Kɛkolu 6
6
Ai ka mɔɔ wolowulan ta teme keladennu madɛmɛnko lɔ
1Waate wo lɔ, Isa kɔbiladennu ka to siyayala. Ado Jahudiya minu bɔnin tɛɛ jamana gbɛlɛlu lɔ minu tɛɛ Gɛlɛkikan fɔla, wolu ka Jahudiya duulennu matelemasɔɔli di, ko mɔɔ minu tɛɛ balo lɔtalala lon bɛ, wolu jɔyine aiya kɛsamosolu ma. 2Wo ma, keladen mɔɔ tan ni fila (12) ka Isa kɔbiladennu bɛ kili k'a fɔ ai yɛ, ai vɛɛ: «A bɛnnin tɛ k'a fɔ ko m'i Ala kumakan lasenko to je ka kɛ balo lɔtalale. 3Wo ma, mɔ badenmalu, ài yi kɛ́ wolowulan ta ài tɛma, minu mangutu ɲuma yi fɔla ko ai joso lafanin Nii Sɛnɛyanin la, ani ko hangilima le ai le. Ài m'i wolu lasii baale wo kunna. 4Ǹu koni kɛtɔ mɔ gbaladonna Aladaliko la ani ka Ala kumakan lase.»
5Ai ka jatesiili min kɛ, wo ka diya jama bɛ yɛ. Wo lɔ, ai ka Etiyɛn ta, min ya limaniya walanin tɛɛ kosɛvɛ, a do joso lafanin tɛɛ Nii Sɛnɛyanin la. Ai ka Filipe fana ta, ani Polokolu, Nikanɔ, Timon, Palimɛnasi, ani Nikola ka bɔ Antiyɔsi min tɛɛ vɛ don Jahudiyalu ya diina lɔ. 6Ado jama ka mɔɔ wolowulan wolu jiya keladennu la. Wolu k'ai bolo la ai kɔkan ka Ala dali ai yɛ.
7Wo ma, Ala kumakan ka to jɛzɛnna, ani Isa kɔbiladennu ka to siyayala kosɛvɛ Jelusalɛmu, ado salakalaseba siyama ka limaniya siya lataama.
Ai ka Etiyɛn mina teme
8Ala ya nɛɛma ni foniseleya ka to Etiyɛn kɔkan, a tɛɛ kawananko balu ni tɔɔmaselu kɛla mɔɔlu tɛma. 9Kɛɛ a dɔlu k'i wuli Etiyɛn sɔsɔla. Ai bɛ bɔnin tɛɛ Aladalibon kelen ne la, ai tɛɛ a fɔla min ma ko Mɔɔ Lafɛlɛnilu ya Aladalibon. A dɔlu bɔnin tɛɛ Silɛni ni Alɛzandele solu la, ani Silisiya ni Esiya koovilu lɔ. 10Kɛɛ ai ma se ai lɔla a ɲa, kamasɔlɔn Nii Sɛnɛyanin tɛɛ hangili dila a ma, a vɛ kɛla kumala. 11Wo le k'a kɛ, ai ka mɔɔ dɔlu lɔsun kuma min fɔko lɔ, ko: «Mɔ na a kan mɛnna, a vɛ lafeyalikan fɔla Nabi Musa ni Ala ma.»
12Wo boloɲa ma, ai ka sokɔnɔmɔɔlu ni kɛmɔbalu ani seliya kalanmɔɔlu lɔsun Etiyɛn kanma. Ai do k'i kɛ a kan ka taa a lalɔ kititɛɛjama ɲakɔlɔ. 13Wo kɛ, ai ka na faɲafɔ selelu le, minu k'a fɔ ko: «Kɛ́ min yi lafeyalikan fɔla waate bɛ maa lɔhɔlɔmabonba ni Nabi Musa ya seliya ma. 14Kamasɔlɔn mɔ na a kan mɛnna ko Nazalɛtika Isa kɛtɔ lɔhɔlɔmabonba min tela ka maa laanalu mafalin, Nabi Musa na minu dila mɔ bemanu ma.»
15Mɔɔ minu bɛ tɛɛ siinin kititɛɛya lɔ, wolu k'ai ɲa lɔ Etiyɛn nɔ k'a ye ko a ɲakɔlɔla tɛɛ vɛ kɛ iwo mɛlɛka.
Currently Selected:
Kɛkolu 6: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
