Lɔmukalu 12

Limaniyamɔɔlu taamaɲa

1M̀ badenmalu, ǹ'ài madiyala ka bɛn Ala ya henandeya ba ma ài yɛ, ǹ ko, ài y'ài jɛlɛ di Ala ma iwo salaka ɲɛnɛma, Ala a bolo siila salaka sɛnɛyanin min suu kɔlɔ. Wo do yi batokɛɲa bɛlɛbɛlɛ le le, ài ka kan ka min kɛ. 2Ài k'ài suma dunuɲakolu ma, mafɔ ài yi diɲa Ala y'ài miliya mafalin ka hangili kula di ài ma. Wo vɛ kɛla, ài kɛtɔ Ala sawo lɔnna, min keinyanin, ani min diyanin a yɛ, ani min dafanin.

3Ka bɛn Ala ya nɛɛma ma min dinin m̀ ma, ǹ'a fɔla ài kelenkelenna bɛ yɛ, ǹ ko, ài k'ài jɛlɛ jate mɔɔ le ài tɛ min ne. Mafɔ, ài yi mili ài jɛlɛ ma hangilimaya boloma ka bɛn limaniya jate ma min dinin ài ma Ala bolo. 4#1 Kolɛntikalu 12.12.Falikolo kelen ne yi adamaden ne, fan siyama yi min ma, kɛɛ a dɔ ni a dɔ ta baale tɛ kelen ne. 5Wo boloɲa kelen ma, hali ǹu limaniyamɔɔlu walanin ka kɛ, mɔ bɛ yi falikolo kelen ne le Masa Tɔɔmasenin ya kafonɲɔɔya lɔ, ado mɔ kelenkelenna bɛ fasanin i ɲɔɔ ma falikolo kelen ne lɔ. 6#1 Kolɛntikalu 12.4-11.Komi senko suu bɛ dɔ yi mɔ kelenkelenna bɛ bolo min dinin ka bɛn Ala ya nɛɛma ma, wo lɔ, ài m'i wolu labaale. Ni a dɔ ta senko ka kɛ kelayakuma lasenko le, fɔ wo tii yi kelaya le kɛ ka bɛn aa limaniya jate ma. 7Ni a dɔ ta ka kɛ madɛmɛli le, wo tii yi mɔɔlu madɛmɛn. Ni min ta ka kɛ kalan ne, wo tii yi mɔɔlu kalan. 8Ni min ta ka kɛ sɛmɛdonko le, wo tii yi mɔɔlu sɛmɛdon. Ni mɔɔsɔko see dinin mɔɔ min ma, wo tii bolo yi fɔlin sɔli boloma. Ni kuntiiya see dinin ka kɛ mɔɔ min ma, wo tii y'a baale kɛ sɔvɛdon boloma. Ni do see dinin mɔɔ min ma ka henandeyakolu kɛ, wo tii y'a kɛ sawa boloma.

9Àiya kanundeya yi kɛ josolɔgbɛya boloma. Ài yi koyon lagbeyaɲɛ, k'ài bolo kɛ kokein na kpekpe. 10Ài i ɲɔɔ kanu badenmaya boloma, k'i ɲɔɔ buɲa ka timin ài jɛlɛ la. 11Ài kà kɛ saakɔlɔ le, mafɔ ài y'ài tɛsili baaleko la. Ài do yi baale kɛ mɔ Tii yɛ ài josokun bɛ le. 12Ài yi sawa ka bɛn ài jeisii ma, ka tɔlɔyalu mina ài ma sawali boloma, ka kɛ Ala dalila kudein. 13Ài yi mumininnu madɛmɛn k'ai makolu laɲia, ani ka lonalu jiya.

14 # Matiyu 5.44; Luka 6.28. Ài yi duwawu kɛ ài jangatabalu yɛ. Ài kà ai daan, mafɔ ka duwawu le kɛ ai yɛ dein. 15Ài yi sawa sawabatɔlu fɛ, k'ài josomakasi mɔɔ josomakasininnu fɛ. 16Bɛn yi kɛ ài wotɛ. Ài k'ài fannɔbuɲa, mafɔ diɲɔɔya yi kɛ àilu ni bolomadɔɔlu wotɛ. Ài k'ài jɛlɛ jate hangilima le feu.

17Ni mɔɔ ka koyon kɛ ài la, ài kà wo julu sala koyon ne. Mafɔ, ài y'ài lɔja ka kolu kɛ minu ɲumayanin bɛ ɲakɔlɔ. 18Ài y'ài senko bɛ kɛ fɔsa josolajii yi kɛ àilu ni mɔɔ bɛ wotɛ. 19Ǹ diyananmɔɔlu, ài k'ài ta sala feu, mafɔ ài y'ài ta to Ala ma. Kamasɔlɔn mɔ Tii n'a fɔla kitabu kɔnɔ, ko: «Tasalali yi ǹ ta le le, ǹ kɛtɔ tasalali kɛla.» 20Ài do k'ài ta sala, mafɔ ka kolu kɛ iwo a sɛvɛnin kitabu kɔnɔ teme, ko: «Ni kɔɔn ka kɛ i juu la, i y'a sɔ dɔnnifen dɔ sɔ. Ni do minkɛlɔɔ ka kɛ a la, i y'a sɔ ji dɔ sɔ. Ni i ka wo kɛ, a kɛtɔle iwo i vɛ taakimi ta k'a sii a kun.» 21I kà diɲa koyon yi see sɔlɔn i ma, mafɔ i yi see sɔlɔn koyon ma koɲuma le.

Currently Selected:

Lɔmukalu 12: MBT2023

Highlight

Copy