Jã 21

Mɔ̃ Jeju nɩnanɩ dɩbara Tɩbɛrɩadɩ mɩɩr nɔ nʋɔra

1A gele pɩ, Jeju bire nɩna ɔɔbara wo ɔɔ kpãkpãadara Tɩbɛrɩadɩ mɩɩr nɔ gẽgerena. Nɩ hɩnɛ mɔ̃kɛ a nɩnanɩ dɩbarara.

2Sɩmɔ̃ Pɩɛr, na Tomasɩɩkɛ wɩ‐n wenɩ Didim, na Natanayɛlɩkɛ thɛnɩ Galile Kana, na Jebedee bikuunsɔ, na ɔɔ kpãkpãadaar ɩkhasɔ yenyɔ kɔɔ har kha pa bɩɛl. 3Dɩ Sɩmɔ̃ Pɩɛr so war ayɩ: Ma jaal na pher thʋma. Dɩ wɩ sʋʋraa: Sa jaal kha dakha na fɛrɛ. Dɩ wɩ ther a lõ gboroona a jal, sɩ ga dɩtɩnɔɔle wa kɔɔ fʋ thɩ̃aˈ.#Lu 5:5

4Ɔbɔɔkɛ dɩɩ wɩlnɩ duuro, Jeju har gẽgerẽ nʋɔra, sɩ kpãkpãadara na kɔɔ jɩ dɩ Jeju ga. 5Dɩ Jeju bule wer: Bɩsana, nɩ hananɛ thɩ̃ɛ a na kho bɛ? Dɩ wɩ birsee: Kpei. 6Dɩ so war: Dɩ nɩ dɔna thʋ̃ pherdaa gborõ nyɔ̃bɔɔra, na yɩɛrɛ. Dɩ wɩ dʋnanɛ, sɩ wa bir puno a na hal na ti bã gɩdonɩ thʋma və̃viəne.#Lu 5:6 7Le kpãkpãadaarɩkɛ Jeju nanɩ so Pɩɛrra: Kɔ̃tɩn gɩ. Dɩ ɔbɔɔkɛ Sɩmɔ̃ Pɩɛr nɩɛnɩ dɩ Kɔ̃tɩn gɩ, gɩdonɩ tomɩ bire a kɔɔ hana, a tɔr ɔɔ kẽkẽ a linə lophɛrɛ sa bɩ̃ ji mɩɩrɔ. 8Dɩ wɩ̃ kpãkpãadara pɔr na gborõo a hal thʋ̃ pherdaakɛ thʋma hironi, gɩdonɩ wɩ wɔrɔnɛ na thɩɩ dɩɩ thɔɔ mɛtɛrɛ tamaa.

9Ɔbɔɔkɛ wɩ gbuni thɩɩra, wɩ kɔɔ yɩrɛ dɔɔkɛ wɩ gbɔɔnɩ na khana a ˈwarɔ thʋma na buru, 10dɩ Jeju so war: Nɩ ɛna thʋ̃ ɩkha thʋmanaakɛra nɩ fʋnɩ nɛnɛ̃. 11Dɩ Sɩmɔ̃ Pɩɛr lõ gboroona, a hal thʋ̃ pherdaakɛ thʋ̃ kɔ̃tɩna tamaa na kpalanyɔ yʋɔr yẽther hironi a thena, wɩ ˈlɛnɩnakɛ thale sɩ thʋ̃ pherdaa na kʋɛaˈ. 12Dɩ Jeju so war: Nɩ ɩna khɔ dɩkor. Sɩ kpãkpãadaar bɩɛllakɛ na‐n ˈla na bulee, amɛ a do yaa ga, gɩdonɩ wɩ jɩrɛ dɩ Jeju Kɔ̃tɩn gɩ. 13Dɩ Jeju tɔr pɔ a gba buru a ha wɩ, a hana wɩ dakha thʋmana.

14Gɛr dʋɔn balãtherdaakɛ Jeju nɩnanɩ ɔɔbara ɔɔ kpãkpãadara, a fʋna bɔɔkɛ a kɔɔ ɩɩrnɩ a the khirera.

Jeju na Pɩɛr

15Ɔbɔɔkɛ wɩ khonɩ dɩkɔ a pɩ, Jeju bulele Sɩmɔ̃ Pɩɛr ayɩ: Sɩmɔ̃ Jonasɩɩ bikuun, fɩ na mɛr a jɔ wɩrɛ bɛ? Dɩ birsee: Ɔɔ Kɔ̃tɩn, fɩ jɩrɛ dɩ mɩ na fɛr. Dɩ Jeju sʋʋraa: Dɩ na khɛ ɩ̃ bana bi. 16Dɩ Jeju bire bulee balanyɔ wo: Sɩmɔ̃ Jonasɩɩ bikuun, fɩ na mɛr bɛ? Dɩ Pɩɛr birsee: Ɔɔ Kɔ̃tɩn, fɩ jɩrɛ dɩ mɩ na fɛr. Dɩ Jeju sʋʋraa: Dɩ dɔ fɩ do ɩ̃ banasɔɔ hɩɩndaar. 17Dɩ a buleele balãther: Sɩmɔ̃ Jonasɩɩ bikuun, fɩ na mɛr bɛ? Dɩ Pɩɛr gbobi gɩrɛraakɛ Jeju buleeni balãther ɓoɓo: Fɩ na mɛr ya? Dɩ a birseere ayɩ: Kɔ̃tɩn, fɩ jɩrɛ thɩ̃ɛ fɛʋ. Fɩ jɩrɛ dɩ mɩ na fɛr. Dɩ Jeju sʋʋraa: Dɩ na khɛ ɩ̃ banasɔ. 18Sobɔr mɩ so far gel, ɔbɔɔkɛ fɩ kɔɔ donɩ daɓolbir fɛr n kɔɔ saa thɩ̃ɛ dɩbara, dɩ fɩ jal ka fɩ‐n ƴaalnɩ. Sɩ ɔbɔɔkɛ fa tɩnɩ fa khəire nyɛ̃ɛ, sɩ tɩɩ kpɩɩ na saa fɩ saa gba fɩ a jalna ka fa‐n ƴaalnaˈ. 19Thale a sonɩ dʋɔn, gɩ nɩnanɛ ga khi caakɛ Pɩɛr na khini a na dʋbɩ Thãgbaa i. Ɔbɔɔkɛ a mɩɩnɩ thale pɩ a sʋʋraarɛ: Na kpa mar.

Jeju na kpãkpãadaarɩkɛ a nanɩ

20Dɩ Pɩɛr kɩɩlɛ a yɩ kpãkpãadaarɩkɛ Jeju nanɩ da‐n kpa war, ɔr dʋɔn kpãkpãadaarɩkɛ n kɔɔ ƴɛlanɩ kũkunə dɩko kho paar, kɛ kɔɔ buleneni aa: Kɔ̃tɩn, amɛ dɔ ʋrɛ na lirena fɩnɩ? 21Ɔbɔɔkɛ Pɩɛr yɩɩnɩ a bulele Jeju: Kɔ̃tɩn, sɩ ʋrɛɛkɛ, anye na danaa? 22Dɩ Jeju birsee: Ado mɩ ƴaal a tɔɔ phaphapha ɩ̃ bir ɩ̃ ɩna, gɩ ba fɛr ya? Fɛrɛ, na kpa mar dɔrɔɔm. 23Liir tutugore kpaar omɩnaa thɩ̃thɩɩn aa: Kpãkpãadaarɩle na khəˈ. Sɩ Jeju na kɔɔ so dɩ a na khəə ga, sɩ ayɩ aa, ado ɩnɩ ƴaal a tɔɔ a danana ɩnɩ bir ɩ̃ bɔɔ, gɩ baarɛ ya?

24Ɔr dɔ kpãkpãadaarɩkɛ mɩanɩ ga thɩ̃sɔɔkɛ sa khere gɩ. Dɩ sɩ jɩrɛ dɩ ɔɔ sobɔ so jɩ thɩmɩɩra a mɩɩnɩ, sobɔr gɩ do.

Pɩpɩɩ thɩmɩɩr

25Jeju cʋʋrɛrakɛ wo thɔ̃ kpɩɩsɔ jɔɔjɔɔ. Ado wɩ yɩ wɩ khera gɩ fɛʋ kpa kha kpa kha, ma pɛr haar thɩɩ thɛthɛɛkɛrakɛ yɛrɛ na marrɛ na fʋrɔ gelela wa kherenaˈ.

Currently Selected:

Jã 21: LOBIRI

Highlight

Copy