Kɛkolu 8
8
Sawuli ka limaniyamɔɔlu jangata teme
1Ado Sawuli ka diɲa Etiyɛn faako ma. Wo lon kelen na, jangata ba k'i wuli limaniyajama kanma Jelusalɛmu so kɔnɔ. Wo lɔ, ai bɛ ka jɛzɛn Jude ni Samaliya koovilu fan bɛ lɔ. Keladennu le ma bɔ Jelusalɛmu dein. 2Ado Alaɲasiyanɲɛmɔɔ dɔlu ka Etiyɛn sudoon ka sayakasi kɛ bubale aa ko lɔ.
3 #
Kɛkolu 22.4, 5; 26.9-11. Kɛɛ Sawuli tɛɛ a lɔjala ka limaniyajama lɔtiɲa, a vɛ taala bon ni bonnu la ka kɛ́ ni mosolu fɔnfɔn k'ai bila kaso la.
Filipe ka Samaliyakalu kawani teme
4Wo k'a talan, limaniyamɔɔ minu jɛzɛnnin tɛɛ, wolu tɛɛ timintiminna fan bɛ lɔ ka Samakan Kein lase. 5Ado Filipe ka taa Samaliya so dɔ la ka Masa Tɔɔmasenin ya ko lase je. 6Jama bɛ ka kawanankolu kɛnin ye Filipe bolo mingɛ, ai k'ai tolomalɔ a la kelen ne. 7Kamasɔlɔn jinajuulu tɛɛ bɔla mɔɔ siyama lɔ gbanɔkan ne, ani namalani ni falifaamatɔ siyama la ka kɛnɛya. 8Wo le k'a kɛ, sokɔnɔmɔɔlu ka sawa bubale.
9Kɛ́ dɔ tɛɛ je, min tɔɔ tɛɛ ko Simɔn. A tɛɛ wɔimaya le kɛla so wo la ka Samaliyakalu bɛ lakawakoya. A do tɛɛ a jɛlɛ kɛla mɔɔba le le. 10Fandannilu ni seetiilu bɛ tɛɛ ai tolomalɔla a la kosɛvɛ, ai vɛɛ: «Ai y'a fɔla Ala ya see min ma ko ‹See Makawanin,› kɛ́ min ne wo le.» 11Simɔn ya ko tɛɛ vɛ ai kun mina, kamasɔlɔn a tɛɛ vɛ mɛn ai lakawakoyala aa wɔimaya le. 12Kɛɛ Samakan Kein ka bɛn Ala ya masaya ma ani Masa Tɔɔmasenin Isa tɔɔ, Filipe ka wo lase ai ma mingɛ, ai ka limaniya. A do k'ai mako ji kɔlɔ, kɛ́ ni mosolu. 13Simɔn gbu ka limaniya. A ban kɔ makoli sɔlɔnna, a ka to Filipe fɛ kawakoya boloma, kamasɔlɔn a tɛɛ tɔɔmase ni kawanankolu kɛnin yena wo bolo.
14Keladen minu tɛɛ Jelusalɛmu, wolu k'a mɛn ko Samaliyaka dɔlu vɛ ai bolo sii Ala kumakan kɔlɔ. Wo le k'a kɛ, ai ka Piyɛli ni Yohana lataa ai ma. 15Ai senin Samaliya, ai ka Ala dali limaniyamɔɔlu yɛ, fɔsa ai yi Nii Sɛnɛyanin sɔlɔn. 16Kamasɔlɔn Nii Sɛnɛyanin tɛɛ ma jii ba bene ai suu suu kɔkan, kɛɛ ai tɛɛ vɛ makoli le sɔlɔn mɔ Tii Isa tɔɔ lɔ dein. 17Wo ma, Piyɛli ni Yohana k'ai bolo la ai kɔkan mingɛ, ai ka Nii Sɛnɛyanin sɔlɔn.
18Simɔn k'a ye mingɛ ko ai vɛ Nii Sɛnɛyanin sɔlɔn keladennu ya bololankan fɛ, a ka wɔli bɔ ko a a di ai ma. 19A do vɛɛ ai yɛ: «Ài yi seetiiya wo di ǹe fana ma, fɔsa m̀'ɛ m̀ bolo lala mɔɔ min kɔkan, wo tii yi Nii Sɛnɛyanin sɔlɔn.»
20Kɛɛ Piyɛli vɛɛ a yɛ: «Ile ni iya wɔli bɛ yi halaki, kamasɔlɔn a y'i kɔnɔ ko Ala ya sɔli yi sɔlɔnna wɔli le le! 21I fɛ tɛ maa baale la feu, kamasɔlɔn i joso telennin tɛ Ala ɲakɔlɔ. 22I i dajoo mafalin, i yi mɔ Tii madiya, fɔsa a y'i makoto ka bɛn i miliya yon min ma, ni wo yi se kɛla. 23M̀'ɛ a ye ɲangbeya le walanin i josokun nɔ fɔɔ i vɛ kɛ julumbu ya jɔn ne.»
24Simɔn k'a javi, a vɛɛ: «Ài yi mɔ Tii madiya ǹ yɛ, fɔsa ài na min fɔla yi ne, wo suu suu kana kɛ ǹ na.»
25Piyɛli ni Yohana wɔlinin seleya dila ka bɛn Isa ma, ani ka mɔ Tii kumakan lase, ai vɛ seikɔla Jelusalɛmu. Ai taatɔla, ai ka to Samakan Kein lasena Samaliyakalu ya soni siyama la.
Filipe ka Ala kumakan lase Etiyopiya ɲamɔɔ dɔ ma teme
26Wo kɔ, mɔ Tii ya mɛlɛka dɔ k'a fɔ Filipe yɛ, a vɛɛ: «I wuli, i yi taa bolokini fannɔ. I yi fuwalɔ siya wo ta, min yi bɔla Jelusalɛmu ka taa Gaza.» 27Wo fɔ, Filipe v'i wulila ka taa. Wo k'a talan Etiyopiya kɛ́ dɔ tɛɛ siya wo la. Kɛ́ tɛnnin ne tɛɛ, min siinin tɛɛ Etiyopiya masamoso Kandasi ya nafolo bɛ kunna. Wo taanin tɛɛ Ala batoya lɔ Jelusalɛmu. 28A seikɔtɔla a fɛso, a siinin tɛɛ aa soowotolo lɔ, a vɛ Nabi Ezayi ya kitabu kalanna. 29Ado Nii Sɛnɛyanin vɛɛ Filipe yɛ: «I madon soowotolo la ka taama a dafɛ.» 30Wo fɔ, Filipe vɛ bɔlila ka taa se kɛ́ wo ma k'a kan mɛn, a vɛ Nabi Ezayi ya kitabu kalanna. A do k'a maɲininga, a vɛɛ: «I yi min kalanna yi ne, i ka wo kɔlɔ lɔn ne?»
31A do vɛɛ Filipe yɛ: «Ni mɔɔ ma a kɔlɔ fɔ ǹ yɛ, ǹ'i se a ɲayena di?» A do k'a fɔ Filipe yɛ ko a yi jɛlɛ k'i sii a tɔɔfɛ soowotolo kɔnɔ. 32A tɛɛ dingila min kalanna, wo le min ne, ko:
«A kɛyine tɛɛ iwo saa min lananin a kannatɛɛba ma,
ado saa bolan tɛ kasila a sitɛɛba bolo teme,
a do ma foi fɔ ten ne.
33Ai ka a lafeya, ka aa kiti tɛɛ telenbaliya boloma.
Jene yi se a bɔzɔnnu ya ko fɔla?
Kamasɔlɔn ai ka a fɛ bɔ dunuɲa la.»
34Wo lɔ, Etiyopiya kɛ́ ka Filipe maɲininga, a vɛɛ: «I jon, i y'a fɔ ǹ yɛ, kela kan yi jene ma jannɔ? Ale gbu, baa mɔɔ gbɛlɛ?» 35Wo lɔ, ka ta kitabu dingila wo ma, Filipe vɛ Isa ya Samakan Kein lasena a ma.
36Ai ka to taala ka se kɔɔ dɔ ma mingɛ, kɛ́ do vɛɛ Filipe yɛ: «A ye, kɔɔ le ne! Mindɛ le yi ǹ dansiila m̀ makoko la?»
37[Filipe k'a javi, a vɛɛ: «Ni i ka limaniya i josokun bɛ la, wo yi sene kɛla.»
Kɛ́ do vɛɛ: «M̀'ɛ limaniya k'a fɔ ko Masa Tɔɔmasenin Isa yi Ala Denkɛ le le.»]
38Etiyopiya kɛ́ do ka jamali di soowotolo bɔliba ma ko a yi lɔ. Wo kɛ, ai mɔɔ fila bɛ ka jii kɔɔ lɔ, Filipe do ka a mako. 39Ai bɔnin kɔɔ lɔ feeya, mɔ Tii Nii ka Filipe ta ka taa a le. Kɛ́ wo do ma a ye butu. A do ka bɔ je ka to taamana sawa boloma.
40Filipe do k'a jɛlɛ ye Azotu so kɔnɔ. A taatɔla, a vɛ Samakan Kein lasena so bɛ la haan fɔɔ ka se Sezale.
Currently Selected:
Kɛkolu 8: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
