یوہانان 4

حضرت عیسیٰ مسیح تانگ سامریہ ما بومو۔

1حضرت عیسیٰ مسیح غوتا سالین یوحنّانی سانگ مانّگا لوبٹوگس گیورتے دوگ زیرتے فریسی پاگونلا تشور۔ 2(نگوسمابو حضرت عیسیٰ مانپا کھونگی لوبٹوگسگونّی غوتا سالّادپین)، 3تیبو حضرت عیسیٰ تھوگیوس سکیودّاچیگ کھونگ یہُودیہ یولجونگسنے بینگتے گلِیلی یولجونگسلا لوگستے سکیودس۔

4حضرت عیسیٰ سامریہ یولجونگس گیُودتے سکیودگوسپا 5کھونگ سامریہ یولجونگسّی سیکار ڈونگکھیر، توس مانگپوے سنگونلا حضرت یعقُوبؔ ی رانگی بُوژا حضرت یُوسفؔ ا تانگسکھانّی ساکیادّی نیموا لیب۔ 6تیکا حضرت یعقُوبؔ ی چھودونگجیگ یودپین، حضرت عیسیٰ تھاگرینگنے جابڈُولّا سکیودپا تھوگنگالتے تے چھودونگی لدُونلا ژوگس، تیبو نیینگّونگ زودچیگّا اینپین۔ 7سامریہ ماجیگ چھو پھینّگالا یونگس، یانگ حضرت عیسیٰ سی تے بوموبوا مولس، ”نگا تھونگچیسلا چھو ژاپیگ سال۔“ 8(چیاجونا کھونگی لوبٹوگسگون ٹھومسلا زاچیس نیوالا سونگتے میدپین)۔

9سامریہ پا بوموبوے حضرت عیسیٰ سی زیرس، ”نیرانگ یہُودی پا یانگ نگا سامریہ ماجیگ، کازوگی نیرانگی نگا تھونگچیسلا چھو تونگ مولتے این“ (چیازیرنا یہُودی پاگونّی سامریہ پاگون نیامپو ڈیل بورّا مانوگ)۔

10حضرت عیسیٰ سی تے بوموبوا مولس، ”کالتیس کھیرانگی خُدے سکییسپو تانگ کھیورانّگا چھو تونگ زیرکھانبو شیسپینّا کھیرانگی کھوا تونگ زیرتے یودڈو، یانگ کھوے کھیورانّگا سروک تانگکھانّی چھو تانگستے یودڈو۔“

11بوموبوے زیرس، ”سپونبولے نیرانگی لاگا چھو چوچیسلا نود چانگ میدوگ، یانگ ای چھودونگبو ما کونڈو یودپا نیرانّگا سروک تانگکھانّی چھوبو کانے تھوبین۔ 12چی نیرانگ نگاجا گُونلا ای چھودونگ سالکھان نگاجے اتا اپو حضرت یعقُوبؔ ی سانگ جیگسّاجیگ اینّا؟ کھونگ، کھونگی ٹھوگوگون تانگ کھونگی سیمسچانگونّی اینّا چھودونگبوے چھو تھونگستے اینپین۔“

13حضرت عیسیٰ سی لانسالس، ”ای چھودونگنے چھو تھونگکھان گُون یانگسکیار سکومساین، 14اِین نانگ نگے تانگکھانّی چھو تھونگکھان گُون یانگسکیار مانے میسکومس۔ نگے تانگکھانّی چھوبو کھونگونی نانّگا تھامیدپے میتشیے تانگکھانّی چھومیگّا گیورین۔“

15بوموبوے زیرس، ”مسیح یانگسکیار مانے میسکومچیس تانگ ایکا چھو نینّالا یونگ میگوشیسّی پھیا جوجو تے چھوبو نگا سالّا زاد۔“

16حضرت عیسیٰ سی بوموبوا مولس، ”سونگتے رانگی ماگپا ایکا ٹھیدتے کھیونگ۔“

17بوموبوے لانتانگس، ”نگا ماگپا مید۔“

حضرت عیسیٰ سی کھوا مولس، ” کھیرانگی نگا ماگپا مید زیرکھانبو ٹانگپو اینوگ۔ 18نگوسمابو کھیورانّگا ماگپا ثنا یودپین، داگسا کھیرانگ نیامپو یودکھانبو کھیرانگی ماگپا مان۔ کھیرانگی زیرکھانبو لدینبا این۔“

19بوموبوے زیرس، ”مسیح نیرانگ پیغمبر جیگ اینچیس دوگ۔ 20نگاجا سامریہ پاگونّی، نگاجے اتا اپو گونّی چولکھانّی ای ریبویکا خُدا چولّاد، اِین نانگ کھیوجا یہُودی پاگونّی خُدا یروشالیمّی نانّگا چولگوس چیا زیرّانوگ؟“

21حضرت عیسیٰ سی مولس، ”بومو نگے زیرچیسچانبوا لدینشیس، توسپو نیمو یود، نام کھیوجاگونّی رانگی یاب خُدا ای ریبویکا یا یروشالیمّی نانّگا میچول۔ 22کھیوجا سامریہ پاگونّی چولکھانبو شیسّا میدوگ، نگاجا گُونی چولکھانبو شیسّاد چیازیرنا یہُودی پاگون گیُودتے تھارپابو یونّگانوگ۔ 23اِین نانگ تُوسپو نیمو اینوگ، ماتشاد لیب تشارتے این، نام لدینبے چولکھانگونّی یاب خُدا رُوح تانگ لدینبے نانّگا چولین، چیازیرنا ایتسوگس چولکھان گُون یابّی ژالّا زادّوگ۔ 24خُدا نی رُوح اینوگ، کھونّگا چولکھانبوے کھونّگا رُوح تانگ لدینبے تھوگنے چولگوس۔“

25بوموبوے زیرس، ”خُدے لدامّا زادکھانّی المسیح پھیبشیسچانبو نگا گیوسیود، کھونگ سکیودّاچیگ، نگاجا، چیژانگما ہاگوچوگّا زادِین۔“

26حضرت عیسیٰ سی بوموبوا مولس، ” کھیرانگ نیامپو سپیرا تانگکھان نگا تینّابو این۔“

لوبٹوگسگون لوگستے سکیودس۔

27حضرت عیسیٰ مسیح تیزوگ مول تشارّاچیگ کھونگی لوبٹوگس گون لوگستے لیب۔ حضرت عیسیٰ بوموجیگ نیامپو جالتا سالین تھونگپا کھونگون ہالاس#4‏:27 لوبٹوگسگون ہالاسکیاگ چیازیرنا حضرت عیسیٰ توسلا یہُودی پا شریعتی گیرگان سوجیگیانگ بومو نیامپو سپیرا تانّگا میدپین۔ چیازیرنا کھونگونی تیزوگ چوچیسپو نی توس گودلا تانگستے اینوگ سامّادکیاگ۔ ، اِین نانگ حضرت عیسیٰ، ”نیرانّگا چی گوسّاد؟“ یا ”چیپھیا نیرانگی تے بوموبوا جالتا سالّاد؟“ زیرتے سوینگ ماٹیس۔ 28بوموے چھوکھاربو تینیکا بورتے کھورانگی ڈونگکھیرلا بانگتانگستے سونگ یانگ میگونلا زیرس، 29”نگے میتشیے نانّگا چوسکھان ژانگما شادّا زادکھانّی میبوا ستالا یونگشیگ۔ کھونگ خُدے لدامّا زادکھانّی مسیحا اینّاہے؟“ 30میگون ڈونگکھیرنے بینگتے حضرت عیسیٰ یودسا چھوگسلا یونگس۔

31تینّا توسلا حضرت عیسیٰ لوبٹوگسگونّی کھونّگا زیرس، ”رابّی، چیتونگشیگ دونّا زاد۔“

32اِین نانگ حضرت عیسیٰ سی کھونگونلا مولس، ”نگا زاچیسّی کھارجیجیگ یود، تیبوے سکورلا کھیوجا چانگ گیوسمید۔“

33تیبو تشورّاچیگ لوبٹوگسگونّی چیگ تانگ چیگّا زیرس، ”سوجیگی کھونّگا دونتانگ کھیونگسپینّا ہے؟“

34حضرت عیسیٰ سی مولس، ”نگے کھارجیبو نی نگا کالا زادکھانّی خُدے تھوگستھادگون چوچیس تانگ کھونگی چھاگلاس گُون ڈانڈا ڈوبچوگچیسپو این۔ 35کھیوجا زیرلوجیگ میدّا، ’ستونتھوگ سمینچیسلا لزاوا ژی لوستے اینوگ؟‘ نگے کھیوجاگونلا زیرّاد، رانگرانگی میگ پھیستے ژینگّونلا ستوسشیگ، تے ستونتھوگّون تشوستے رنگابسا ران تشارتے دوگ۔ 36رنگابسا تانگکھانگونلا لاچھا گیالّا تھوبین اینوگ، یانگ میگون تھامیدپے میتشیے نانّگا کھیونگچیسپو کھونگی رنگاکھانّی کھازاسپو اینوگ۔ تینے ساون تابسکھان تانگ رنگابسا تانگکھان نییسکوا تسامشیگی سکیدپو مییونگ۔ 37ای زیرلوبو لدینبا اینوگ، ’چیگی تابین، ژانجیگی رنگین۔‘ 38نگے کھیوجاگون کھیوجے ماتابکھانّی ستونتھوگپو رنگالا کالپین۔ جانماگونّی سونڈوس ثانٹے چوس یانگ کھیوجاگونّی کھونگی سونڈوسّی ڈاسبوگون رنگاس۔“

سامریہ پاگونّی ایمان چوس۔

39تے بوموبوے، حضرت عیسیٰ مسیح نگے میتشیے نانّگا چوسکھان ژانگما شادّا زادس زیرین گواہ تانگس پاسانگ سامریہ پا مانگپوجیگی حضرت عیسیٰ یکا ایمان چوس۔ 40تینے سامریہ پاگون حضرت عیسیٰ یودسا یونگستے جوجو کھونگون نیامپو جوگسا زاد زیرتے جُووا پھولسپا، کھونگ جاگما نیس تیرو ژوگس۔ 41کھونگی لابجاگون تشورتے جانمی مانگپوجیگی ایمان کھیونگس۔ 42میگونّی تے بوموبوا زیرس، ”نگاجے کھیرانگی زیرکھانّی سپیرا تشورچیس چیگپو مانپا، نگاجا رانگی نامچھوگنے کھونگی مولکھانگون تشورچیسپوے ایمان چواد، یانگ لدینبا ای میبو دُنیائی می گونّی کھوم چُوک کھن اینکھانبو نگاجے شیسّاد۔“

حضرت عیسیٰ سی لونپوجیگی بُوژا پھانچوگا زادس۔

43جاگ نییسّی ستینگنے حضرت عیسیٰ مسیح یانگ گلِیلی یولجونگس چھوگسلا لوگستے سکیودس۔ 44(حضرت عیسیٰ سنگونلا پیغمبر سوجیگّانگ رانگیولّا سیوا مانے میتھوب مولتے اینپین) 45کھونگ گلِیل لا لیبّاچیگ، گلِیل پاگونّی کھونّگا گاسوس جْوس چیازیرنا پیساگی توسچھین زانے یروشالیمّی نانّگا حضرت عیسیٰ سی زادکھان ژانگما کھونگونی تھونگ۔

46حضرت عیسیٰ سی لان نیسپا گلِیلی یولجونگسّی کانا ڈونگکھیرلا سکیودس، کارُو کھونگی چھو رگونچھانّگا گیورچوگّا زادتے اینپین۔ کانے نیموا کفرنحُوم گیالسے نانّگا لونپوجیگی بُوژا زُومو یونگستے یودپین۔ 47لونپوا حضرت عیسیٰ یہُودیہ نے گلِیل لا لوگستے سکیودتوگ زیرتے تشورپا کھو حضرت عیسیٰ سی یودسا سونگ یانگ جوجو سکیودتے کھوے بُوژا شیکییس یودکھانبو پھانچوگا زاد زیرتے جُووا پھولس۔

48حضرت عیسیٰ سی لونپوبوا مولس، ”کھیوجاگونّی معجزہ ستاس تانگ ستاگس تھونگستے مانے ایمان میچو۔“

49لونپوبوے زیرس، ”مسیح نگے ٹھوگو شیی سانگ سنگونلا سکیودّا زادّانگ۔“

50حضرت عیسیٰ سی کھوا مولس، ”تا سونگ کھیرانگی بُوژا میشی۔“ کھوے حضرت عیسیٰ سی مولکھانبوا لدینشیس یانگ کھانگپا لوگستے چھاچیس گوزوگ۔

51کھو لامبارلا یود زانے، کھوے یوگپوگون کھوے بُوژا زُومو یونگسکھانبو گیالتے کھامزانگ گیورکھانّی ناتشول شادّالا یونگس۔ 52لونپوبوے کھوے بُوژا بُو تسام زودشیگّا گیال زیرتے ٹیسپا کھونگونی زیرس، ”تانگ دزارّے چھوتشود چیگپا زودچیگّا کھوے تشادپو میدکھان سونگ۔“ 53تینے ابابوا، تینّا توسپویکا حضرت عیسیٰ سی کھوا، ” کھیرانگی بُوژا میشی“ مولکھانبو ایدتو یونگس۔ کھو تانگ کھوے نانگتشانگس گانگپوے حضرت عیسیٰ سی یکا ایمان کھیونگس۔ 54تیبو یہُودیہ نے گلِیل لا سکیودتے حضرت عیسیٰ سی معجزہ نیسپابو زادتے اینپین۔

Currently Selected:

یوہانان 4: LBJNT

Highlight

Copy