Lɔmukalu 10
10
1M̀ badenmalu, a lɔɔ yi ǹ na bɛlɛbɛlɛ kɛ ani ǹ'i Ala dalila fɔsa ǹ jɛlɛkanu mɔɔlu la yi kisi. 2Ǹ taanin kɛla sele le ka bɛn aiya ko ma, ko ai tɛsiliyine ka bɛn Ala ko ma, kɛɛ koɲaye t'ai bolo. 3Komi ai m'a ɲaye ko Ala yi mɔɔ jatela telenmande le siya min ne fɛ, ani ai tɛɛ ai lɔjala k'ai ta siya labɔ, wo le n'a kɛla, ai m'ai fanmajii Ala ya telenmandeya yɛ. 4Kamasɔlɔn Masa Tɔɔmasenin vɛ seliya dafa, fɔsa a malimaniyamɔɔlu bɛ yi kɛ telenmande le Ala ɲakɔlɔ.
Kisiko yi mɔɔ bɛ le ta le
5Mɔɔ yi se jatela telenmande le seliya fɛ teme, Nabi Musa na ko dɔ sɛvɛla ka bɛn wo ma, a vɛɛ: «Ni mɔɔ min ka jamali minu latelen, wo tii ma kɛtɔ niimaya kɛla ka bɛn wolu le ma.» 6Kɛɛ mɔɔ yi se jatela telenmande le limaniya fɛ teme, a sɛvɛnin kitabu kɔnɔ ka bɛn wo ma, ko: «I kà a fɔ i josokun nɔ, i vɛɛ: ‹Jene kɛtɔ jɛlɛla ka taa haijɛnɛ?› (Wo kɔlɔ le ko a yi Masa Tɔɔmasenin lajii.) 7I do kà a fɔ kɔtunun, i vɛɛ: ‹Jene kɛtɔ jiila ka taa Laikila?› » (Wo kɔlɔ le ko a yi Masa Tɔɔmasenin lawuli ka bɔ fulenilu tɛma.) 8Kɛɛ mindɛ le sɛvɛnin je? A vɛɛ: «Ala kumakan masulunyanin i la, a y'i da, ani a y'i josokun nɔ.» Kumakan wo yi limaniya kuma le le, m'i min lasena. 9Ni i k'i lɔ a la i da le k'a fɔ ko Isa y'i Tii le le, ani ka limaniya i josokun nɔ k'a fɔ ko Ala n'a lawulila ka bɔ saya lɔ, wo vɛ kɛla, i yi kisile. 10Kamasɔlɔn ni i ka limaniya i josokun nɔ, Ala y'i jatele telenmande le. Ado ni i k'i lɔ a la i da le, i yi kisile. 11A sɛvɛnin kitabu kɔnɔ, ko: «Ni mɔɔ mɔɔ ka limaniya a ma, wo tii tɛnala maloyala.» 12Wo lɔ saa, wotɛbɔli tɛ Jahudiyalu ni siboloma gbɛlɛ mɔɔlu wotɛ butu, kamasɔlɔn Tii kelen ne yi bɛ kunna, a do y'aa nɛɛma dila a tɔɔ kiliba bɛ le ma kosɛvɛ. 13A sɛvɛnin tan ne kitabu kɔnɔ, ko: «Ni mɔɔ mɔɔ ka mɔ Tii tɔɔ kili, wo tii yi kisile.»
14Kɛɛ ai kɛtɔ a tɔɔ kilila di vɛ, ni ai ma limaniya a ma? Ai kɛtɔ limaniyala a ma di vɛ, ni ai ma aa ko mɛn? Ai do kɛtɔ aa ko mɛnna di vɛ, ni mɔɔ ma ai kawani? 15Mɔɔ kɛtɔ ai kawanila di vɛ, ni mɔɔ ma kelaya ai ma? A sɛvɛnin tan ne kitabu kɔnɔ, ko: «Samakan Kein lasenbalu yenko bɛnyine feu!» 16Kɛɛ mɔɔ bɛ ma ai bolo sii Samakan Kein kɔlɔ. Wo le n'a kɛla, Nabi Ezayi n'a fɔla, a vɛɛ: «Ǹ Tii, jene vɛ limaniya maa kawanili ma?» 17Wo le y'a ma, mɔɔ yi limaniya sɔlɔnna tolomalɔ le fɛ, mɔɔ do yi min mɛnna, wo yi bɔla Masa Tɔɔmasenin kumakan ne lɔ.
18Wo ma, ǹ'i ɲiningali kɛla, ǹ ko: Jalasa Jahudiyalu ma kuma wo mɛn? Ai v'a mɛn jɔ! Kamasɔlɔn a sɛvɛnin kitabu kɔnɔ, ko:
«Kawanilikɛbalu kumakan vɛ jɛzɛn duukolo fan bɛ lɔ,
ado aiya kumalu vɛ se haan fɔɔ dunuɲa dan na.»
19Ǹ'i ɲiningali kɛla kɔtunun, ǹ ko: Jalasa Bani Isilankalu ma Ala kumakan ɲaye? Nabi Musa le na wo javila kunfɔlɔ le, a vɛɛ:
«Ǹ kɛtɔ ài kɛla keleyatɔlu le ka bɛn mɔɔ wolu ma, minu tɛ siboloma le.
Ado ǹ kɛtɔ ài lamɔnɛla ka bɛn siboloma hangilindan ne ya ko ma.»
20Wo kɔ, Nabi Ezayi ka Ala dalakan lase wakali boloma, a vɛɛ:
«Mɔɔ minu tɛɛ tɛ ǹ ɲininna, wolu vɛ ǹ ye.
Ado m̀'ɛ ǹ jɛlɛ jiya mɔɔlu la minu tɛɛ tɛ ǹa ko maɲiningala.»
21Kɛɛ a na min ne fɔla ka bɛn Bani Isilankalu ya ko ma, a vɛɛ: «M̀'ɛ m̀ bolo sii jama mulutunin yɛ tele muumɛ kɔlɔ, ailu minu yi ǹ sɔsɔla kudein.»
Currently Selected:
Lɔmukalu 10: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
