Lɔmukalu 16
16
Pɔli ya folikannu
1Ǹ'i mɔ badenmamoso Fibi matanula ài yɛ, min taanin kɛla limaniyajama makoɲabɔba le Sengele so kɔnɔ. 2Ài y'ài bolo sii a kɔlɔ mɔ Tii tɔɔ lɔ, iwo mumininnu ka kan ka mɔɔ suu wo buɲa teme. Ni a mako ka kɛ fen fen si la, ài y'a madɛmɛn wo la, kamasɔlɔn a vɛ mɔ badenma siyama madɛmɛn, ani ǹe gbu.
3 #
Kɛkolu 18.2. Ài yi Pisila ni a kɛ́ Akuila fo ǹ yɛ, m̀ baaledenɲɔɔlu le ve Masa Tɔɔmasenin Isa ya baale lɔ, 4minu n'ai lɔla saya ɲa ǹa ko lɔ. Ǹe kelen tɛ balika bɔla ai yɛ, mafɔ limaniyajama minu bɛ yi siboloma gbɛlɛ mɔɔlu tɛma fana. 5Limaniyajama min yi ladɛn kɛla aiya bon na, ài y'ai bɛ fo.
Ài yi ǹ diyananmɔɔ Epainɛti fo, min taanin kɛla mɔɔ kunfɔlɔ le ka limaniya Masa Tɔɔmasenin ma Esiya koovi lɔ. 6Ài yi Mɔyamu fo, min yi baale gbɛlɛn na ài yɛ. 7Ài yi Andolonikusi ni Juniya fo, minu yi ǹ sibolomaɲɔɔ le, ani ai na kɛla ǹ kasodenɲɔɔ le waate lɔ. Ai lɔnnin bɛlɛbɛlɛ kɛ Isa ya keladennu tɛma, ado ai na donna Masa Tɔɔmasenin ya kafonɲɔɔya lɔ ǹe ɲa.
8Ài yi Ampiliyasi fo, ǹ diyananmɔɔ le a le mɔ Tii ya kafonɲɔɔya lɔ. 9Ài yi Ulubɛn fo, m̀ baaledenɲɔɔ le a le Masa Tɔɔmasenin ya baale lɔ, ani ài yi ǹ diyananmɔɔ Sitakisi fo. 10Ài yi Apɛlɛsi fo, min ya kankelentiiya vɛ bɔ gbɛ la Masa Tɔɔmasenin ya ko lɔ. Ài yi Alisitobule ya bonnamɔɔlu fo. 11Ài yi ǹ sibolomaɲɔɔ Helodiyɔn fo. Ài yi Nalisisi ya bonnamɔɔlu fo, minu yi mɔ Tii ya kafonɲɔɔya lɔ.
12Ài yi mɔ badenmamoso fila fo ǹ yɛ, Tilifɛna ni Tilifosa, minu yi baale kɛla mɔ Tii yɛ. Ài yi mɔ diyanan badenmamoso Pɛlɛsidi fo, min fana vɛ baale gbɛlɛn kɛ mɔ Tii yɛ. 13#Malɛkɛ 15.21.Ài yi Lufusi fo, mɔ Tii na min tala, ka a ba fana fo, min na ǹ lɔminala iwo a jɛlɛkanu den. 14Ài yi Asinkiliti fo, ani Felegɔn, ani Hɛlimɛsi, ani Patolobasi, ani Hɛlimasi, ani mɔ badenma minu y'ai fɛ. 15Ài yi Filologi ni Juliya fo, ani Nelesi ni a badenmamoso, ani Olimpasi ni mumininnu bɛ minu y'ai fɛ je.
16Ài i ɲɔɔ fo kanundeya foli sɛnɛyanin ne. Masa Tɔɔmasenin ya limaniyajamalu bɛ y'ài fola.
Pɔli ya laili laban
17M̀ badenmalu, ǹ'ài madiyala, ài y'ài jando ài jɛlɛ lɔ mɔɔwotɛfalanbalu ya ko lɔ, minu yi mɔɔlu kunnɔtɛɛla, ani ka kalan bɛlɛ sɔsɔ, ài na min sɔlɔnna. Ài y'ài mataa ai la feu! 18Mɔɔ suu wolu tɛ baalela mɔ Tii Masa Tɔɔmasenin yɛ, mafɔ ai kɔnɔgbolo. Ai do yi kuma madiyanin ne fɔla ka mɔɔlu matɔɔ fuun fɔsa ai yi koɲayebalilu manɛɛ. 19Kɛɛ àilu koni, bɛ k'a lɔn ài yi Samakan Kein labatola teme. Wo lɔ, ǹ sawanin àiya ko lɔ. Kɛɛ ǹ'a fɛ le ài yi kɛ hangilima le koɲuma lɔ, ani k'ài fɛ bɔ koyon na. 20Ado Ala min yi josolajii dila, wo kɛtɔ Soitana lɔgbɛnɛngɛla ài sen kɔlɔ jona.
Mɔ Tii Masa Tɔɔmasenin Isa ya nɛɛma yi kɛ ài yɛ.
21 #
Kɛkolu 16.1. Ǹ baaledenɲɔɔ Timote y'ài fola, ani Lusiyusi ani Jason ani Sosipata, minu taanin kɛla ǹ sibolomaɲɔɔlu le.
22Ǹe Tɛlitusi min yi lɛtɛlɛ min sɛvɛla Pɔli yɛ, ǹe fana y'ài fola mɔ Tii tɔɔ lɔ.
23 #
Kɛkolu 19.29; 1 Kolɛntikalu 1.14;
2 Timote 4.20. Gayusi y'ài fola, min taanin kɛla ǹ jetii le, ani limaniyajama fana jetii. Elasitusi, min yi so wɔlilamalaba le, wo y'ài fola ani mɔ baden Kuwatusi.#16.23 Sɛvɛli kɔlɔ dɔlu ka haya min la a kɔkan: 16.24
Duwawu laban
25Tanuli yi Ala yɛ, a see yi min yɛ k'ài lasawati limaniya lɔ iwo ǹ na kawanili kɛla teme ǹa Samakan Kein nɔ ka bɛn Masa Tɔɔmasenin Isa ma. Ala ya gbonoko le wo le, a na min doonna waate timinninu kɔlɔ, 26kɛɛ a vɛ bɔ gbɛ la yi ne kelalu ya kitabulu fɛ. Ado ka bɛn Habadan Ala ya jamali ma, gbonoko min vɛ lɔn siboloma bɛ bolo, fɔsa ai yi kolo a yɛ limaniya boloma.
27Tanuli yi Ala yɛ, min kelenpesa yi hangilima le. Tanuli y'a yɛ Masa Tɔɔmasenin Isa sabu la habadan! Amiina.
Currently Selected:
Lɔmukalu 16: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
