Jan 12

Lezan lasikɔrɔ zén Jézu ma Bétani

(Mt 26:6–13; Mk 14:3–9)

1Dé é vo yi suiɛdo yé wo Taboyi lé fɛti pélisia, Jézu go Bétani, fɛana lé é Lazaa nwa gamunu va, ana. 2Wo fɛ kɛlɛ a lɛ ’bɛna é nyanadi; Maate fɛ nɔ wo lɛ yé munu lé wo ke fɛblena Jézu va, Lazaa a wo va mi do nya. 3Lasikɔrɔ lé é ke nari bozen nya é vlɛ nya blɛn, kilo buu nya, Mari a si yé é a zén Jézu gane ma, yé é a ganenu ma boo é nwin nya. Yé lasikɔrɔ gin kɔn ’ko fan. 4Jézu zuomi do, Kariɔtzan Simɔn be Judas, mi lé é dan yee Jézu pa lɛ munu lee bɛ, é léé: 5Mɛmalé wo ’ka lasikɔrɔ ’ko dan lɛ dénié wuru do yɔ soru va yé wa mafɛ nɔ nyanégyɛmunu lɛ loo? 6É ’ka kɛlɛ lɛ léé, nyanégyɛmunu lé we gi bɔrɔ a a ma, ’bɛ we ma lé é a fe lo; kyeenzan lé ke a nya; kolé gɔɔlipabala a yee ɛ lee, yé fɛ lé ko paan a gi, éé ’bɛ sié, bɛwemalé é a fena. 7Naa, Jézu léé: ’Ka daan lezan ’ko ma. É lasikɔrɔ ’ko tadɔ turu an payi lé we ma. 8Nyanégyɛmunu a ka va yifaama; naa, maa ’ka ka va yifaama lo.

Wo Lazaa ma we ble

9Juifi mi kiɛre a ’ma léé, Jézu a Bétani, yé wo da ana. Wo ’ka da lɛ yee saa lé we ma lo, naa, wo da Lazaa lé é ’bɛ nwa gamunu va, ’bɛ yele we gi é ziin. 10-11Juifi mi kiɛri péli si Balebanmunu segelenu va Lazaa lé we ma, yé wo zén Jézu zuo, bɛwemalé Balebanmunu segelenu ’wo gi pa léé, ’wo Lazaa gyɛ é ziin.

Jézu bɔra Jérusalɛm minwiinzan blɛn nya

(Mt 21:1–11; Mk 11:1–11; Lk 19:28–40)

12’Bɛ é tu kini, mi gu blɛn da fɛti la. Wa ’ma aan wo léé, Jézu a dana Jérusalɛm, 13amalé wo yɔlaanu sia yé wo go a si lɛ zia siaale nya léé: Ozana, mi lé é da Mizambale tɔ gi, a drɔɔ ’é vo ma! Izraɛl nwiinzan blɛn drɔɔ ’é vo ma! 14Jézu sokofale boroné do ye, yé é nyana a punu, é a é gyɛle sɛbɛ gi fɛan zo, a zo, léé:

15Siɔn munu, té ka kana monomono lo;

Ka ye, ka nwiinzan blɛn a dana,

É nyanale sokofale tina lé né punu.

16É vinin a zuomunu ’ka we ’konu gi ’ma lɛ lo, naa, Jézu wɔra aan wo élé fua gi, a sele dɔ wo gi léé, wo we ’konu gyɛ sɛbɛ gi alé we ma yé a kɛlɛwenu yee sɛbɛ gi we lɛ sɔɔ.

17Bléyian va lé Jézu Lazaa laa léé, ’é si gɔlɛkoro gi, yé é a nwa gamunu va, munu faa lé ’bɛnu ke Jézu va ’bɛ bléyi va, ’bɛnu alé we fe. 18Munu a ’ma léé, é gyɛzorowe ’ko kɛlɛ, bɛwemalé wo go a si lɛ zia. 19Yé Farizimunu lé ’wo ke lɛ léé: Ka yua bɛ, kalé we ’ko ’ka vɔna a ma lo. Ka ’ka a yé loo? Munu faa go a zuo bii.

Grɛki mi kenu da Jézu nagini lɛ

(Éz 49:6)

20Munu lé wo da Kazambale bɔ lɛ fɛti yinu la, Grɛki mi kenu a wo va. 21Yé wo go Galilé tɛrɛ lé Bɛtsaidazan Filip va yé wo lé a lɛ léé: Kozan, é sɔ ko lɛ léé, ko Jézu ye. 22Filip go a fe lɛ André lɛ, yé André valé Filip go a fe lɛ Jézu lɛ.

23Yé Jézu a zi pa wo lɛ léé: Bléyian va lé wo dan maa blami Be tɔ kɛlɛ lɛ blɛn, é bɔ. 24Maa fe ka lɛ kyɔ webozen nya, ’sawɔlɛ do lé wa vɔ, dé a gɔn ’ka bɔ lɛ lo, é vo é do; naa, dé a gɔn bɔ, éé baan di. 25Mian alé tɛrɛla we ke a lee, é dan vuru lɛ a gi; yé mian alé tɛrɛla za ke a gi tɛrɛ la ’ko, azé ta a é dɔle vole é yuɛma lé a glɛ ’ka lo, a gi. 26Dé é sɔ mian lɛ léé, é anlé nyanama pa, ’é da an zuo ma; yé fɛana lé an ke, ana lé anlé nyanamapazan é dan kɛlɛ lɛ é ziin. Mian éé anlé nyanama paan, an Ti é dan ’bɛzan tɔ kɛlɛ lɛ blɛn.

É a lé wo blami Be dun

(Éz 53:10–12; Ébr 3:7–8)

27Sin, gi bɔrɔ pa an ma. Dé maa dan a fe lɛ nɔɔ? Maa dan a fe lɛ léé, an Ti, ’i an si we ’ko gii? Gba, we ’ko ma lé bléyi ’ko bɔ an ma. 28An Ti, ’i tɔ kɛlɛ blɛn ma.

Yé dére do we la gi yé é léé: Maa a kɛlɛ blɛn, yé maa dan a taa kɛlɛ lɛ blɛn é ziin.

29Mi gu lé wo ke ana bɛ, wa ’ma yé wo léé: Zagele ɛ ban bɛ. Mi kenu léé: Lanje do ɛ ke we fena a lɛ.

30Jézu léé: Wo ’ka dére ’ko fe lɛ anlé we ma lo; kalé we ma lé wa fe. 31Sin, tɛrɛlamunu lé weblebléyi bɔ yé wo dan tɛrɛ ’ko nwiinzan vuli lɛ béera. 32Yé maa, dé wo an si yian ma tɛrɛ la yé wo an dun loru, maa dan mi faa gana lɛ an va. 33É we ’ko fe wo lɛ é gabɛ gɔɔnle wo lɛ we ma. 34Yé mi gu lé a lɛ léé: Ko a ’ma bélidɔwe sɛbɛ gi léé, Krist é dan vo lɛ é yuɛma lɛɛfaama. Yé mɛmalé bii léé, é a lé wo blami Be duun? De ɛ ke ’bɛ blami Be ’ko nyaa? 35Jézu lé wo lɛ léé: San ana é ziin bléyi sɛ nya ka méléna. Bléyian va lé san ke ka va, ’ka tawo, té béli é tan ka ma lo; mi lé é ke tawona gunutinu va, é ’ka é gona dɔɔa lo. 36Bléyian va lé san a ka va, ka bli é vo san lɛ, ka va kinile we gi.

Juifinu ’ka wo bli pa lɛ a lɛ lo

(Lk 9:26)

Jézu we ’konu fe aan wo, é go yé é yɔɔ wo lee baa.

37É gyɛzorowe kiɛre kɛlɛ wo yuɛ va, yé wo ’ka wo bli vo lɛ a lɛ duowo lo, 38dére lé balelayezan Ézai a fe, a lɛsɔɔle we ma. É léé:

Mizambale, de ɛ bli vo kolé wefedére lɛɛ?

Yé de lɛ lé Mizambale élé plɛplɛ nagɔɔn?

39-40Ézai lé é ziin léé:

É wo yuɛ ’wii, yé é wo tɔné gi kɛlɛ yuyu,

Dé wo da fɛ ye ’wo yuɛ nya;

Dé wo da we ’ma ’wo bli gi,

Dé wo da ’wo bli nɔla yé maa wo béli.

Bɛwemalé wo ’ka bɔ lɛ ’wo bli vole lɛ a lɛ é ziin lo. 41Bléyian va lé Ézai Mizan lé fuasan ye, é we ’konu fe, yé é a ma we fe.

42Minwiinmunu méléna, mi kiɛre pa Jézu ta duowo, naa, Farizimunu lé we ma lé wo ka a fe lɛ gɔrɔ la lo, dé ’bɛnu é da wo bɔra bazorokɔn gi. 43Naa, munu lé wo tɔbɔle sɔ wo lɛ é mini Kazambale lé wo tɔbɔle ta.

Jézu dére éé munu lé we blé

(2 BDws 18:18–19)

44Jézu siaa yé é léé: Mi lé a bli vo an lɛ, an lɛan a bli vo lo; mi lé é an pa zia, ’bɛzan lɛ lé a bli vo; 45yé mi lé éé an yé, mi lé é an pa zia, éé ’bɛzan yé. 46Maa ɛ ke san nya, yé maa ɛ da tɛrɛ la léé, dé miomian bli vo an lɛ, é ’ka vo gunutinu va lo. 47Dé mi do an dérenu maan yé é ’ka tawo wo ta lo, maa ’ka alé weblezan nya lo; maa ’ka da lɛ tɛrɛlamunu lé we blele we ma lo, naa, an da tɛrɛlamunu sile we gi we ma. 48Mi lé éé sɔn vɔa an ma, yé é ’ka tawoo an dérenu ta lo, alé weblezan ana; dérenu lé maa wo fe, wo ta lé Bale é dan alé we ble lɛ yi voéla nya. 49Wean maa a fe, anbo ’léé dére kaan lo, naa, we lé é a lé maa a fe, é valé dérenu lé é a lé maa a fe, an Ti lé é an pa zia, yeebozen ɛ a pa an ’léé. 50Yé maa a gi dɔɔ léé, a dére éé mi voo é yuɛma, ’bɛ glɛ ’ka lo. Bɛwemalé, wenu lé maa ke wo fena, maa a wo fena fɛan zo lé an Ti wo pa an ’léé, a zo.

Currently Selected:

Jan 12: GOURU

Highlight

Copy