Lɔmukalu 9
9
Ala na mɔɔ minu tala
1Ǹ'i tuɲa le fɔla yi ne, ǹe do tɛ faɲa fɔla, kamasɔlɔn Masa Tɔɔmasenin ta le ǹ ne. Ado Nii Sɛnɛyanin gbu le yi seleya dila ǹ josokun nɔ ko 2ǹ niilafinyine, ani ǹ josoladiyanin tɛ waate bɛ 3ka bɛn ǹa mɔɔlu ma, ǹ jɛlɛkanu siboloma koni. Kamasɔlɔn hali ni ǹ tɛɛ kɛ Ala ya daan kɔlɔ ani ka falan Masa Tɔɔmasenin ya kafonɲɔɔya la ai lakisiko lɔ, ǹ tɛɛ diɲale wo ma. 4Bani Isilanka le ai le, Ala na minu kɛla a jɛlɛkanu dennu le, ka aa magbiliyali jiya ai la, ka salatikannu ta ale ni ailu wotɛ, ani ka aa seliya di ai ma. Ai do vɛ batokɛɲa bɛlɛbɛlɛ sɔlɔn, ani Ala ya lahedilu. 5Ai bemanu taanin kɛla Ibulahima, Isiyaka ni Janguba le le. Ado Masa Tɔɔmasenin ka na mingɛ adamadenya boloma, a fɛ tɛɛ ai siboloma le la. Ala min yi fen bɛ kunna, tanuli y'a yɛ habadan! Amiina.
6A tɛ k'a fɔ ko Ala kumakan koliyine, kamasɔlɔn mɔɔ minu bɛ yi bema Isilan bɔzɔn ne, wolu bɛ tɛ Bani Isilanka bɛlɛbɛlɛ le. 7Ado bema Ibulahima jilijaalu bɛ tɛ a den bɛlɛbɛlɛ le. Kamasɔlɔn Ala n'a fɔla Ibulahima yɛ, a vɛɛ: «Ǹ na lahedi min tala i bɔzɔn minu yɛ, wolu bɔtɔ Isiyaka le lɔ.» 8Wo kɔlɔ le ko den minu sɔlɔnnin adamadenya sabu la, wolu tɛ jatela Ala den ne. Kɛɛ minu do sɔlɔnnin ka bɛn Ala ya lahedi ma, wolu le jatela a den bɛlɛbɛlɛ le. 9Kamasɔlɔn Ala na lahedi tala Ibulahima yɛ, a vɛɛ: «Ǹ kɔseitɔ i fɛlɔ numaija min ɲɔɔzii saa lɔ, k'a talan Salan vɛ denkɛ sɔlɔn.»
10A do ma dan wo ma, mafɔ a ka kɛ Lebeka fana yɛ wo boloɲa kelen ne ma, a na filaninnu kɔnɔ tala mɔ bema Isiyaka la waate min nɔ. 11Jani filaninnu tɛɛ sɔlɔn, k'a talan ai tɛɛ ma koɲuma kɛ ba bene, niwotɛ koyon, Ala ka kolu labaale fɔsa aa mɔɔtako jusiinin yi to aa kolatɛɛnin kɔkan. A do jusiinin tɛ mɔɔ kɛkolu kɔkan, mafɔ ale min yi mɔɔlu kilila. 12Wo le k'a kɛ, a k'a fɔ Lebeka yɛ, a vɛɛ: «Kɔlɔmanda kɛtɔ dɔɔmanda ya jɔn ne le.» 13A sɛvɛnin kitabu kɔnɔ tan ne, ko: «Ǹ na Janguba le kanula, ka Esawu lagbeyaɲɛ.»
14M'i mindɛ fɔ wo lɔ? Jalasa Ala telennin tɛ? Wo tɛ dɛ! 15Kamasɔlɔn Ala k'a fɔ Nabi Musa yɛ, a vɛɛ: «Ni ǹ'a fɛ ka mɔɔ min maɲumaye, ǹ kɛtɔ wo tii maɲumayena. Ni ǹe do y'a fɛ ka hena mɔɔ min na, ǹ'i henale wo tii ma la.» 16Wo lɔ saa, Ala ya mɔɔtako jusiinin tɛ adamadennu sawonanko kɔkan, niwotɛ ai kɛkolu, mafɔ Ala ya henandeya. 17Kitabu kɔnɔ, Ala k'a fɔ Filawuna yɛ, a vɛɛ: «M̀'ɛ i lasii masaya la, fɔsa ǹ'i ǹa seetiiya jiya i lɔ, ani ǹ tɔɔ yi fɔ dunuɲa fan bɛ lɔ.» 18Wo ma yi ne, Ala yi henala mɔɔ le la min v'a diyala, ani ka mɔɔ kɛ kataigbɛlɛn ne min v'a diyala.
Ala ya mɔnɛya ni aa henandeya
19Wo lɔ, dɔ kɛtɔ a fɔla, a vɛɛ: «Ni a ka kɛ ten, mindɛ lɔ Ala yi fɛɛ yena mɔɔlu la? Jene yi se i banna Ala sawo ma?» 20Kɛɛ ile adamaden, i i jɛlɛ yena mɔɔ mindɛ le k'a fɔ ko i yi Ala sɔsɔ? Jalasa bɔɔdaa yi sene k'a fɔ daaladanba yɛ, a vɛɛ: «Mindɛ lɔ i na ǹ ladanna tan?» 21Bɔɔ yi daaladanba ta le le, kɛlɛ? A jo le k'a fɔ ko a yi wo bɔɔ kelen ta ka daa kein ladan a le, ani k'a dɔgbɛlɛ ladan daa jɛlɛla le, kɛlɛ?
22Wo boloɲa kelen ma, a lɔɔ tɛɛ Ala la ka aa mɔnɛya jiya, ani ka aa seetiiya lankɛnɛmaya. Kɛɛ a mɔnɛnin mɔɔ minu kanma, minu lɔbɛnnin tɛɛ halakiko lɔ, a na wolu ya ko minala a ma sawali boloma. 23A na wo kɛla fɔsa a aa magbiliyali wala jate jiya dɔ mɔɔlu la, a na henala minu la k'ai lɔbɛn magbiliyali sɔlɔnko lɔ ka ta waate jaan ma. 24Hali ǹu minu kilinin Ala bolo, mɔ bɛ kilinin tɛ ka bɔ Jahudiyalu tɛma dein, mafɔ siboloma gbɛlɛ mɔɔlu fana. 25A sɛvɛnin tan ne Nabi Hoseya ya kitabu kɔnɔ, ko:
«Mɔɔ minu fɛ tɛɛ tɛ ǹa mɔɔlu la,
ǹ kɛtɔ a fɔla wolu ma: ‹Ǹa mɔɔlu.›
Ado siboloma min diyanin tɛɛ tɛ ǹ yɛ kɔlɔman ne,
ǹ kɛtɔ a fɔla wo ma: ‹Ǹ diyananmɔɔ.›
26A fɔnin tɛɛ ai yɛ tɛɛminja, ko: ‹Ǹa mɔɔ tɛ ài le,›
a yi fɔle ai ma woja gbugbu lɔ, ko: ‹Ɲɛnɛmayatii Ala dennu.› »
27Nabi Ezayi fana k'a kan labɔ ka bɛn Bani Isilankalu ya ko ma, a vɛɛ:
«Hali Bani Isilankalu walanin ka kɛ iwo kɔɔji kawunna kiɲɛ,
kɛɛ ai dana le kisitɔ dein.
28Kamasɔlɔn mɔ Tii kɛtɔ a latelejala ka aa kolatɔn dafanin kɛ duukolo kɔkan.»
29A kɛyine kɔtunun iwo kelayakuma minu fɔnin Nabi Ezayi bolo, ko:
«Ni Seebɛtii Ala tɛɛ ma hena mɔ la ka mɔ bɔzɔn dɔlu to je,
mɔ tɛɛ banne tɛtɛ iwo Sɔdɔmukalu,
ani ka tunun iwo Gɔmɔlikalu.»
Bani Isilankalu ya limaniyabaliya
30M'i mindɛ le fɔ wo lɔ butu? Siboloma gbɛlɛ mɔɔ minu tɛɛ tɛ telenmandeya ɲininna, wolu vɛ telenmandeya sɔlɔn, telenmandeya min yi sɔlɔnna limaniya fɛ. 31Kɛɛ Bani Isilanka minu tɛɛ telenmandeya ɲininna seliya latelenko fɛ, wolu ka polo a ma. 32Mindɛ lɔ? Kamasɔlɔn Bani Isilankalu tɛɛ tɛ a ɲininna limaniya boloma, mafɔ k'ai bolomala ai jɛlɛkanu kɛkolu ma. Ai sen tuunin kawakulun ne la min yi mɔɔ labenna, 33iwo a sɛvɛnin kitabu kɔnɔ teme, ko:
«Ài y'a ye, m̀'ɛ sen tuu kawakulun dɔ bila Ziyɔn so kɔnɔ,
min kɛtɔ kɛla sabu le ka mɔɔlu laben.
Kɛɛ do, ni mɔɔ mɔɔ ka limaniya a ma,
wo tii tɛnala maloyala.»
Currently Selected:
Lɔmukalu 9: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
