Markɩ 14

Jejuu yʋ ƴaal

(Mat 26:1–5; Lu 22:1–2; Jã 11:45–53)

1Wire yenyɔ sɛra sɩɩ do Pakɩ ɓol bɔɔ na buruukɛ na hananɩ tabɩɩraa kho bɔ daan. Le bonɩ jidaar kɔ̃tɩna na jɔfʋ dɩɩrdara n ƴaal hʋɛ wɩ fʋ Jeju na fɩɩlɛ wɩ kʋ.#Thɩɩ 12:1–27 2Gɩdonɩ wɩ‐n sor, ɩna fʋʋ ɓol bɔaˈ, a mɛ̃ gaa khʋ̃ɛ na ɩɩrɛ tibil jɔɔ thɩ̃thɩɩn.

Kɩɛr khɛr deer Jejura latɩkolo

(Mat 26:6–13; Jã 12:1–8)

3Ɔbɔɔkɛ Jeju hanɩ Betanɩ Sɩmɔ̃ gbuuluu cɔ dɩko kho paar, khɛ bɩɛl lʋʋn le, a fʋrɔ laaso ja bulobirikɛ hananɩ latɩkolookɛ n hʋnanɩ daʋ, a khɩɩr the nʋɔ ka; dɩ a cʋɔrɛ bulobirile a deer latɩkolo Jejuu yʋɔ.#Lu 7:37–38 4Dɩ ɩkhasɔɔkɛ kɔɔ hanɩle nĩkhii fʋ wɛr dɩ wa‐n so: Anyee latɩkolo kʋɛ ca ha gɩrɛ thakɛ? 5Ga do wa kɔɔ dolonena gɩ dã wire tãatherɩɩ thɔ̃ lɩmɩ wɩ ha bɔdara gaa? Dɩ mɛ̃ wɩ cɩ̃cɩma khɛrraale. 6Sɩ Jeju so: Nɩ sɩɛraa, mɔ̃gɩdo dɩ na‐n vɔgʋʋ? Thɔ̃ bʋɔ a cʋʋ mar; 7gɩdonɩ bɔdara n har wire fɛʋ anɩ pa, nɩ punone cʋʋ wɩ bɔɔ mɔ̃ nɩ‐n ƴaalnɩ, sɩ mɛrɛ na hana mɩ khorraˈ.#Dət 15:11 8Gɩrɛ a‐n punoni ha gɩrɛ a cʋʋnɩ, a kɔɔ mãa a thir mi latɩkolo da‐n gbɛbɩ mɩ mɔ̃ wa dʋ mɩnɩ. 9Sobɔr mɩ so nar, paar fɛʋʋkɛ wa mɩɩnɩ Thãgbaa tutugo bʋɔɔ thɩmɩɩ thɩɩraakɛ fɛʋ, wa mɩɩrɛ dakha gɩrɛɛkɛ khɛrɩkɛ kɔɔ cʋʋnɩ dɩ wa jɩnaa.

Mɔ̃ Judasɩ liirnanɩ Jeju

(Mat 26:14–16; Lu 22:3–6)

10Sɩ Judasɩɩkɛ thɛnɩ Karɩyɔtɩ dɩɩra, kɛ dʋɔnnɩ kpãkpãadaar bɩɛl yʋɔr yenyɔra, jaal bonɩ jidaar kɔ̃tɩnaa pa dɩ a na liirna Jeju. 11Dɩɩ da war na sobɔr mɔ̃ a‐n mɩɩ wɩnɩ dɩ wɩ yɩ, ɩna haarɛ war. Dɩ Judasɩ jɩɩ ma da‐n ƴaal hʋɛ waa a liirnaa.

Jeju Kɔ̃tɩnɩ dɩko kho fʋ pa

(Mat 26:17–25; Lu 22:7–14, 21–23; Jã 13:21–30)

12 Buruukɛ na hananɩ tabɩɩraa caca ɓol wi, kɛ dʋɔnnɩ wireekɛ wɩ‐n jinəni Pakɩ bana bire bonɩɛ, Jejuu kpãkpãadara buleele ayɩ: Ka fɩ‐n ƴaal sɩ jala gbɛbɩrɛ Pakɩ dɩkor fɩ kho? 13Dɩ a thʋɔn ɔɔ kpãkpãadara yenyɔ a so war ayɩ: Nɩ jala dɩɩra, kuunikɛ heenenɩ nyʋɔn na daa na caana nɛr, na‐n kpaaraa, 14dɩ ka a na lonɩ nɩ sɔ cɔdaar kuunna ayɛ: Dɩɩrdaar yɩ, ka duukɛ ɩna khoronɩ Pakɩ dɩkor na ɩnɩ kpãkpãadara ha? 15Dɩ a na nɩ narɛ lɩ̃gã kɔ̃tɩ̃ɩkɛ wɩ thɩɩnɔnɩ thɩ̃ɛ, nɩ gbɛbɩrɛ le Pakɩ dɩkor. 16Dɩ kpãkpãadara jaal a dã dɩɩra, a yɩ thɩ̃ɛ fɛʋ dɩɩ ha mɔna Jeju kɔɔ so warnɩ, dɩ mɛ̃ wɩ gbɛbɩ Pakɩ dɩkor. 17A dɩɩ dʋɔr Jeju pɔr na yʋɔr yenyɔ. 18Dɩ ɔbɔɔkɛ wɩ toonɩ dɩ wa‐n kho dɩkor Jeju sor: Sobɔr mɩ so nar, tibil bɩɛl nɛrɛraakɛ sɩ‐n khonanɩ kha dɩkor na liirna mɛr.#Khɩ 41:9 19Dɩ wɩ ma dɩ wa‐n gbobi, sɩ dɩ wɛr bɩɛlbɩɛl na‐n bulee ɩnɛr gɩ kã? 20Dɩ birse wi: Tibil bɩɛl nɛr yʋɔr yenyɔraakɛ n ˈlɔɔnɩ tasa bɩɛl na mɛrɛ gɩ. 21Mɛr tibili Bikuun n jaal mɔ̃kɛ gɩ khere marnɩ Thãgbaa sɛbɛra, sɩ ga puure ʋrɛraakɛ na lirenanɩ mɛr tibili Bikuun; a wa kɔɔ kɔ̃ tibil ca olelakaˈ, gɩ ka baar.

Kɔ̃tɩnɩ dɩko

(Mat 26:26–30; Lu 22:15–20; 1 Kor 11:23–25)

22Ɔbɔɔkɛ wɩ‐n khonɩ dɩkor Jeju gbaar buru, dɩ ɔbɔɔkɛ a bɩɛlnɩ Thãgba pɛr pɩ, a kuure a ha wɩ sa so: Nɩ gba gɩrɛra ɩ̃ tomɩ gɩ. 23Agɩpɩ dɩ gba thɩ̃ yɔnanɛ, ɔbɔɔkɛ a fʋɔrnɩ Thãgba pɛr pɩ, a ha wɛr, dɩ wɛr fɛʋ gba a yɔ. 24Dɩ a so warɛ aa: Gɩrɛ dʋɔn ɩ̃ tɔmɩ̃, Thãgbaa nɔ bɩɛl ʋlfɛ tɔmɩ̃ gɩ, a na deer tɩbɩla bərəəm sora.#Thɩɩ 24:8; Jer 31:31–34 25Sobɔr mɩ so nar, ma bir na yɔ dɩvɛ̃ɛkɛ bã, phaphapha gɩ dana wireekɛ ma birni na yɔ daphaa Thãgba fãgadaarɩ dʋɔ. 26Ɔbɔɔkɛ wɩ khɩnɩ nɩɛ pɩ, wɩ ther jal gɔ̃gʋɔnaakɛ hananɩ olɩvɩ thɩra.

Jeju mɩɩrɛ mɔ̃ Pɩɛr na bananɩ nayɩ, ɩna jɩaˈ

(Mat 26:31–35; Lu 22:31–34; Jã 13:36–38)

27Dɩ Jeju so war: Nɛrɛ fɛʋ na kɛrnanɛ khiru, gɩdonɩ gɩ kherere Thãgbaa sɛbɛra ayɩ: “Mɛr Thãgba na bɩɩrɛ bana khedaar dɩ banaa na bɩ̃bɩlã paar fɛʋ.”#Jak 13:7 28Sɩ ɔbɔɔkɛ ma ɩɩrnɩ na the khirera ma kʋʋl nɛr ƴɩɛ na jal Galile.#Mat 28:16 29Dɩ Pɩɛr sʋʋraa: Ado tɩbɩla fɛʋrakɛ na kɛrnanɛ khiru, sɩ me wer na kɛrna khiruəˈ. 30Dɩ Jeju sʋʋraa: Sobɔr mɩ so far, fɛrɛ, nĩ dɩtɩnɔɔkɛ yɔl kʋʋ na khɩɩrakɛ balanyɔaˈ, sɩ balãther fa bana nayɩ fa jɩ maˈ. 31Sɩ Pɩɛr bir tu na kheu: Adorakɛ wɩ yɩ sɩ khe kha, sɩ ma puno na bana nayɩ ma jɩ faa ga; dɩ mɛ̃ wɛr fɛʋ kɔɔ so dakha.

Jejuu Thãgba bɩɛl Jɛcɛmanɛ na mɔ̃ wɩ fʋʋnɩ

(Mat 26:36–46; Lu 22:39–46)

32Agɩpɩ wɩ kɔɔ daan paarɩkɛ wɩ‐n wenɩ Jɛcɛmanɛ, dɩ Jeju so ɔɔ kpãkpãadarara ayɩ: Nɩ tɔɔ kɩɛr ɔbɔɔkɛ ma hanɩ Thãgba bɩɛllɔ. 33Dɩ a kpar Pɩɛr na Jakɩ na Jã, sɩ maar mar dɩ ga‐n fʋʋ, dɩ haar haa kũkulõo. 34Dɩ a so warɛ: Ɩ̃ ha gbobire khikhi gbobire waa gel, nɩ tɔɔ kɩɛr a na jʋrɛ. 35Mɛ̃ a tɔ jal gbe, a ji thɩɩra da‐n bɩɛl Thãgba adora hʋɛ hale gɩ dora bɔ gaar bɔɔle khokhɩaraarɛ, 36a sor aa: Aba (kɩrʋ dʋɔn Thɩrɛ), fɛr n punone thɩ̃ɛ fɛʋ, hʋnɔnɛ mar thɩ̃ yɔnanɛɛkɛ sɩ ga do mɔ̃ mɩ‐n ƴaalnɩ ga, sɩ mɔ̃ fɛrɛ n pɛrnɩ haar gɩ hana. 37Sɩ agɩpɩ dɩ kɛr pɔ war a yɩ wɩ dɩ wa‐n daar, dɩ so Pɩɛrra: Sɩmɔ̃, fɛr n daarɛɛ? Fa kɔɔ puno toorakɛ gbe a jʋʋr hɩɩnaa? 38Nɩ jʋrɛ a na bɩɛlna Thãgba dɩ mɛ̃ na lõ fifiləlela ga. Tuur wer n har haarra gel, sɩ tibili tibil do pa fãga ˈlee. 39Dɩ mɛ̃ a kɛr jal wo da‐n bɩɛl Thãgba da‐n ˈloro mɔ̃kɛra a kɔɔ sonɩ. 40Sɩ a bire pɔ wo, a yɩ wɩ dɩ wa‐n daar, gɩdonɩ dayuur fʋ wɛr a kar, dɩ wa jɩ mɔ̃ wa sʋʋraanaˈ. 41Ɔbɔɔkɛ a pɔ warnɩ dɩɩ dã balãther, a so warɛ: Nɩ daarɛ dɩphã a hɩrɛ; gɩ daan dɩ bɔɔ daan. Nɩ hɩnɛ, wa liirnanɛ mɛr tibili Bikuun sopugodara. 42Nɩ ɩrɛ sɩ jal, sɩ hɩnɛ ʋrɛɛkɛ lirena mɩnɩ n ɩnɛ.

Jejuu fʋ

(Mat 26:47–56; Lu 22:47–53; Jã 18:3–12)

43Mɔ̃ a hanɩ mɩɩrɔ, dapaara Judasɩɩkɛ dʋɔnnɩ bɩɛl kpãkpãadara yʋɔr yenyɔra daan na tibil jɔɔkɛ fɔrɔnɩ bajɩnasɔ na gbolasɔ, kɛ bonɩ jidaar kɔ̃tɩna na jɔfʋ dɩɩrdarasɔ na kɔ̃tɩnasɔ kɔɔ thɔnɩ. 44Sɩ lĩlir kɔɔ nɩ warɛ gɩrɛɛkɛ a na cʋʋnɩ aa, ʋrɛɛkɛ ɩna palnɩ, ɔr gɩ, wɩ fʋɔnɛɛ jalana sɩ wa‐n do a yɩ fuu paaraˈ. 45Dɩ ɔbɔɔkɛ a danɩ, dapaara a tɔ wɔrɔ̃ Jeju sa so: Dɩɩrdaar; sa palʋʋ. 46Sɩ wɩ kɔɔ fʋrɛ Jeju. 47Sɩ tibil bɩɛl wɛrra pher bajɩna, a cɩna Thãgbaa gbõdaarɩ thɔ̃daar nũu a kur. 48Dɩ Jeju so war: Nɩ ɩnanɛ bajɩna na gbolasɔ nɩ fʋ mɩ mɔ̃kɛ wɩ‐n fʋnɩ yu hɔ̃hʋɔldaar koe. 49Mɩ‐n kɔɔ har kha na nɛrɛ wire fɛʋ dɩ ma‐n dɩɩr nɩ thɩ̃ɛ Thãgba fʋɔr cɔ kɔ̃tɩɩna, sɩ na kɔɔ fʋ maˈ. Sɩ gɩ har thakɛ gɩ cʋʋ gɩrɛɛkɛ Thãgbaa sɛbɛ sonɩ gɩ dã.#Lu 19:47; 21:37

50Liir wɩ fuule fɛʋ sa fagʋʋ. 51Sɩ daɓol bɩɛl gɩ da‐n kɔɔ kpa Jejura, a par kẽkẽ nɩɩ, wɩ fʋʋrɛ, 52dɩ for kẽkẽ nɩɩ pɛ war sa cana sãɓɔlɔ̃.

Jeju kɩɩldaraa ƴɛra

(Mat 26:57–68; Lu 22:54–55, 63–71; Jã 18:13–14, 19–24)

53Dɩ wɩ kpar Jeju a jalna gbõdaarɩ pa ka bonɩ jidaar kɔ̃tɩnasɔ, na kɔ̃tɩnasɔ, na jɔfʋ dɩɩrdarasɔ n gbɛbɩnɩ kha. 54Sɩ Pɩɛr n kpaar Jejura nɔ bɩɛl nɔ bɩɛl, a ba dana gbõdaarɩ gbaya, a lõ too le na thɔ̃dara da‐n ɩɩr dɔɔ. 55Bonɩ jidaar kɔ̃tɩnasɔ, na so gʋʋrdara fɛʋ, kɔɔ kpɛr sɔ dɩ wa‐n pɛ Jeju wɩ yɩrɔ hʋɛ wɩ kʋʋ, sɩ wa kɔɔ yɩ ga. 56Sɩ tibil jɔ kɔɔ pɔr a kuur sɔ̃sɔ dɩ wa‐n pɛ Jejura, sɩ awɩ so jɩ na ma kha ga. 57Dɩ ɩkhasɔ n ɩɩr dɩ wɩ sõso na pɩɛraa ayɩ, 58ɩnɩ kɔɔ nɩɛrɛ dɩ so ayɩ, ɩna kʋɛrɛ Thãgba fʋɔr cɔ kɔ̃tɩ̃ɩkɛ tɩbɩla mɩnɩ, sɩ ɩnɩ‐n bir ɩnɩ‐n mɩ dakpɩɩ wire balãther, sɩ ga do tibil nyɛ̃ɛ maˈ.#Jã 2:19 59Sɩ gelelakɛ wɩ sonɩ awɩ so jɩ na ma kha ga.

60Dɩ gbõdaar pal ɩɩr tɩbɩlaa thɩ̃thɩɩn a bule Jeju: Fa‐n hana nʋɔ na birsena gaa? Anyee so ha gɩrɛ tɩbɩlaakɛ n pɛ farnɩ? 61Sɩ Jeju pɩr pɔbɩ aa əl nʋɔaˈ, dɩ gbõdaar bir bulee: Sɩɩ do fɛr dʋɔn Kirisiti, Thãgbaakɛ sɩ‐n fʋɔrnɩɩ Bikuun bɛ? 62Dɩ Jeju tu: Mɛrra gɩ, sɩ na yɩrɛ tibili Bikuun da too Thãgbaa nyɔ̃bɔra, a thena dakha thãgbara ƴũ a na‐n ɩ̃ na ndɔlɔ̃pana.#Dan 7:13 63Dɩ gbõdaar ɓəər ɔɔ kẽkẽsɔ sa so: Anye hale dɩ sa bir na ˈlo dɩkha ˈlo? 64Nɩ nɩɛnɩ mɔ̃ a kʋɛnɩ Thãgbaa i; mɔ̃ nɩ‐n kpɩɛr? Dɩ tɩbɩla fɛʋ pɩɛraa so kʋnanɛ.#Lev 24:16 65Sɩ ɩkhasɔ wɛrra mar dɩ wa‐n cɩɩraa nyɔ̃thɩ̃ɩ, sa thii ƴɩɛ sɩ dɩ wa‐n thʋʋrʋʋ na nyɔ̃ po, sɩ wa‐n sʋʋraa a jɛ ntɛ n bɩɛnɩ; sɩ thɔ̃dara gbaarɛ sɩ wa‐n ɓaalɛ.

Mɔ̃ Pɩɛr bananɩ ɩna jɩ ntɛ Jeju donaˈ

(Mat 26:69–75; Lu 22:56–62; Jã 18:15–18, 25–27)

66Mɔ̃ Pɩɛr hanɩ gbayara, gbõdaar thɔ̃daar khɛ bɩɛl pɔr 67a yɩɩ da‐n ɩɩr dɔɔ, dɩ hɩɩnʋʋ kirkirkir sa sʋʋraa: Fɛrɛ dakha mee fɩ‐n kɔɔ ha kha na Najarɛtɩ Jeju. 68Sɩ a bananɛ sa so: Ma jaˈ, ma‐n nɩ gɩrɛɛkɛ fɩ ƴaalnɩ fɩ soaˈ. Agɩpɩ Pɩɛr gba jal thena phel ko lõfonʋɔ. 69Dɩ thɔ̃daar khɛrɩle yɩɩ, a bir ma da‐n so wɩrɛraakɛ hanɩle aa: Kuunikɛ wa tibil cara bɩɛl gɩ. 70Sɩ Pɩɛr bir da‐n bana wo. Bɔɔ gbe dɩ wɩrɛɛkɛ kɔɔ hanɩle bir sʋʋraa: Sobɔr gɩ gel, wa tibil ca bɩɛl fɩ do gɩdonɩ Galiledaar ha fɩ. 71Sɩ Pɩɛr mar a bana a ʋlfɛ da‐n wɩɩrna thɩ̃ɛsɔ aa, ɩna jɩ kuunikɛ wɩ‐n sonaˈ. 72Dɩ dapaara balanyɔ yɔl kʋʋ bir khɩɩ, dɩ Pɩɛr jɩna Jejuu thɩmɩɩkɛ a kɔɔ sʋʋraanɩ ayɩ, a yɔl kʋʋ na ˈlɛ na khɩɩ balanyɔaˈ, sɩ a na bananɛ balãther nayɩ, ɩna jɩ naˈ. Dɩ mɔ̃ Pɩɛr n kpɩɛrnɩ thale a‐n khɩɩrɛ.

Currently Selected:

Markɩ 14: LOBIRI

Highlight

Copy