John 20

De mouli age

(Mat 28.1-8; Mark 16.1-8; Luke 24.1-12)

1Gai tahi laangi huu o de uvigi,#20.1 tahi laangi huu o de uvigi e bei go de laangi dabu. gai Mary Magdalene ne hano gi taanunga i boo taiao donu huu, i de masavaa goi gohugohu ai de mee. Gai ia gu gidee bolo de hadu i ma te haitoga gu lava i de hagadige gee. 2Gai ia ga savini ga hano gi daho Simon Peter, ma dahi dangada agoago ange laa, go de ia o Iesu e aloha ai laa, ga hai ange gi gilaau, “Gilaadeu gu kave gee de angaanga o Tagi Maolunga i lo te daanunga laa, gai gimaadeu e dee iloo be go hee alaadeu ne kave aagena.”

3Gai Peter madali tangada agoago ange laa ne ssao e hulo gi taanunga. 4Gai gilaau ngaadahi ne saavini ga hulo ai, aagai go tangada agoago ange laa ne savini i mua o Peter ga dae gi taanunga i mua. 5Gai ia ga hagatugu iho ga tilo lo te daanunga, gai ia gu gidee denga dalaa malo linen e dagodo i kilaa, aagai ia tee ulu gi lodo. 6Gai Simon Peter gu dae mai i ono dua ga ulu gi lo te daanunga; gai ia gu gidee denga dalaa malo laa e daakodo i kilaa, 7gai de malo ne saabini ai laa de biho e vvae gee ma denga dalaa malo laa, gai gu hhedu ma e dugu i dahi mommee gee. 8Muli mai gai tangada agoago ne dae laa gi taanunga i mua, ne ulu hogi gi lodo. Gai ia gu gidee ma de hagadonusia. 9De masavaa laa gai gilaau tigi tonu ange gi muna a de Beebaa Dabu gu tala laa bolo ia e mouli age naa donu mai i de magau. 10Gai luu dangada agoago laa ga aahe gi olaau hale.

De hakide ange o Iesu gi Mary Magdalene

(Mat 28.9-10; Mark 16.9-11)

11Gai Mary ne duu ga dangi i gaogao taanunga laa, gai ia ne hagatugu iho ga tilo lo te daanunga i de masavaa oona e dangi ai; 12gai ia ne gidee e dogolua dangada de langi e kahu i malo tea, gilaau e nnoho i de mommee ne hagadagodo ai laa de angaanga o Iesu, dahi i ulu gai dahi i vae.

13Gai gilaau ne ssili ange gi de hine laa, “De hine, gu aha gu dangi ai naa goe?”

Ia ne hai ange gi gilaau, “Go hiidinga gilaadeu gu kave gee dogu Dagi Maolunga, gai au e dee iloo be go hee alaadeu ne kave ga dugu ai.” 14Dua dana tala muna nei, gai ia ga huli dua gu gidee e ia Iesu e duu i kilaa, gai ia tee iloo bolo go Iesu deelaa.

15Gai Iesu ga hai ange gi de ia, “De hine, gu aha gu dangi ai naa goe? Gai goai aau e ssala naa?”

Gai Mary e hai bolo ia se dangada hai veelenga, gai ia ga hai ange gi de ia, “Tangada aamua, noo go koe ne gaavee gee dono angaanga, gai koe daalaa mai be go hee aau ne kave ia ga dugu ai, gai au ga hano e kave.”

16Iesu ne hai ange, “Mary.”

Gai de hine laa ga huli dua ga hai ange i muna Aramaic, “Rabboni!” (e bei “Tangada Agoago”).

17Iesu ne hai ange gi de ia, “Aude poo mai gi de au, i hiidinga au tigi ahe age gi daho Tamana. Aagai koe hannoo gi daho ogu daina hai ange gi gilaadeu, ‘Au e hanage naa gi daho dogu Damana gai go doodou Damana, ma daho dogu Maadua, gai go doodou Maadua hogi.’ ”

18Gai Mary Magdalene ga hano ga hai ange gi denga dangada agoago, “Au gu gidee Tagi Maolunga!” Gai ia ga tala ange gi gilaadeu ana muna ne tala ange gi de ia.

De hakide ange o Iesu gi ana dangada agoago

(Mat 28.16-20; Mark 16.14-18; Luke 24.36-49)

19Gai de ahiahi laa go de ahiahi o tahi laangi o de uvigi,#20.19 tahi laangi o de uvigi e bei go de laangi dabu. gai denga dangada agoago gu hagamakaga delaadeu abaaba ma e nnoho ai, i hiidinga delaadeu maatagu i de gau Ssuu. Gai Iesu ga humai ga duu i olaadeu magavaa ga hai ange gi gilaadeu, “De baba gi dagodo i oodou daha.” 20Gai ga lava huu i dana tala ange muna nei, gai ia ga hagaago ange luoono lima ma dono gaogao gi gilaadeu. Gai ana dangada agoago gu malangilangi mmao i delaadeu gidee Tagi Maolunga.

21Gai Iesu ga hai ange hogi gi gilaadeu, “De baba gi dagodo i oodou daha. Tamana ne hai au gi humai, gai au e hai naa hogi goodou gi hulo.” 22Ga lava huu i dana tala muna nei, gai ia ga manava ange i olaadeu elunga, ga hai ange gi gilaadeu, “Goodou gaavee de Hagasaalunga Dabu. 23Noo goodou e tala haisala o dangada, gai olaadeu haisala gu maatala donu; gai noo goodou e dee tala haisala o dangada, gai olaadeu haisala e dee maatala donu.” #Mat 16.19; 18.18

Iesu ma Thomas

24Gai Thomas (e hagaingoo ange laa hogi go Didymus#20.24 Didymus i muna Greek e bei go de Maasanga.), go dahi i magavaa o tinoangahulu ma dogolua, e dee noho madali gilaadeu i de masavaa o Iesu ne humai ai. 25Deelaa ai, denga dangada agoago ange laa ne tala ange ga hai ange, “Gimaadeu gu gidee Tagi Maolunga.”

Gai ia ga hai ange gi gilaadeu, “Noo au e dee gidee denga duulanga o denga neele i lodo luoono alohi lima, ma de poo ange gi denga duulanga a neele laa, aama de velo ange dogu lima gi de haonga i dono gaogao, gai au e dee hagadonusia donu.”

26Gai dua huu e valu laangi, gai denga dangada agoago gu nnoho hogi i de hale, gai Thomas gu noho madali gilaadeu. Gai denga abaaba gu pono, aagai Iesu ga humai ga duu i olaadeu magavaa, ga hai ange, “De baba gi dagodo i oodou daha.” 27Gai ia ga hai ange gi Thomas, “Dugua mai doo madannia gi kinei, gai galo ange diiloo luoogu lima. Haalo ina mai doo lima mage dugua ange gi dogu gaogao. Aude lua lodo gai hagadonusia.”

28Thomas ne hai ange gi de ia, “Dogu Dagi Maolunga, gai go dogu Maadua!”

29Iesu ne hai ange gi de ia, “Koe ne hagadonusia donu huu i hiidinga koe gu gidee au. E manuuia tangada tigi gidee gai e hagadonusia!”

Hiidinga ne sisi ai de beebaa nei

30Gai ne lagolago mee hagalele mouli a Iesu ne hai i madamada o ana dangada agoago, tee sisi i lo te beebaa nei. 31Aagai mee nei ne sisi gi hagadonusia ai e goodou, bolo Iesu go de Klisdo donu, go Tama Daane a de Maadua, gai gi maua ai e goodou de mouli i doodou hagadonusia ia.

Currently Selected:

John 20: DBD

Highlight

Copy