Luk 9

Jézu mi vu ta fié nwunvɔ

(Mt 10:5–15; Mk 6:7–13)

1Jézu mi vu ta fié zén aan wo ékeva yé é plɛplɛ nɔ wo lɛ, yé é a se kɛlɛ wo lɛ léé, wo yonu faa kele yé é gyɛgyɛmunu béli plɛplɛ nɔ wo lɛ é ziin. 2É wo nwunvɔ Kazambale plale mi nwiin lé we fele valé gyɛgyɛmunu bélile we gi. 3É lé wo lɛ léma: Té ka go tawofɛ do kpen nya ka lee lo; yili koo, bala koo, buru koo, gɔɔli koo, té ka go wo do kpen nya ka lee lo, yé té ka go varɔ fié nya lo. 4Dé ka go kɔn‐an ’léé, dé wo ka si bɛn nya, ’ka vo ana fɔɔ yé ka goyi é bɔ. 5Dé munu ’ka ka bɛn si lɛ lo, ’ka si fla ’ko la yé ’ka wo ma we fe wolé fla vungoi puole nya ka gane ma. 6Wo go yé wo gié fla faa do do ta, wenéné fele nya, é valé mi bélile nya fɛfaana.

Mi batizéwozan Jan gale

(Mt 14:1–12; Mk 6:14–29)

7We faa lé wo ke bɔna, gyamalati Érɔd a ’ma, yé we lé é dɔ a gi we ’konu ma é ’ka a gi dɔɔa lo, naa, mi kenu léé, Jan nwa gamunu va; 8yé a bɛnu léé, Éli bɔra munu va, yé a koɛnu léé, balelayezan vinin do lé é nwa gale va, yee lé. 9Naa, Érɔd léé: An Jan ’wuo kini ’naan, mi ’ko lé maa a kɛlɛwe ’ko zoɛ ’ma bɛ, de ɛ ke ’bɛ nyaa? Yé é a kwa kulina léé, ’é a ye.

Jézu fɛ nɔ mi baa fié wuru soru lɛ

(Mt 14:13–21; Mk 6:30–44; Jn 6:1–14)

10Nwunvɔzannu da aan wo wo pa gi Jézu va, wo ’wo zuo faa fe a lɛ. É wo si yé é go wo nya é yɛrama, fla do lé wa laama Bɛtsaida, a sɔnɔ. 11Mi gu ’bɛ ’ma aan wo yé wo go a zuo. Jézu wo si yé é Kazambale plale mi nwiin lé we fe wo lɛ, yé é ziin, munu lé wo mawe ke bélile gi, é wo béli.

12Yiri bɔ aan wo baa, mi vu ta fié bié yé wo lé Jézu lɛ léé: Kaa a bwi gi ’ko, amalé ’i munu pa zia, ’wo go flanu valé ’wo zi féinu ta yiakɔn valé fɛblele yele we gi. 13Jézu lé wo lɛ léé: Kabozen, ’ka fɛblele nɔ wo lɛ. Yé wo léé: Buru soru valé pɔ fié saa ɛ ke ko lee, ’naan, ’ko go munu ’konu faa lé fɛblele lɔɔ? 14’Té woo mi baa fié mi wuru soru bɔa. Jézu lé é zuomunu lɛ léé: ’Ka wo nyana é bale nya bale nya, mi yɔ fié wɔlɛ vu vu. 15Wa kɛlɛ a zo yé wo munu faa nyana. 16Jézu buru soru valé pɔ fié si, yé é yara nwa lagi zia yé é Kazambale bɔ vɔ. Yé é a bɔi yé é a nɔ é zuomunu lɛ, wolé a nɔle mi gu lɛ we gi. 17Wo faa fɛ ble yé wo kan, yé wo kyɛɛné vu ta fié fan a kurunu lé wo vo, a nya.

Piɛri Jézu ta bɔra

(Mt 16:13–19; Mk 8:27–29)

18Yi do nya Jézu go é yɛrama yé é bazoro. A zuomunu a a va, yé é we laa wo lee léé: Mi gu léé, maa a de nyaa? 19Wa zi pa a lɛ léé: Wo léé, bii a mi batizéwozan Jan nya; mi kenu léé, bii a Éli nya; yé a koɛnu léé, bii a balelayezan vinin do lé é nwa gale va, a nya. 20É lé wo lɛ léé: Yé ka lé nɔɔ? Piɛri léé: Bii a Kazambale lé Krist nya. 21Jézu a yi ga wo lee plɛplɛ léé, té wa fe mi do kpen lɛ lo.

Jézu é gale fale vɔ

(Mt 16:20–28; Mk 8:31—9:1)

22Yé é we taa fe léé: É a lé maa blami Be, an nyané ble é baba; é a lé mi segelenu koo, Balebanmunu segelenu koo, sɛbɛgifemunu koo, wo sɔn vɔ an ma; é a lé wo an gyɛ yé yi fié a yaazan nya yé an nwa gamunu va.

23A zuo é lé wo faa lɛ léé: Dé é sɔ mian lɛ léé, ’é da an zuo, ’é bli si ébozen lɛ, yé ébo lé yiliblan sia tu valé é kinile ma yé ’é da an zuo. 24Naa, mian é sɔ a lɛ léé, é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi anlé we ma, ’bɛzan é dan ézé ye lɛ. 25Dé mi tɛrɛlafɛ faa ye, dé ébozen sɛrɛ yé ébozen san, ’bɛ tɔnɔ lé é ke mɛ fɛ nyaa? 26Naa, mian é yara gya maa valé an dérenu lé we ma, yara é dan maa blami Be gyɛ lɛ ’bɛzan lé we ma, yian nya lé an dan da lɛ, maabozen koo, an Ti koo, lanje sauunnu koo, wolé fua gi, a yi nya. 27Munu lé ke ’ko, wo va mi kenu ’ka dan ga lɛ lo fɔɔ yé wa ye léé, Kazambale a é plale munu nwiin. Maa fe ka lɛ.

Jézu dɔbɛ nɔla gɔ nwiin

(Mt 17:1–8; Mk 9:2–8; 2 Pi 1:16–18)

28Alé we ’konu fele zuo, dé yi sɔraa giéle léé? Jézu go Piɛri koo, Jan koo, Jak koo, wo nya ’é va gɔ torole nwiin bazoro lɛ. 29Jézu a bazorona aan wo a yara dɔbɛ nɔla yé alé sɔ kinin sɔ fu tata nyananyana nya. 30Yé mi fié vo glewona a va; Moizi valé Éli lé. 31Wo da fuasan gi yé go lé é dan wo lɛ Jérusalɛm bɛ, ’té wana glewo. 32’Té yi vɔ Piɛri valé é bɔlunu yuɛ la; naa, wo vuo aan wo tɔɔn yé wo Jézu lé fuasan valé é va mi fié ye. 33Bléyian va lé munu ’konu a sina Jézu va, Piɛri lé a lɛ léé: Anzan, kaa vole ’ko a é zima; kaa ban yaa dɔ ma, izé do, Moizi zé do, Éli zé do. We lé é ke a fena é ’ka a gi dɔɔa lo. 34É a we fena ’bɛ zo aan wo, lafu tua wo nwiin; zuomunu wobo ye aan wo lafu worona, kana zén wo gi. 35Yé Bale we fe lafu gi yé é léé: Mi ’ko a an Be lé maa a si a va, a nya. ’Ka tɔné dɔ a lɛ. 36Bléyian va lé wo dére ’ko ’ma, ’té Jézu vo é do. Zuomunu ’wo tadɔ, yé we lé wa ye wo ’ka a do kpen fe lɛ mi do kpen lɛ ’bɛ bléyi va lo.

Jézu yo tiridɔle si né gi

(Mt 17:14–21; Mk 9:14–29)

37’Bɛ é tu kini, wo si aan wo gɔ nwiin mi gu da Jézu va. 38’Té mi do éé siaan mi gu worona léé: Anzan, ilé zanté, ’i yuɛ vɔ an be ta, naa, é a an be wɔlɛ do kpen nya. 39Yo do a kunwo, ’té éé siaan, ’té yo a sunsun dɔa, ’té a ’léé buiɛ éé dɔa; yé dé é nyɛ dɔ a kɔlɛ gi faa yé a daanle a ma a tɔntɔn. 40Maa zanté vɔ i zuomunu ma léé, ’wo yo si a gi, yé wo ’ka bɔ lɛ a lɛ lo. 41Jézu léé: Blipaanlo bɛn, zirizobɛn, ka léé, an lɛɛ nɔɔ ɛ kɛlɛ ka va faa ’lɛ yé ka bli é vo an lɛɛ? Ka léé, maa kɛlɛ kaa? ’I da i be nya ze. 42Dé né bié yo tiridɔle a dia tɛrɛ va yé é a sunsun dɔ. Jézu siaa yo tiridɔle ta, yé é nézan béli yé é a nɔ é ti lɛ. 43Yé wo faa gi vuru Kazambale lé plɛplɛ blɛn ma.

Jézu é gale fale vɔ é ziin

(Mt 17:22–23; Mk 9:30–32)

Bléyian va lé mi faa do do a Jézu ze vɔna we faa lé é ke a kɛlɛna bɛ, a ma, Jézu lé é zuomunu lɛ léé: 44’Kaanu, ’ka tɔné dɔ we ’ko lɛ é zima ma: wo dan maa blami Be pa lɛ munu lee. 45Naa, a zuomunu ’ka we ’ko gi ’ma lɛ lo; a ta a é yɔɔle wo lee, té wa gi ’ma lo we gi; yé wo kana we ’ko gi laale ma a lee.

Mi kyɛn ɛ ke blɛn é mini é bɔluzannu taa?

(Mt 18:1–5; Mk 9:33–37)

46Wa za vɔna wo worona léé, dé wo va mi kyɛn ɛ ke mi blɛn nyaa? 47Jézu wo bli giwe dɔɔ aan wo é né kiéné do si yé é a dɔ é sɔnɔ yé é lé wo lɛ léé: 48Dé miomian éé né kiéné ’ko sié anlé we ma, ’té éé maabozen sié é ziin; yé mian éé an sié, mi lé é an pa zia éé ’bɛzan sié. Naa, mian é ke kiiéné ka faa méléna, yee ɛ ke mi blɛn nya.

Mi lé é ’ka ka ma lo, é a ka va

(Mk 9:38–40)

49Yé Jan léé: Anzan, ko mi do ye yonu sina munu gi i tɔ nya yé ko a yi ga a lee. É ’ka ko va lo, ’bɛzama. 50Jézu lé a lɛ léé: Té ka a yi ga a lee lo; naa, mi lé é ’ka kamazan nya lo, é a ka va.

Samari fla do sɔn vɔ Jézu ma

(Mi N 20:14–21)

51Jézu sile tɛrɛ la bléyi bɔ aan wo é pu, a yara a é pale a ta léé, ’é go Jérusalɛm. 52É nwunvɔzannu nwunvɔ é ’lɛ yé wo zi sia yé wo bɔra Samari fla do la, a yiana ma’lɛrɛle we gi. 53A yara a é dɔle Jérusalɛm zia, amalé Samari munu ’ka a vole ’wo va nyi si lɛ lo. 54A zuomunu Jan valé Jak, wo ’bɛ ye aan wo, wo léé: Mizan, é sɔ i lɛ léé, ko kyɛ laa léé, ’é si la gi yé ’é wo blee? 55Jézu nɔla wo va yé é we pla wo lɛ a fele nya léé: Bli lé ka ke we kɛlɛna a nya, ka ’ka a dɔɔa lo. 56Naa, maa blami Be, an ’ka da lɛ munu bozennu saanle we gi lo, naa, an da wo sile we gi we ma. Yé wo go fla bɛ la.

Munu lé é sɔ wo lɛ léé, wo go Jézu zuo

(Mt 8:19–22)

57Bléyian va lé wa gona zia mi do lé a lɛ léé: Dé i go fɛofɛana, ’maa goo i zuo. 58Jézu lé a lɛ léé: Kwanénu yɛrɛ a, yé mianénu kɔn a, naa, maa blami Be, an yiana ’ka lo. 59É lé a bɛ lɛ léé: ’I da an zuo. Yé ’bɛ léé: ’I zi nɔ an lɛ yé an go an ti pa é vinin faa lɛ. 60Jézu a zi pa a lɛ léé: ’I mi galenu vo yé wo ’wozé migalenu pa, yé bii, ’i go Kazambale plale mi nwiin lé we fe. 61A bɛ léé: Anzan, maa dan go lɛ i zuo, naa, ’i zi nɔ an lɛ é vinin yé an go anlé kɔngimunu yai vɔ. 62Jézu lé ’bɛ é lɛ léé: Dé miomian kun gwané yili ma, ’té éé zuo naginian, wɔrale Kazambale lé fuatɛrɛ la ’ka a nyɛɛ lɛ lo.

Currently Selected:

Luk 9: GOURU

Highlight

Copy