John 21

De hakide gi togohidu dangada agoago

1Dua mee laa, gai Iesu ne hakide ange hogi gi hanu ana dangada agoago i gaogao de Vai o Tiberias. Deenei dono hai ne hakide ange ai gi gilaadeu. 2Dahi laangi gai Simon Peter, ma Thomas (e hagaingoo ange laa hogi go Didymus#21.2 Didymus i muna Greek e bei go de Maasanga.), ma Nathanael, taane Cana i Galilee, ma luu dama daane a Zebedee, aama e dogolua ange dangada agoago, e nnoho i dahi mommee. 3Gai Simon Peter ne hai ange gi gilaadeu, “Au ga hano nei e haangoda.” Gai gilaadeu ga hai ange gi de ia, “Gimaadeu e hulo hogi madali goe.” Gai gilaadeu ga hulo ga kage i dahi boose ga hulo ai. Gai gilaadeu tee hagalau i de boo laa.#Luke 5.5

4Taiao age, gai Iesu ne hano ga duu i honga gelegele i gaogao tai, gai ana dangada agoago tee madea e gilaadeu ia.

5Gai Iesu ga hagahi gilaadeu ga hai ange, “Denga gauligi, gu hanu naa oodou mamu ne mau?”

Gai gilaadeu ga hai ange gi de ia, “Tigi ai donu.”

6Ia ne hai ange gi gilaadeu, “Dilia doodou galauna gi de baasi madau o de boose gi maua ai e goodou hanu manu.” Gai de masavaa huu alaadeu ne tili ai delaadeu galauna gi de baasi madau, gai gilaadeu gu dee maua i de hhudi age delaadeu galauna, i hiidinga gu honu baabaa i de mamu.#Luke 5.6

7Gai tangada agoago o Iesu e aloha ai laa, ga hai ange gi Peter, “Go Tagi Maolunga deelaa!” Gai ga langona huu e Peter bolo go Tagi Maolunga deelaa, gai ia ga ahe ange ga saabini ia i dono malo laa daha, (go hiidinga ia gu lava i de hagaui ono malo,) gai ia ga lele gi lo te vai ga kau age. 8Gai denga dangada agoago ange laa ne loadu i de boose i ono dua, ga dada adu delaadeu galauna, gu honu laa i de mamu ga loage ai, go hiidinga gilaadeu e dee mmao donu i de henua, agu made se lualau sugilima mai i de henua. 9Gai ga tae age huu gilaadeu gi de henua, gai gilaadeu gu gidee dahi maga ahi i kilaa gai hanu mamu e dunu i ono elunga, madali hanu pelaoaa.

10Gai Iesu ga hai ange gi gilaadeu, “Gaamai hanu oodou mamu ne mau naa.”

11Gai Simon Peter ga gage age ange gi lo te boose ga dada age de galauna gi gabugabu tai. Gai gu honu baabaa i denga mamu nnui, se 153 mamu laa alodahi. Aagai delaadeu galauna tee masae donu, e dee galemu donu de lagolago alaadeu mamu ne mau. 12Gai Iesu ga hai ange gi gilaadeu, “Goodou loomai gaimee.” Gai teai donu se gilaadeu ne maua i de ssili ange gi de ia, “Go koe goai?” Gai gilaadeu gu iloo donu bolo go Tagi Maolunga deelaa. 13Gai Iesu ne humai, ga poo denga pelaoaa laa ga gaavange gi gilaadeu, ia ne gaavange hogi gi gilaadeu denga mamu laa. 14Deenei tolu hanonga o Iesu ne hakide ange ai gi ana dangada agoago i dua dono mouli age.

Iesu ma Peter

15Gai ga lava huu olaadeu gaimee, gai Iesu ga ssili ange gi Simon Peter, “Simon tama daane a John, koe e kii ange doo aloha i de au i de gau ange nei?”

Peter ne hai ange, “Uaa, Tagi Maolunga; koe e iloo bolo au e aloha i de goe.”

Iesu ne hai ange gi de ia, “Diiloo haangai ina ange agu ssiibi gauligi.”

16Ia ne ssili ange hogi i de lua hanonga, “Peter, tama daane a John, koe e aloha abodonu i de au?”

Peter ne hai ange, “Uaa, Tagi Maolunga, koe e iloo bolo au e aloha i de goe.”

Iesu ne hai ange gi de ia, “Diiloo ange agu ssiibi.”

17Ia ne ssili ange hogi gi Peter i tolu hanonga, “Simon, tama daane a John, koe e aloha i de au?”

Gai Peter gu daemaha ono lodo, i hiidinga gu dolu hanonga aana ne ssili ange ai gi de ia, “Koe e aloha i de au?” Gai ia ga hai ange gi de ia, “Tagi Maolunga, koe e iloo mee alodahi; koe e iloo bolo au e aloha i de goe.”

Iesu ne hai ange gi de ia, “Diiloo haangai ina ange agu ssiibi. 18Ni muna abodonu, ni muna abodonu aagu e hai adu nei gi de goe, doo masavaa e dama daane ai, gai koe e nnoa doo ungaalodo i doo beele, ga hano be go hee oou e lodo e hano aagena. Gai doo masavaa naa huu e madumadua ai, gai koe e haalo naa luoo lima, gai dahi dangada gee ga nnoa doo ungaalodo i de beele, ga dagi goe gi de mommee oou e dee lodo e hano aagena.” 19(Iesu ne tala muna nei e hagaago mai ai de hai o Peter e magau ai, gai ia ga hagamahamaha ai de Maadua.) Dua de mee nei gai Iesu ga hai ange gi Peter, “Daudali mai i de au.”

Iesu ma de agoago oona e aloha ai laa

20Gai Peter ne huli dua gu gidee e ia tangada agoago o Iesu e aloha ai laa e daudali ange i gilaau. (Deenei tangada e noho laa i gaogao o Iesu i de masavaa alaadeu ne gaimee ai, go ia ne siilia ange laa, “Tagi Maolunga, goai gu dai gaavange goe?”)#John 13.25 21De masavaa huu a Peter ne gidee ai tangada agoago laa, gai ia ga ssili ange gi Iesu, “Tagi Maolunga, gai taane nei?”

22Iesu ne hai ange gi de ia, “Noo au e lodo taane naa gi mouli ga dae ai gi dogu ahe mai, gai ni aha aau e hai ai? Koe daudali mai donu huu i de au!” 23Gai muna nei gu dele i magavaa o denga daina bolo tangada agoago laa e dee magau naa donu. Gai Iesu tee hagadaba loo bolo ia e dee magau, aagai ne hagadaba, “Noo au e lodo ia gi mouli ga dae ai gi dogu ahe mai, gai ni aha aau e hai ai?”

24Deenei tangada agoago ne daalaa hagadonu ma de sisi ga daohi mee nei. Gai gidaadeu e iloo bolo ana mee ne tala hagadonu ni muna abodonu.

25Gai ne lagolago ange donu hegau a Iesu ne hai. Gai noo ne sisi mee nei alodahi, gai au e hagadaba bolo henua i lalo e dee maua gi oo ai beebaa e sisi ai mee nei.

Currently Selected:

John 21: DBD

Highlight

Copy