Kɛkolu 7

Etiyɛn ya kuma

1Wo kɔ, salakalase kuntiiba k'a fɔ Etiyɛn yɛ, a vɛɛ: «Ai na min fɔla yi ne, tuɲa le wo le?»

2Etiyɛn vɛɛ: «M̀ badenmalu ni ǹ fanu, ài y'ài tolomalɔ ǹ na. Ka talan mɔ bema Ibulahima tɛɛ m'i sii ba bene Halan duu kɔnɔ, Nɔɔlɔtii Ala k'a jɛlɛ jiya a la Mesopotami jamana lɔ. 3Ala vɛɛ a yɛ: ‹Bɔ iya jamana lɔ, i yi bɔ i badenmalu tɛma, i yi taa duu dɔ lɔ, ǹ kɛtɔ min jiyala i la.› 4Wo fɔ, mɔ bema ka bɔ Kadeyakalu ya duu kɔnɔ ka t'i sii Halan. A fa sa kɔ, Ala k'a labɔ je k'a lana jan, ài siinin duu min nɔ bi. 5Ala do ma dingila suu suu di a ma jan ka kɛ a ta le, hali senbilaya kelen. A ka to densɔlɔnbaliya lɔ, Ala ka lahedi ta a yɛ ko duu min kɛtɔ ale ni a bɔzɔnnu ta le le. 6Ala vɛɛ a yɛ: ‹I bɔzɔnnu kɛtɔ lona le le dɔlu ya jamana lɔ. Wolu kɛtɔ ai bilala jɔnya lɔ k'ai tɔlɔya sanji kɛmɛ naani (400) kɔlɔ. 7Kɛɛ ai kɛtɔ kɛla jɔn ne siboloma min bolo, ǹe gbu le kɛtɔ wo latɔnna. Wo kɔ, i bɔzɔnnu bɔtɔ je ka na m̀ bato jan.› 8Wo kɛ, Ala ka salatikan ta Ibulahima yɛ, ka kɛnɛkɛko kɛ wo tɔɔmase le. Wo le k'a kɛ, Ibulahima ka Isiyaka sɔlɔn mingɛ, a ka a makɛnɛkɛ a sɔlɔn tele seinna ma. Isiyaka ka Janguba sɔlɔn, ado Janguba ka mɔ bema malɔnnin tan ni fila (12) sɔlɔn.

9«Ka bɛn ɲangbeya ma, mɔ bemanu k'ai dɔɔni Jusufu fele jɔnya lɔ Misilan. Kɛɛ Ala do ka to a fɛ, 10k'a lakisi k'a bɔ aa tɔlɔya bɛ lɔ. Ai k'a lalɔ Misilan masakɛ ɲakɔlɔ mingɛ, Ala ka hangili di a ma ka aa ko diya wo yɛ. Wo do k'a lasii Misilan jamana kunna, k'a kɛ aa bonkunnasiiba le.

11«Wo timinnin kɔ, kɔɔn fitina ka don Misilan ni Kanaan jamana fan bɛ lɔ ka kɛwonya kosɛvɛ. Ado mɔ bemanu ma se balo sɔlɔnna. 12Wo lɔ, Janguba k'a mɛn mingɛ ko balo yi sɔlɔnna Misilan, a ka mɔ bemanu lataa baloko lɔ siɲa kunfɔlɔ lɔ. 13Ai siɲa filana lɔ, Jusufu k'a jɛlɛ jiya a fadenmalu la, ado Misilan masakɛ ka Jusufu bɔya lɔn wo fɛ. 14Wo lɔ, Jusufu ka samakan lataa a fa Janguba ma ko a yi na, ale ani aa demaya bɛ. Ai bɛ lakunnin tɛɛ mɔɔ biwolowulan ni mɔɔ loolu (75) le le. 15Wo boloɲa ma, Janguba ka taa Misilan ka to je haan fɔɔ ka sa, ani mɔ bemanu. 16Waate wo timinnin kɔ, ai ka taa ai kololu le Sɛkɛmu k'ai sudoon Ibulahima ya sudoonya lɔ, ale gbu na dingila min sanna Hamɔli denkɛlu ma wɔligbɛ gbana jilika dɔ la.

17«Ka talan Ala ya lahedi mafa waate ma tɛɛ vɛ sulunya, a na min tala Ibulahima yɛ, maa mɔɔlu tɛɛ vɛ wala bubale Misilan, 18haan fɔɔ masakɛ dɔ k'i sii je, min tɛɛ tɛ Jusufu ya ko kalama. 19A ka maa mɔɔlu janva k'i sɛɛsii ai lɔ, k'ai lɔ ai denɲaninnu labɔko ma kɛnɛma k'ai faa.

20«Nabi Musa ka sɔlɔn waate wo le lɔ, min ka kɛ den kein ne Ala ɲakɔlɔ. A ka to a fa aa bon na lasonnin boloma kalo sawa kɔlɔ. 21A do labilanin kɛnɛma, Filawuna denmoso k'a ta k'a lason iwo ale gbu den. 22Wo boloɲa ma, Musa ka kalan Misilankalu ya lɔnni bɛ la, ka kɛ fangama le a kumakan ni a kɛkolu bɛ lɔ.

23«Musa sɔlɔn ka san binaani (40) bɔ mingɛ, a k'i mili ko a yi taa bɔ a badenmalu ma, Bani Isilankalu koni. 24A ka wo dɔ tɔlɔyanin ye Misilanka kɛ́ dɔ bolo mingɛ, a ka taa wo madɛmɛn, ka wo ta sala kɛ́ wo lɔ, ka wo faa. 25A tɛɛ Musa kɔnɔ ko a badenmalu kɛtɔ a ɲayena ko Ala vɛ a lɔ ai lafɛlɛla, kɛɛ ai do ma wo ɲaye. 26Wo kɛnɛbɔlon, Musa ka Bani Isilanka kɛ́ fila bilanin ye i ɲɔɔ na. A do k'i lɔja k'ai wotɛbɛn, a vɛɛ: ‹Badenma le ài le, mindɛ kɛnin ài yi koyon kɛla i ɲɔɔ na tan?› 27Kɛɛ mɔɔ min tɛɛ a badenma gbasila, wo ka Musa lasusu k'a fɔ a yɛ, a vɛɛ: ‹Jene n'i kɛla maa kuntii ni kititɛɛba le? 28A yi di? I y'a fɛ i yi ǹ faa iwo i na Misilanka wo faala teme kunun?› 29Wo mɛn Musa bolo, a do ka bɔli ka t'i sii lonaya lɔ Madiyan duu lɔ, ka denkɛ fila sɔlɔn je.

30«San binaani (40) timinnin, Musa ka to fuwa lɔ Sinai tini dafɛ, mɛlɛka dɔ ka bɔ gbɛ la a yɛ kɔlɔmanjuni taamɛnɛn lamaa lɔ. 31Musa ka wo ye ka kawakoya. A do k'i madon a la k'a lasaa mingɛ, mɔ Tii kumakan ka bɔ. 32A vɛɛ: ‹Ǹe le i bemanu Tii le, min yi batola Ibulahima ni Isiyaka ani Janguba bolo.› Musa do lɔ ka jaajaa siyan boloma. A do m'a wakali k'i ɲa kaa a lɔ. 33Wo kɛ, mɔ Tii vɛɛ a yɛ: ‹Iya samala bɔ i sen na, kamasɔlɔn i lɔnin tɛɛminja yi ne, wo yi lɔhɔlɔma duu le le. 34M̀'ɛ ǹa mɔɔlu ya tɔlɔya ye Misilan, ani k'ai wunɛkan mɛn, ado m̀'ɛ jii ai lafɛlɛko lɔ. Na vɛ, ǹ kɛtɔ i lataala Misilan.›

35«Ai k'i ban Musa min nɔ k'a fɔ a yɛ: ‹Jene n'i kɛla maa kuntii ni kititɛɛba le?›, Ala ka ale le kelaya k'a kɛ aiya kuntii ni ai kunmakaba le mɛlɛka wo sabu la, min ka bɔ gbɛ la a yɛ kɔlɔmanjuni lɔ. 36Wo lɔ, Musa k'ai labɔ Misilan, a vɛ tɔɔmase ni kawananko babalu kɛla Misilan jamana lɔ ani Kɔɔji Wulɛn dala ani fuwa lɔ san binaani (40) kɔlɔ.

37«Wo Musa kelen ne k'a fɔ Bani Isilankalu yɛ, a vɛɛ: ‹Ala kɛtɔ kela dɔ lanala ài ma ka bɔ ài badenmalu tɛma, iwo ǹe.› 38Ale le tɛɛ jama ba fɛ fuwa lɔ, ani mɛlɛka min tɛɛ kumala a fɛ Sinai tini kɔkan, ani a tɛɛ mɔ bemanu fɛ. A do ka niimaya kumalu sɔlɔn k'ai lase mɔ ma.

39«Kɛɛ mɔ bemanu k'i ban Musa kumakan labatoko ma, ado kɔsei lɔɔ le tɛɛ ai la Misilan. 40Wo ma, ai vɛɛ Sedina Haluna yɛ: ‹I yi tii dɔlu ladan mɔ yɛ, minu kɛtɔ bilala mɔ ɲa. Mɔ do m'a lɔn ko min kɛnin Musa wo la, min nanin mɔ le ka bɔ Misilan.› 41Wo waate le lɔ, ai ka joo ladan tolani sawula lɔ, ka salaka bɔ a yɛ, ai vɛ sawala ai jɛlɛkanu ya fen ladannin na. 42Kɛɛ Ala k'i kɔdon ai la k'ai labila, ai vɛ sangbololɔ mɛnɛnfennu batola, iwo a sɛvɛnin kelalu ya kitabu kɔnɔ teme, ko:

‹Àilu Bani Isilankalu! Ai tɛɛ fuwa lɔ san binaani (40) minu kɔlɔ,

jalasa ài tɛɛ kolofennu kannatɛɛla ka wolu bɔ salaka le ǹe le yɛ?

43Mafɔ, ài tɛɛ àiya joo Mɔlɔki ya gbaa le tala,

ani ài tii Lefan ya loloni,

ài na wolu le sawula ladanna ai batoko lɔ.

Wo le n'a kɛla, ǹ kɛtɔ ài gbɛnna k'ài kɛ jɔnnu le haan fɔɔ Babilɔn kɔma poon.›

44«Mɔ bemanu tɛɛ fuwa lɔ waate min nɔ, Alalabɛngbaa tɛɛ ai bolo ka kɛ tɔɔmase le, k'a jiya ko Ala y'ai fɛ. Ala k'a kɛɲa jate jiya Musa la teme, a k'a ladan ten ne. 45Wo kɔ, mɔ bemanu ka Alalabɛngbaa wo don ai dennu bolo. Ailu ni Josuwa ka na a le ai fɛ duu minaya lɔ, Ala ka siboloma gbɛlɛlu gbɛn k'ai bɔ ai ɲa waate min nɔ. A do ka to je lɔ haan fɔɔ Masakɛ Dawuda ya waate, 46min ya ko ka diya Ala yɛ. Wo lɔ, Dawuda ka Ala dali ko a a fɛ ka Janguba Tii makɛbon lɔ. 47Kɛɛ a denkɛ Sulimana le ka bon wo lɔ Ala yɛ.

48«Kɛɛ Masa Taala t'a makɛla bon na min lɔnin adamadennu bolo la, iwo kela k'a fɔ teme, ko:

49‹Mɔ Tii vɛɛ: Sangbolo le ǹa masayasiifen ne,

ado duukolo le ǹ senbilaya le.

Ài yi bon suu mindɛ le lɔ ǹ yɛ wo lɔ?

Niwotɛ, ǹ nɔningɛya yi se kɛla mineja le?

50Ǹe gbugbu bolo le ma fen minu bɛ ladan?›

51«Àilu mɔɔ kataigbɛlɛnnu, Alalɔnbaliya tolo ni sɔn yi minu la! Ài yi Nii Sɛnɛyanin sɔsɔla kudein, iwo ài bemanu tɛɛ a kɛla teme. 52Wo kela vɛ je, k'a fɔ ko ài bemanu ma min jangata? Ai do ka keladen wolu faa, minu tɛɛ Ala ya Mɔɔ Telennin nako lasena, ài na min janvala yi ne k'a faa. 53Ala ya seliya dinin àilu le ma mɛlɛkalu bolo, kɛɛ ài do ma diɲa wo labatoko ma feu!»

Ai ka Etiyɛn faa teme

54Kititɛɛbalu ka kuma wolu mɛn mingɛ, ai ka mɔnɛ bubale k'ai ɲii sisa i ɲɔɔ na Etiyɛn kanma. 55Kɛɛ Etiyɛn joso lafanin ka to Nii Sɛnɛyanin la, a k'a ɲa kaa sangbolo lɔ ka Ala nɔɔlɔ ye, ani ka Isa lɔnin ye Ala bolokini fannɔ. 56A do vɛɛ: «A ye! M̀'ɛ haijɛnɛ dalakanin ye, ka Mɔɔnivin Tanin lɔnin ye Ala bolokini fannɔ.»

57Wo fɔ Etiyɛn bolo, ai bɛ vɛ gbanɔla bakɛ, k'ai bolo bilin ai tololu la, k'ai kɛ a kan kelen ne. 58Ai do k'a fɔnfɔn ka taa a le so kɔɔkan, k'a mabon damina kawakulunnu la. Seleyadibalu k'aiya faanibalu kɛ kavelen dɔ sen kɔlɔ, min tɔɔ tɛɛ ko Sawuli.

59Ai tɛɛ Etiyɛn mabonna kawakulunnu la waate min nɔ, a ka madaili kɛ, a vɛɛ: «Ǹ Tii Isa, i bolo sii ǹ nii kɔlɔ!» 60Wo fɔ, a k'i bilin a kumɛlɛni la ka gbanɔ, a vɛɛ: «Ǹ Tii, i kà min jate ai ma julumbu le.» Wo fɔ a bolo, a ka sa.

Currently Selected:

Kɛkolu 7: MBT2023

Highlight

Copy