Jovan 16
16
1I o Isus phenđa: “Adava phenđum tumenđe te na otperen oti vera. 2Ka ikalen tumen oti sinagoga, a ka avel o vreme kad, đijekh kova ka mudari tumen, ka mislini da adaleja služini e Devlese. 3A adava ka ćeren adalese so na pendžarena ni mle Dade ni man. 4Adava vaćerđum tumenđe, kad ka avel adava vreme, te setinen tumen mle lafendar. Na vaćerđum tumenđe akava ko početak, adalese so injumle tumencar.”
O Isus vaćeri e Svetone Duhostar
5“Ali akana džava Okoleste kova bičhalđa man, a nijekh tumendar na pučela man: ‘Kaj džaja?’ 6Nego, adalese so adava phenđum tumenđe, i žal pherđa tumare vile. 7Ali vaćerava tumenđe o čačipe: po šukari tumenđe me te džav. Adalese so, te na dželjum, naka avel tumenđe o Zastupniko. Ali te dželjum, ka bičhalav le tumende. 8A kad ov ka avel, ka mothoj e manušenđe soi čače o greh, i pravednost hem o sudo. 9So tičini pe oto greh, adalese so na verujinena ana mande. 10So tičini pe oti pravednost, adalese so džava koro Dad hem naka dikhen man više. 11So tičini pe oto sudo, adalese soi o vladari akale svetosoro već osudime.
12Pana but so isi man te phenav tumenđe, ali adava naka šaj ine akana te akharen. 13Ali, kad ka avel ov, o Duho e čačipnasoro, ka legari tumen ano sa o čačipe. Ov naka vaćeri korkoro pestar, nego ka vaćeri samo okova so šunela, hem ka vaćeri tumenđe okova so ka ovel. 14Ov ka proslavini man, adalese so mandar ka primini hem tumenđe ka vaćeri. 15Sa so isi mle Dade, mloi. Adalese phenđum tumenđe da mandar ka primini hem tumenđe ka vaćeri.
16Pana hari, hem naka dikhen man više, a onda pana hari, i ka dikhen man.”
I žalost ka irini pe ani radost
17Tegani nesave lesere učenikonendar pučle jekh avere: “Soi adava so phenela amenđe: ‘Pana hari, hem naka dikhen man, a onda pana hari, i ka dikhen man’, hem: ‘Adalese so džava koro Dad’?”
18I phende: “So mislini adaleja kad phenela: ‘Pana hari’? Na džanaja sostar vaćeri.”
19A o Isus džanđa so mangle te pučen le, hem phenđa lenđe: “Pučena tumen maškara tumende so značini adava so phenđum: ‘Pana hari, hem naka dikhen man, a onda pana hari, i ka dikhen man’? 20Čače, čače vaćerava tumenđe: Ka roven hem ka tugujinen, a o sveto ka radujini pe. Ka oven žalosna, ali tumari žalost ka irini pe ani radost. 21Ano dukhai i đuvli kad bijani, adalese so alo lakoro vreme, ali kad bijanđola o čhavoro, radosnoi adalese so anđa e čhavore ko sveto, i bistrela upro pharipa save nakhavđa. 22Ađahar hem tumen akana injen žalosna, ali me palem ka dikhav tumen hem tumare vile ka radujinen pe, hem niko naka šaj te lel tumendar adaja radost. 23Hem adava dive ništa više naka pučen man. Čače, čače vaćerava tumenđe: sa so ka roden mle Dadestar ano mlo anav, ka del tumen. 24Đi akana ništa na rodinđen ano mlo anav. Roden hem ka dobinen – te šaj tumari radost ovel pherdi.”
O Isus pobedinđa e sveto
25“Akava vaćerđum tumenđe ano priče. Avela o vreme kad više naka vaćerav tumenđe ano priče, nego phravdeste ka vaćerav tumenđe e Dadestar. 26Adava dive ka roden e Dadestar maje ano anav. Na phenava tumenđe da me ka molinav mle Dade tumenđe, 27adalese so hem korkoro o Dad mangela tumen adalese so tumen mangljen man hem poverujinđen da aljum e Devlestar. 28E Dadestar ikliljum hem aljum ko sveto. Akana ačhavava o sveto hem džava mle Dadeste.”
29Tegani lesere učenici phende: “Ače, akana vaćereja amenđe phravdeste, bizo te vaćere ano priče. 30Akana džanaja da sa džane hem na valjani neko te pučel tut nešto, adalese so sa angleder džane. Adalese verujinaja da aljan e Devlestar.”
31A o Isus phenđa lenđe: “Akana li verujinena? 32Ače, avela o vreme – hem već alo – kad sare ka našen đijekh pese ki strana, a man ka ačhaven korkore. Ali me na injum korkoro, adalese soi o Dad mancar. 33Akava phenđum tumenđe te šaj ovel tumen mir ana mande. Ano sveto ka ovel tumen nevolja, ali tumen oven zorale – me pobedinđum e sveto.”
Currently Selected:
Jovan 16: RAB
Highlight
Share
Copy
Want to have your highlights saved across all your devices? Sign up or sign in
