Jovan 14
14
O Isusi o drom đi o Dad
1I o Isus phenđa: “Ma te uznemirinen pe tumare vile. Verujinen ano Devel hem verujinen ana mande. 2Ano čher mle Dadesoro isi but thana bešibnase. Te na ovel ine ađahar, naka phenav tumenđe ine: ‘Džava te pripreminav tumenđe than.’ 3A kad ka džav hem kad ka pripreminav tumenđe than, ka avav palem hem ka lav tumen mancar, te oven hem tumen adari kaj me injum. 4A tumen džanena o drom kaj me džava.”
5O Toma phenđa lese: “Gospode, na džanaja kaj džaja. Sar onda šaj te džana o drom?”
6A o Isus phenđa lese: “Me injum o Drom, o Čačipe hem o Dživdipe. Nijekh na avela koro Dad, sem prekala mande. 7Te pendžarđen man, ka pendžaren hem mle Dade. Od akana pendžarena le, hem dikhljen le.”
8O Filip phenđa lese: “Gospode, mothov amenđe e Dade, hem adava ka ovel amenđe dovoljno.”
9O Isus phenđa lese: “Edobor vreme injum tumencar, a tu man, Filipe, pana na pendžareja! Ko dikhlja man, dikhlja hem e Dade. Sar šaj te phene: ‘Mothov amenđe e Dade’? 10Tu li na verujineja da me injum ano Dad hem dai o Dad ana mande? O lafija save vaćerava tumenđe na vaćerava korkoro mandar, nego o Dad, kova živini ana mande, ćerela ple ćeriba prekala mande. 11Verujinen maje da injum ano Dad hem dai o Dad ana mande. A te na verujinena maje, verujinen zbog o ćeriba save ćerava. 12Čače, čače vaćerava tumenđe: ko verujini ana mande, ka ćerel o ćeriba save me ćerava. Ka ćerel hem po bare, adalese so me džava koro Dad. 13Hem sa so ka roden ano mlo anav, me ka ćerav adava, te šaj o Dad proslavini pe ano Čhavo. 14Sa so ka roden ano mlo anav, me ka ćerav.”
O Isus vaćeri da ka bičhali e Svetone Duho
15“Te mangena man, ka ićeren mle naredbe. 16A me ka molinav e Dade hem ov ka del tumen avere Zastupniko, te ovel tumencar zauvek: 17e Duho e čačipnasere, kole o sveto našti primini, adalese so na dikhela le hem na pendžarela le. Tumen pendžarena le, adalese soi tumencar hem ka ovel ana tumende. 18Naka ačhavav tumen sar čhavoren bizo dad hem bizi daj. Palem ka avav kora tumende. 19Pana hari, hem o sveto više naka dikhel man, ali tumen ka dikhen man. Adalese so me živinava, hem tumen ka živinen. 20Adava dive ka haljoven da me injum ano mlo Dad hem da tumen injen ana mande, a me ana tumende. 21Ko prihvatini mle naredbe hem ićeri len, ov mangela man, a ko mangela man, ole ka mangel hem mlo Dad. A hem me ka mangav le hem ka mothovav man lese.”
22O Juda (na o Iskariot) pučlja le: “Gospode, sar adava da ka mothove tut amenđe, a na e svetose?”
23O Isus phenđa lese: “Te neko mangela man, ka ićeri mlo Lafi, hem mlo Dad ka mangel le. Mlo Dad hem me ka ava koro leste hem ka ačhova koro leste. 24Ko na mangela man, na ićeri mlo Lafi. A o Lafi savo šunena nane mlo, nego avela e Dadestar, kova bičhalđa man.
25Adava phenđum tumenđe akana, sar pana injum tumencar. 26A o Zastupniko, o Sveto Duho, kole o Dad ka bičhali te zastupini man, ka sikaj tumen sa hem ka podsetini tumen ko sa so phenđum tumenđe.
27Ačhavava tumenđe mir, mlo mir dava tumen. Ali, na dava tumen ole ađahar sar o sveto so dela. Ma te uznemirinen pe tumare vile hem ma te daran. 28Šunđen man so phenđum: ‘Džava hem ka irinav man kora tumende.’ Te mangena man, ka radujinen tumen ine so džava koro Dad, adalese soi o Dad po baro mandar.
29Adava phenđum tumenđe akana, angleder nego so ka ovel, te verujinen kad ka ovel adava. 30Naka vaćerav pana but tumencar, adalese so avela o vladari akale svetosoro. Ole nane vlast upra mande, 31ali sar te šaj o sveto dodžanel da me mangava e Dade, ćerava ađahar sar so o Dad naredinđa maje.
Ušten, hajde akatar!”
Currently Selected:
Jovan 14: RAB
Highlight
Share
Copy
Want to have your highlights saved across all your devices? Sign up or sign in
