Jovan 15

O Isus – o čačikano čokot

1“Me injum o čačikano čokot, a mloi Dad o vinogradari. 2Ov čhinela đijekh loza upra mande savi na anela bijandipe, a čistini đijekha savi anela bijandipe, sar te del više bijandipe. 3A tumen injen već čista zbog o lafi savo vaćerđum tumenđe. 4Ačhoven ana mande hem me ka ačhovav ana tumende. Sar so i loza našti te anel bijandipe korkori pestar te na ačhili upro čokot, ađahar ni tumen našti te anen bijandipe te na ačhiljen ana mande. 5Me injum o čokot, a tumen o loze. Ko ačhola ana mande hem me ano leste, ov anela but bijandipe, adalese so bizo mande našti ništa te ćeren. 6Te neko na ačhola ana mande, frdela pe avri sar i čhindi loza hem šućola, a esavken čedena hem frdena len ani jag, i tharena len. 7Te ačhona ana mande hem te mle lafija ačhona ana tumende, roden okova so mangena hem ka dobinen. 8Akavai ki slava mle Dadesiri: te anen but bijandipe hem te oven mle učenici.

9Sar so o Dad manglja man, ađahar hem me tumen mangljum. Ačhoven ano mlo mangipe. 10Te ićerđen tumen ko mle naredbe, ka ačhoven ano mlo mangipe, sar so hem me ićerđum man ko naredbe mle Dadesere, i ačhovava ano lesoro mangipe.

11Akava phenđum tumenđe te šaj mli radost ovel ana tumende hem te šaj tumari radost ovel pherdi. 12Akavai mli naredba: mangen jekh avere sar so me mangljum tumen. 13Nane po baro mangipe adalestar nego kad neko dela plo dživdipe ple amalenđe. 14A tumen injen mle amala te ćerđen okova so naredinava tumenđe. 15Na vičinava tumen više sluge, adalese so o sluga na džanel so ćerela lesoro gospodari. Akana vičinava tumen amala, adalese so mothovđum tumenđe sa so phenđa maje mlo Dad. 16Na birinđen tumen man, nego me tumen birinđum hem čhivđum tumen te džan hem te anen bijandipe, hem tumaro bijandipe te ačhol, hem te šaj o Dad te del tumen sa so ka roden ano mlo anav. 17Akava naredinava tumenđe: Mangen jekh avere!”

O sveto mrzini e Isusesere učenikonen

18“Te o sveto mrzini tumen, džanen da man mrzinđa angleder tumendar. 19Te oven ine akale svetostar, o sveto ka mangel tumen ine. Ali, adalese so na injen akale svetostar, nego me izabirinđum tumen olestar, zbog adalese o sveto mrzini tumen. 20Setinen tumen mle lafendar so phenđum tumenđe: ‘O sluga nane po baro ple gospodarestar.’ Te man progoninde, ka progoninen hem tumen. Te ićerde pe ko mlo Lafi, ka ićeren pe hem ko tumaro. 21A sa adava ka ćeren protiv tumende zbog mlo anav, adalese so na džanen Okole kova man bičhalđa. 22Te na avav hem te na vaćerav lenđe ine, naka oven ine kriva zako greh. Ali akana nane len izgovor zako pumaro greh. 23Ko mrzini man, mrzini hem mle Dade. 24Te na ćerav ine delja maškar olende save niko aver na ćerđa, naka oven ine kriva zako greh. A on dikhle o delja save ćerđum, a palem zamrzinde hem man hem mle Dade. 25Ali, valjani te pherđol okova soi pisime ano lengoro Zakoni: ‘Mrzinde man bizo razlog.’

26A kad ka avel o Zastupniko, kole ka bičhalav tumenđe e Dadestar – o Duho e čačipnasoro kova avela e Dadestar – ov ka svedočini mandar. 27A hem tumen ka svedočinen, adalese so taro početak injen mancar.”

Currently Selected:

Jovan 15: RAB

Highlight

Copy