوچیسپو اینوگ۔“

30تینے کھونگونی حضرت عیسیٰ سی زیرس، ”نیرانگی چی چوا زادِین؟ نگاجے نیرانگیکا ایمان کھیونگچیسلا نیرانگی نگاجا معجزہ کازوگشیگ ستانّا زادِین؟ 31سپیرنا نگاجے اتا اپو گونّی ریستونگی نانّگا مانّا زیرکھانّی تاگی زوس، شوقبُو بوے نانّگا مولتے اینوگ، حضرت مُوسیٰؔ سی کھونگونلا نامکھانے زاچیسلا تاگی سالس۔“

32حضرت عیسیٰ سی کھونگونلا مولس، ”نگے کھیوجا لدینبا لدینبا زیرّاد، تے تاگی گُون نامکھانے کھیوجے اتا اپو گونلا حضرت مُوسیٰؔ مانپا، نگے یابّی سالّا زادتے اینپین، کھونگی نامکھانے لدینبے تاگی بو سالّا زادّانوگ۔ 33خُدے تاگی نی نامکھانے یونگستے دُنیائی می گونلا سروک سالکھانبو این۔“

34کھونگونی زیرس، ”مسیح لے، ای تاگی بو نگاجا توسگیون سالّا زاد۔“

35حضرت عیسیٰ سی کھونگونلا مولس، ”نگا نی سروک تانگکھانّی تاگی این۔ نگیکا یونگکھانگون مانے میستوگس، یانگ نگیکا ایمان چوکھانگون مانے میسکومس۔ 36اِین نانگ کازوگ نگے کھیوجاگونلا زیرپین، کھیوجاگونّی نگے لاسگون تھونگتیانگ ایمان ماچوس۔ 37یابّی نگا سالّا زادکھان ژانگما نگیکا یونگین، یانگ نگیکا یونگکھانگون نگے مانے میپھانگ۔ 38نگارانگی دودپا مانپا نگا کالا زادکھان نگے یابّی تھوگّونگسگون ڈوبچوگچیسّی پھیا نگا نامکھانے یوگا یونگسپین۔ 39نگا کالا زادکھانبوے تھوگّونگس نی، کھونگی نگا سالّا زادکھان تشانگمے نانگنے چیگّانگ ستور ماچوگّا، تھامے جاگّا کھونگون سونتیا لانگچوگچیسپو این۔ 40اونا نگے یابّی تھوگّونگس نی، بُوژا تھونگتے ایمان چوکھان ژانگمالا تھامیدپے میتشے تھوبچیس یانگ نگے کھونگون تھامے جاگّا سونتیا لانگچیسپو این۔“

41”نگا نی نامکھانے بابسکھانّی تاگی بو این“ مولچیسپوے یہُودی پاگونّی کھونگی سکورلا بوگچیس گوزوگس۔ 42کھونگونی زیرس، ”کھو چی حضرت یُوسفؔ بی بُوژا حضرت عیسیٰ سی مانوگا؟ کھوے پھاماگون نگاتانگونّی شیسّانوگ۔ تینے کھوے کازوگّا زیرّانوگ، نگا نامکھانے بابستے این؟“

43حضرت عیسیٰ سی کھونگونلا مولس، ”نگے زیرکھانگونّی سکورلا کھیوجاگونّی سکیون رجود چوچیس پھونگشیگ۔ 44سوجیگّانگ نگیکا یونگ مینیان نامتشوگپا نگا کالا زادکھانّی یابّی کھونگی کا کھیونگا میزاد، یانگ نگے کھو تھامے جاگّا سونتیا لانگین۔ 45پیغمبر گُونی ہلژخمہ شوقبُو بوے نانّگا ڈِیازادتے دوگ، خُدے کھونگ ژانگمالا لابّا زادِین#6‏:45 حضرت یسعیاہ شوقبُوئ 54‏۔ 13 یابّی لابجا نیانتے کھونگی کانے لوبسکھانّی میگون نگیکا یونگین۔ 46خُدے چھوگسنے یونگکھانبو مانپا سوجیگیانگ یاب ماجال، کھو چیگپوے یاب جالتے این۔“

47”نگے کھیوجا لدینبا لدینبا زیرّاد، نگیکا ایمان کھیونگکھانگونلا تھامیدپے میتشے تھوبتے این۔ 48نگا نی سروک تانگکھانّی تاگی بو این۔ 49کھیوجے اتا اپو گونّی ریستونگی نانّگا مانّا زیرکھانّی تاگی زوس اِین نانگ کھونگون شی۔ 50ایکا نامکھانے بابسکھانّی تاگی بو یود، ای تاگی زاکھانگون مانے میشی۔ 51اونا نگا نامکھانے بابسکھانّی سروک تانگکھانّی تاگی بو این۔ کالتیس سوجیگی ای تاگی کانے زانا، کھو تھامیدپا سونتیا لوسین۔ ای تاگی بو نگے شابو این، کا بو نگے دُنیائی می گونلا تھامیدپے میتشے تھوبچیسّی پھیا چھودپا تانگین۔“

52یہُودی پاگونّی ٹھوا زیرزیر گوزوگس یانگ کھونگونی زیرس، ”ای می بوے کازوگی نگاتانگونلا کھوے شا زا تانّگانوگ؟“

53حضرت عیسیٰ سی کھونگونلا مولس، ”نگے کھیوجا لدینبا لدینبا زیرّاد، نامتشوگپا کھیوجاگونّی اِبنِ آدمی شابو میزا، یانگ کھوے ٹھاق پو میتُھونگ کھیوجاگونّی نانّگا لدینبے سروک مید۔ 54نگے شا زوستے نگے ٹھاق تھونگکھانگونلا تھامیدپے سروک یود۔ تھامے جاگّا نگے کھونگون سونتیا لانگین، 55چیازیرنا نگے شا لدینبے زان یانگ نگے ٹھاق لدینبے تھونگچیسپو این۔ 56یانگ نگے شا زوستے نگے ٹھاق تھونگکھان گُون نگیکا یانگ نگا کھونگونی نانّگا ناستے یود۔ 57سروک سالّا زادکھانّی یاب کابوے نگا کالا زادس کھونگی جاستے نگا سونتیا این، تینّا تسوگسلا سوجیگی نگے کانے زانا نگے جاستے کھو سونتیا لوسین۔ 58نگا نامکھانے بابسکھانّی تاگی بو این۔ کھیوجے اتا اپو گون مانّا زیرکھانّی تاگی زوستے شی، اِین نانگ ای تاگی زاکھانگون تھامیدپا سونتیا لوسین۔“

59حضرت عیسیٰ سی کفرنحُوم مّی گیالسے مجلِسی نانّگا لابجا سال زانے کھونگی تیگون مولس۔

لوبٹوگس مانگپوے حضرت عیسیٰ سی سپانگس۔

60حضرت عیسیٰ مسیح جالتاگون تشورتے کھونگی لوبٹوگس مانگپوے زیرس، ”کھونگی لابجاگون ما کاگسپو دوگ سوی نیانتے تیبویکا ڈول تھوبین؟“

61لوبٹوگسگونّی حضرت عیسیٰ سی مولکھانگونّی گیابگالّا زیرگیو تانگکھانبو کھونگی کھیین پاسانگ، کھونگونلا مولس، ”نگے سپیرا زیرکھانگون کھیوجا کھاملوگ تشورّا؟ 62کالتیس کھیوجاگونّی اِبنِ آدم نامکھا ستاگّالا تھونگنا کارُو کھو سنگونلا یودپین، تینے چی سامین؟ 63خُدے رُوح بوے تھامیدپے سروک سالّانوگ، میی سونڈوس گیُودتے تیبو تھوبچیس میدکیاگ۔ نگے کھیوجا زیرکھانگون خُدے رُوح نے این یانگ سروک تانّگانوگ۔ 64تینیانگ کھیوجاگونّی ٹونے کھاچیگی نگیکا ایمان ماچوس۔“ (سوی کھونگی کا ایمان میچو یانگ سوی کھونّگا نگولوگ چوچیسپو حضرت عیسیٰ گومانے پھارلا تھوگیوس یودپین)۔ 65حضرت عیسیٰ سی مولس، ”تینّابویپھیا نگے کھیوجاگونلا زیرپین، سوجیگیانگ نگیکا ایمان کھیونگ مینیان نامتشوگپا نگے یابّی کھو نگا میسال۔“

66تیبو تشورّاچیگ کھونگی لوبٹوگس مانگپوے کھونگ پھانگستے کھونگی ستینگرانگنے ماڈانگس۔ 67تینے حضرت عیسیٰ سی لوبٹوگس چوگنییسپوا مولس، ”کھیوجاگونّانگ نگا پھانگستے چھا تھادّا راگا؟“

68شمعُوؔن حضرت پطرؔس سی زیرس، ”مسیح لے، نگاجا سویکا چھا؟ تھامیدپے سروک سالکھانّی جالتا نیرانّگا دوگ۔ 69نیرانگ خُدے چھوگسنے سکیودکھانّی ہلژخمہ اینکھانبو نگاجا ایمان یانگ گیوسیود۔“

70حضرت عیسیٰ سی لانسالس، ”کھیوجا چوگنییسپو نگے نگارانگی لوبٹوگسگا مالدامسّا؟ اِین نانگ کھیوجے ٹونے چیگ چیگ شیطان گونّی گوبے وانگی یوگا دوگ۔“ 71(کھونگی شمعُوؔن اِسکریوت پے بُوژا یہُوداؔہ سکورلا مولتے اینوگ، کھو چوگنییسّی ٹونے چیگ اینتیانگ ستینگنے حضرت عیسیٰ نگولوگ چوستے اینپین)۔

Currently Selected:

یوہانان 6: LBJNT

Highlight

Copy