Jã 20

Jejuu khi ɩɩr

(Mat 28:1–8; Mar 16:1–8; Lu 24:1–12)

1Wire makonyɔɔ caca wi, Marɩɩkɛ thɛnɩ Magɩdala kɔɔ jaal kaara duuro phiphiphi ɔbɔɔkɛ gɩ hanɩ jilə jilə ˈlo. Dɩ a yɩɛrɛ dɩɩ do bokaar hɛlɛnɛ sa faa ka nʋɔ. 2Dɩ a car jal a yɩ Sɩmɔ̃ Pɩɛr na kpãkpãadaar kpɩɩkɛ Jeju nanɩ, a so war ayɩ: Wɩ tire Kɔ̃tɩn kaʋ sɩ dɩ sa jɩ ka wɩ pɩɛnaˈ.

3Dɩ Pɩɛr na kpãkpãadaar kpɩɩle ther jal kaara. 4Dɩ wɛr yenyɔ car jal. Sɩ kpãkpãadaar kpɩɩle car ka Pɩɛr a kɔɔ dã kaara caca, 5a gʋɛ a yɩ kẽkẽ gborõbesɔ thɩɩra, sɩ aa lõaˈ. 6Dɩ Sɩmɔ̃ Pɩɛrɩkɛ n kpaaraanɩ daan, a lõ kaʋ a yɩ kẽkẽ gborõbe haarsɔ thɩɩra, 7na kẽkẽ ʋrɛ wɩ parnɩ Jeju yʋʋ dɩ ga ha kha na kẽkẽ gborõbesɔaˈ, sɩ gɩ gbɛlɛlɛ a thɩɩn pa kpɩɩ. 8Dɩ kpãkpãadaar kpɩɩle kɔɔ dananɩ kaara cacaca lʋʋn dakha a yɩɛ a pɛr haar. 9Gɩdonɩ wa kɔɔ jɩ gɩrɛɛkɛ Thãgbaa sɛbɛ sonɩ kɩrʋ, dɩ Jeju na ɩɩrɛ na the khirera paˈ. 10Dɩ kpãkpãadara kɛrrɛ bir awɩ pa.

Jeju nɩnanɛ ɔɔbara Marɩɩkɛ thɛnɩ Magɩdala

(Mat 28:9–10; Mar 16:9–11)

11Sɩ Marɩ or jɩɩlɛ le ka nʋɔra jɩɛra da‐n khɩɩ. Sɩ mɔ̃ a‐n khɩɩnɩ, a gʋɛrɛ a kpu da‐n hɩɩn kaʋ, 12a yɩ Thãgbaa thɔ̃thɔ̃daar thu yenyɔ dɩ wɩ to kẽkẽ bulona, sa too ka wɩ kɔɔ pɛnɩ Jejuu for, bɩɛl yʋ khʋra bɩɛl nɛ khʋra. 13Dɩ wɩ bulee: Khɛr, anye fɩ‐n khɩɩrɔ? Dɩ birse wi: Gɩdonɩ ɩ̃ Kɔ̃tɩ̃ wɩ ti kaʋ dɩ ma jɩ ka wɩ pɩɛnaˈ, gɛr gɩ. 14Mɔ̃ a‐n mɩɩnɩ thale, a na kɩɩlɛ a yɩ Jeju dɩ jɩɩl, sɩ aa jɩ dɩɩ do Jeju ga. 15Dɩ Jeju bulee: Khɛr, mɔ̃gɩdo dɩ fa‐n khɩɩ? Amɛ fɩ‐n ƴaal? Sɩ Marɩ wer kpɩɛrɛ a ka jɩna nãkʋɔrdaar gɩ, a sʋʋraa: Kɔ̃tɩn, ado fɛr gbaanɛɛ sɔ mar kãkɛ fɩ pɩɛnɩ ɩ̃ jal ɩ̃ gba. 16Dɩ Jeju wɩɩ: Marɩ. Dɩ a kɩɩlɛ a sʋʋraa na ebirə thɩmɩɩr: Rabʋnɩ. Kɩrʋ dʋɔn Dɩɩrdaar. 17Dɩ Jeju sʋʋraa: Fa‐n tha maraˈ, gɩdonɩ ma jʋʋn ɩ̃ Thɩra paˈ. Sɩ jala ɩ̃ omisɔɔ pa a sɔ war ayɛ: Mɩ‐n jʋʋnɛ ɩ̃ Thɩra, kɛ dɔnɩ dakha anɩ Thɩ, ɩ̃ Thãgbara kɛ dɔnɩ dakha anɩ Thãgba. 18Dɩ Marɩɩkɛ thɛnɩ Magɩdala jaal a mɩɩ kpãkpãadara ayɩ, ɩnɩ yɩrɛ Kɔ̃tɩn dɩ ɔr mɩɛnɛ nɩ ga thɩ̃sɔɔle.

Mɔ̃ Jeju nɩnanɩ dɩbara kpãkpãadara

(Mat 28:16–20; Mar 16:14–18; Lu 24:36–49)

19Ga wiile dʋɔrɔ, kɛ dɔnɩ wire makonyɔɔ caca wi, kpãkpãadara kɔɔ har duu sa khaan loo gɩdonɩ maar kɔɔ fʋɔn wɩ Juifisɔra; dɩ Jeju pɔr a jɩɩl awɩ thɩ̃thɩɩn sa so war: Nɩ hanana ha ɩɩ. 20Ɔbɔɔkɛ a sonɩ gele pɩ, a nɩna wɛr ɔɔ nyɛ̃ na ɔɔ gɛl, dɩ daʋ fʋrɛ kpãkpãadara mɔ̃ wɩ yɩnɩ Kɔ̃tɩn. 21Dɩ Jeju bir so war wo: Nɩ hanana ha ɩɩ. Mɔ̃kɛ Thɩrɛ thɔ̃ mɩnɩ mɛ̃ mɛrɛ dakha thɔ̃ nɩ. 22Ado a mɩɩ thale pɩ, a phʋʋrɛ pɛ war sa so war: Nɩ tea Thu Phuu. 23Wɩrɛ nɩ faanɩ awɩ sopugosɔ, Thãgba na faarɛ, sɩ wɩrɛɛ sopugosɔɔkɛ na‐n faanaˈ, Thãgba na fa ga.#Mat 16:19; 18:18

Jeju na Tomasɩ

24Tomasɩɩkɛ wɩ‐n wenɩ Didim, kɛ dɔnɩ dakha bɩɛl kpãkpãadaar yʋɔr yenyɔra na kɔɔ ha kha na wɛr ɔbɔɔkɛ Jeju pɔnaˈ. 25Dɩ wɩ̃ kpãkpãadara sʋʋraarɛ: Sɩ kɔɔ yɩrɛ Kɔ̃tɩn. Sɩ dɩ so war: Ado ma yɩ pɔ̃tɩ kpa paar ɔɔ nyɛna ga, dɩ ado ma tor ɩ̃ nyɛ̃bi pɔ̃tɩ kanana ga, dɩ ado ma tharna ɩ̃ nyɛ̃ ɔɔ gɛlla ga, ma pɛr haar yuurakaˈ.

26A wire makõther ka, Jejuu kpãkpãadara bire ha cɔ bɩnɔ wo, dɩ Tomasɩ kɔɔ har kha dɩphã na wɛr. Dɩ lõfonʋɔ kɔɔ khaanɛ, sɩ Jeju pɔr a jɩɩl awɩ thɩ̃thɩɩn sa so war: Nɩ hanana ha ɩɩ. 27Agɩpɩ dɩ so Tomasɩra: ˈLaanɛ kɛ afɩ nyɛ̃bi, dɩ hɩnɛ dakha ɩ̃ nyɛ̃sɔ. ˈLaanɛ dakha afɩ nyɔ̃ a thaar ɩ̃ gɛlla, sɩ fa‐n baalɔ bã sɩ pɩɛr haar. 28Dɩ Tomasɩ sʋʋraa: Ɩ̃ Kɔ̃tɩ̃, na ɩ̃ Thãgba. 29Dɩ Jeju sʋʋraa: Gɩdonɩ fɩ yɩ mɛr dɩphã, gɛr gɩ dɩ fɩ pɛr haar. Sɩ ga dar wɩrɛraakɛ na yɛ mɩnaˈ sa pɛr haar.

Gɩrɛ dɔnɩ kɩrʋ dɩ wɩ khere sɛbɛɛkɛ

30Jeju cʋʋrɛ wo ɔɔ kpãkpãadaraa ƴɛ thɩ̃thɩɩn nɔ kpaa thɩ̃ jɔjʋɔɔkɛ na kheranɩ sɛbɛraakaˈ. 31Sɩ ga thɩ̃sɔɔkɛ kherere, dɩ mɛ̃ na pɛr haar dɩ Jeju dʋɔn Kirisiti, Thãgbaa Bikuun, dɩ mɔna nɩ pɛrnɩ haar, na hananɛ yire gɩ do ɔɔ i dɔ nɔɔ.

Currently Selected:

Jã 20: LOBIRI

Highlight

Copy