Lɔmukalu 15

Ài m'i ɲɔɔ ladiyanankolu kɛ limaniya lɔ

1Ǹu minu sawatinin limaniya lɔ, mɔ ka kan ka mɔ bolo sii dɔlu kɔlɔ minu ya limaniya dɔɔyanin, jani m'i gbala mɔ jɛlɛkanu diyanankolu le dein. 2Fɔ mɔ kelenkelenna bɛ y'a siiɲɔɔ ladiyanankolu kɛ a nafako kanma k'a lasawati limaniya lɔ. 3Kamasɔlɔn Masa Tɔɔmasenin m'a jɛlɛ diyabɔ, mafɔ a n'a kɛla iwo a sɛvɛnin kitabu kɔnɔ teme, ko: «I jɛvɛbalu ya jɛvɛli vɛ la ǹ kan.» 4Ko minu bɛ sɛvɛnin kɔlɔkɔlɔ le, wolu sɛvɛnin mɔ kalanko le lɔ, fɔsa m'i jeisii sɔlɔn ka bɛn sawali ni sɛmɛdonko ma, lɔhɔlɔma kitabulu yi minu dila mɔ ma. 5Ala min yi sawali ni sɛmɛdon dila mɔ ma, wo y'ài bɛn a lɔ ka bɛn Masa Tɔɔmasenin Isa kokɛɲa ma, 6fɔsa ài bɛ lakafonnin yi Ala tanu kan kelen nɔ, ale min yi mɔ Tii Masa Tɔɔmasenin Isa Fa le.

Samakan Kein siboloma bɛ yɛ

7Wo lɔ, ài y'ài bolo sii i ɲɔɔ kɔlɔ iwo Masa Tɔɔmasenin n'a bolo siila ài kɔlɔ teme Ala magbiliyako lɔ. 8Ǹ'a fɔ ài yɛ, Masa Tɔɔmasenin na kɛla Jahudiyalu ya bɔiden ne Ala ya lahedilu dafako le lɔ, a na minu tala ai bemanu yɛ, fɔsa a a jiya ko Ala yi tuɲande le le. 9A na wo kɛla kɔtunun fɔsa siboloma gbɛlɛ mɔɔlu yi Ala tanu ka bɛn aa henandeya ma, iwo a sɛvɛnin kitabu kɔnɔ teme, ko:

«Wo le n'a kɛla, ǹ kɛtɔ i tanula siboloma gbɛlɛ mɔɔlu tɛma,

ani ka baiti la i tɔɔ buɲako lɔ.»

10A do sɛvɛnin kɔtunun, ko:

«Àilu siboloma gbɛlɛ mɔɔlu, ài yi sawa Ala ya mɔɔlu fɛ.»

11A sɛvɛnin kɔtunun, ko:

«Àilu siboloma gbɛlɛ mɔɔlu,

ài bɛ yi mɔ Tii tanu,

ani jamana bɛ mɔɔlu y'a matɔɔ.»

12Nabi Ezayi fana vɛɛ ko:

«Mɔɔ dɔ kɛtɔ bɔla Jese ya bonna lɔ iwo gbumgbulu mafɛlɛn.

A kɛtɔ a wulila k'i sii siboloma gbɛlɛ mɔɔlu kunna.

Ai do kɛtɔ ai jei siila ale le la.»

13Ala min yi jeisii dila, wo y'ài josoladiya k'ài josolajii bɛlɛbɛlɛ kɛ àiya limaniya fɛ, fɔsa a dɔ yi to lala àiya jeisii kɔkan ka bɛn Nii Sɛnɛyanin ya seetiiya ma.

Pɔli ya baale Ala yɛ

14M̀ badenmalu, ǹe gbu layine a la ko àiya ɲumaya dafayine, ani àiya lɔnni walayine, ani a see y'ài yɛ k'i ɲɔɔ lali. 15Wo bɛ n'a kɛ, m̀'ɛ ko dɔ sɛvɛ ài ma wakali boloma ài hangili bilako lɔ ka bɛn nɛɛma ma, Ala na min dila m̀ ma, 16ka ǹ kɛ Masa Tɔɔmasenin Isa ya bɔiden ne siboloma gbɛlɛ mɔɔlu yɛ. Ǹ'i Ala ya salakalase baale le la aa Samakan Kein ya ko lɔ, fɔsa ǹ'i siboloma gbɛlɛ mɔɔlu lase a ma iwo a diyanan salaka, min la vɛ sɛnɛya Nii Sɛnɛyanin sabu la. 17Wo le y'a ma, ǹ ɲalɔkɛnɛyanin Masa Tɔɔmasenin Isa ya kafonɲɔɔya lɔ ka bɛn ǹa baale ma Ala yɛ. 18Ado ǹ tɛnala m̀ wakalila ka ko ko fɔ, mafɔ Masa Tɔɔmasenin na minu kɛla ǹ nɔ ka siboloma gbɛlɛ mɔɔlu kolo Ala yɛ ǹ kumakan ni ǹ kɛkolu fɛ, 19ani kawananko ni tɔɔmaselu, ani Nii Sɛnɛyanin ya foniseleya. Wo boloɲa ma, ka damina Jelusalɛmu ma ka taa sii Ilailikun koovi la, m̀'ɛ ǹa baale dafa ka Masa Tɔɔmasenin ya Samakan Kein lase fan wo bɛ lɔ. 20Masa Tɔɔmasenin tɔɔ ma fɔ dingila minu lɔ, a lɔɔ yi ǹ na waate bɛ ka Samakan Kein lase dingila wolu lɔ, jani ǹ'i bon lɔ mɔɔ gbɛlɛ ya bonjusii kɔkan. 21A sɛvɛnin tan ne kitabu kɔnɔ, ko:

«Aa ko ma fɔ ba mɔɔ minu yɛ bene, wolu kɛtɔ a yena.

Ado mɔɔ minu ma aa ko mɛn ba bene, wolu kɛtɔ a ɲayena.»

Taa lɔɔ yi Pɔli la Lɔmu

22 # Lɔmukalu 1.13. Wo le n'a kɛla sabu le, m̀'ɛ koli siɲa siyama le ǹ taako lɔ ài fɛlɔ. 23Kɛɛ tandainɔ, dingila tɛ je butu ǹa baaleko lɔ jan koovilu lɔ. Ado ài yenlɔɔ vɛ gba ǹ na san siyama kɔlɔ. 24Wo lɔ, ǹ'a fɛ ka taa bɔ ài ma, m̀'ɛ kɛla timinna ka taa se Ɛsipaɲɛ jamana lɔ waate min nɔ. Mɔ v'i ɲɔɔ diyabɔla waateni kɔlɔ, ǹ'a fɛ ài yi m̀ madɛmɛn ǹa taamanko lɔ ka se je. 25#1 Kolɛntikalu 16.1-4.Tandainɔ koni, ǹ taatɔ Jelusalɛmu ka dɛmɛngali dɔ di je mumininnu ma. 26Kamasɔlɔn limaniyajama minu yi Masaduwani ni Akayi koovilu lɔ, wolu n'a latɛɛla sawa boloma ko ai y'ai bolo ladɛn bolokolonnu yɛ Jelusalɛmu mumininnu tɛma. 27#1 Kolɛntikalu 9.11.Wo do kɛko ka diya ai yɛ. Tuɲa le, ai tɛɛ ka kan ka wo kɛ, kamasɔlɔn Ala ya nɛɛma min kɛnin Jahudiya limaniyamɔɔlu yɛ, siboloma gbɛlɛ limaniyamɔɔlu v'a dɔ sɔlɔn wo lɔ. Wo ma, a bɛnyine ai yi Jahudiyalu makolu laɲia ai jɛlɛkanu fennu le. 28M̀'ɛ banna ko wo ɲabɔla waate min nɔ ka bololadɛnfen wo don ai bolo, ǹ kɛtɔ timinna ài fɛlɔ ka taa Ɛsipaɲɛ jamana lɔ. 29M̀'ɛ nala ài ma, ǹ k'a lɔn ko ǹ kɛtɔ nala Masa Tɔɔmasenin ya duwawu dafanin ne lɔ.

30M̀ badenmalu, ǹ'ài madiyala mɔ Tii Masa Tɔɔmasenin Isa tɔɔ lɔ ani Nii Sɛnɛyanin ya kanundeya, ǹ ko, ài y'ài lɔja ka Ala dali ǹ yɛ kosɛvɛ, 31fɔsa m̀ ma yi tanga limaniyabalilu ma Jude koovi lɔ, ani ǹ taatɔ madɛmɛlifen min ne, wo yi diya Jelusalɛmu mumininnu yɛ. 32Wo vɛ kɛla, ni Ala ka diɲa, ǹ kɛtɔ nala ài fɛlɔ sawa boloma ka ǹ lɔfɔlin dɔni ne ài fɛ. 33Ala min yi josolajii dila, wo yi to ài bɛ fɛ. Amiina.

Currently Selected:

Lɔmukalu 15: MBT2023

Highlight

Copy