Lɔmukalu 11
11
Ala ya henandeya Bani Isilankalu yɛ
1 #
Filipikalu 3.5. Wo lɔ saa, ǹ'i ɲiningali kɛla, ǹ ko: Jalasa Ala v'i ban aa mɔɔlu lɔ? Wo tɛ dɛ! Kamasɔlɔn ǹe gbu taanin kɛla Bani Isilanka le le, bema Ibulahima bɔzɔn koni, ado Bɛnjamin kabiladen ne ǹ ne. 2Ala m'i ban aa mɔɔlu lɔ, minu lɔnnin tɛɛ a bolo ka ta a damina ma. Ài m'a lɔn min sɛvɛnin kitabu kɔnɔ ka bɛn Nabi Iliya ma, a k'i makasi Ala yɛ teme Bani Isilankalu kanma? 3A vɛɛ: «Ǹ Tii, ai n'iya kelalu faala, k'iya salakagbalannu tete. Ǹe kelenpesa le tonin. Ai do yi ǹ faako ɲaɲininna.» 4Kɛɛ Ala k'a javi di? A vɛɛ: «M̀'ɛ kɛ́ waa wolowulan (7 000) ladalo ǹ jɛlɛ yɛ, minu kumɛlɛni ma suudi ben Baalan yɛ.» 5Wo boloɲa kelen ma, hali bi, mɔɔ dana yi je Bani Isilankalu tɛma, Ala na minu tala ka bɛn aa nɛɛma ma. 6Ni Ala ya mɔɔtako yi kɛla ka bɛn aa nɛɛma le ma, wo vɛ kɛla, mɔɔ kɛkolu sabu tɛ butu. Niwotɛ, aa nɛɛma tɛnala kɛla nɛɛma bɛlɛbɛlɛ le butu.
7A yi di wo lɔ? Bani Isilankalu tɛɛ ko min ɲininna, ai ma wo sɔlɔn. Ai lɔ mɔɔ taninnu le n'a sɔlɔnna, kɛɛ a tɔ bɛ le na kɛla mɔɔ kataigbɛlɛn ne. 8A sɛvɛnin tan ne kitabu kɔnɔ, ko:
«Ala vɛ ai hangili magbasi.
Haan ka na sii bi la, ai tɛ se yeni kɛla ai ɲa la,
ai do tɛ se ko mɛnna ai tolo la.»
9Nabi Dawuda n'a fɔla kɔtunun, a vɛɛ:
«Ala a kɛ, aiya feetikɛyalu yi kɛ sɔɔ ni jɔ le ai ɲa,
ka kɛ ai labenko sabu le ani aiya koyon sala.
10Ala a kɛ, ai ɲa yi gbɛ fɔsa ai kana yeni kɛ butu,
ai do kɔ kulunin yi to kudein.»
11Wo ma yi ne, ǹ'i ɲiningali kɛla, ǹ ko: Bani Isilankalu sen ka tuu mingɛ, jalasa ai ma se ai wulila butu? Wo tɛ dɛ! Mafɔ, ai filiko le na kɛla sabu le kisiko vɛ se siboloma gbɛlɛ mɔɔlu ma, fɔsa keleya yi Bani Isilankalu mina. 12Bani Isilankalu filiko na kɛla dunuɲa ya nɛɛma sɔlɔnko sabu le, ani ai benko na kɛla siboloma gbɛlɛ mɔɔlu nafako le le. Wo lɔ saa, ni ai dafanin k'ai fannɔsei Ala ma, wo nɛɛma tɛnala walala ka timin a kunfɔlɔ ta la?
Siboloma gbɛlɛ mɔɔlu kisiko
13Ǹ'i kumala àilu siboloma gbɛlɛ mɔɔlu le yɛ butu. Komi Ala na ǹ kɛla keladen ne siboloma gbɛlɛ mɔɔlu yɛ, wo le n'a kɛla, ǹ ɲalɔkɛnɛyayine ǹa baaleko lɔ, 14fɔsa keleya yi ǹ jɛlɛkanu mɔɔlu mina, tumadɔ wo yi kɛ ai dɔlu kisiko sabu le. 15Ala k'i ban Bani Isilankalu lɔ mingɛ, wo ka kɛ sabu le ale ni dunuɲamɔɔlu wotɛ ka bɛn. Wo ma, ni Ala k'a bolo sii ai kɔlɔ kɔtunun, wo tɛnala kɛla iwo fuleni v'i wuli ka bɔ saya lɔ?
16Ni dɛɛ fan kunfɔlɔ ka di Ala ma, a tɔ bɛ kɛtɔ kɛla a ta le le fana. Ado ni kɔlɔman lilen vɛ kɛla Ala ta le, a bololu fana kɛtɔ kɛla a ta le le. 17Bani Isilankalu kɛyine iwo zeitunaju min sɛnɛnin gbele lɔ, Ala na wo bolo dɔlu tɛɛla a la. Àilu siboloma gbɛlɛ mɔɔlu minu kɛnin iwo tuu kɔlɔ zaituna bololu, Ala vɛ ài fasa bolo tɛɛninnu nɔ lɔ. Ado ji min yi bɔla a lilen na ka jɛlɛ, wo le àilu ni dɔ zaituna bololu balola i ɲɔɔ fɛ. 18Wo le y'a ma, i kà fannɔbaya kɛ dɔ zaituna bolo tɛɛninnu la. Niwotɛ, i y'a lɔn ko zaituna lilen bolomalanin tɛ ile ma, mafɔ ile le bolomalanin a ma.
19Kɛɛ i kɛtɔ a fɔla, i vɛɛ: «Kɔlɔman wo bololu tɛɛnin a la fɔsa ǹe gbu yi fasa a ma.» 20Tuɲa le wo le. Wolu tɛɛnin a la ka bɛn aiya limaniyabaliya le ma, ile do i nɔ lɔ ka bɛn iya limaniya le ma. Wo ma, i k'i fannɔbuɲa, mafɔ i yi siyan. 21Kamasɔlɔn ni Ala ma kɔlɔman sɛnɛnin bololu to je, ile do? 22M'i Ala ya ɲumaya ni aa faiya le yena ko min nɔ: A faiyayine aa siyabilabalu ma, kɛɛ a yi ɲumaya jiyala àilu le la, ni ài ka to aa ɲumaya kɔ. Niwotɛ, ile gbu kɛtɔ tɛɛla a la wo boloɲa kelen ne ma. 23Ni Bani Isilankalu gbu k'aiya limaniyabaliya dabila, Ala kɛtɔ ai fasala kɔlɔman ma kɔtunun, kamasɔlɔn a see yi Ala yɛ k'ai fasa kɔlɔman ma kɔtunun. 24Ni ile min tɛɛnin ka bɔ tuukɔlɔ kɔlɔman ma, i vɛ fasa zeitunaju sɛnɛnin ma, k'a talan ile ni wo tɛ suu kelen ne, a lagbɛyine feu ko kɔlɔman sɛnɛnin bolo bɛlɛbɛlɛlu fasako nɔyatɔle ka timin ile ta la.
25M̀ badenmalu, jani ài y'ài jɛlɛ jate hangilima le, ǹ'a fɛ ài yi kɛ gbonoko min kalama: Bani Isilankalu fan kelen kunnɔ vɛ gbeleya, haan fɔɔ siboloma gbɛlɛ mɔɔlu jate dafanin yi don Ala ya masaya lɔ. 26Wo boloɲa ma, Bani Isilanka bɛ kɛtɔ kisila, iwo a sɛvɛnin kitabu kɔnɔ teme, ko:
«Lakisilikɛba kɛtɔ nala ka bɔ Ziyɔn.
A do kɛtɔ Alalɔnbaliya dajoo kolon bɔla Janguba jilijaalu lɔ.
27Salatikan ne wo le, ǹ kɛtɔ min tala ǹe ni ailu wotɛ,
m̀'ɛ aiya julumbulu bɔla ai ma waate min nɔ.»
28Samakan Kein ta fannɔ, Bani Isilankalu yi Ala juu le le àiya ko lɔ. Kɛɛ Ala ya mɔɔtako ta fannɔ, a diyananmɔɔ le ai le ka bɛn ai bemanu ma. 29Kamasɔlɔn ni Ala ka mɔɔ min sɔ, a tɛ aa sɔli wo minala wo tii ma la. Ni a do ka mɔɔ kili ko dɔ kanma, a tɛ wo bɔla a ma feu. 30Waate lɔ, àilu siboloma gbɛlɛ mɔɔlu tɛɛ kolobaliya le kɛla Ala la. Kɛɛ tandainɔ yi ne, àilu vɛ Ala ya henandeya sɔlɔn ka bɛn Jahudiyalu ya kolobaliya ma. 31Wo boloɲa kelen ma, Bani Isilankalu yi kolobaliya le kɛla butu, fɔsa ai yi henandeya sɔlɔn iwo àilu. 32Kamasɔlɔn Ala vɛ adamaden bɛ to aiya kolobaliya lɔ, fɔsa a yi hena bɛ la.
Ala tanu
33Tuɲa le, Ala ya nafolotiiya walayine! Aa hangilimaya ni aa lɔnni dan jate tɛ se lɔnna. Jene yi se aa kolatɛɛninnu ɲayena, kumatɛ ka aa kokɛɲalu lɔn? 34A sɛvɛnin tan ne kitabu kɔnɔ, ko:
«Jene ka mɔ Tii miliya lɔn?
Jene yi se kɛla a lailiba le?
35Jene vɛ fen di Ala ma,
k'a fɔ ko a yi wo tii ya julu sala?»
36 #
1 Kolɛntikalu 8.6. Fen bɛ bɔnin ale le lɔ, ani fen bɛ yi je ale le yɛ, a do ta le fen bɛ le. Magbiliyali yi di a ma habadan. Amiina!
Currently Selected:
Lɔmukalu 11: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
