Kɛkolu 4

Ai ka taa Piyɛli ni Yohana le kititɛɛya lɔ teme

1Piyɛli ni Yohana ka to kumala jama yɛ, salakalasebalu ni lɔhɔlɔmabonba lakanabalu ya kuntii ni Sadusilu ka na ai ma. 2Wolu josolakunanin tɛɛ bubale, kamasɔlɔn Piyɛli ni Yohana tɛɛ mɔɔlu kalanna ko Isa n'a wulila ka bɔ saya lɔ teme, ko wo v'a jiya ko fulenilu wulitɔ ka bɔ saya lɔ ten ne. 3Wo lɔ, ai k'ai mina k'ai bila kaso la haan fɔɔ wo dusagbɛlon, kamasɔlɔn wula le la tɛɛ. 4Kɛɛ wo bɛ n'a kɛ, mɔɔ minu na Ala kumakan mɛnna, wolu siyama ka limaniya, ka limaniyamɔɔlu kɛ mɔɔ waa loolu (5 000) jate le.

5Wo dusagbɛlon, Jahudiya ɲamɔɔlu ni kɛmɔbalu ni seliya kalanmɔɔlu k'ai ladɛn Jelusalɛmu. 6Salakalase kuntiiba Anasi fana tɛɛ je, ani a bilankɛ Kayife, ni a badenmalu Yohana ni Alɛzandele, ani a badenma dɔgbɛlɛlu. 7Ai do ka Piyɛli ni Yohana lalɔ ai tɛma k'ai maɲininga, ai vɛɛ: «Ài na ko min kɛla fanga suu mindɛ le lɔ, niwotɛ jene tɔɔ lɔ?»

8Wo fɔ, Piyɛli joso lafanin ka to Nii Sɛnɛyanin la, a vɛɛ ai yɛ: «Ɲamɔɔlu ni kɛmɔbalu, 9ài yi mɔ maɲiningala bi ka bɛn koɲuma ma, min kɛnin namalani yɛ ani a la na kɛnɛyala teme. 10Wo lɔ saa, àilu ni Bani Isilankalu bɛ y'a lɔn ko Masa Tɔɔmasenin Isa Nazalɛtika, ài na min gbaanna kɔlɔman ma, kɛɛ Ala n'a lawulila ka bɔ saya lɔ, wo le tɔɔ kɛnin sabu le kɛ́ min lakɛnɛyanin lɔnin ài ɲakɔlɔ. 11A sɛvɛnin kitabu kɔnɔ ka bɛn Isa ya ko ma, ko:

‹Àilu bonlɔbalu n'ài banna kawakulun min nɔ,

wo le kɛnin bon tungun kawakulun ne.›

12Mɔɔlu tɛ se kisila boloɲa gbɛlɛ ma, fɔ ale kelenpesa, kamasɔlɔn Ala ma tɔɔ gbɛlɛ fɔ adamadennu yɛ dunuɲa, m'i kisi min fɛ.»

13Kititɛɛjama ka Piyɛli ni Yohana ya josolagbeleya ye mingɛ, k'a lɔn ai tɛɛ mɔɔ kalanbali jɛlɛla le le, ai bɛ vɛ kawakoyala. Ai do k'a ɲaye ko Isa taamaɲɔɔ kɔlɔ le ai le. 14Kititɛɛjama ma se ai sɔsɔla, kamasɔlɔn kɛ́ min lakɛnɛyanin tɛɛ, ai ka wo lɔnin ye Piyɛli ni Yohana tɔɔfɛ. 15Ai ka Piyɛli ni Yohana labɔ kititɛɛbon na mingɛ, ai k'ai kun bilin i ɲɔɔ ma. 16Ai vɛɛ: «M'i mindɛ kɛ mɔɔ minu la? Kamasɔlɔn Jelusalɛmukalu bɛ vɛ kɛ kawananko ba min kalama, min kɛnin ai bolo yi ne. Mɔ do tɛ se sɔsɔyali bilala wo lɔ. 17Wo bɛ n'a kɛ, fɔ m'ai dansii k'a fɔ ko ai kà Isa tɔɔ fɔ mɔɔ suu suu yɛ butu, jani ko min yi to jɛzɛnna maa mɔɔlu tɛma.»

18Wo lɔ, ai ka Piyɛli ni Yohana kili k'ai jamali ko ai kà kuma niwotɛ ka kalan kɛ Isa tɔɔ lɔ butu. 19Kɛɛ Piyɛli ni Yohana k'ai javi, ai vɛɛ: «Mindɛ le bɛnnin Ala ɲana? Ka Ala kumakan labato, baa àilu? Ài yi wo kiti tɛɛ. 20Kɛɛ ǹu na ko minu yena ani k'ai mɛn, mɔ tɛ se mɔ makunna wo ma.»

21Wo lɔ, kititɛɛjama k'a dɔ la aiya masiyannikan kɔkan, ka ban k'ai bila. Ai ma ɲa sɔlɔn ka kolatɔn kɛ ai la, kamasɔlɔn mɔɔ bɛ tɛɛ Ala tanula ka bɛn ko min kɛnin. 22Kamasɔlɔn kɛ́ min lakɛnɛyanin tɛɛ kawakoya boloma, wo sɔlɔn tɛɛ vɛ san binaani (40) ni kɔ bɔ.

Limaniyamɔɔlu ka Ala dali teme

23Piyɛli ni Yohana bilanin, ai ka taa ai limaniyaɲɔɔlu fɛlɔ ka ko bɛ lase ai ma, minu fɔnin tɛɛ salakalase kuntiibalu ni kɛmɔbalu bolo. 24Ai ka wo mɛn mingɛ, ai bɛ vɛ Ala dalila miliya kelen nɔ, ai vɛɛ: «Mɔ Tii, ile min na sangbolo ladanna ani duukolo ni kɔɔji ani ai kɔnɔlɔfen bɛ, 25ile le ka kuma min don iya bɔiden mɔ bema Dawuda da Nii Sɛnɛyanin sabu la, ko:

‹Siboloma gbɛlɛlu jamannin mindɛ lɔ?

Mindɛ le kɛnin mɔɔlu yi janva fuun ladanna?

26Dunuɲa masakɛlu k'ai lɔbɛn kɛlɛkɛko lɔ.

Ɲamɔɔlu k'ai ladɛn k'ai wuli mɔ Tii ni aa Masa Tɔɔmasenin kanma.›

27 # Luka 23.7-11; Matiyu 27.1, 2; Malɛkɛ 15.1; Luka 23.1; Yohana 18.28, 29. «Tuɲa le, mɔɔlu k'ai ladɛn so kɔnɔ jan Isa kanma, iya lɔhɔlɔma bɔiden, i na min tala. Helodi ni Ponsi Pilati ni siboloma gbɛlɛ mɔɔlu ani Bani Isilankalu bɛ ka dɛn ka janva don a ma. 28I tɛɛ vɛ ko min bɛ latɛɛ iya seetiiya ni i sawo lɔ, ai ka wo bɛ kɛ. 29Wo lɔ saa mɔ Tii, i tolomalɔ aiya masiyannikannu la, ka see di ǹu iya bɔidennu ma fɔsa m'i to i kumakan lasena josolagbeleya boloma. 30I iya foniseleya jiya fɔsa m'i mɔɔlu lakɛnɛya, ani ka tɔɔmase ni kawanankolu kɛ iya bɔiden sɛnɛyanin Isa tɔɔ lɔ.»

31Ai wɔlinin Ala dalila, aiya ladɛnkɛya vɛ jaajaala, ai bɛ do josola ka fa Nii Sɛnɛyanin la, ani ai ka Ala kumakan lase damina josolagbeleya boloma.

Limaniyamɔɔlu ka dɛn ai bolofennu la teme

32 # Kɛkolu 2.44, 45. Limaniyajama bɛ bɛnnin tɛɛ a lɔ ai josokun ni ai miliya lɔ. Wo lɔ, mɔɔ mɔɔ tɛɛ tɛ a bolofennu jatela ale kelen ta le, mafɔ k'ai dɛn ai bolofennu la. 33Keladennu ka to seleya dila seetiiya ba boloma k'a fɔ mɔɔlu yɛ ko mɔ Tii Isa v'i wuli ka bɔ saya lɔ. Ado Ala ya nɛɛma tɛɛ limaniyamɔɔlu bɛ kɔkan kosɛvɛ. 34Mɔɔ tɛɛ tɛ ai tɛma k'a fɔ ko min lɔgbɛnɛnin tɛɛ, kamasɔlɔn duutiilu ni bontiilu tɛɛ ai bolofennu felela, 35ka na wɔli wo le keladennu fɛ. Keladennu tɛɛ wɔli wo le lɔtalala limaniyamɔɔlu wotɛ ka bɛn ai kelenkelenna bɛ mako jate ma.

36-37Kɛ́ dɔ tɛɛ ai tɛma je, min tɛɛ Levi kabiladen ne ka bɔ Sipele. A tɔɔ le tɛɛ Jusufu, kɛɛ keladennu tɛɛ a fɔla a ma ko Baanabasi, min kɔlɔ le ko Mɔɔ Sɛmɛdonba. Wo ka aa duu dɔ fele ka na wo wɔli le, k'a don keladennu bolo.

Currently Selected:

Kɛkolu 4: MBT2023

Highlight

Copy