Kɛkolu 9

Sawuli ka tube teme

1Wo waate lɔ, Sawuli tɛɛ masiyannikannu ni faaliko fɔla mɔ Tii Isa kɔbiladennu kanma. A do ka taa salakalase kuntiiba fɛlɔ, 2k'a maɲininga sɛvɛli dɔlu ma, fɔsa a yi taa wolu jiya Aladalibon ɲamɔɔlu la Damase so kɔnɔ. Wo lɔ saa, ni a tɛɛ ka kɛ́ ni moso dɔlu ye je, minu tɛɛ Isa ya siya kɔkan, a tɛɛ wolu minale ka na ai silinin ne Jelusalɛmu.

3Sawuli masulunyatɔla Damase so la, nɔɔlɔ ka bɔ sanma telemanin k'a makɛ kala. 4A do k'i ben duu ma ka kumakan dɔ mɛn, wo vɛɛ a yɛ: «Sawuli, Sawuli, mindɛ lɔ i yi ǹ jangatala?»

5Sawuli vɛɛ: «Ǹ Tii, jene i le le?»

A do ka Sawuli javi, a vɛɛ: «Ǹe le Isa le, i yi min jangatala. 6I wuli, i yi taa so kɔnɔ. I ka kan ka min kɛ, wo fɔtɔ i yɛ je.»

7Kɛ́ minu tɛɛ Sawuli taamaɲɔɔlu le, wolu k'i lɔ dalaja boloma. Ai tɛɛ kumakan wo mɛnna, kɛɛ ai do ma mɔɔ ye. 8Sawuli do v'i wulila duu ma k'a ɲa maka, kɛɛ a tɛɛ tɛ yeni kɛla. Wo lɔ, ai k'a bolo mina ka taa a le Damase. 9A ka tele sawa kɛ, a tɛɛ tɛ yeni kɛla, a ma dɔnni kɛ, kumatɛ k'i min.

Ala ka Ananiya kelaya Sawuli ma teme

10Wo k'a talan Isa kɔbiladen dɔ tɛɛ Damase, min tɔɔ tɛɛ ko Ananiya. Mɔ Tii ka ko dɔ lajɛlɛ a ɲa ma, a vɛɛ: «Ananiya.»

A do vɛɛ: «Naam, ǹ Tii.»

11Mɔ Tii vɛɛ a yɛ: «I wuli, i yi taa siya dɔ la, ai y'a fɔla min ma ko Siya Telennin. I yi taa Judasi ya bon na, ka Taleseka kɛ́ dɔ maɲininga a la, min tɔɔ yi ko Sawuli. A yi Ala dalila yi ne. 12M̀'ɛ ko dɔ lajɛlɛ a ɲa ma. A do ka kɛ́ dɔ natɔla ye a ma, min tɔɔ yi ko Ananiya. Wo do k'a bolo la a kɔkan fɔsa a ɲa la yi ka.»

13Ananiya do vɛɛ: «Ɛɛ, ǹ Tii! M̀'ɛ a mɛn mɔɔ siyama da ko kɛ́ min vɛ koyon siyama kɛ iya mumininnu la Jelusalɛmu. 14Salakalase kuntiibalu na seetiiya le dila a ma ka na Damase, fɔsa a yi mɔɔ wolu bɛ mina minu yi madaili kɛla i tɔɔ lɔ.»

15Kɛɛ mɔ Tii k'a javi, a vɛɛ: «Taa vɛ! Kamasɔlɔn m̀'ɛ kɛ́ wo ta k'a kɛ ǹa bɔiden ne, fɔsa a yi siboloma gbɛlɛlu lalɔnni ǹ tɔɔ la, ani masakɛlu ni Bani Isilankalu. 16A do kɛtɔ tɔlɔya minu masɔlɔnna ǹa ko lɔ, ǹe gbu le kɛtɔ wo jiyala a la.»

17Wo lɔ, Ananiya vɛ taala ka don bon wo la, k'a bolo la Sawuli kan, k'a fɔ a yɛ, a vɛɛ: «M̀ badenma Sawuli, mɔ Tii Isa min n'a jɛlɛ jiyala i la siya la, i tɛɛ nala jan waate min nɔ, wo le na ǹ lanala fɔsa i ɲa la yi ka kɔtunun, ani i josola yi fa Nii Sɛnɛyanin la.» 18Telemanin, fen dɔlu ka bɔ Sawuli ɲa ma, minu kɛnin tɛɛ iwo jɛɛ fala. A do ka se yeni kɛla kɔtunun. A wulinin, ai k'a mako ji kɔlɔ. 19A ban kɔ dɔnnila, a ka fanga sɔlɔn.

Sawuli ya kawanili Damase

Sawuli ka tele dana kɛ limaniyamɔɔlu fɛ Damase. 20A ka taa telemanin ka kawanili damina Jahudiyalu ya Aladalibonnu la, ka to a fɔla ai yɛ ko Isa yi Ala Denkɛ le le.

21A lamɛnbalu bɛ dala ka ja, ai vɛɛ: «Kɛ́ min ne tɛɛ tɛ mɔɔlu halakila Jelusalɛmu, minu yi Ala dalila Isa tɔɔ lɔ? Jalasa a nanin tɛ jan dailu kelen wo le la, ka mɔɔ wolu mina ka taa ai le salakalase kuntiibalu fɛ?»

22Kɛɛ a dɔ ka to lala Sawuli fanga kɔkan haan fɔɔ ka Damase Jahudiyalu kɔnɔlɔfili, kamasɔlɔn a k'a lagbɛ ai yɛ ko Isa le Masa Tɔɔmasenin ne.

23 # 2 Kolɛntikalu 11.32, 33. Tele siyama timin kɔ, ai k'ai kun bilin i ɲɔɔ ma ka Sawuli faako ɲaɲinin, 24kɛɛ Sawuli ka kɛ aiya janva wo kalama. Su ni tele, ai kɔngɔnin tɛɛ a ma so dondalu la a faako lɔ. 25Kɛɛ su dɔ lɔ, a kɔbiladennu ka a bila gbɔlɔ lɔ, ka a lajii julu le so jiin kɔma.

Sawuli ka se Jelusalɛmu teme

26Sawuli senin Jelusalɛmu, a k'a bilako lɔsuma Isa kɔbiladennu fɛ, kɛɛ ai bɛ tɛɛ siyanna a ɲa. Ai do tɛɛ ma la a la k'a fɔ ko Isa kɔbiladen bɛlɛbɛlɛ le a le. 27Kɛɛ Baanabasi le k'a bolo sii Sawuli kɔlɔ ka taa a le Isa ya keladennu fɛ. A do ka Sawuli ya ko ɲafɔ ai yɛ, a na mɔ Tii yena siya la teme, wo ka kuma a yɛ teme, ani Sawuli tɛɛ kawanili kɛla teme Isa tɔɔ lɔ josolagbeleya boloma Damase. 28Wo boloɲa ma, Sawuli ka to ai fɛ ka kɛ ai bilankɔɲɔɔ dɔ le. A do tɛɛ kawanili kɛla ka bɛn mɔ Tii ya ko ma josolagbeleya boloma Jelusalɛmu. 29Jahudiya minu balakan tɛɛ Gɛlɛkikan ne, Sawuli tɛɛ kumala wolu fɛ k'ai sɔsɔ. Wo le k'a kɛ, ai tɛɛ a faako ɲaɲininna. 30Limaniyamɔɔlu ka wo mɛn mingɛ, ai ka taa Sawuli le Sezale so kɔnɔ ka ban k'a lataa Talese.

31Wo lɔ, limaniyajama minu tɛɛ Jude, ani Galile ni Samaliya, wolu ka waate dɔ kɛ josolajii lɔ, ai vɛ sawatila. Ai ka to taamana mɔ Tii ɲasiyanɲɛ lɔ, Nii Sɛnɛyanin tɛɛ ai sɛmɛdonna, ani k'ai lasiyaya.

Piyɛli ka Enese lakɛnɛya

32Piyɛli ka to koovi wo fan bɛ lɔtaamana, lon dɔ, a ka taa bɔ mumininnu ma Lida so kɔnɔ. 33A do ka kɛ́ dɔ ye je, min tɔɔ tɛɛ ko Enese, falifaama jangalo tɛɛ vɛ min lala aa lafen nɔ sanji sein kɔlɔ. 34Piyɛli do vɛɛ a yɛ: «Enese, Masa Tɔɔmasenin Isa v'i lakɛnɛya yi ne. I wuli, i iya lafen ladɛn.» Enese k'i wuli telemanin. 35Mɔɔ minu siinin tɛɛ Lida so kɔnɔ, ani Salon gbɛkɛnɛ lɔ, wolu bɛ ka Enese ye k'ai jɛlɛ lasei mɔ Tii ma wo lɔ.

Dɔɔkasi lawuliko ka bɔ saya lɔ

36Wo k'a talan Isa kɔbiladen dɔ tɛɛ Jopa so kɔnɔ, min tɔɔ tɛɛ ko Tabita. Ai tɛɛ a fɔla a ma Gɛlɛkikan nɔ ko Dɔɔkasi, wo kɔlɔ le ko Minaan. Moso wo tɛɛ kokein ne kɛla kudein ka fandannilu madɛmɛn. 37Wo waate lɔ, Tabita ka jangalo ka sa. Ai ban a fuleni kola, ai ka a lala sangaso sanmabon na. 38Komi Lida so masulunyanin tɛɛ Jopa la, wo lɔ, Isa kɔbiladen minu tɛɛ Jopa k'a mɛn mingɛ ko Piyɛli yi Lida, ai ka mɔɔ fila kelaya a ma k'a madiya ko a yi na telemanin. 39Wo fɔ Piyɛli yɛ, a v'i wulila ka bila ai kɔ. A senin je, ai ka taa a le sangaso sanmabon na. Kɛsamosolu bɛ lɔnin tɛɛ Piyɛli laminin nɔ, ai vɛ kasila ka faanibalu ni faani kɔlɔbilalu jiya a la, Dɔɔkasi tɛɛ vɛ minu kala ai yɛ.

40Kɛɛ Piyɛli k'ai bɛ labɔ bon na, k'i bilin a kumɛlɛni la ka Ala dali. A do k'a ɲa kaa fuleni lɔ k'a fɔ a yɛ, a vɛɛ: «Tabita, i wuli!» Wo fɔ, moso ɲa la ka ka. A do ka Piyɛli ye mingɛ, a k'i wuli k'i sii. 41Piyɛli k'a mina a bolo ma, k'a lalɔ. Wo kɛ, a ka mumininnu ni kɛsamosolu kili, ka Tabita ɲɛnɛma jiya ai la. 42Wo ko mangutu ka jɛzɛn Jopa fan bɛ lɔ, ado mɔɔ siyama ka limaniya mɔ Tii ma. 43Piyɛli ka tele siyama kɛ Jopa, a jiyanin tɛɛ gbolobaalekɛba dɔ le fɛlɔ, min tɔɔ tɛɛ ko Simɔn.

Currently Selected:

Kɛkolu 9: MBT2023

Highlight

Copy