Luk 8

Lomu go Jézu zuo

(Mk 15:40–41)

1’Bɛ zuo Jézu gié kuru ’léénu valé wolé flanu ta Kazambale lé we fele valé Kazambale plale mi nwiin lé wenéné fele nya; ’té mi vu ta fié a a va, 2é valé lomu lé é yonu si wo gi yé é gyɛnu si wo ma bɛ, wo nya. Magadala le Mari lé Jézu yo sɔrafié si ’bɛ gi, ’bɛ koo, 3Érɔd leezan Suza na Jane koo, Suzane valé le bɛnu lé woo bɔa a va ’wo leefɛ nɔle nya a lɛ, ’bɛnu koo, woo lé.

’Savɔzan ma gɔné vɔle

(Mt 13:1–9; Mk 4:1–9)

4Mi gu blɛn zén aan wo ékeva, yé munu si fla bɛnu ta yé wo da a va yé é gɔné do vɔ wo lɛ. É léé:

5’Savɔzan go ’sa vɔ lɛ. É a ’sa nwɛɛnna aan wo a wɔlɛ kenu dia zi sɔnɔ; munu a zɔn ’wo gane nya yé mianénu a ble. 6A wɔlɛ kenu dia gɔlɛ ta; a wuo tɛrɛ ’ka drɔɔdrɔɔ lo, bɛwemalé a vɔnɔ bɔrale tɔɔn, yé é ga. 7A wɔlɛ kenu dia lélinu va; yé wo tin ’bɛnu nya ékeva, yé ’bɛnu wo tunu. 8A wɔlɛ kenu dia tɛrɛ zima ta; wo tin aan wo, a nɛnɛ do wɔlɛ kɛlɛ yɔ soru. ’Bɛ zuo, Jézu é dére bié yé é léé: Mi lé we ’ma tɔné ke a ’wuo ma, ’bɛzan a ’ma ma.

Wean ma lé Jézu éé gɔné vɔa

(Mt 13:10–17; Mk 4:10–12)

9A zuomunu gɔné vɔle ’ko gi laa a lee. 10É lé wo lɛ léé: Wa se kɛlɛ ka lɛ léé, ka Kazambale plale mi nwiin lé weyɔɔlenu dɔɔ; naa, woo mi bɛnu zé fé gɔné vɔlenu nya, léé, dé wa nagini, wo ’ka a yé lo; dé wa ’ma, wo ’ka a gi maan lo.

Jézu ’savɔzan ma gɔné vɔle gi fe

(Mt 13:18–23; Mk 4:13–20)

11Gɔné vɔle ’ko gi lé é ke ’ko: Vɔ’sawɔlɛ a Bale dére nya. 12Wo lé wo zana zi sɔnɔ bɛ, wa munu lé woo we maan, wo nya; ’bɛ zuo yo éé dan, yé é Bale dére si wo bli gi, dé wo da wo bli vo a lɛ yé wo si we gi. 13Wo lé wo dia gɔlɛ ta, wa munu lé woo Bale dére maan yé wa sié gi nanale nya, wo nya; naa, wo suni ’ka goo baa lo, woo bli voo Bale dére lɛ bléyi sɛ nya, yé woo diaan mi gidanbléyi va. 14A wɔlɛnu lé wo dia lélinu va, wa munu lé woo Bale dére maan, wo nya, yé dé wo go, tɛrɛ ’ko la gibɔrɔpalenu valé alé fuafɛnu valé alé ginanamawenu koo, woo dére tunuan wo bli gi, yé wo faa éé voo é pia nya. 15Yee lé é dia tɛrɛ zima ta, wa munu lé woo dére maan bli tegele valé bli zin nya, wo nya, yé éé voo wo gi, ’té wo wɔlɛ éé baan yarapalale nya.

Wo ’ka bɔ buaan kyɛbɔ ta lo

(Mk 4:21–25)

16Mian éé kyɛbɔ bié yé é a wɔra bɔ wuo, dé ’bɛ kaan lo yé é a wɔra yialafɛ wuo, ’bɛzan ’ka lo; naa, éé a dɔraan kyɛbɔ dɔrana, munu lé woo wɔraan, wolé a san yele we gi. 17Fɛ lé ke é yɔɔle yé a ta ’ka dan bɔra lɛ lo, ’bɛ fɛ ’ka lo; yé kyeengiwe lé ’bɛ ’ka dan bɔra lɛ lo, ’bɛ ’ka lo. 18Bɛwemalé ’ka yuɛ pa kalé wemabɛ va; wo dan fɛ nɔ lɛ mi lé fɛ ke a lee, a lɛ, naa, mi lé azé ’ka lo, fɛ lé é dɔ a gi léé, é a ézé nya, wo dan ’bɛ si lɛ a lee é ziin.

Jézu bu valé a zuanénu

(Mt 12:46–50; Mk 3:31–35)

19Jézu bu valé a zuanénu da; naa, wo ’ka bɔ lɛ biéle lɛ a sɔnɔ mi gu lé we ma lo. 20Yé wo lé a lɛ léé: I bu valé i zuanénu a béera yé wa a va léé, ’wo i ye. 21Naa, é lé wo lɛ léé: An bu valé an zuanénu lé ke munu lé woo tɔné dɔa Bale dére lɛ, ’té wa ta tawoo, wo nya.

Jézu fu dɔ

(LvS 107:23–31; Mt 8:23–27; Mk 4:35–41)

22Yi do nya Jézu valé é zuomunu vɔ ’yitagoro gi. É lé wo lɛ léé: Kaa wɛyi kini. Yé wo go. 23Bléyian va lé wo ke ’yitagoro vɔna Jézu yi gyɛ. Yé fu blɛn gié wɛyi ta yé ’yi bo bɔ ’yitagoro gi yé é vo sɛ yé wo zamaga wo. 24Wo bié yé wo Jézu vuo a fele nya léé: Kozan, kozan, ga lé ko wo ’ko! Yé Jézu vuo yé é we fe fu valé ’yi nwalenu lɛ yé ’bɛnu dɔ flee yé fɛ faa vo drɔɔɔ. 25A zuo é lé wo lɛ léé: Kalé blipale a kyɛɛn? Kana zén wo gi yé wo gi vuru yé wo lé ’wo ke lɛ léé: Mi kaa lé ke ’ko, yé éé we fé fu valé ’yi boen lɛ, ’té wa lɛdɔamaa?

Jézu yoagizan béli Jérazé

(Mt 8:28–34; Mk 5:1–20)

26-29Yé wo bɔ Jérazé munu lé tɛrɛ lé é ke Galilé tɛrɛ yara ma bɛ, a ta. Jézu zun aan wo tɛrɛ va, flazan do lé yo kiɛre ke a gi, ’bɛ da a va. Ana mɔn é kyɛn, ’té ’bɛ ’ka sɔ zén‐é é ta lo, ’té ’bɛ ’ka nyanaan kɔn gi lo, ’té ’bɛ éé nyanaan mi pana. Gɔnɔ kiɛre nya wa yerean gɔgɔbale nya, ’té woo foliɛwɔlɛ bale vɔa a gane ma, ’té éé wo kinié é ma yé yo é go a nya bwi gi. Jézu yo tiridɔle béli dɔ léé, ’é si mi ’ko lé é nyana a gi é kyɛn bɛ, a gi. Gɔnézan Jézu ye aan wo, é siaa yé ébo dia a gane ma yé é lé dére plɛplɛ nya léé: Loruzan Bale Be Jézu, mɛmalé i we kolé we maa? Ilé zanté, té i nyané pa an ta lo. 30Jézu a laa a lee léé: I tɔ lé nɔɔ? É lé a lɛ léé: Wo an laama Léjɔn. Yo kiɛre a a gi, amalé é a fe. 31Yé yee yo tiridɔlenu lé Jézu lɛ léé: Ilé zanté, ilé weai, té bé fe léé, ko go guru lé a wɔlɛ ma nyaana ’ka lo, a gi lo. 32Suru palu blɛn do a fɛblena gɔ bɔn la. Yé yonu zanté vɔ Jézu ma léé, é zi nɔ ’wo lɛ léé, ’wo wɔra suru ’konu gi. Yé é zi nɔ wo lɛ. 33Yonu si gɔné ’ko gi yé wo wɔra surunu gi yé suru palu go vlan nya yé wo gɔ nyé zunle wééé zun za ma yé wo zén wɛyi blɛn va yé wo ga a va. 34We lé é bɔ bɛ, suru tabinmunu a ye aan wo, wo ’wii vlan nya yé wo we ’ko nwɛɛn fla valé é zi tɛrɛ faa la. 35We lé é bɔ, munu go a nagini lɛ. Wo da Jézu va yé mi lé yonu si a gi bɛ, wa ye é nyanale Jézu gane ma, sɔ nya é ta, ’té a ’wuo gi a é pla; yé di kini wo gi. 36We lé é bɔ yoagizan ma yé é béli bɛ, munu lé wo ana ye, ’bɛnu a zuo fe wo lɛ. 37Kana blɛn zén Jérazé tɛrɛlamunu faa gi, amalé wo faa lé Jézu lɛ léé: ’I go, té i vo ko va ’ko lo.

Jézu vɔ ’yitagoro gi yé é nɔla é pa gi. 38Naa, gɔnézan lé yonu si a gi bɛ, é zanté vɔ Jézu lɛ léé: ’An vo i va. Naa, Jézu a pa zia yé é léé: 39’I go ilé kɔn ’léé, yé we faa lé Kazambale a kɛlɛ i lɛ, bé zuo fe. É go, yé we faa lé Jézu a kɛlɛ a lɛ, é a faa zuo fe fla fɛfaana.

Jairus lu valé le lé é bɛ mane Jézu lé sɔ ma

(Mt 9:18–26; Mk 5:21–43)

40Mi faa a Jézu lɛbɛnna turu amalé é da aan wo wo va a dale sɔ wo lɛ é baba. 41-42Yé bazorokɔnzan do lé wa laama Jairus, é da. A lu a gana; yee ɛ ke a lu nya é do kpen, dé a lɛɛ a vu ta fiéé? amalé ébo dia Jézu gane wuo yé é zanté vɔ a ma nyanaizénla dére nya léé, ’bɛ é go élé kɔn ’léé. Bléyian va lé Jézu a gona ana, yé mi gu a tunu.

43Naa, lezan do ana, é vɔ lomu va lɛɛ vu ta fié, ’té é ’ka sié a ma lo, yé élé gɔɔli faa sɛrɛ dɔtrɔnu va, yé wo va mi do kpen ’ka bɔ lɛ a bélile lɛ lo. 44É bié Jézu ma a zuo zia yé é bɛ mane ’bɛlé sɔ lɔlu ma. A bléyi duo nya tɔɔn a nyɛ bɔle kini. 45Yé Jézu léé: De ɛ bɛ mane an maa? Wo faa a fena léé, ’wo kaan lo, yé Piɛri valé é bɔlunu léé: Kozan, mi gu i zi lɛ sɔɔ yé wo i tunu yé i léé, de ɛ bɛ mane ’é maa? 46Naa, Jézu léé: Gba, té ka fe ’bɛ zo lo. Mi do é bɛ mane an ma, naa, maa a gi dɔɔ léé, anlé plɛplɛ do nyanama pa. 47Lezan a ye aan wo léé, é ta bɔra, é da gligli nya é gi, yé é dia a gane wuo yé wean ma lé é bɛ mane a ma koo, yé bɛan zo lé é béli é nya do koo, é ’bɛ gi fe munu faa lɛ. 48Jézu lé a lɛ léé: An lu, ilé blipale ma lé i béli; ’i go drɔɔ ma.

49É a tan wefena aan wo mi do si bazorokɔnzan lé kɔn ’léé yé é léé: I lu ga. Té i Mizan wɔlɛ gi nyaa ’é ma é dɛrɛ lo. 50Jézu ’bɛ ’ma aan wo é lé bazorokɔnzan lɛ léé: Té i kana lo; i bli ’é vo an lɛ é pla yé i lu é dan béli lɛ. 51Wo bɔ aan wo kɔn ’léé, Jézu ’ka a nyi si lɛ léé, mi do kpen é wɔra é va lo, ’té dé é ’ka Piɛri koo, Jan koo, Jak koo, né ti valé né bu koo, wo nya lo. 52Munu faa a wuvɔna né zi ’té woo siaan. Yé Jézu léé: Té ka wuvɔ lo; é ’ka é gale lo, naa, é a yi gyɛna. 53Wa gi dɔɔ léé, é ga, amalé wo Jézu ma we nana. 54Naa, Jézu kun né bɛ ma yé é siaa dére plɛplɛ nya léé: Blɛnné, ’i nwa! 55Yé né léli wɔra é gi tɔɔn, é nwa yé Jézu léé, ’wo fɛblele nɔ a lɛ. 56Blɛnné yaazannu ’léé ma ’wo ma yé Jézu lé wo lɛ léé: Té ka we ’ko glewo mi do kpen lɛ lo.

Currently Selected:

Luk 8: GOURU

Highlight

Copy