Markɩ 10

He kuur thɩmɩɩr

(Mat 19:1–12; Lu 16:18)

1Jeju ther le a gba jal Jude khʋra, sɩ agɩpɩ dɩ ɩɩr Jʋrdɛ̃ iiro. Dɩ tibil jɔ n gbɛbɩ dɩ wɩ pɔ na derraa, dɩ ma da‐n dɩɩr wɩ thɩ̃ɛ mɔ̃ a mɩlna gɩnɩ.

2Ɩkhaa jɔfʋ bʋ dʋdara pʋɔraarɛ, dɩ wa‐n fifiləə a bulee thakɛ ayɩ: Tibil hananɛ hʋɛ na faa ɔɔ khɛr ya? 3Dɩ tu: Anyee jɔfʋ Mʋɩjɩ kɔɔ ha nɩ? 4Dɩ wɩ sʋʋraa ayɩ: Mʋɩjɩ kɔɔ ˈlaarɛ hʋɛ, kuun n khera he kuur sɛbɛ sa wea ɔɔ khɛr a faa.#Dət 24:1–4; Mat 5:31 5Dɩ Jeju so war: Anɩdara khiinoni dɔ kɩrʋ dɩ Mʋɩjɩ kɔɔ khere nar jɔfʋ caale. 6Sɩ fʋ paar, ɔbɔɔkɛ Thãgba kɔɔ tini thɩ̃ɛ, kuun na khɛr a kɔɔ cʋʋ.#Jən 1:27; 5:2 7Gɛr dɔ kɩrʋ dɩ kuun na lee kha na ɔɔ thɩ na ɔɔ nɩ, sɩ a ɓã kha na ɔɔ khɛr,#Jən 2:24 8wɛr yenyɔ n gbɛbɩ wɩ do tibil bɩɛl, mɛ̃ ga do yenyɔ ha wɩ bã, sɩ wɩ coore kha a do bɩɛl. 9Gɛr gɩ ga teena tibil n lea gɩrɛ Thãgba coornɩ dɩɩ do bɩɛlaˈ.

10Ɔbɔɔkɛ wɩ kɔɔ hanɩ cʋɔrɔ, kpãkpãadara bire bule Jeju ga so caalera, 11dɩ so war: A tibil faa ɔɔ khɛr sa bir a he khɛ kpɩɩ, khɛ kpɩɩ ƴaal sopugo a cʋʋ ɔɔ caca khɛrra.#Mat 5:32; 1 Kor 7:10–11 12Ado khɛr gɩ a faa ɔɔ ko sa bir he kũu kpɩɩ, kũu kpɩɩ ƴaal sopugo a cʋʋ.

Mɔ̃ Jeju dɛɛnɩ bɩsanana nyɛ̃ɛ a bɔna wɩ

(Mat 19:13–15; Lu 18:15–17)

13Dɩ tɩbɩla kɔɔ kpar bɩsana a pɔna Jejura, a dɛɛnɛ war nyɛ̃ɛ, sɩ kpãkpãadara kɔɔ phaanɛ wɩrɛ pɔna wɩnɩ. 14Dɩ ɔbɔɔkɛ Jeju yɩɛnɩ nĩkhii fʋʋrɛ, dɩ so ɔɔ kpãkpãadarara: Nɩ dɔ bɩsana na‐n ɩ̃ mar, na‐n pɩɛr waˈ, gɩdonɩ wɩrɛ hɔnɩ bɩsana, wɛr Thãgbaa fãgadaar do mana. 15Sobɔr mɩ so nar, ʋrɛɛkɛ na‐n tuonni Thãgbaa fãgadaar do bɩsanaa khaakaˈ, a na puno na lono kpɩɩrakaˈ.#Mat 18:3 16Agɩpɩ dɩ gba bɩsana a fʋrɔ, sa dɛ̃ɛ war fɛʋ bɩɛlbɩɛl nyɛ̃ɛ a bɔna wɩ.

Lẽle kuuni thɩmɩɩ

(Mat 19:16–30; Lu 18:18–30)

17Mɔ̃kɛ Jeju n gbanɩ hʋɛ, kũu bɩɛl car pʋɔraa a gulẽgaraa a bulee: Dɩɩrdaar bʋɔ, anye ma cʋʋ na ˈlɛ yire khorr? 18Dɩ Jeju sʋʋraa: Mɔ̃gɩdo dɩ fɩ we mɩ dabʋɔ? Tɩɩ bʋɔ na halaˈ, Thãgba dɩbara bʋɔnɔ. 19Fɩ jɩrɛ Thãgbaa jɔfʋ: “Fa‐n kʋ tibiləˈ, fa‐n hana khɛ kpɩɩ ƴaalaˈ, fa‐n hana kũu kpɩɩ ƴaalaˈ, fa‐n yuəˈ, fa‐n sõso pɛ tibiləˈ, fa‐n pɛr fɩɩlɛ thɩɛna ga, na cɔ afɩ thɩ na afɩ nɩ.”#Thɩɩ 20:12–16; Dət 5:16–20 20Dɩ kuunile tu: Dɩɩrdaar mɩ kɔɔ mãa nɩ ga jɔfʋraale fɛʋ nũu kɛkɛkɛ ɩ̃ daɓol dĩi bɔɔ. 21Dɩ Jeju hɩɩnʋʋ na naʋ sa sʋʋraa: Thɩ̃ bɩɛl ɓɔr fɛr, jala dolone thɩ̃ɛ fɛʋʋkɛ fɩ hananɩ a hana bɔdara, dɩ mɛ̃ fa ˈlɛ lẽle thɩ̃ɛ Thãgbaa dʋɔ, agɩpɩ fɩ ɩ̃ fa‐n kpa mar. 22Sɩ ɔbɔɔkɛ kuunile nɩɛnɩ thɩmɩɩ ca gele a gbure ƴɩɛ, sa gba da‐n kɔna gbobire, gɩdonɩ lẽledaar gɩ na sobɔr.

23Sɩ Jeju hɩɩn ɔɔ kpãkpãadara da‐n finə sa so war: Thãgba fãgadaar dɩ lʋʋn khɩɩrɛ waa gel wɩrɛraakɛ dɔnɩ lɛ̃lɛ. 24Dɩ nʋɔ kɔɔ kpaarɛ kpãkpãadara fɛʋ ga thɩmɩɩ caraale; sɩ Jeju bir so war wo: Ɩ̃ bɩsãsɔ, Thãgba fãgadaar dɩ lʋʋn khɩɩrɛ waa gel. 25Nyɔɔmɛɛ lõokɛ a na lonɩ mɩsɩmɩ kaarra ka yɔɔrɛ jɔ lẽlee Thãgba fãgadaar dɩ lõ. 26Sɩ nʋɔ kɔɔ kpaarɛ kpãkpãadara dɩɩ ka thɩmɩɩrraale, dɩ wa‐n bule khasɔ bɩɛlbɩɛl aa: Dɩ a mɛ̃ gɩ, amɛ na punone na ˈlɛ taarɛ? 27Dɩ Jeju hɩɩn wɩ sa so: Ado tɩbɩlala wer gɩ, thɩ̃ punonaa ga; sɩ ga ha mɛ̃ Thãgbara ga, gɩdonɩ Thãgba n punone thɩ̃ɛ fɛʋ.

28Sɩ Pɩɛr ma da‐n sʋʋraa: Hɩnɛ, sɛrɛ sɩ faarɛ thɩ̃ɛ fɛʋ sɩ sa‐n kpa far. 29Dɩ Jeju tu: Sobɔr mɩ so nar, ado tibil faa ɔɔ cɔ, a ɔɔ õkona wɛ, a ɔɔ õkhɛrsɔ wɛ, a ɔɔ nɩ gɩ, a ɔɔ thɩ gɩ, a ɔɔ bɩsãsɔ wɛ, a ɔɔ lɛ gɩ, dɩɩ do ɩ̃ i dɔ nɔɔ na Thãgbaa tutugo bʋɔɔ thɩmɩɩra, 30a na ˈlɛr thɩ̃ɛ nɛnɛ̃ bɔɔraakɛ tama tama der paar tamaa: Cɔnasɔ, õkonasɔ, õkhɛnasɔ, nɛsɔ, bɩsanasɔ, na lɩɛsɔ, a na ˈlɛnanɛ dakha kpoore, sɩ bɔɔkɛ na ɩnanɩ a na ˈlɛr yire khorr. 31Sɩ tibil jɔjʋɔɔkɛ dɔnɩ nɛnɛ̃ ƴɛ kʋla, wɛr na fien na do sɩka pɩra, sɩ tibil jɔjʋɔɔkɛ dɔnɩ nɛnɛ̃ sɩka pɩra, wɛr na fien na do ƴɛ kʋla.#Mat 20:16; Lu 13:30

Balãther ha gɩrɛ Jeju mɩɩnɩ ɔɔ khi na ɔɔ khi ɩɩr

(Mat 20:17–19; Lu 18:31–34)

32Sɩ wɩ kɔɔ gbaar hʋɛ dɩ wa‐n jal Jerujalɛm, dɩ Jeju kʋʋl wɩ ƴɩɛ. Sɩ haar fuure kpãkpãadara dɩ maar fʋ dakha wɩrɛ n kpaaraanɩ. Dɩ Jeju bir kpa kpãkpãadara yʋɔr yenyɔ dɩ wɩ ha kha, dɩ ma da‐n mɩɛ wɩ gɩrɛ na danaanɩ. 33A so warɛ ayɩ: Nɩ hɩnɛ, sɩ‐n jaal gɩrɛ Jerujalɛm, ka wa fʋnɩ mɛr tibili Bikuun na ha bonɩ jidaar kɔ̃tɩna, na jɔfʋ dɩɩrdarasɔ, dɩ wa pɛ mar so kʋnanɛ; sɩ na gba mɩ na ha ca kpala; 34dɩ wa mãa mɛr, wɩ cɩɩrna nyɔ̃thɩ̃ɩ wa‐n pɛ mar, wa ciil mer dakha na khasa, sɩ wɩ kʋ mɩ, sɩ a wire yẽther ka ma ɩɩrɛ khirera.

Bɩɛlɛɛkɛ Jakɩ na Jã kɔɔ bɩɛlnɩ Jeju

(Mat 20:20–28)

35Agɩpɩ Jebedee bikonaakɛ wɩ‐n wenɩ Jakɩ na Jã pɔ Jejura, a sʋʋraa: Dɩɩrdaar, cʋɛ sar gɩrɛ sa bɩɛl farnɩ. 36Dɩ bule wi: Anye nɩ‐n ƴaal ɩ̃ cʋɛ nar? 37Dɩ wɩ tu: A fɩ gba afɩ fãga, ha sɩ hʋɛ, bɩɛl n too afɩ nyɔ̃bɔra, bɩɛl afɩ nyɔ̃bɩlana. 38Sɩ Jeju so war: Na jɩ gɩrɛ nɩ‐n bɩɛlnaˈ; na punone na yɔ thɩ̃ yɔnanɛɛkɛ dɔnɩ bɔ gaarɛɛkɛ ma yɔnɩ ya? Agɩbo wɩ kpɛɛ nɩ bɔ gaarɛraakɛ wa kpɛɛ mɩnɩ yɔ khaa ya?#Lu 12:50 39Dɩ wɩ tu: Ɔɔ, sa punone. Dɩ Jeju so war: Sobɔr gɩ, thɩ̃ yɔnanɛɛkɛ ma yɔnɩ na yɔr, dɩ yɔ kpɛɛrɛɛkɛ ma ˈlɛnɩ na ˈlɛr dakha. 40Sɩ ga do mɛr na phire ʋrɛ na tɔɔnɩ ɩ̃ nyɔ̃bɔra na ʋrɛ na tɔɔnɩ ɩ̃ nyɔ̃bɩlana ga; wɩrɛ dɩbara Thãgba gbɛbɩrɔnɩ too paa caarɩkɛ, awɩda gɩ. 41Sɩ ɔbɔɔkɛ kpãkpãadara yʋɔr kɔɔ nɩɛnɩ gele, nɩ̃khii kɔɔ fʋ wɛr Jakɩra na Jã. 42Dɩ Jeju we wɩ dɩ wɩ pɔ, dɩ so war: Nɩ jɩrɛ dɩ wɩrɛ wɩ‐n hɩɩnnɩ dɩ wɛr dɔ ca kpalaa fãgadara, wɩ‐n ʋʋnɛ tɩbɩlala kpɛ, dɩ wɩrɛ dɔnɩ kɔ̃tɩna n cʋʋ warɛ fãga dɩɩ pho ka.#Lu 22:25–26 43Sɩ ga ha mɛ̃ anɩ thɩ̃thɩɩnaˈ, sɩ ntɛɛkɛ n ƴaalɛnɩ ɩnɩ‐n dɔ kɔ̃tɩn, dɔ ɔr n ka a do anɩ thɔ̃daar.#Mat 23:11; Mar 9:35; Lu 22:26 44Ado tibil bɩɛl nɛrɛra ƴaal ɩnɩ‐n dɔ ƴɛ kʋl, dɔ ɔr n do tɩbɩla fɛʋʋ dee. 45Gɩdonɩ mɛr tibili Bikuun na ɩ̃ tibil na‐n dɔ mar thɔma ga, sɩ mɩ ɩnɛ ɩ̃ ka ɩ̃ do thɔma sɩ ɩ̃ ˈlaa ɩ̃ yi gɩ birse tɩbɩla bərəəm.

Kɩɛr Jeju khɛr yaarʋ yinə

(Mat 20:29–34; Lu 18:35–43)

46Dɩ wɩ kɔɔ daan Jeriko; dɩ ɔbɔɔkɛ Jeju na ɔɔ kpãkpãadara na tibil jɔ na ɩɩrnɩ dɩɩraale na the, bɛ̃bɩɛl yaarʋʋkɛ wɩ‐n wenɩ Bartɩme, kɛ dʋɔnnɩ Timee bikuun, kɔɔ toore le hʋ nʋɔra. 47Dɩ ɔbɔɔkɛ a nɩɛnɩ dɩ Najarɛtɩ Jeju n pʋɔn, a mar da‐n hulẽ aa: Jeju Davɩdɩɩ Bikuun, jɛ mɩ bʋɔra. 48Sɩ tibil jɔ kɔɔ manaanɛ ayɩ a pɩra; sɩ a ka jɩɛ bir hulẽ wo aa: Davɩdɩɩ Bikuun, jɛ mɩ bʋɔra. 49Dɩ Jeju jɩɩl sa yɩ wɩ wɩɛ. Dɩ wɩ wer yaarʋra a sʋʋraa: Pɩɛr ˈlar, ɩrɛ, a‐n we fer. 50Dɩ yaarʋ dʋna ɔɔ darã a faa, sa pal birbir da‐n pɔ Jejura. 51Dɩ Jeju bulee: Anye fɩ‐n ƴaal ɩ̃ cʋɛ far? Dɩ yaarʋ tu: Dɩɩrdaar, cʋɛ mɩ ma‐n yɩ. 52Dɩ Jeju sʋʋraa: Dɩ kɔna, afɩ ha pɛ taa fɩ. 53Dɩ dapaara ɔɔ yi khɛr da‐n yɩ, a kpa Jejura dɩ wɩ cʋr wa‐n jal.

Currently Selected:

Markɩ 10: LOBIRI

Highlight

Copy