Jan 11

Lazaa gale

(Lk 10:38–42; Jn 5:21)

1Bétani gɔné do lé wa laama Lazaa, a ma é yaan. Bétani a Mari valé é buru Maate lé fla nya. 2Mari ’ko lé é lasikɔrɔ zén Mizan nwiin yé é a gane ma boo é nwun nya; yee ɛ bwe Lazaa ma ke yaana. 3Lazaa burunu we pa Jézu lɛ zia léé: Mizan, mi lé é sɔ i lɛ, a ma a yaana. 4Jézu we ’ko ’ma aan wo, é léé: Gyɛ ’ko ’ka a gyɛgyɛ nya lo; naa, é a Kazambale tɔ kɛlɛ blɛn we nya, Kazambale Be tɔ kɛlɛle blɛn a gi we ma.

5Maate koo, é zuané koo, Lazaa koo, wo sɔ Jézu lɛ. 6Naa, Jézu a ’ma aan wo léé, gyɛ a Lazaa ma, fɛana lé é ke, é yii é ziin ana fié. 7’Bɛ zuo yé é lé é zuomunu lɛ léé: Kaa go Judé tɛrɛ la é ziin. 8A zuomunu lé a lɛ léé: Kozan, Juifinu a kwa kulina yi la léé, ’wo i gya gɔlɛ nya Judé tɛrɛ la ’naan, yé i léé, ’é go ana é ziin? 9Jézu lé wo lɛ léé: Yi do gi, lɛrɛ ’ka vu ta fié loo? Dé mi a tawona é yiéyi, fɛna a é kinile, bɛwemalé a sɔnéwɔlɛ ’ka saan lo. 10Naa, dé mi a tawona é béli, fɛna ’ka é kinile lo, bɛwemalé a sɔnéwɔlɛ éé saan. 11Dére ’konu fele zuo é lé wo lɛ léé: Kaa béé Lazaa a yigyɛna, naa, ’maa go a wuo lɛ. 12A zuomunu lé a lɛ léé: Mizan, dé é a yiɛna, é dan béli lɛ. 13A gale lé we lé Jézu a fe bɛ, naa, é a wo gi léé, Jézu a yigyɛle pla lé we ɛ fena. 14’Bɛna tɔɔn, Jézu lé wo lɛ kpaklaa léé: Lazaa ga. 15Yé kalé we ma, an gi nana léé, maa ’ka ’bɛna mi lo, ka bli vole an lɛ we ma. Naa, kaa go a va. 16Dére ’ko ta, Tɔmas lé wo wo yaa fiané nya, é lé zuomunu pɔnénu lɛ léé: Kaa go yé kaa ga a va mi.

Jézu a gamunu nwazan valé wo vole é yuɛmazan nya

(Jn 5:26–29)

17Jézu bɔ aan wo, é a ye léé, wo Lazaa pa gɔlɛkoro gi a yi ziɛn lo. 18Yé Bétani ke aan wo Jérusalɛm sɔnɔ, dé kilo yaa ta léé? a zo, 19bɛwemalé Juifinu kiɛre da Maate valé Mari va, wo tɔrɔ paale we gi wo bwe gale lé we ma.

20Maate a ’ma aan wo léé, Jézu a dana, é go a si lɛ zia, ’té Mari a kɔn gi é nyanale. 21Maate lé Jézu lɛ léé: Mizan, dé é kɛlɛ léé, bii ana kɔɔn ’ko, ’té an bwe ’ka gaan lo. 22Naa, sin duowo, maa a gi dɔɔ léé, we faa lé bé laan Kazambale lee, éé a kɛla. 23Jézu lé a lɛ léé: I bwe é dan nwa lɛ gale va. 24Maate lé a lɛ léé: Maa a gi dɔɔ léé, yi voélazan nya é dan nwa lɛ gamunu nwabléyi va. 25Jézu lé a lɛ léé: Maa lé ke gamunu nwazan nya, é valé mi vo é yuɛmazan nya. Mian é bli vo an lɛ, dé é gaoo, é dan béli lɛ. 26Yé dé miomian vo é yuɛma yé a bli vo an lɛ, é ’ka dan ga lɛ monomono lo. I dɔ ’bɛ taa? 27Yé Maate lé a lɛ léé: Iin, Mizan. An dɔ a ta léé, bii ɛ ke Krist nya, Kazambale Be lé, wo léé, é dan da lɛ tɛrɛ la, a nya.

Jézu wuvɔ

(Lk 7:11–17)

28Maate we fe aan wo ’ko zo, yé é go. Yé é zuané Mari laa kyeen gi yé é lé a lɛ léé: Kozan da; é a i ma laana. 29Mari ’bɛ ’ma aan wo tɔɔn, é nwa é kele yé é go a va. 30Té Jézu ’ka tan bɔra lɛ fla lo; fɛana lé wo kee Maate nya, ’té é a yee ɛ na. 31Juifinu lé wo ke Mari va kɔn gi a tɔrɔ paana bɛ, wa ye aan wo léé, é nwa é kele yé é bɔra, é dɔ wo gi léé, é a gona mi vun ta wuvɔle we ma, yé wo go a zuo.

32Mari bɔ fɛana lé Jézu ke, ana. É Jézu ye aan wo, é dia a gane ma yé é léé: Mizan, dé é kɛlɛ léé, bii ana kɔɔn ’ko, ’té an bwe ’ka gaan lo. 33Jézu a ye léé, é a wuvɔna, é valé Juifinu lé wo da a va, wo nya, ’bɛ Jézu bli kyɛ dɔ fɔɔ yé a gi vuru. 34Yé é léé: Fɛ kyɛnna lé ka a paa? Yé wo lé a lɛ léé: Mizan, ’i da bé ye. 35Jézu wuvɔ. 36Amalé Juifinu léé: É sɔ a lɛ fɛan zo, ka a yé loo? 37Yé wo va mi kenu léé: Mi lé é yuɛwiizannu yuɛ fuo, é ’ka bɔa we do kɛlɛle lɛ kɔɔn ’té mi ’ko ’ka gaan lo loo?

Lazaa nwale

(Mk 5:35–43; Jn 6:40; Kw 9:36–42)

38We ’ko Jézu bli kyɛ dɔ é ziin, yé é go mi vun ta. É a gɔlɛkoro do nya, yé gɔlɛ do a é plale a ’léé. 39Jézu léé: ’Ka gɔlɛ si a ’léé. Gazan buru Maate lé a lɛ léé: Mizan, a yi ziɛn lo, amalé é vɔn yé a gin dɔ é kwakwa. 40Jézu lé a lɛ léé: Maa ’ka a fe lɛ i lɛ léé, dé i bli vo an lɛ i dan Kazambale lé fua ye lɛ loo? 41Yé wo gɔlɛ si a ’léé. Yé Jézu é yara nwa loru yé é léé: An Ti, i an dére nyi si, amalé maa i bɔ vɔ. 42Dé é a maa nya, maa a gi dɔɔ léé, i an dére nyi sié yifaama, naa, maa a fe, munu lé wo zén an zi ’ko, wolé we ma, yé ’wo dɔ a ta léé, bii ɛ an pa zia. 43We ’ko fele zuo, é siaa dére plɛplɛ nya léé: Lazaa, ’i bɔra! 44Yé mi gale bɔra, a ganenu valé a bɛnu a é vurule sɔbɛ nya, yé a yara a é vurule sɔ do nya. Jézu lé wo lɛ léé: ’Ka fuo, ’é go.

Wo Jézu ma we ble

(LvS 71:10; Lk 16:31)

45Juifinu lé wo da Mari va, dé wo Jézu kɛlɛwe ye, wo va mi kiɛre pa a ta. 46Naa, wo va mi kenu go Farizimunu va, yé we lé Jézu a kɛlɛ, wa fe ’bɛnu lɛ. 47’Bɛna tɔɔn, Balebanmunu segelenu valé Farizimunu webolikinimunu zén ékeva yé wo lé ’bɛnu lɛ léé: Ko dan kɛlɛ lɛ kaa? Mi ’ko a gyɛzorowe kiɛre kɛlɛna. 48Dé é vo we ’ko kɛlɛna yé ko ’ka we lɛ a zi lo, mi faa é dan bli pa lɛ a lɛ, yé Rom munu é dan da lɛ yé wo kolé Balebangikɔn sɛrɛ yé ko bɛn tɔ é san. 49Wo va mi do lé wa laama Kaifu, yee lɛɛ ’ko gi ’té ’bɛ a Balebanmunu ’lɛzan nya, é lé wo lɛ léé: Ka ’ka we do dɔɔa loo? 50Ka ’ka a gi dɔɔa léé, dé mi do ga munu lé we ma, ’bɛ fila vɔ é mini ’bɛn faa zé gale ta loo? 51Naa, é ’ka we ’ko fena ébo ’wuo gi lo. Lɛɛ ’ko gi é a Balebanmunu ’lɛzan nya, yé é a balelawe fena léé, Jézu é dan ga lɛ ’é bɛnnu lé we ma. 52Yé a bɛn saa lé we ma kaan lo; naa, Kazambale lé nénu lé wo ke é nwɛɛnle fɛfaana, wo zénle ékeva yé ’wo kɛlɛ kɔlɛ do nya lé we ma lé é ziin.

53É sia ’bɛ yi la, wo suni wɔra léé, ’wa gya kpɔ. 54Bɛwemalé Jézu ’ka bɔra lɛ gɔrɔ la Juifinu worona é dɛrɛ lo, naa, é si ’bɛna yé é go tɛrɛ do lé é ke bwi sɔnɔ, a ta, yé yee valé é zuomunu nyana fla do lé wa laama Éfraim, a ta.

55Juifinu lé Taboyi bɔ aan wo é pu, yé tɛrɛ ’ko ta mi kiɛre go Jérusalɛm Taboyi lé fɛti ’lɛ, yuɛpale ’wobo va we gi, yé dé a yi bɔ ’té wa tegele. 56Wo vo Jézu ginina, yé wo lé ’wo ke lɛ Balebangikɔn gi léé: É dɔ ka gi kaa? É ’ka dan da lɛ fɛti la loo? 57Yé Balebanmunu segelenu valé Farizimunu munu béli dɔ léé, fɛana lé é ke, dé mian é a gi dɔɔ, ’é a fe, yé wa kun.

Currently Selected:

Jan 11: GOURU

Highlight

Copy