Jã 19

1Le Pɩlatɩ gba Jeju a ciil na khasa. 2Dɩ sɔrasɛsɔ kɔɔ gba uu a kɛr dɩɩ ho fãgadaar kpɩɛr, dɩ wɩ subuu yʋɔ, sa gba darã sɩɛ a tʋʋ; 3agɩpɩ dɩ wɩ tɔ wɔrɔ̃ɔ sɩ wa‐n sʋʋraa: Gba fʋɔrɛ Juifi fãgadaar; sɩ agɩpɩ dɩ wa‐n ɓaalɛɛ.

4Dɩ Pɩlatɩ bir the wo a so Juifisɔra ayɩ: Nɩ hɩnɛ, mɩ thenaanɛ dɩ mɛ̃ na jɩ dɩ ma yɩɩraa thɩ̃ɛɛkɛ teananɩ wɩ heenuu soraˈ. 5Dɩ mɛ̃ Jeju the a suu uu yʋɔ dɩɩ ho fãgadaar kpɩɛr, a tona darã sɩɛ. Dɩ Pɩlatɩ so war: Nɩ hɩnɛ kuunnaakɛ.

6Ɔbɔɔkɛ bonɩ jidaar kɔ̃tɩna na gardɛsɔ yɩɩnɩ, wɩ hulene ayɩ: Gbaanɛɛ kpa kʋkʋ thɩrʋra. Gbaanɛɛ kpa kʋkʋ thɩrʋra. Dɩ Pɩlatɩ so war: Nɩ gbaanɛɛ anɩbara a kpa kʋkʋ thɩrʋrara, gɩdonɩ me wer, ma yɩɩraa thɩ̃ɛɛkɛ teananɩ wɩ heenuu soraˈ. 7Dɩ Juifisɔ birsee: Sɩ hananɛ jɔfʋ, dɩ ado mɔ̃ asɩ jɔfʋ hanɩ gɩ, gɩ teenanɛ a khi gɩdonɩ ayɩ, Thãgbaa Bikuun ha nɩ.

8Dɩ ɔbɔɔkɛ Pɩlatɩ nɩɛnɩ thɩmɩɩrɩle, maar fʋʋrɛ dɩ ga‐n pɛr. 9Dɩ a bire lõ gobanɛrɩ cɔ a bule Jeju: Ka fɩ therakɛ tɔr? Sɩ Jeju na deeraa nʋɔaˈ. 10Le Pɩlatɩ sʋʋraa: Mɛr mɩana fɩ dɩ fɩ pɩr pɔbɩ? Fa jɩ dɩɩ do mɩ hananɛ punone a na faana fɩ, dɩ mɩ hananɛ punone wo a na kpana fɩ kʋkʋ thɩrʋra gaa? 11Dɩ Jeju birsee: Fa hana punone mɛrɛra saagado Thãgba hana faa ga. Gɛr gɩ ʋrɛɛkɛ kɔɔ gbaan mɩnɩ a ha fɩ, a cʋʋrɛ sopugo dɩɩ kɔ̃tɩ̃ a jɔ.

12Dɩ a fʋna ga bɔɔlera Pɩlatɩ n ƴaalɛ hʋɛ sɩ a fagʋʋ, sɩ Juifisɔ na‐n hulẽ aa: Ado fɩ fagʋʋ, fa do Sejaarɩ kuunaˈ. Mee, tibil wo tibilikɛ yɛnɩ fãgadaar ha nɩ, Sejaarɩ lãlaardaar a do. 13Ɔbɔɔkɛ Pɩlatɩ nɩɛnɩ ga thɩmɩɩle, a kpar Jeju a thena phiilo a toona kɩɩl paar, paar gɩɩkɛ wɩ mɩnɩ na bokana, kɛ wɩ‐n wenɩ na ebirə thɩmɩɩr Gabata. 14Sɩ Pakɩ gbɛbɩ bɔɔ gɩ kɔɔ do, dɩ gɩ thɔɔrɛ ʋlkhɔɔ. Dɩ a sor Juifisɔra: Nɩ yɛ anɩ fãgadaarra. 15Sɩ wɩ hulene: Kʋɔ, kʋɔ, gbaanɛɛ kpa kʋkʋ thɩrʋra. Dɩ Pɩlatɩ bir bule wi: Ɩ̃ kpa anɩ fãgadaar kʋkʋ thɩrʋra ya? Sɩ bonɩ jidaar kɔ̃tɩnasɔ birsee ayɩ: Sa hana fãgadaar kpɩɩ saagado Sejaar gaaga. 16Liir a faa Jeju a ha wɩ wɩ kpaanɛɛ kʋkʋ thɩrʋra. Dɩ mɛ̃ wɩ kpa Jeju a jalna.

Jeju kʋkʋ thɩrʋra

(Mat 27:32–44; Mar 15:21–32; Lu 23:26–43)

17Dɩ Jeju gba ɔɔ kʋkʋ thɩr a thena a jalna paarɩkɛ wɩ‐n wenɩ Yʋ khubu, sɩ wa‐n wena ebirə thɩmɩɩr Gɔlgɔta. 18Liir wɩ kɔɔ kpaa kʋkʋ thɩrʋra na tɩbɩla yenyɔ, bɩɛl ʋ̃ gɛllɔ, bɩɛl ʋ̃ gɛllɔ, sa pɛ Jeju thɩ̃thɩɩn. 19Dɩ Pɩlatɩ kherere dakha sɛbɛ a ɓã kʋkʋ thɩrʋra ƴũ. Khererera sor ayɩ: Najarɛtɩ Jeju, Juifi fãgadaar. 20Juifisɔ jɔɔjɔɔ n kɔɔ sor sɛbɛɛlera kheranɩ, gɩdonɩ paarɩkɛra wɩ kɔɔ kpanɩ Jeju na kɔɔ hʋnɔna Jerujalɛm dɩaˈ; dɩ dakha, ebirə thɩmɩɩr gɩ kɔɔ kherena, na latɛ̃ thɩmɩɩr, na gɩrɛkɩ thɩmɩɩr. 21Dɩ Juifisɔɔ bonɩ jidaar kɔ̃tɩ̃sɔ so Pɩlatɩra: Fa‐n khere thale ayɩ: Juifi fãgadaar ga, sɩ kherene, ɔr yɛ Juifi fãgadaar ha nɩ. 22Dɩ Pɩlatɩ birse wi: Gɩrɛ mɩ ˈlini kherere, mɩ kherere dɛ.

23Dɩ ɔbɔɔkɛ wɩ kɔɔ kpanɩ Jeju kʋkʋ thɩrʋra pɩ, sɔrasɛsɔ kɔɔ gbaar ɔɔ kẽkẽsɔ a tɩnɛ tɩnɛ paar yenã. Sɔrasɛ bɩɛlbɩɛl ˈlɛr oti fɛʋ. Wɩ gbaar dakha ɔɔ delkeba, kɛ bɛbɩ paar na harnaˈ, kẽkẽ bɩɛlla gɩ a fɩ fʋ jɩɩlna ƴũ sɩ dɩɩ dã thɩɩ. 24Dɩ sɔrasɛsɔ mɩɩrɛ kha ayɩ: Sa‐n ɓəərəˈ, sɩ lɩɩ n lɛ sɩ jɩ ʋrɛ na ˈlɛnɩ. Gɩ har mɛ̃ gɩ cʋʋ gɩrɛ kɔɔ kherenenɩ Thãgbaa sɛbɛra gɩ dã oti, gɩ sor:

“Wɩ kɔɔ tɩnɛnɛ ɩ̃ kẽkẽsɔ,

sɩ lɩɩ wɩ kɔɔ lɩ ɩ̃ delkebara.”

Dɩ thalera sɔrasɛra kɔɔ cʋʋ.#Khɩ 22:19

25Sɩ Jejuu nɩ, nakha Marɩ, na Jejuu nɩɩ õkhɛrɩkɛ dɔnɩ Kʋlopasɩɩ khɛr, na Magɩdala Marɩ kɔɔ hale a jɩɩl kʋkʋ thɩr kɩrɔ. 26Mɔ̃ Jeju yɩnɩ ɔɔ nɩ, na kpãkpãadaarɩkɛ Jeju nanɩ, kɛ jɩlɛnanɩ ɔɔ nɩ, a sor ɔɔ nɩra: Khɛr, hɩnɛ ʋrɛ dɔ afɩ bikuun. 27Agɩpɩ dɩ so kpãkpãadaarraale: Hɩnɛ, ʋrɛ dɔ afɩ nɩ. Dɩ a fʋna ɔbɔɔlera, kpãkpãadaarɩle kpaa kɔna ɔɔ pa.

Jejuu khi

(Mat 27:45–56; Mar 15:33–41; Lu 23:44–49)

28A gele pɩ, mɔ̃ Jeju jɩnɩ dɩɩ do thɩ̃ɛ fɛʋ daan pɩ, dɩ mɔ̃ na dɔnɩ nɔɔ gɩrɛ Thãgbaa sɛbɛ sonɩ n ha oti, a sor: Yɔlkhaa fʋ mɛr.#Khɩ 69:21; 22:15 29Dɩ daa kɔɔ hale a hinə ta ƴʋ̃ɔ. Dɩ sɔrasɛsɔ gbaar thɩ̃ɛɛkɛ hɔnɩ tabɩhʋɛ, a mʋʋ ta ƴʋɔna a gar ɩjopɩ ɓalʋʋ, a ˈlaa tʋʋ nʋɔ. 30Ɔbɔɔkɛ Jeju ˈlɛnɩ ta ƴʋɔna a sor: Thɩ̃ɛ fɛʋ pɩrɛ mɛ̃. Sɩ agɩpɩ dɩ gʋɛ yʋʋ sa ˈlaa ɔɔ thu.

Sɔrasɩ kuun gɔr Jeju gɛlʋ

31Sɩ hɩɩr wi dɛɛsɩ wire gɩ kɔɔ do, dɩ ga do wa faarɛ khire kʋkʋ thɩrʋra dawiilaˈ, gɩdonɩ wi kɔ̃tɩ̃ɩ hɩɩr wireele do, dɩ gɛr gɩ dɩ Juifisɔ kɔɔ bɩɛl Pɩlatɩ ayɩ, ado wɩ khaar wɩrɛ wɩ kpanɩ thɩrʋraale nɛɛ pɩ wɩ hɛla wɩ. 32Dɩ gɛr gɩ dɩ sɔrasɛsɔ jal a khaar cacadaar nɛɛ, agɩpɩ na balanyɔdaar, kɛ wɩ kɔɔ kpananɩ Jeju kʋkʋ thɩrʋra. 33Sɩ ɔbɔɔkɛ wɩ danɩ Jeju a yɩɩ dɩɩ do a ˈlire khir, wa khaarʋʋ nɛaˈ; 34sɩ sɔrasɩ kũu bɩɛl kɔɔ gʋɔrɛ gɛlʋ na kpɩla, dɩ dapaara tɔmɩn na nyʋɔn the. 35Dɩ ʋrɛ kɔɔ yɛ gɩnɩ a mɩɩ gɛr, dɩ ɔɔ thɩmɩɩlera a mɩɩnɩ sobɔr gɩ do, dɩ ɔɔ thɛthɛ jɩrɛ dɩ sobɔr ɩnɩ so, dɩ mɛ̃ ga do nɔɔ dɩ nɛrɛ dakha na pɛr haar. 36Gelela daan thale gɩ cʋʋ gɩrɛ Thãgbaa sɛbɛ sonɩ gɩ ha oti, gɩ sor: “Ɔɔ khubu bɩɛllakɛ na kha ga.”#Thɩɩ 12:46; Ther 9:12; Khɩ 34:21 37Dɩ Thãgbaa sɛbɛ bire so pa kpɩɩ wo ayɩ: “Ʋrɛɛkɛ wɩ kɔɔ gɔnɩ, wa bir wa‐n hɩɩn.”#Jak 12:10; Nɩr 1:7

Mɔ̃ wɩ dʋnɩ Jeju

(Mat 27:57–61; Mar 15:42–47; Lu 23:50–56)

38A gele pɩ, Jojɛfɩɩkɛ thɛnɩ Arɩmate, kɛ dʋɔnnɩ Jejuu kpãkpãadaar wolonena gɩdonɩ Juifisɔ n kʋɔ maar, ɔr bɩɛlnɛ Pɩlatɩra hʋɛ sa a hɛl Jejuu forra. Dɩ Pɩlatɩ kɔɔ haarɛ hʋɛ. Dɩ gɛr gɩ dɩ jal a hɛl Jejuu forra. 39Nɩkɔdɛmɩkɛ kɔɔ jalanɩ Jejuu pa mamara dɩtɩnɔ, kɔɔ gbaar thɩ̃ɛɛkɛ hɔnɩ latɩkolo ni caar, kɛ nyanyaananɩ tomɩ#19:39 Tomɩ bʋl thɩɩ: Latɩkolo ni caar gɩ, kɛ Juifisɔ n bʋlnɩ khire a li sa dʋ. bʋl thɩɩ, kɛ thɔɔnɩ kilə kpelẽ yʋɔr a pɔna.#Jã 3:1–2 40Dɩ wɩ kɔɔ gba Jejuu forra a paarna kẽkẽ gborõbireekɛ wɩ pɛrnɩ thɩɩsɔɔlera, gɩdonɩ thale Juifisɔɔ fɩl ha wɩ‐n dʋnanɩ khire. 41Sɩ nãkʋɔr kɔɔ hale kãkɛra wɩ kɔɔ kpanɩ Jejura kʋkʋ thɩrʋra. Dɩ le nãkʋɔrraalera ka phaa kɔɔ hale ka wa kɔɔ dʋnɩ tibil paˈ. 42Gɩdonɩ Juifisɔɔ hɩɩr wi dɩɛsɩ wi gɩ, dɩɩ do kaa hale a wɔrɔ̃, gɛr gɩ dɩ wɩ gba Jeju a dʋ le.

Currently Selected:

Jã 19: LOBIRI

Highlight

Copy