Jan 13

Jézu é zuomunu gane ma foli

(1 Jn 1:9)

1Taboyi lé fɛti ’lɛ, Jézu a gi dɔɔ léé, a bléyi bɔ yé é dan si lɛ tɛrɛ la yé é go é Ti va. Azé munu lé wo ke tɛrɛ la, wo sɔ a lɛ fɔɔ yé alé tɛrɛla nyaa a zo.

2Yonufaatagɔné da gibɔrɔle nyané nya Kariɔtzan Simɔn be Judas gi léé, ’é Jézu pa munu lee. 3Yé Jézu a gi dɔɔ léé, é Ti fɛ faa bɛ pa é lee; é a gi dɔɔ léé, é si Kazambale va yé é dan go lɛ Kazambale va é ziin. 4Wa fɛ blena aan wo, yé é nwa fɛblele zi, yé élé sɔnu si é ta, yé é sɔ do si yé é a vɔ é tɛrɛ la. 5’Bɛ zuo é ’yi zén kana do gi, yé é kun é zuomunu gane ma folile ma, yé é wo ganenu ma boo, sɔ lé é a vɔ é tɛrɛ la bɛ, a nya. 6Yé é da Simɔn Piɛri va, yé Piɛri lé a lɛ léé: Bii Mizan, bii ɛ an gane ma foliéé? 7Jézu a zi pa a lɛ léé: We lé maa ke a kɛlɛna, i ’ka a gi maan lao lo, naa, i dan a gi ’ma lɛ é voéla. 8Piɛri lé a lɛ léé: Gba, i ’ka an gane ma folié monomono lo. Jézu lé a lɛ léé: Dé maa ’ka i gane ma folié lo, ’té izé ’ka an va lo. 9Simɔn Piɛri lé a lɛ léé: Mizan, té i an gane ma saa foli lo; ’i an bɛ valé an ’wuo ma foli é ziin. 10Jézu lé a lɛ léé: Mi lé é ke é zurule, a mawe a a gi léé, é gane saa ɛ ma foli a mabɔle tata we ma. Yé ka ma a é bɔle, naa, ka faa kaan lo. 11’Té mi lé ’bɛ é dan a pa lɛ munu lee, é ’bɛzan dɔɔ, bɛwemalé é léé: Ka faa ma ’ka é bɔle lo.

12Wo ganenu ma folile zuo, élé sɔnu zén é ta yé é nyana tablé zi, yé é lé wo lɛ léé: Wean maa a kɛlɛ ka lɛ, ka a gi ’maa? 13Ka an laan Kazan valé Mizan, yé ka a fé webozen nya, maa a ’bɛ nya. 14Maa Mizan valé Kazan, dé maa ka ganenu ma foli, é a lé ka ka ke ganenu ma foli é ziin. 15Maa wekɛlɛmawe vo ka va, we lé maa a kɛlɛ ka lɛ, kalé kazé kɛlɛle a zo we gi. 16Maa fe ka lɛ kyɔ webozen nya, miwuozan ’ka minié ézan lɛ lo, yé nwunvɔzan ’ka minié é paziazan lɛ lo. 17Dé ka we ’konu dɔɔ yé ka a wo kɛlɛna, ’té ’bɛ a é zima.

18Maa ’ka we ’ko fena ka faa lé we ma lo; munu lé maa wo si a va, maa wo dɔɔ. Kazambale lé sɛbɛ gi we lé é a fe léé,

Mi lé éé buru blé an va,

Yee ɛ é ganetɛn nwa an ma,

é a lé a lɛ é sɔɔ. 19É sia bléyi ’ko va, we lé é dan kɛlɛ lɛ, maa a fe ka lɛ a bɔle ’lɛ, yé dé é bɔ, yé ka bli vo a lɛ léé, mi lé maa ke a nya, maa a ’bɛ nya. 20Maa fe ka lɛ kyɔ webozen nya, mi lé maa a pa zia, dé mian é a si, ’té é an si; yé mi lé é an si, mi lé é an pa zia, é ’bɛzan si.

Jézu é liwole fale vɔ

(Mt 26:20–25; Mk 14:17–21; Lk 22:21–23)

21We ’ko fele zuo, gibɔrɔle do da Jézu bli gi, yé é we fe kpaklaa léé: Maa fe ka lɛ kyɔ webozen nya, ka va mi do é dan an pa lɛ munu lee. 22A zuomunu vo wo yuɛ vɔna wo ke yara, dé mi kyɛn lé we lé é ke a fenaa? 23Jézu zuomi do lé ’bɛ sɔ a lɛ, ’bɛ a é tɛnle a ma. 24Simɔn Piɛri tɔmase kɛlɛ ’bɛ lɛ léé: Bé laa a lee, mi kyɛn lé we lé é ke a fenaa? 25Yé a zuomi lé ke é tɛnle a ma, ’bɛ lé a lɛ léé: Mizan, de léé? 26Jézu lé ’bɛ lɛ léé: Mi lé maa dan buru kuru zua lɛ, yé maa a nɔ a lɛ, yee lé. É buru kuru zua aan wo, yé é a nɔ Kariɔtzan Simɔn be Judas lɛ. 27Judas lé buru kuru sile tɔɔn, Satan wɔra a bli gi. Jézu lé a lɛ léé: We lé bé kɛla, ’bé kɛlɛ é kele. 28Naa, munu lé wo ke a va tablé zi, wean ma lé é we ’ko fe ’bɛ lɛ, wo va mi do kpen ’ka a gi dɔɔ lɛ lo. 29Gɔɔlipabala a Judas lee, bɛwemalé é dɔ mi kenu gi léé, Jézu lé a lɛ é wo léé: Fɛ lé ko mawe ke a gi fɛti zé nya, bé lɔ; taa, dé é lé é wo a lɛ lee, ’é fɛ nɔ nyanégyɛzannu lɛɛ? 30Judas buru kuru si tɔɔn, é bɔra é kele. ’Té béli tan.

Bélidɔwe dɛrɛ

(Jn 15:12–14; 17:1–5)

31Judas bɔrale zuo Jézu léé:

Sin, maa blami Be tɔ kɛlɛ blɛn, yé Kazambale tɔ kɛlɛ an gi blɛn. 32Dé Kazambale tɔ kɛlɛ an gi blɛn, Kazambale é dan an tɔ kɛlɛ lɛ blɛn ébozen gi é ziin, yé é dan a kɛlɛ lɛ blɛn é kele.

33Anlé né kiénénu, maa a ka va bléyi sɛ nya é ziin. Ka dan an gini lɛ yé fɛan zo lé maa a fe Juifinu lɛ léé, fɛana lé maa ke gona wo ’ka bɔa gole lɛ ’bɛna lo, a zo duo lé maa a fena ka lɛ é ziin kyɔ. 34Maa bélidɔwe dɛrɛ nɔ ka lɛ léé: ’Ka sɔ ka ke lɛ, bélé fɛan zo lé ka sɔ an lɛ, ’ka sɔ ka ke lɛ a zo. 35Dé ka sɔ ka ke lɛ, ’bɛ lé we ma lé mi faa é dan a gi dɔɔ lɛ léé, ka a an zuomunu nya.

Jézu Piɛri sɔnvɔle é ma fale vɔ

(Mt 26:31–35; Mk 14:27–31; Lk 22:31–34)

36Simɔn Piɛri lé a lɛ léé: Mizan, i go kyɛɛn? Jézu lé a lɛ léé: Fɛana lé maa ke gona, i ’ka bɔa gole lɛ an zuo ’bɛna lao lo; naa, é voéla i dan go lɛ an zuo. 37Piɛri lé a lɛ léé: Mizan, mɛwemalé an ’ka bɔa gole lɛ i zuo lao loo? Maa gaan ilé we ma. 38Jézu lé a lɛ léé: I gaan anlé we maa? Dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo. Maa fe i lɛ.

Currently Selected:

Jan 13: GOURU

Highlight

Copy