Lɔmukalu 8

M'i taama ka bɛn Nii Sɛnɛyanin sawo ma.

1Wo lɔ saa, jobaliyako tɛ mɔɔlu ma butu, minu yi Masa Tɔɔmasenin Isa ya kafonɲɔɔya lɔ. 2Kamasɔlɔn Nii Sɛnɛyanin ya seliya min yi niimaya dila Masa Tɔɔmasenin Isa ya kafonɲɔɔya lɔ, wo vɛ ǹ lafɛlɛ ka m̀ bɔ julumbu ni saya ya seliya kɔlɔ. 3Ka bɛn mɔ falikolo ya fangandanya ma, Nabi Musa ya seliya tɛɛ ma se ko min kɛla mɔ yɛ, Ala gbu le na wo kɛla. A na a jɛlɛkanu Denkɛ lanala dunuɲa adamaden julumbutɔlu sawula lɔ, fɔsa a tɛɛ julumbu fanga tiɲa ale jɛlɛ falikolo ya salaka le. 4Wo le y'a kɛ, seliya yi telenmandeya min makilila, wo da yi fa mɔ taamaɲa lɔ teme, ǹu minu tɛ taamana ka bɛn mɔ falikolo ladiyanankolu ma, mafɔ Nii Sɛnɛyanin sawo. 5Kamasɔlɔn mɔɔ minu yi taamana ka bɛn ai falikolo ladiyanankolu ma, wolu nii lanin ko suu wolu le kɔkan. Kɛɛ do, mɔɔ minu yi taamana ka bɛn Nii Sɛnɛyanin sawo ma, wolu nii lanin Nii Sɛnɛyanin ya kolu le kɔkan. 6K'i nii la i falikolo ladiyanankolu kɔkan, wo laban yi saya le le. Kɛɛ k'i nii la Nii Sɛnɛyanin ladiyanankolu kɔkan, wo laban yi niimaya ni josolajii le le. 7Kamasɔlɔn mɔɔ min nii lanin a falikolo ladiyanankolu kɔkan, wo tii v'i lɔ Ala ɲa, kamasɔlɔn a m'a kolo Ala ya seliya yɛ, a do tɛ se wo la feu. 8Mɔɔ minu yi taamana ka bɛn ai falikolo ladiyanankolu ma, wolu ya ko tɛ se diyala Ala yɛ.

9Àilu koni tɛ taamana ka bɛn ài falikolo ladiyanankolu ma, mafɔ Nii Sɛnɛyanin sawo, ni wo lasawatinin ka kɛ ài lɔ bɛlɛbɛlɛ kɛ. Ni Masa Tɔɔmasenin Nii Sɛnɛyanin tɛ mɔɔ min nɔ, wo tii ma tɛ a ta le. 10Kɛɛ do, ni Masa Tɔɔmasenin lasawatinin ka kɛ ài lɔ, hali ni ài falikolo sanin ka kɛ ka bɛn julumbu ma, Nii Sɛnɛyanin yi niimaya dile, kamasɔlɔn ài vɛ kɛ telenmande le Ala ɲakɔlɔ. 11#1 Kolɛntikalu 3.16.Ala min na Masa Tɔɔmasenin Isa lawulila ka bɔ saya lɔ, ni wo Nii Sɛnɛyanin lasawatinin ka kɛ ài lɔ, ale Ala kelen ne kɛtɔ niimaya dila ài fali satalu ma a Nii Sɛnɛyanin sabu la, min lasawatinin ài lɔ.

12Wo lɔ saa, m̀ badenmalu, diyanigbeya tɛ mɔ kan butu k'a fɔ ko m'i kɛ taamana ka bɛn mɔ falikolo ladiyanankolu ma. 13Kamasɔlɔn ni ài vɛ kɛla taamana ka bɛn ài falikolo ladiyanankolu ma, ài yi sale feu. Kɛɛ ni ài do k'ài falikolo ya koyonnu lɔsa Nii Sɛnɛyanin sabu la, ài yi niimaya sɔlɔnne. 14Kamasɔlɔn mɔɔ minu yi taamana iwo Ala Nii Sɛnɛyanin y'ai lɔla teme, wolu bɛ yi Ala den ne le. 15#Galatiyakalu 4.5-7.#Malɛkɛ 14.36; Galatiyakalu 4.6.Ài na Nii min sɔlɔnna, wo tɛ ài bilala jɔnya lɔ k'ài kɛ siyanbatɔ le kɔtunun. Mafɔ, mɔ na Nii min sɔlɔnna, wo vɛ mɔ kɛ Ala den ne le. Ado ka bɛn Nii min ma, m'i sene a fɔla Ala ma, mɔ vɛɛ: «Mɔ Fa! Mɔ Fa!» 16Nii Sɛnɛyanin gbu yi seleya min dila, wo seleya kelen ne yi mɔ josokun nɔ ko Ala den ne mɔ le. 17Komi Ala den ne mɔ le, mɔ kɛtɔ balayi sɔlɔnna iwo a dennu. Kamasɔlɔn Ala yi balayi min ladalola Masa Tɔɔmasenin yɛ, mɔ fɛ kɛtɔ kɛla wo sɔlɔnko la. Kɛɛ fɔ mɔ fɛ yi kɛ aa tɔlɔyalu la bene, jani m'i magbiliyali sɔlɔn a fɛ.

Magbiliyali min natɔ

18Ǹ ta miliya lɔ, bi tɔlɔyalu tɛ se sumala magbiliyali ma min la kɛtɔ nkɛnɛmayala mɔ yɛ sinin. 19Kamasɔlɔn dannifen bɛ kɔlɔtɔnin wo lon nako le la, Ala kɛtɔ a dennu lankɛnɛmayala lon min na. 20Kamasɔlɔn dannifennu bɛ la ka don nafandanya kɔlɔ. Wo ma kɛ ailu gbu sawonanko le, mafɔ ale sawonanko, ale min n'ai ladonna je. Kɛɛ wo bɛ n'a kɛ, jeisii yi je bene, 21k'a fɔ ko lon dɔ, dannifen bɛ la kɛtɔ fɛlɛla k'ai bɔ tiɲali ya jɔnya lɔ, ani ka lafɛlɛ ni magbiliyali sɔlɔn iwo Ala dennu kɛnin teme. 22Mɔ k'a lɔn ne ko haan fɔɔ ka na sii bi la, dannifen bɛ y'ai wunɛla i ɲɔɔ le, iwo moso min yi tin nɔ. 23#2 Kolɛntikalu 5.2-4.A do dan tɛ dannifen wolu kelen ne, mafɔ ǹu minu vɛ Nii Sɛnɛyanin sɔlɔn iwo sɛnɛfen den kunfɔlɔ. M'i mɔ wunɛla mɔ kɔnɔ ka to lon wo makɔnɔna, Ala kɛtɔ mɔ kɛla a jɛlɛkanu dennu le lon min na, ka mɔ falikolo kunmaka tɛtɛ. 24Mɔ la vɛ kisi jeisii min fɛ. Ado i jei siinin ko min na, ni i vɛ wo yena, i t'a fɔla wo ma ko: «Ǹ jeisii». Jene jei siinin ko dɔ la, a vɛ ban min yena? 25Kɛɛ ni mɔ jei siinin ka kɛ ko yenbali dɔ la, m'i wo makɔnɔna sawali le boloma.

26Wo boloɲa kelen ma, Nii Sɛnɛyanin yi mɔ madɛmɛnna maa fangandanya lɔ. Kamasɔlɔn mɔ m'a lɔn m'i Ala dali ko minu la, kɛɛ Nii Sɛnɛyanin gbu le yi mɔ masolonali minala Ala ma wunɛ boloma, min tɛ kumafɔ talu le. 27Ado Ala min yi mɔ josokun lasaala, wo ka Nii Sɛnɛyanin miliya lɔn, kamasɔlɔn Nii Sɛnɛyanin yi mumininnu masolonali minala Ala ma ka bɛn Ala sawo le ma.

28Mɔ do k'a lɔn ne ko, ko bɛ la yi banna a ɲuma le ma Ala kanundelu yɛ, minu kilinin ka bɛn aa kolatɛɛnin ma. 29Kamasɔlɔn mɔɔ minu lɔnnin tɛɛ Ala bolo ka ta a damina ma, a k'a latɛɛ fana ko wolu yi kɛ a Denkɛ sawula le le, fɔsa wo yi kɛ den kunfɔlɔ le badenma siyama wotɛ. 30Ado a na wo latɛɛla mɔɔ minu ma, a na wolu le kilila fana. Ado a na mɔɔ minu kilila, a na wolu jatela telenmande le fana. Ado a na mɔɔ minu jatela telenmande le, a na magbiliyali dila wolu le ma fana.

Ala ya kanundeya banbali

31M'i mindɛ fɔ butu ka bɛn ko minu ma? Ni Ala ka kɛ mɔ fɛ, jene yi se i lɔla mɔ ɲa? 32Ala min ma saya lagban a jɛlɛkanu Denkɛ kunna, mafɔ ka wo di mɔ bɛ ya ko lɔ, jalasa a tɛnala mɔ sɔla fen bɛ la fana? 33Wo lɔ saa, jene kɛtɔ nala telemasɔɔli le Ala ya mɔɔ taninnu kanma? Ala gbu le ai lajola. 34Jene yi se ai jobaliyala? Kamasɔlɔn Masa Tɔɔmasenin Isa le na sala. K'a dɔ la wo kɔkan, a lawulinin ka bɔ saya lɔ. A do siinin Ala bolokini fannɔ, a vɛ mɔ masolonali minala Ala ma. 35Mindɛ le yi se mɔ fɛ tɛɛla Masa Tɔɔmasenin ya kanundeya la? Tɔlɔya, niwotɛ hangili ɲaami? Jangata, niwotɛ kɔɔn? Feeyabɔtanya, niwotɛ masuwako, niwotɛ siyamifan? 36A sɛvɛnin tan ne kitabu kɔnɔ, ko:

«Ka bɛn iya ko ma, mɔ labilanin saya yɛ tele o tele.

Ai yi mɔ yena iwo saa minu bilanin ai kannatɛɛko kanma.»

37Kɛɛ wo bɛ lɔ, mɔ vɛ kɛ seesɔlɔnbalu le feu ka bɛn ale le ma, ale min na mɔ kanula. 38-39Kamasɔlɔn ǹ lanin a la ko foi tɛnala sena mɔ fɛ tɛɛla Ala ya kanundeya la. Ni a ka kɛ saya le, niimaya le, mɛlɛkalu le, jinalu le, bi kolu le, sinin kolu le, seetiilu le, sangbololɔ fangatiilu le, duukolokɔkan fangatiilu le, kumatɛ dannifen suu suu ma, wo foi tɛnala sena mɔ fɛ tɛɛla Ala ya kanundeya la, min jiyanin mɔ la mɔ Tii Masa Tɔɔmasenin Isa fɛ.

Currently Selected:

Lɔmukalu 8: MBT2023

Highlight

Copy