Markɩ 15

Jeju Pɩlatɩɩ ƴɛra

(Mat 27:1–2, 11–14; Lu 23:1–5; Jã 18:28–38)

1A dɩɩ wɩl duuro phiphi, bonɩ jidaar kɔ̃tɩna, na kɔ̃tɩnasɔ, na jɔfʋ dɩɩrdarasɔ, na so gʋʋrdara fɛʋ gbɛbɩrɛ kha wɩ gʋʋr mɔ̃ wa donɩ. A wɩ li Jeju pɩ, wɩ kpaarɛ ha Pɩlatɩ. 2Dɩ Pɩlatɩ bulee ayɩ: Fɛr dʋɔn Juifi fãgadaarɩ? Dɩ Jeju tu: Mɔna fɩ sonɩ gɩ. 3Dɩ bonɩ jidaar kɔ̃tɩna pɩɛraa sɔ jɔɔjɔɔ. 4Dɩ Pɩlatɩ bir bulee wo: Fa‐n hana nʋɔ na birsena gaa? Hɩnɛ sɔ fɛʋʋkɛ wɩ‐n pɛ farnɩ. 5Sɩ Jeju na kɔɔ so thɩ̃ɛ bã, dɩ gɛr cʋɛ dɩ nʋɔ kpaa Pɩlatɩ.

Mɔ̃ wɩ heennɩ Jeju so kʋnanɛ

(Mat 27:15–26; Lu 23:13–25; Jã 18:39—19:16)

6Sɩ ɓol bɔɔ fɛʋ Pɩlatɩ n faarɛ khaɩdaarɩkɛ tɩbɩla n ƴaalnɩ. 7Sɩ tibil bɩɛl hale khaɩra wɩ‐n wenɩ Barabasɩ nakha lãlana, gɩdonɩ tibil wɩ kɔɔ kʋ dawiikɛ wɩ kɔɔ ɩɩrnanɩ lãʋ. 8Dɩ tibil jɔɔle jʋʋnɛ Pɩlatɩɩ pa, a ma dɩ wa‐n bɩɛlʋʋ a cʋɛ nar gɩrɛɛkɛ a‐n kɔɔ cʋʋ narnɩ. 9Dɩ Pɩlatɩ tu: Nɩ‐n ƴaalɛ ɩ̃ faa ʋrɛ dɔnɩ Juifi fãgadaar a ha nɩ ya? 10Gɩdonɩ a jɩrɛ dɩ gbugi dɔ kɩrʋ dɩ bonɩ jidaar kɔ̃tɩna kɔɔ fʋ Jeju a haa. 11Sɩ bonɩ jidaar kɔ̃tɩna cʋrrɛ tɩbɩla wa‐n pɛr, wɩ sɔ Pɩlatɩra a ka faa Barabasɩ. 12Dɩ Pɩlatɩ bir bule wi: Sɩ anye nɩ‐n ƴaal ɩ̃ cʋɛna ʋrɛ nɩ‐n wenɩ Juifi fãgadaar? 13Dɩ wɩ tu kheu wɛlɛ wɛlɛ aa: Gbaanɛɛ kpa kʋkʋ thɩrʋra. 14Dɩ Pɩlatɩ bule wi: Anyee puu ca a cʋʋ? Sɩ wɩ bir tu na kheu wɛlɛ wɛlɛ dɩɩ jɔ mɛ̃ aa: Gbaanɛɛ kpa kʋkʋ thɩrʋra. 15Dɩ Pɩlatɩ ƴaalɛ ɩnɩ‐n da tibil jɔ haar a faa Barabasɩ, sa gba Jeju ˈlaa dɩ wɩ ciil na khasa sɩ dɩ ha wɩ wɩ kpa kʋkʋ thɩrʋra.

Mɔ̃ sɔrasɛsɔ maannɩ Jeju

(Mat 27:27–31; Jã 19:2–3)

16Dɩ sɔrasɛ kɔɔ kpar Jeju a lona gobanɛrɩ cɔ gbayara, dɩ wɩ wer wɩ̃ sɔrasɩsɔ fɛʋ. 17Sɩ wɩ tor Jeju kẽkẽ sɩɛ, a kɛrna uu dɩɩ ho fãgadaar kpɩɛr, dɩ wɩ tʋʋ yʋʋra, 18sa ma dɩ wa‐n fʋɔrʋʋ ayɩ: Juifi fãgadaar gba fʋɔrɛ. 19Sɩ dɩ wa‐n bɩɩrʋʋ yʋʋ na ɓalʋʋ dɩ wa‐n cɩɩrnanaa nyɔ̃thɩ̃ɩ, sɩ dɩ wɩ gburõku na fʋɔrʋʋ. 20Ɔbɔɔkɛ wɩ kɔɔ maanʋʋnɩ pɩ, wɩ thʋbʋʋrɛ kẽkẽ sɩɛ sa bir tʋʋ ɔɔ kẽkẽ sa kpaa thena wɩ kpa kʋkʋ thɩrʋra.

Jejuu thɩr kpa

(Mat 27:32–44; Lu 23:26–43; Jã 19:17–27)

21Kũu bɩɛl gɩ, a the lɔɔ da‐n kɔ̃, dɩ wɩ kɔɔ cʋgʋʋ na fãga dɩ gba Jejuu kʋkʋ thɩr a heen; ɔɔ i n dʋɔn Sɩmɔ̃, Sɩrɛn dɩɩra a the, Alesãdɩɩr na Rufusii thɩ gɩ.#Rɔm 16:13 22Dɩ wɩ kpa Jeju a jalna paarɩkɛ wɩ‐n wenɩ Gɔlgɔta, kɩrʋ dʋɔn Yʋ khubu. 23Dɩ wɩ haarɛ taanɩkɛ nyanyaananɩ thɩɩkɛ wɩ‐n wenɩ mɩɩr, sɩ a kɔɔ bor. 24Agɩpɩ wɩ gbaarɛ a kpa kʋkʋ thɩrʋra, sa gba ɔɔ kẽkẽsɔ a tɩnɛ na lɩ lɩr wɩ jɩ ntɛɛkɛ na ˈlɛnɩ.#Khɩ 22:18 25Ɔbɔɔkɛ wɩ kɔɔ kpaanɩ kʋkʋ thɩrʋra, khɛ yɔ kpãa bɔɔ gɩ kɔɔ do. 26Kherereekɛ n nɛnanɩ ɔɔ so heen kɩr ha gɩrɛ, gɩ sor: Juifi fãgadaar gɩ. 27Wɩ kɔɔ kpar dakha yu hɔ̃hɔla yenyɔ dapaale, bɩɛl ɔɔ nyɔ̃bɔra, bɩɛl ɔɔ nyɔ̃bɩlana. [

28Mɛ̃ gɩrɛɛkɛ kherenenɩ Thãgbaa sɛbɛra ayɩ: “Wɩ kɔɔ theruure a ɓã puu cʋʋdarara” dã otirə.]#Eja 53:12

29Wɩrɛ n thɛnɩ le sɩ wa‐n ka wɩ‐n nɩɩrʋʋrɛ sɩ dɩ wɩ didiə yʋʋ sɩ na so: Mee fɩ kɔɔ yɩ fa wɩɛrɛ Thãgba fʋɔr cɔ kɔ̃tɩ̃ɩ sɩ fɩ bir fɩ mɩ wire balãther;#Khɩ 22:7; 109:25; Mar 14:58; Jã 2:19 30taa afɩbara a gbuno kʋkʋ thɩrʋra bɛɛ. 31Mɛ̃ dakha bonɩ jidaar kɔ̃tɩna na jɔfʋ dɩɩrdara n ɓoɓororaa awɩ ha dɩ wa‐n so aa: A kɔɔ taarɛ wɩ̃ tibil sɩ aa puno na taa dɩbara ga. 32Dɔ ɔrkɛ dɔnɩ Kirisiti, Ɩjɩrayɛl fãgadaar n gbũ nɛnɛ̃ kʋkʋ thɩrʋra sɩ tor yire sɩ pɛr haar. Wɩrɛ wɩ kɔɔ kpanaanɩ kha n nɩɩrʋʋrɛ dakha wer.

Jejuu khi

(Mat 27:45–56; Lu 23:44–49; Jã 19:28–30)

33A wire ʋlkha dɩɩ koo kɔɔ birəre tĩtĩtĩ a dana dʋɔr bɔɔ. 34Dɩ dʋɔr bɔɔ, Jeju kɔɔ hulene nɔ khɩɩr aa: Eloyɩ, Eloyɩ, lama sabakɩtanɩ; kɩrʋ dʋɔn: Ɩ̃ Thãgba, ɩ̃ Thãgba mɔ̃gɩdo dɩ fɩ bo mɩ faa?#Khɩ 22:1 35Sɩ ɩkhasɔɔkɛ kɔɔ hanɩle dɩ wa‐n nɩɛ, wɩ sor: Nɩ hɩnɛ, Elɩ Thãgbaa bobon a‐n we. 36Dɩ tibil bɩɛl wɛrra car a gba tabɩhʋɛ a mʋʋ ta ƴʋɔna, a gar jʋmuunə a ˈlaaraa a yɔ, sa so: Nɩ dɔ sɩ hɩɩn ado Elɩra na ɩnɛ na cʋgʋʋ dɩ na gbũ.#Khɩ 69:21 37Sɩ Jeju hulene nɔ kheu sa khi. 38Dɩ kẽkẽ nɩɩkɛ hanɩ Thãgba fʋɔr cɔ kɔ̃tɩɩna kɔɔ fʋrɛ ƴũ a ɓəər yenyɔ a ba dana thɩɩ.#Thɩɩ 26:31–33

39Dɩ ɔbɔɔkɛ sɔrasɛ tamaa kɔ̃tɩ̃ɩkɛ jɩlɛnɩ Jejuu ƴɛra yɩnɩ khi caale Jeju khini, a sor: Sobɔr gɩ, Thãgbaa Bikuun kuunikɛ do ger.

40Khɛrasɔ kɔɔ hale dakha a ˈlaa yɩɛ; Marɩɩkɛ thɛnɩ Magɩdala dɩɩra, Salome, nakha Marɩɩkɛ dʋɔnnɩ Jakɩ diine na Jojɩɩ nɩ, wɩrɛ fɛʋ kɔɔ har khɛraalee thɩ̃thɩɩn.#Lu 8:2–3 41Wɛr n kɔɔ kpaanɛ Jejura dɩ wa‐n buluu ɔbɔɔkɛ a kɔɔ hanɩ Galile, na wɩ̃ khɛrsɔ bərəəmkɛ n kɔɔ jalanaanɩ kha Jerujalɛm kɔɔ hale wer.

Mɔ̃ wɩ dʋnɩ Jeju

(Mat 27:57–61; Lu 23:50–56; Jã 19:38–42)

42Dɩɩ ˈlire dʋɔrɛ sɩ dɩɩ do gbɛbɩ wire gɩ, a thɩɛna gaa gɛr dʋɔn hɩɩr wi dɛɛsɩ wire. 43Jojɛfɩɩkɛ thɛnɩ Arɩmate kɔɔ pɔr, ɔr dʋɔn tibilikɛ dɔnɩ so gʋʋr kɔ̃tɩn dakha kɛ wɩ‐n cʋnɩ, ɔɔ thɛthɛ dakha n pɩɛrɛ bɔɔkɛ Thãgbaa fãgadaar do na ɩnɩ; a kɔɔ ɩɩrɛ a pɛr kũu fɩlɛ sa jal Pɩlatɩɩ pa a bɩɛlaa a ha nɩ Jejuu for. 44Sɩ nʋɔ kɔɔ kpaarɛ Pɩlatɩ ɔbɔɔkɛ a nɩɛnɩ dɩɩ do a ˈlire khir, dɩ mɛ̃ a we sɔrasɛ tamaa kɔ̃tɩ̃ a bulee ado Jeju kɔɔ mãa khir. 45Mɔ̃ sɔrasɛ tamaa kɔ̃tɩ̃ mɩɛɛnɩ, gɛr a harɔ Jojɛfɩ hʋɛ dɩ gba Jejuu for. 46Dɩ Jojɛfɩ ther kẽkẽ bulo ɓʋ̃ɔ, sa gbũ Jejuu for a par kɩ̃kɩɩnna, sa dʋʋ kaaraakɛ wɩ kɔɔ thelnɩ gɔ̃gʋɔna, agɩpɩ dɩ kpuro bokaar a khaanna ka nʋɔ. 47Sɩ Marɩɩkɛ thɛnɩ Magɩdala na Marɩ ʋrɛ dɔnɩ Jojɩɩ nɩ kɔɔ hɩɩnɛ ka wɩ kɔɔ pɩɛnɩ.

Currently Selected:

Markɩ 15: LOBIRI

Highlight

Copy