John 19

De hagamodu muna o Iesu e daudau i de laagau lui

1Gai Pilate ne hai gi hagailiilia Iesu. 2Gai denga daane hebagi ne bini dahi hau manu duiduia ga hagauda ange gi honga dono biho, ma de hakahu ange ia i dahi malo purple. 3Gai gilaadeu ne loomai, ga hai ange, “De laangi danuaa, de hodooligi o de gau Ssuu!” Gai gilaadeu ga hagailiili luoono mada.

4Gai Pilate ga sao ange hogi gi duaahaho ga hai ange gi de gau Ssuu, “Tilo, au ga hagasao mai nei ia e gaavadu gi goodou, gai goodou gi iloo bolo au tee gidee donu dahi haisala daudahi i ono daha.” 5Gai de masavaa huu o Iesu ne sao mai ai, gai ia gu hagauda de hau duiduia ma de gahu i de malo purple. Gai Pilate ga hai ange gi gilaadeu, “Tilo, deenei taane!”

6De masavaa huu a de gau haimeedabu maolunga ma de gau hagaloosi ne gidee ai ia, gai gilaadeu ga hevaalogi, ga hagataba, “Daudau ina ia i de laagau lui, daudau ina ia i de laagau lui!”

Pilate ne hai ange gi gilaadeu, “Goodou gaavee ia daudau ina i de laagau lui, gai au tee gidee donu dahi haisala daudahi i ono daha.”

7De gau Ssuu ne hai ange gi de ia, “E dahi amaadeu hainga, gai de hainga laa gu hagamodu bolo ia e magau, i hiidinga ia e hagadaba bolo ia go Tama Daane a de Maadua.”

8De masavaa huu a Pilate ne langona ai muna laa, gai ia gu kii ange donu dono madagu; 9gai ia ga ulu ange hogi gi lo te hale ga ssili ange gi Iesu, “Go hee oou ne humai ai?” Gai Iesu tee basa ange donu. 10Pilate ne hai ange gi de ia, “Koe e dee lodo e basa mai gi de au? Koe e dee iloo laa bolo e dahi ogu sauaa e hagaola ai goe aabe go de daudau goe i de laagau lui?”

11Iesu ne hai ange gi de ia, “E deai donu soo sauaa noo e dee gaavadu gi de goe mai i lunga. Deelaa ai, tangada ne gaavadu au gi de goe e kii ange dono haisala i de goe.”

12De masavaa laa gai Pilate gu hagatale de hagaola ai Iesu, aagai de gau Ssuu ne hevaalogi ga hai ange, “Noo koe e hagaola taane nei, gai koe e dee se soa niio Caesar; tangada e hagadaba bolo ia se hodooligi e hai baasi ange donu gi Caesar.”

13Gai ga langona huu e Pilate muna laa, gai ia ga hagasao mai Iesu ma de noho i honga dono seaa hagamodu muna, i de mommee e hagaingoo ange go de Mommee e Hola i Hadu Malali (gai muna Aramaic go Gabbatha). 14Gai de laangi laa go de laangi e hagadabena ai Taonga Hagasili; agu made gu daa tuele.#19.14 tuele: de Beebaa Greek e hai ange go de ono aoaa.

Gai Pilate ga hai ange gi de gau Ssuu, “Tilo, deenei doodou Hodooligi!”

15Gai gilaadeu ga hevaalogi ga hai ange, “Gaavee gee ia, gaavee gee ia, daudau ina ia i de laagau lui!”

Pilate ne ssili ange gi gilaadeu, “Goodou e llodo au gi daudaulia doodou Hodooligi i de laagau lui?”

Gai de gau haimeedabu maolunga ga hai ange, “E deai ange donu semaadeu hodooligi, go Caesar donu huu.”

16Gai Pilate ga gaavange Iesu gilaadeu gi gaavee gi daudau ina i de laagau lui.

De daudau o Iesu i de laagau lui

(Mat 27.32-44; Mark 15.21-32; Luke 23.26-43)

Deelaa ai, gilaadeu ne dagi Iesu ga kave, 17gai ia ne saabai dono laagau lui ga hano ai, gi de mommee e hagaingoo ange laa go de Mommee o de Ivi o de Biho, gai muna Aramaic e hai ange bolo go Golgotha. 18Gai gilaadeu ne daudau ia i kilaa madali e dogolua daane, dahi i dono baasi madau, gai dahi i dono baasi masui, gai Iesu i olaau magavaa.

19Gai Pilate ne sisi dahi mee ga hagapigi age gi ulu de laagau lui, e hai ange, “Iesu taane Nazareth, de Hodooligi o de gau Ssuu.” 20Ne soa dangada Ssuu ne daulia muna laa, go hiidinga de mommee o Iesu ne daudau ai laa e baa ange gi de aduhale; gai muna laa e sisi i muna Aramaic, ma muna Latin aama muna Greek. 21Gai de gau haimeedabu maolunga o de gau Ssuu ga hai ange gi Pilate, “Aude siia ange ‘de Hodooligi o de gau Ssuu’, gai siia ange bolo taane nei e hagadaba bolo ia go de Hodooligi o de gau Ssuu.”

22Pilate ne hai ange, “Mee aagu gu lava i de sisi, e dugu bei dagu hai gu sisi ai.”

23Gai ga lava huu de daudau a denga daane hebagi Iesu i de laagau lui, gai gilaadeu ga kave ono malo ga vvae haa, dahi gilaadeu ne kave dahi, gai dono malo laa lodo e doe. De malo laa ne llanga mai i de ulu ga dae ai gi de bido i lalo, gai e buni donu huu.

24Gai gilaadeu ga hagataba, “Gidaadeu e dee ssae de malo nei. Gai gidaadeu ga dada e tilo ai be goai e gaavee de malo nei.”

De mee nei ne hai e hagassula ai muna a de Beebaa Dabu,

“Gilaadeu ne vaevae ogu malo i olaadeu magavaa,

ma de dada e tilo ai be goai e gaavee dogu malo.” #Psa 22.18

Aanei mee a denga daane hebagi ne hai.

25Gai dono dinana e duu i de baasi gee o de laagau lui o Iesu, ma taina o dono dinana, ma Mary de bodu o Clopas, aama Mary Magdalene. 26Gai ga gidee huu e Iesu dono dinana, ma tangada agoago oona e aloha ai laa e tuu i ono gaogao, gai ia ga hai ange gi dono dinana, “De hine, deenei dau dama daane!” 27Gai ia ne hai ange gi tangada agoago laa, “Tilo, deenei doo dinana!” Mai i de masavaa laa gai tangada agoago laa ne kave de hine laa gi noho i dono hale.

De magau o Iesu

(Mat 27.45-56; Mark 15.33-41; Luke 23.44-49)

28Dua mee laa, gai Iesu gu iloo bolo mee alodahi gu lava, gai gi hagassula ai muna a de Beebaa Dabu, gai Iesu ga hagadaba, “Au gu hieunu.” #Psa 69.21; 22.15 29Gai e dahi ssaa iai hanu uvaini mmala e duu i kilaa. Gai gilaadeu ne hai dahi laagau hyssop, ga velo age ai dahi galagala iai uvaini mmala ga daohi ange gi dono ngudu. 30Gai ga lava huu i dana unu mee laa, gai Iesu ga hagadaba, “Gu lava.” Gai ia ga ino iho dono biho ga dugu gi hano dono hagasaalunga.

De velo de gaogao o Iesu

31De laangi laa se laangi hagadabena, gai de laangi i ono dua se Sabbath maolunga. Gai dagi o de gau Ssuu ne dangidangi ange gi Pilate gi hadihadia vae o de gau laa, go hiidinga gilaadeu e dee llodo hanu dangada maakau gi daudau i honga denga laagau lui i de laangi o Sabbath. 32Gai denga daane hebagi ne loomai e hadihadi vae o tahi daane ne daudau madali Iesu aama taane ange laa. 33Aagai ga loomai huu gilaadeu e hadihadi luu vae o Iesu, gai gilaadeu gu gide bolo ia gu magau. Deelaa ai, gilaadeu tee hadihadi luoono vae. 34Aagai dahi daane hebagi ga velo dono gaogao i tao, gai gu ssali mai ai dodo ma vai. 35Gai taane ne gidee mee nei ne tala hagadonu mee nei, gai ana muna ni muna abodonu. Gai ia e iloo bolo ia e tala de muna abodonu, gi hagadonusia ai e goodou. 36Gai mee nei ne hai e hagassula ai muna a de Beebaa Dabu, “E deai donu sono ivi daudahi e hadi.” #Exo 12.46; Num 9.12; Psa 34.20 37Gai e hai ange hogi i dahi mommee, “Gilaadeu e gidee naa de ia alaadeu ne velo laa.” #Zec 12.10; Rev 1.7

De danu o Iesu

(Mat 27.57-61; Mark 15.42-47; Luke 23.50-56)

38Dua mee nei gai Joseph taane Arimathea ne dangidangi ange gi Pilate i de angaanga o Iesu. Joseph go dahi dangada agoago a Iesu, aagai ia tigi tala i hiidinga ia e madagu i de gau Ssuu. Gai Pilate ne dugu ange, gai ia ga kave gee dono angaanga. 39Taane hogi go Nicodemus, ne humai laa gi Iesu i de boo, ne humai ga gaamai hanu myrrh ma aloe gu hilo, agu made se lau pauni.#John 3.1-2 40Gai gilaadeu ga kave de angaanga o Iesu ga saabini i denga malo linen madali denga mee maanongi, bei dagodo tahulinga a de gau Ssuu e danu ai dangada. 41Gai de mommee o Iesu ne daudau ai i de laagau lui, e dahi veelenga iai, gai lo te veelenga laa e dahi daanunga gu lava i de hoda i lo te baba. Gai tigi ai donu dangada ne hagadaakodo ai. 42Gai go hiidinga de laangi laa se laangi e hagadabena niio de gau Ssuu, gai taanunga laa e baa ange, gai gilaadeu ga kave Iesu ga hagadagodo i kilaa.

Currently Selected:

John 19: DBD

Highlight

Copy