Markɩ 11

Mɔ̃ Jeju n lonɩ Jerujalɛm

(Mat 21:1–11; Lu 19:28–40; Jã 12:12–19)

1Ɔbɔɔkɛ wɩ‐n wɔrɔnɩ Jerujalɛm a ha Bɛtɩfaje na Betanɩ khʋra, wɩ kɔɔ daan gɔ̃gʋ̃ɔɔkɛ hananɩ olɩvɩ thɩra; le Jeju thɔ̃ ɔɔ kpãkpãadara yenyɔ, 2a so war ayɩ: Nɩ jala dɩɩraakɛ nɩ pɛnɩ ƴɩɛ; a nɩ pɔ na dã na yɩrɛ kũkə̃ ɓolʋʋkɛ tibil na jʋʋnnɩ paˈ, dɩ wa li; nɩ thʋba a kpa ɛna. 3A tibil bule ni: Anye nɩ‐n cʋʋ ya, nɩ to: Kɔ̃tɩn n ƴaalɛ sa a bir a thɔna kɔrɔ wɩ ɩna.

4Dɩ mɛ̃ wɩ jal a yɩ kũkə̃ ɓolʋ, dɩ wɩ li cɔ lõfonɔɔ hʋ nʋɔra, dɩ wɩ thʋbɩ. 5Dɩ ɩkhaa tibilsɔ wɩrɛraakɛ kɔɔ hanɩle bule wi: Anye nɩ‐n cʋʋ, dɩ anyera nɩ‐n thʋbɩ kũkə̃ ɓolʋ? 6Dɩ kpãkpãadara gbaar mɔna Jeju kɔɔ so warnɩ a so war; dɩ mɛ̃ wɩ sɩ war dɩ wɩ jalna. 7Dɩ wɩ pɔnanɛ kũkə̃ ɓolʋ Jejura, a gba awɩ kẽkẽ a dɛbɩ kũkəənə, dɩ Jeju jʋʋn tooro. 8Tɩbɩla bərəəm kɔɔ belle awɩ kẽkẽ kɔ̃tɩ̃sɔ a pɛr hʋɛra, sɩ wɛ cɩ fa huu lɔɔ dɩ wa‐n pɛr hʋɛra. 9Wɩrɛ kʋlɛnɩ Jeju ƴɩɛ na wɩrɛ n kpaanɛnɩ khiro n hulene aa: Ojana, bɔnanɛ n hana ʋrɛraakɛ n ɩnanɩ gɩrɛ na Kɔ̃tɩnɩ i.#Khɩ 118:25–26 10Bɔnanɛ n hana fãga gbaarraakɛ n ɩnanɩ, kɛ dɔnɩ asɩ mama thɩ kɔ̃tɩ̃ Davɩdɩɩda. Ojana le ƴũ pər. 11Ɔbɔɔkɛ Jeju kɔɔ danɩ Jerujalɛm, a lʋʋn Thãgba fʋɔr cɔ kɔ̃tɩɩna; ɔbɔɔkɛ a hɩɩnnɩ thɩ̃ɛ fɛʋ pɩ, a ther jal Betanɩ na ɔɔ kpãkpãadara yʋɔr yenyɔ gɩdonɩ dɩɩ kɔɔ ˈlire tɩɩn.

Thɩr khonanɛɛkɛ Jeju nɩɩrnɩ

(Mat 21:18–19)

12A dɩɩ kɔɔ wɩl dɩ wɩ the Betanɩ, kɔmɛr kɔɔ fʋrɛ Jeju. 13Dɩ mɔ̃ a ˈlaanɩ yɩ thɩr khonanɛ ƴɔɔ dɩ thɔɔ faa, a gbaar pɔ ɩnɩ‐n hɩɩn a ba sɛr yaa? Sɩ ɔbɔɔkɛ a kɔɔ danɩ, fa haar dɩbara a kɔɔ yɩ, gɩdonɩ ga do ɔɔ se bɔ ga. 14Dɩ mɛ̃ Jeju so thɩrʋraale ayɩ: Tibil na bir na kho afɩ bi kpɩɩrakɛ bã; dɩ ɔɔ kpãkpãadara kɔɔ nɩɛrɛ.

Mɔ̃ Jeju phʋɔlnɩ Thãgba fʋɔr cɔ kɔ̃tɩ̃ɩ

(Mat 21:12–17; Lu 19:45–48; Jã 2:13–22)

15Agɩpɩ wɩ kɔɔ daan Jerujalɛm, dɩ Jeju lõ Thãgba fʋɔr cɔ kɔ̃tɩɩna, a ma a weele wɩrɛ n dolonenɩ thɩ̃ɛ na wɩrɛ n thɛnɩ thɩ̃ɛ le Thãgba fʋɔr cɔ kɔ̃tɩɩna, a tʋɔrna war debaa tabalsɔ a kpɛɛ na kʋlã puu dolõdaraa too pasɔ. 16Sɩ aa‐n tu tibil n fɔrɔ thɩ̃ɛ a kpãsɛnɛna Thãgba fʋɔr cɔ kɔ̃tɩɩna ga. 17Sɩ a dɩɩr wɛr thakɛ aa: Ga do gɩ kherere Thãgbaa sɛbɛra ayɩ: “Mɛr Thãgbaa cɔ na dor paarɩkɛ tibil caar fɛʋ na‐n fʋɔr mɩnaa”? Sɩ dɩ ne wer cʋʋ dɩɩ do yu hɔ̃hʋɔldaraa wɔ̃ pa.#Eja 56:7; Jer 7:11 18Bonɩ jidaar kɔ̃tɩna na jɔfʋ dɩɩrdara kɔɔ nɩɛrɛ gele dɩ wa‐n ƴaal mɔ̃ wa fʋnɩ sɩ wɩ kʋ Jeju, gɩdonɩ a‐n kʋ wɛr maar, gɩdonɩ nʋɔ n kpaarɛ tɩbɩla fɛʋ ɔɔ dɩɩrra. 19A dɩɩ birə Jeju na ɔɔ kpãkpãadara faarɛ dɩɩ sa the.

Thɩr khonanɛɛkɛ khenɩɩ thɩmɩɩ

(Mat 21:20–22)

20Dɩɩ wɩlnɩ duuro dɩ wa ka kpãkpãadara yɩrɛ thɩrʋʋlera dɩ khi na nɛɛ fɛʋ. 21Dɩ Pɩɛr jɩna gɩrɛ kɔɔ cʋɛnɩ a so Jejura: Dɩɩrdaar, hɩnɛ thɩrʋʋkɛ fɩ pɛrnɩ sor a khire. 22Dɩ Jeju so war: Nɩ pɩɛr Thãgba haar. 23Sobɔr mɩ so nar: A tibil so gɔ̃gʋ̃ɔɔkɛ ayɩ: Ələ kɩɛr a je lanyʋɔnna, dɩ ado ntɛ na baalɔ ɔɔ hara ga, sa pɛr haar gɩrɛ ɩnɩ sonɩ ga har oti, a na yɩɛrɛ ga cʋʋna gel.#Mat 17:20; 1 Kor 13:2 24Gɛr gɩ dɩ ɩ̃ so nar: Thɩ̃ɛ wo thɩ̃ɛɛkɛ na bɩɛlnɩ Thãgbara, nɩ pɩɛr haar nɩ ˈlɛr pɩ, dɩ na yɩɛrɛ gɩ cʋʋna. [ 25Dɩ ɔbɔɔkɛ nɩ ɩɩrnɩ jɩɩl na bɩɛl Thãgba, ado nɩ hananɛ sor na tibil, nɩ faa, dɩ mɛ̃ anɩ Thɩɩkɛ hanɩ Thãgbaa dʋɔ na faa dakha anɩ sopugo.#Mat 6:14–15] 26Sɩ ado na faa wɩ̃ tibili soaˈ, anɩ Thɩɩkɛ hanɩ Thãgbaa dʋɔ na faa dakha anɩ sopugoəˈ.

Mɔ̃ Jeju hananɩ hʋɛ

(Mat 21:23–27; Lu 20:1–8)

27Dɩ wɩ bire jal Jerujalɛm, dɩ ɔbɔɔkɛ Jeju n kpaarnɩ Thãgba fʋɔr cɔ kɔ̃tɩɩna, bonɩ jidaar kɔ̃tɩna na jɔfʋ dɩɩrdara na kɔ̃tɩna pʋɔraarɛ, 28a bulee: Ka hʋ caakɛra fɩ hananɩ dɩ fa‐n cʋʋna thɩ̃ɛɛkɛra the, dɩ amɛ hana fɩ hʋɛ fa‐n cʋɛ? 29Dɩ Jeju tu: Ma bule ner dakha thɩ̃ bɩɛl, a nɩ puno birse mi mɛrɛ dakha ma so narɛ hʋ ca ʋrɛ mɩ hananɩ dɩ ma‐n cʋʋna thɩ̃ ca gɩrɛ. 30Jãa yɔ kpɛɛ Thãgbaa dʋɔ gɩ the yaa, tɩbɩlaa pa gɩ the? Nɩ to ɩ̃ hɩɩn. 31Dɩ wɩ mar dɩ wa‐n bana khasɔ ayɩ: A sɩ tu ayɩ: Thãgbaa dʋɔ gɩ the, a na bule ser dɩ anye dɔ kɩrʋ dɩ sa kɔɔ pɛ ɔɔ thɩmɩɩ haaraˈ; 32dɩ a sɩ so wo ayɩ: Tɩbɩlaa pa gɩ … Maar kɔɔ fʋɔn wɩ tɩbɩlala thalee sora, gɩdonɩ Thãgbaa bobon bɔ tɩbɩla fɛʋ kɔɔ gba Jã dɩ do. 33Dɩ wɩ tu: Sɩ jɩrɛ ya? Dɩ Jeju so war: Dɩ a thale gɩ, ma‐n so nar mer ka mɩ yɩnɩ hʋɛ dɩ ma‐n cʋʋna ga thɩ̃sɔɔkaˈ.

Currently Selected:

Markɩ 11: LOBIRI

Highlight

Copy