Markɩ 13
13
Thãgba fʋɔr cɔ kɔ̃tɩ̃ wɩɛr thɩmɩɩr
(Mat 24:1–2; Lu 21:5–6)
1Mɔ̃kɛ Jeju n thenɩ Thãgba fʋɔr cɔ kɔ̃tɩɩna, ɔɔ kpãkpãadaar bɩɛl sʋʋraarɛ: Dɩɩrdaar, yɛ boka ɓɔnanakɛ, dɩ hɩnɛ mɔ̃ wɩ thʋnɩ mɩ gʋʋsɔ ɓoɓo. 2Dɩ Jeju birsee ayɩ: Fa yɩ mɔ̃ wɩ thʋnɩ mɩ go kɔ̃tɩnasɔɔkɛ ɓoɓoaa? Boka bɩɛl na bir na sɩ kɩɛr na dɛ̃ɛ ʋ̃ bokara ƴũ bã, fɛʋ na derre.
Nɩwɛɛkɛ na kɔɔ dananɩ
(Mat 24:3–14; Lu 21:7–19)
3Mɔ̃ Jeju toonɩ gɔ̃gʋɔnaakɛ hananɩ olɩvɩ thɩra a pɛ ƴɩɛ Thãgba fʋɔr cɔ kɔ̃tɩɩna, Pɩɛr na Jakɩ na Jã na Ãdire kɔɔ buleele hɛllɩ: 4Sɔ sar bɔɔkɛ gelela na danɩ, dɩ anye dɔ jɩɩnɩkɛ na nɛnanɩ bɔɔkɛ gelesɔra na‐n danɩ.
5Dɩ Jeju ma da‐n so war ayɩ: Na‐n jɩɛ dʋ bʋrɛ, na‐n do tibil n fɩɩl naˈ. 6Gɩdonɩ tɩbɩla bərəəm na gbaar ɩ̃ i na ɩna wa‐n so, ɩnɛr dʋɔn mɛrɛ; dɩ mɛ̃ wa fɩɩl tɩbɩla jɔɔ. 7Ɔbɔɔkɛ nɩ nɩɛnɩ kʋʋr hale na mɔ̃ na‐n nɩɛnɩ ko thɩmɩasɔ, na‐n do maar n fʋ naˈ, dɔ gele n kɔɔ dã sɩ ga do thɩ pɩ paar paˈ. 8Ʋ̃ ca na ɩɩrɛ a na‐n kena ʋ̃ ca, ʋ̃ fãgadaarɩ dɩ bɩɛl n ɩɩr a na‐n kena ʋ̃ fãgadaarɩ dɩ kpɩɩ. Thɩ jɩɩnsɔ na har paar dɩɩdɩɩ, kɔmɛ kɔ̃tɩ̃ɩ na jire dakha; sɩ gɩrɛ wallɛɛ tɔ̃tʋ̃ɔ pa gɩ. 9Sɩ na‐n jɩɛ dʋ bʋrɛ dɩbara, gɩdonɩ tɩbɩla na fʋ nɛr na jalna kɩɩl paar; wa bɩɩr nɛr dakha Juifisɔɔ Thãgba fʋɔr cɔnanɔ; wa kpa nɛr na jalna dɩ na jɩɩl gobanɛrsɔ na fãgadarasɔɔ ƴɛra, gɩ do mɛr dɔ nɔɔ, dɩ ga mɩɩ warɛ anɩ ha pɛda.#Mat 10:17–20; Lu 12:11–12 10Dɔ tutugo bʋɔɔ thɩmɩɩ n kɔɔ mɩɩ tibil caarra fɛʋ ɓo. 11Sɩ ɔbɔɔkɛ wɩ fʋ nɩnɩ a jalna kɩɩl paar, na‐n kɔɔ ma na dɛ anye na so yaa ga, sɩ dawiilera thɩmɩɩr na the ner nɔɔ dɩ na so, gɩdonɩ ga do anɩ pa ga thaˈ, sɩ Thu Phuu na hana nɩ. 12Õkuun na liirnanɛ ɔɔ õkũu bɩnɔ dɩ wa kʋ, ɔmɛ̃ thɩrɛ na cʋʋ na ɔɔ bɩsã; bɩsana na ɩɩrɛ na lã thɩrɛ na nɩrɛra. 13Tɩbɩla fɛʋ na laar nɛr gɩ do ɩ̃ i dɔ nɔɔ, sɩ ʋrɛɛkɛ na yɩranɩ a na dana khu paar, ɔr na ˈlɛ taarɛ.#Mat 10:22
Bɔ gaar kɔ̃tɩ̃daa
(Mat 24:15–28; Lu 21:20–24)
14Ɔbɔɔkɛ na yɩnɩ thɩ̃ thuurnəneekɛ na kʋɛanɩ thɩ̃ɛ da ha kãkɛ na teananɩ a hana ga (dɔ ʋrɛɛkɛ n hɩnɛnɩ sɛbɛɛkɛ n dʋ gar bʋrɛ), le wɩrɛ hanɩ Jude n fuo ca jala gɔ̃gʋɔna;#Dan 9:27; 11:31; 12:11 15ʋrɛɛkɛ na hanɩ nãsʋrɔ a na‐n gbũ lõ cʋɔrɔ ɩnɩ‐n gba thɩ̃aˈ;#Lu 17:31 16dɩ ʋrɛɛkɛ dakha na hanɩ lɔɔ a na‐n kɛr bir ɩnɩ‐n gba ɩnɩ kẽkẽ kɔ̃tɩ̃ bã. 17Ga wisɔɔle ga puurore khɛ pɛmɛdarara na wɩrɛ n mamanɩ bibɔrɔsɔ. 18Na‐n bɩɛlnɛ Thãgba dɩ thɩ̃ɛ thale na‐n dã yʋʋrɔaˈ. 19Ga wisɔɔle bɔ gaarɛ na jɔrɛ na ka, bɔ gaar caale na kɔɔ hale ɔbɔɔkɛ Thãgba kɔɔ tini thɩ̃ɛ dɩɩ dana nɛnɛ̃kaˈ, dɩ ga bir na halerakɛ kpɩɩ bã.#Dan 12:1; Nɩr 7:14 20Ado Kɔ̃tɩn na kɔɔ tɔ ga bɔɔle dɩɩ gburoəˈ, tibil na mar na ta ga, sɩ tɩbɩlaakɛ a kɔɔ phiirni wɩ dɔ ɩnɩ too dɔ kɩrʋ dɩ tɔ ga bɔɔle dɩɩ gburo.
21Liir ado tibil na so nar: Nɩ hɩnɛ Kirisiti har kɩɛr, agɩbo: Nɩ hɩnɛ pal a ha, na‐n pɛr haaraˈ. 22Gɩdonɩ wɩrɛ n sõsonenɩ dɩ wɩ yɩ Kirisiti ha nɩ, agɩbo bobona ha nɩ, na ɩɩrɛ wa‐n nɩna tɩbɩla nɔ kpaa thɩ̃ɛsɔ na ma kʋ thɩ̃ɛsɔ, wa‐n fɩɩlnanakɛ tɩbɩlaakɛ Thãgba kɔɔ phiirni adora wa punone. 23Sɩ nɛrɛ, na‐n jɩɛ dʋ bʋrɛ koe; mɩ kɔɔ maanɛ dɩ ma‐n so nar gɩrɛ fɛʋ.
Tibili Bikuuni bir ɩ̃
(Mat 24:29–31; Lu 21:25–28)
24Ga bɔɔlera a bɔ gaarɛ ka na pɩ, wire na birəre, por dakha na hɩrɛ bã.#Eja 13:10; Eje 32:7; Jow 2:10, 31; 3:15; Nɩr 6:12 25Ƴepələ̃be na ther thãgbara ƴũ ga‐n jiir thɩɩra, dɩ gɩrɛ dɔnɩ fãgaakɛ hanɩ thãgbara ƴũ ga gbugbuyore.#Eja 34:4; Jow 2:10; Nɩr 6:13 26Le wa yɩ tibili Bikuun a na‐n ɩ̃ na ndɔlɔ̃pana na fãga jɔɔ ka na carbararɛ jɔɔ.#Dan 7:13; Nɩr 1:7 27Le a na thɔ̃ ɔɔ thɔ̃thɔ̃daar thusɔ dɩ wa kpa wɩrɛ a phiirni, kɛ hanɩ kɩrrɔ, na gananɔ, na gɛla yenyɔra, na ka thãgbara ƴũ na thɩɩ khuni.
Thɩ̃ dɩɩrɛ thɩrʋraakɛ dɔnɩ thɩr khonanɛ
(Mat 24:32–35; Lu 21:29–33)
28Nɩ dɔ sokpaa thɩr khonanɛdara n dɩɩrnɩ thɩ̃ɛ; ɔbɔɔkɛ nɩ yɩnɩ ɔɔ jɛ̃ dɩɩ ɓol a na thɔɔ fa ƴolo, nɩ jɩrɛ ubulo n wɩla. 29Mɛ̃ gɩ, nɛrɛ dakha a nɩ yɩ thɩ̃ɛsɔɔkɛ dɩ a dã, nɩ jɛ tibili Bikuuni ɩ̃ bɔ n daan, dɩ lõfonɔɔ a ha. 30Sobɔr mɩ so nar, nɩ̃daraakɛ na khiir koo sɩ thɩ̃ɛsɔɔkɛ fɛʋ n dã ga. 31Thãgbara ƴũ na thɩɩ na phor na ka, sɩ ɩ̃ thɩmɩɩsɔ na pho na ka kpɩɩrakaˈ.
Thãgba dɩbara jɩɛn pɩpɩɩ wire
(Mat 24:36–44)
32Ado wi jɩɩrra gɩ, na bɔɔkɛ ga thɩ̃ɩkɛ na danɩ, tibil bɩɛl na jaˈ, thɔ̃thɔ̃daar thusɔrakɛ le Thãgbaa dʋɔ wa jaˈ, mɛr Bikuunnakɛ na jaˈ, sɩ Thɩrɛ dɩbara jɩɛn.#Mat 24:36 33Na‐n jɩɛ dʋ bʋrɛ a na jʋrɛna, gɩdonɩ na jɩ bɔɔkɛ ga danaˈ. 34Ga hʋrɛ mɔ̃ tibil n pɛrnɩ haar ɩna jaal dɩkhãa pa, dɩ faa cʋɔr sɩ dɩ ˈlaa ɔɔ thɔ̃daarsɔra bɩɛlbɩɛl hʋɛ thɔmanaakɛ wa‐n donɩ, sɩ dɩ so lo bɛrdaarra, a na‐n jɩɛ jʋʋr.#Lu 12:36–38 35Na‐n jʋrɛ mɛ̃, gɩdonɩ na jɩ bɔɔkɛ cɔdaar kuun na birni na ɩ̃aˈ; agakpaana dʋɔrɔ ga do, agɩbo dɩnɩrɔ, a mɛ̃ gaa yɔl ko khɩɩ bɔɔ, agɩbo duuro. 36Ado a phuro a ɩ̃ na‐n do a fʋ nɩ daanɔaˈ. 37Gɩrɛ mɩ so narnɩ, tɩbɩlala fɛʋ mɩ so: A nɩ jɩ na‐n jʋrɛ.
Currently Selected:
Markɩ 13: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
