Markɩ 12

Nãkʋɔr hɩɩn sokpaa

(Mat 21:33–46; Lu 20:9–19)

1Jeju mar da‐n mɩɩ wɩ na sokpaa ayɩ: Kũu bɩɛl gɩ, a kɔɔ cʋʋ nãkʋɔr a bã dãgbol diiro, a kpena dakha koru bi der paar, sa mɩ bɛbɛr cɔ gbãa. Agɩpɩ dɩ gba nãkʋɔr hɩɩndara a pɛr wa‐n hɩnɛ ɓo, sa jal kpaar paar.#Eja 5:1–2 2Dɩ ɔbɔɔkɛ bi khʋ̃ bɔɔ danɩ, a thʋɔn ɔɔ thɔ̃daar bɩɛl a jala nãkʋɔr hɩɩndararara, wɩ hanaa dɩkhaa nãkʋɔr thɩ̃ a pɔna. 3Sɩ wɩ kɔɔ fʋrɛ thɔ̃daar a bɩɩr, sa weguu dɩ kɔna nyɛ̃ khɩɩ. 4Dɩ bir thɔ̃ war thɔ̃daar kpɩɩ wo, dɩ wɩ bɩɩrʋʋ yʋʋ cu, sa pɩɛraa yicuru. 5Dɩ bir thɔ̃ war thɔ̃daar kpɩɩ wo, dɩ wɩ kʋʋ. Agɩpɩ dɩ thɔ̃ war wɩ̃ thɔ̃dara wo, dɩ wɩ fʋlɛlɛ wɛ a bɩɩr sa kʋʋr ɩkha. 6Sɩɩ do ɔɔ bikũu bɩɛlɩkɛ a‐n nanɩ sɩɛraa, dɩ pɩɩrɔ thʋ̃ɔ wɛrra sa so wa cʋrɛ ɩ̃ bikuun. 7Sɩ nãkʋɔr hɩɩndaraale mɩɩrɛ kha ayɩ: Ʋrɛɛkɛ dʋɔn thɩ̃ hɩn, nɩ dɔ sɩ kʋʋ, sɩɩ do sɛr hɩna thɩ̃ɛ. 8Dɩ mɛ̃ wɩ fʋʋ, a kʋʋ, a gba dʋna faa nãkʋɔr khuirə. 9Anye nãkʋɔr kɔ̃tɩn na cʋʋ dɩphã? A na jaal na kʋʋr nãkʋɔr hɩɩndaraale, sa a gba nãkʋɔr a ha tɩɩ kpɩɩsɔ. 10A thɩɛna gaa, na kɔɔ hɩɩn gɩrɛ Thãgbaa sɛbɛ sonaa? Gɩ sor ayɩ:

“Bokaarɩkɛ cɔ mɛ kɔɔ bonɩ,

debire a do go tɩ bokaar;#Khɩ 118:22–23

11sɩ Kɔ̃tɩnɩ pa thɩ̃ɛɛle the,

dɩ sɩ yɩɛrɛ dɩɩ do sar thɩ̃ kɔ̃tɩ̃ɩ.”

12Sɩ wɩ kɔɔ ƴaalɛ hʋɛ wɩ fʋʋ, sɩɩ do maar n fʋ wɛr tɩbɩlala, gɩdonɩ wɩ jɩrɛ dɩ wɛrra Jeju so sokpaale, sɩ wɩ kɔɔ fagʋʋrɛ sa kɔ̃.

Sejaarɩkɛ dɔnɩ Rɔmɛ̃ fãgadaarɩ lãpho thɩmɩɩ

(Mat 22:15–22; Lu 20:20–26)

13Sɩ wɩ thʋɔnaanɛ ɩkhaa jɔfʋ bʋ dʋdara na Ɛrɔɔdɩɩ totoo, wɩ nʋɔ thɩmɩɩrraakɛ a na mɩɩnɩ. 14Dɩ wɩ pɔr a sʋʋraa: Dɩɩrdaar, sɩ jɩrɛ dɩ sobɔ tibil fɩ do, dɩ fa‐n ma tibiləˈ, fa‐n hɩɩn dakha tɩbɩla dɩɩdɩaˈ, sɩ dɩ fa‐n dɩɩr tɩbɩla Thãgbaa hʋ na sobɔr. Gɩ teere kha dɩ sa lɩmɩ Sejaar lãpho yaa, ga tee kha ga? 15Sɩ lɩma yaa, sa‐n lɩma? Sɩ gɩdonɩ Jeju jɩrɛ awɩ bɩnɛ yenyɔ fɩl, a so warɛ: Mɔ̃gɩdo dɩ na‐n fifilə mi? Nɩ gba war bi bɩɛl ɛna ɩ̃ hɩɩn. 16Dɩ wɩ gba bɩɛl a pɔna, dɩ bule wi: Amɛɛ foto ha ʋrɛ, dɩ amɛɛ khere ha gɩrɛ? Dɩ wɩ tu: Sejaar gɩ. 17Dɩ mɛ̃ Jeju so war: Nɩ ˈlaanɛ Sejaarra gɩrɛɛkɛ dɔnɩ Sejaarɩda, a ˈlaanɛ Thãgbara gɩrɛɛkɛ dɔnɩ Thãgbaada; dɩ nʋɔ kɔɔ kpaa wɛr fɛʋ ɔrra.

Khi ɩɩr thɩmɩɩr

(Mat 22:23–33; Lu 20:27–40)

18Dɩ Sadʋsɛ̃ɛsɔɔkɛ n yɛnɩ khi ɩɩrɛ na halaˈ, pʋɔraarɛ a bulee thakɛ ayɩ:#Th t t 23:8 19Dɩɩrdaar, hɩnɛ gɩrɛɛkɛ Mʋɩjɩ kɔɔ khere sarnɩ ayɩ: “Ado tibil hana õkuun dɩ khi sa faa khɛr sɩ bɩsaan na halaˈ, ɔɔ õkuun n gba hɛ a kɔna bɩsana wɩ do ɔɔ õkuuni məl.”#Dət 25:5 20Sɩɩ do õkona makonyɔ wɛ a kɔɔ hale; cacadaar kɔɔ her khɛr aa hana bɩsana ga, sa khi. 21Dɩ balanyɔdaar gba khikhɛrʋ aa hana bɩsana ga, sa khi wo; mɛna gɩ kɔɔ ha dakha na balãtherdaar. 22Sɩ bɩɛl wɛr makonyɔrarakɛ na hana bɩsaanaˈ, wɩ pɩnɩ fɛʋ na pɩ dɩɩ do khɛr dakha khire. 23Ado khe ɩɩr khirera, ʋmɔ̃ wɛrra na hɩna khɛr? Gɩdonɩ wɛr makonyɔra fɛʋʋ khɛr a kɔɔ do.

24Dɩ Jeju tu: Nɩ buure waa fĩi yə̃ə? Na jɩnɩ Thãgbaa sɛbɛ na Thãgbaa fãga ga, gɛr gɩ. 25Ado khe na ɩɩr khirera, kona na he khɛra bã, khɛra dakha na he kona bã, sɩ wa hʋrɛ Thãgbaa thɔ̃thɔ̃daar thusɔ le Thãgbaa dʋɔ. 26Sɩ ado gɩrɛ dɔnɩ khee ɩɩr gɩ, na kɔɔ yɩɛ Mʋɩjɩɩ sɛbɛra thɩr bu thɩmɩɩrra gaa? Mee Thãgbaa sʋʋraarɛ ayɩ: “Ɩnɛr dʋɔn Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba.”#Thɩɩ 3:6 27Thãgba na do khee Thãgba ga, sɩ wɩrɛ hananɩ yiree Thãgba a do; nɩ bure waa vʋ̃ʋ.

Thãgbaa caca jɔfʋ

(Mat 22:34–40; Lu 10:25–28)

28Jɔfʋ dɩɩrdaar bɩɛlɩkɛ kɔɔ nɩɛnɛnɩ mɔ̃kɛ wɩ‐n bananɩ thɩ̃ banaa, a jɩna dakha mɔ̃ Jeju jɩɩnɩ tu, a pɔr a bulee ayɩ: Ʋmɔ̃ dɔ caca jɔfʋ jɔfʋsɔra fɛʋ?#Lu 10:25–28 29Dɩ Jeju tu: Cacadaa dʋɔn: “Ɩjɩrayɛl na pɛ nũu, Kɔ̃tɩn asɩ Thãgba, Kɔ̃tɩ̃ bɩɛl ˈlẽˈlẽˈlẽ a do,#Dət 6:4–5 30dɩ dɔ fa‐n na Kɔ̃tɩn afɩ Thãgba na afɩ bɩ̃ fɛʋ, na afɩ ha fɛʋ, na afɩ kpɩɛr fɛʋ, na afɩ fãga fɛʋ.” 31Balanyɔdaa dʋɔn: “Dɔ fa‐n na afɩ ˈwalãkha tibil mɔ̃kɛ fɩ‐n nanɩ afɩbara.” Jɔfʋ na hale a kɔ̃tɩ̃ jɔ jɔfʋ ca ƴɩrɛ bã.#Lev 19:18 32Dɩ jɔfʋ dɩɩrdaar sʋʋraa: Gɩ bɔrɛ Dɩɩrdaar, sobɔr fɩ so, dɩ bɩɛl Thãgba do ˈlẽˈlẽˈlẽ, dakpɩɩ na hale saagado ɔr gaaga,#Dət 4:35 33dɩ ɔɔ naakɛ fa‐n naanɩ na bɩnɛ fɛʋ, na kpɩɛrɛ fɛʋ, na fãga fɛʋ, fa‐n nana dakha ˈwalãkha tibil mɔ̃ fɩ‐n nanɩ afɩbara, gɩ jɔr nʋmaakɛ wɩ‐n jinəni bonɩɛ Thãgbara sa thii, na gɩ̃ bonɩ ji fɛʋ.#Oje 6:6 34A Jeju yɩ mɔ̃ a tuni thale na kpɛsɛrɛ, a sʋʋraarɛ: Fa hʋnɔ dɩ Thãgba na do far fãgadaaraˈ. Dɩ tibil na ˈla na bule Jeju thɩ̃ɛ bã.

Mesɩ na Davɩdɩ

(Mat 22:41–46; Lu 20:41–44)

35Mɔ̃kɛ Jeju hanɩ Thãgba fʋɔr cɔ kɔ̃tɩɩna da‐n dɩɩr wɩ, a sor ayɩ: Mɔ̃ gɩ fʋ sɩ jɔfʋ dɩɩrdarasɔ na‐n so ayɩ: Davɩdɩɩ Bikuun Kirisiti do? 36Davɩdɩɩ thɛthɛ Thu Phuu kɔɔ cʋʋ dɩ so ayɩ:

“Thãgba sor ɩ̃ Kɔ̃tɩna ayɩ:

Tɔɔ ɩ̃ nyɔ̃bɔra,

phaphapha ɩ̃ cʋʋ afɩ lãlaardara wɩ do afɩ nɛ jəəda.”#Khɩ 110:1

37Davɩdɩɩ thɛthɛrakɛ n wɩɩrɛ Kɔ̃tɩn, dɩ mɔ̃ a na fʋ sɩ na do ɔɔ bikuun? Tibil jɔjʋɔ kɔɔ pɛr Jeju nũu na daʋ.

Jɔfʋ dɩɩrdarasɔɔkɛ Jeju mɩɩrɔnɩ thɩmɩɩr

(Mat 23:1–36; Lu 20:45–47)

38Dɩ a‐n dɩɩrɛ tɩbɩla ayɩ: Na‐n jɩɛ hɩɩn jɔfʋ dɩɩrdarasɔɔkɛ n ƴaalɛnɩ ɩnɩ‐n tɔ kẽkẽ gbana na kpaarna ƴatɔɔ tɩbɩla na‐n fʋɔrɛ nɩ kɔ̃tɩ̃ fʋɔrʋʋ; 39ɩnɩ‐n phiirna ƴɛ kʋʋl too paar Thãgba fʋɔr cʋɔrɔ, na caca too paar dɩko kho paar; 40ɩna‐n phʋʋna khikhɛra, sɩɩ do fɩɩlɛ wɩ‐n bɩɛlna Thãgba dɩ wa‐n pʋɔrna wa‐n yɛ nɩ; wele, so kɔ̃tɩ̃ɩ na heen wer na khɩɩr na ka.

Khaardaakɛ khikhɛrʋ ˈlaanɩ

(Lu 21:1–4)

41Jeju toore a pɛ ka wɩ‐n pɛnɩ Thãgba mũsumo ƴɩɛ, da‐n hɩɩn mɔ̃ tibil jɔɔle n pɛrnɩ war Thãgba mũsũ pɛ paar. Lẽledara bərəəm pɛrɛ war jɔɔ. 42Dɩ khikhɛr bɔdaar pɔ a pɛr tama be yenyɔɔkɛ na dananɩ war birəˈ. 43Dɩ Jeju we ɔɔ kpãkpãadara a so war: Sobɔr mɩ so nar, khikhɛrʋʋkɛ pɛrɛ war dɩɩ jɔ gɩrɛɛkɛ wɩrɛ fɛʋ pɛrnɩ Thãgba mũsũ pɛ paar. 44Gɩdonɩ war harra wɩrɛ fɛʋ pɛr, sɩ ɔr, ɔɔ bɔdaar warɩkɛ a hananɩ koo, kɛ na haanɛɛnɩ a pɛr.

Currently Selected:

Markɩ 12: LOBIRI

Highlight

Copy