Kɛkolu 5

Ananiya ni Safila ka ko min kɛ

1Kɛ́ dɔ tɛɛ je fana, min tɔɔ tɛɛ ko Ananiya. Ale ni a moso Safila k'aiya duu dɔ fele. 2Ale ni a moso ka bɛn a ma ko ai yi wɔli fan kelen ladalo ai jɛlɛ yɛ, a do ka na a tɔ le keladennu fɛ. 3Kɛɛ Piyɛli vɛɛ a yɛ: «Ananiya, a yi di vɛ i na diɲala Soitana yi don i josokun nɔ, haan fɔɔ i na faɲa fɔla Nii Sɛnɛyanin yɛ, ka wɔli fan kelen ladalo i jɛlɛ yɛ? 4Jani i tɛɛ duu fele, i ta le tɛɛ tɛ? I na a felela mingɛ, a wɔli bɛ tɛɛ ile le bolo, kɛlɛ? Mindɛ lɔ i n'a latɛɛla i josokun nɔ ka ko suu min kɛ? I ma faɲa fɔ adamadennu yɛ, mafɔ Ala.» 5Wo mɛn Ananiya bolo, a k'i ben duu ma ka sa, ado ko wo lamɛnbalu bɛ ka siyan bubale. 6Wo kɛ, kavelen dɔlu v'i wulila k'a su kasange ka taa a sudoon.

7Lɛlɛ sawa jate timinnin, Ananiya moso ka na Piyɛli fɛlɔ bon na, k'a talan a tɛɛ m'a lɔn ko min kɛnin. 8Wo lɔ, Piyɛli vɛɛ a yɛ: «A fɔ ǹ yɛ, ile ni i kɛ́ na duu felela daa min ne la?»

A do vɛɛ: «Aan, ale le ve.»

9Piyɛli vɛɛ a yɛ: «A yi di vɛ ài na bɛnna a ma ka mɔ Tii Nii Sɛnɛyanin lɔsuma? A ye! I kɛ́ sudoonbalu lɔnin da la yi ne, ai do kɛtɔ taala ile fana su le ten ne.» 10Wo fɔ Piyɛli bolo, moso k'i ben duu ma a sen kɔlɔ telemanin ka sa. Ado kavelennu ka don bon na k'a su ye mingɛ, ai ka taa a sudoon a kɛ́ tɔɔfɛ. 11Limaniyajama bɛ ka siyan bubale, ani ko wo lamɛnbalu bɛ.

Keladennu ka mɔɔ siyama lakɛnɛya teme

12Wo ma, tɔɔmase ni kawananko siyama tɛɛ kɛla mɔɔlu tɛma keladennu bolo. Limaniyajama bɛ tɛɛ i ɲɔɔ ladɛnna Sulimana ya bolon kɔlɔ miliya kelen ne kan. 13Kɛɛ mɔɔ dɔlu m'ai wakali k'ai kafon ai kan, hali jama tɛɛ kɛ ai matanula. 14Mɔɔ siyama ka to limaniyala mɔ Tii ma ka kafon jama kɔkan, kɛ́lu ni mosolu. 15Wo le k'a kɛ, mɔɔlu tɛɛ nala jangalotɔlu le k'ai lala siya dalu la aiya lafennu ni dɛvɛlu kɔkan, fɔsa ni Piyɛli ka kɛ timinna, a maduulen gbu tɛɛ la a dɔlu kɔkan k'ai lakɛnɛya. 16Mɔɔ siyama fana tɛɛ bɔla Jelusalɛmu laminin solu la ka na jangalotɔlu ni jinajuutɔlu le, wolu bɛ do ka kɛnɛya.

Jahudiya kuntiilu ka keladennu jangata teme

17Wo waate, salakalase kuntiiba ni a bilankɔɲɔɔlu minu tɛɛ Sadusilu le, wolu v'i wulila keladennu kanma ɲangbeya boloma. 18Wo lɔ saa, ai ka keladennu mina k'ai bila kasobon ba la. 19Kɛɛ su lɔ, mɔ Tii ya mɛlɛka dɔ ka kasobon da laka k'ai labɔ je. A do vɛɛ ai yɛ: 20«Ài yi taa ài lɔ lɔhɔlɔmabonba luu ma ka niimaya kula min ya ko bɛ lase mɔɔlu ma.»

21Kuma wo mɛn ai bolo, ai ka taa lɔhɔlɔmabonba luu kɔnɔ sɔɔmadanina ka mɔɔlu kalan damina.

Salakalase kuntiiba ni a bilankɔɲɔɔlu ka na mingɛ, ai ka Bani Isilanka ɲamɔɔlu kili ko kititɛɛbalu bɛ y'ai ladɛn. Ai do ka jamali di ko ai yi na keladennu le ka bɔ kaso la. 22Kɛɛ sɔdasilu senin kaso la, ai ma keladennu ye je. Wo lɔ, ai ka seikɔ ka dandɛɛli kɛ, ai vɛɛ: 23«Mɔ senin kaso la, mɔ na a sɔɔnin yena kobɛn, ka lakanalibalu lɔnin talan dalu la, kɛɛ mɔ na da lakala mingɛ, mɔ ma mɔɔ ye a kɔnɔ.» 24Lɔhɔlɔmabonba lakanabalu ya kuntii ni salakalase kuntiibalu ka kuma wo mɛn mingɛ, ai kɔnɔlɔ ka fili bubale, ai v'i ɲɔɔ maɲiningala ka bɛn ko wo laban ma.

25Wo kɛ, mɔɔ dɔ ka na k'a fɔ ai yɛ, a vɛɛ: «Ài na kɛ́ minu bilala kaso la, wolu lɔnin mɔɔlu kalanna lɔhɔlɔmabonba luu kɔnɔ!» 26Wo fɔ, lakanalibalu ya kuntii ni aa mɔɔlu ka taa keladennu ta, ka na ai le. Kɛɛ wo ma kɛ fanga la, kamasɔlɔn ai tɛɛ siyanna k'a fɔ ko jama kan'i wuli ai kanma k'ai bon kawa la.

27Ai ka na keladennu le mingɛ, ai k'ai lalɔ kititɛɛjama ɲakɔlɔ. Wo lɔ, salakalase kuntiiba k'ai maɲininga, a vɛɛ: 28#Matiyu 27.25.«Mɔ n'ài dansiila ko ài kà kalan kɛ Isa tɔɔ lɔ. Kɛɛ wo bɛ n'a kɛ, ài vɛ àiya kalan lase Jelusalɛmu fan bɛ lɔ, ani ài y'a fɛ ka kɛ́ wo faa hakɛ bila mɔ kɔ!»

29Kɛɛ Piyɛli ni keladen tɔlu k'ai javi, ai vɛɛ: «Fɔ m'i Ala kan ne labato ka timin mɔɔlu ta la. 30Mɔ bemanu Tii Ala na Isa lawulila ka bɔ saya lɔ, ài na min gbaanna kɔlɔman ma k'a faa. 31Ala n'a kɔlɔtala k'a lasii a bolokini fannɔ, k'a kɛ Ɲamɔɔ ni Lakisilikɛba le, fɔsa Bani Isilankalu y'a ɲa sɔlɔn k'ai dajoo mafalin aiya julumbulu lɔkotoko lɔ. 32M'i ko minu sele le le, ani Nii Sɛnɛyanin fana, Ala na min dila a kumakan labatobalu ma.»

33Kititɛɛjama ka kuma wo mɛn mingɛ, ai josola ka kuna bubale. A do lɔɔ tɛɛ ai la k'ai faa. 34Kɛɛ Falisi kɛ́ dɔ tɛɛ je, min tɔɔ tɛɛ ko Gamaliyɛli. Seliya kalanmɔɔ le tɛɛ a le, mɔɔ bɛ tɛɛ min buɲala. A k'i lɔ jama tɛma k'ai lɔ keladennu labɔla banama waateni kɔlɔ. 35Wo kɛ, a vɛɛ kititɛɛjama yɛ: «Bani Isilankalu, ài y'a fɛ ka ko min kɛ kɛ́ minu la, ài y'ài mili wo ma bene kosɛvɛ. 36Kamasɔlɔn waate timinnin, Tedasi k'i wuli, min tɛɛ a jɛlɛ kɛla mɔɔba le, ado kɛ́ mɔɔ kɛmɛ naani (400) jate ka bila a kɔ. Kɛɛ ai ka a faa mingɛ, aa mɔɔlu bɛ ka jɛzɛn a ma, aa ko do ka ban. 37Wo timin kɔ, a dɔ fana k'i wuli tɔɔsɛvɛ waate lɔ, ai tɛɛ a fɔla min ma ko Galileka Judasi. A ka mɔɔ siyama lamulutu k'ai bila a kɔ. Kɛɛ ale fana ka faa ten ne, aa mɔɔlu bɛ do ka jɛzɛn. 38Wo ma, ǹ'a fɔ ài yɛ, ài y'ài mataa kɛ́ minu la k'ai to je. Ai yi min na yi ne, ni wo bɔnin adamadennu miliya le lɔ, a yi tiɲale a jɛlɛ ma. 39Kɛɛ ni a bɔnin Ala le lɔ, ài tɛnala sena ai la feu. Ài y'a kɛ kobɛn jani ài yi bila Ala la.»

Gamaliyɛli ka min fɔ, kititɛɛjama ka diɲa wo ma. 40Ai ka keladennu kili k'ai gbasi gbusan na, k'ai dansii ai kumako lɔ Isa tɔɔ lɔ, ka ban k'ai bila. 41Wo kɛ, keladennu ka bɔ kititɛɛjama ɲakɔlɔ sawa le, kamasɔlɔn ai lafeyako ka bɛn Isa tɔɔ ma, ailu ni wo le kaannin. 42Lon bɛ, ai tɛɛ mɔɔlu kalanna lɔhɔlɔmabonba luu kɔnɔ ani mɔɔlu ya bonnu la, ka to Samakan Kein lasena ko Isa le Masa Tɔɔmasenin ne.

Currently Selected:

Kɛkolu 5: MBT2023

Highlight

Copy