Kɛkolu 26
26
Pɔli k'a kumanɔbɔ Masakɛ Agilipa yɛ teme
1Wo lɔ, Masakɛ Agilipa vɛɛ Pɔli yɛ: «M̀'ɛ kuma di i ma.»
Wo fɔ, Pɔli k'a bolo jate k'a kumanɔbɔ damina, a vɛɛ. 2«Masakɛ Agilipa, ǹ kunnadiyayine ka ǹ kumanɔbɔ i ɲakɔlɔ bi ka bɛn ko wolu ma, Jahudiyalu vɛ ǹ jalaki minu la. 3Kamasɔlɔn i ka Jahudiyalu ya laanalu ni aiya sɔsɔyalikolu bɛ lɔn ne kosɛvɛ. Wo lɔ, i jon, i i tolomalɔ ǹ na sawali boloma.
4«Jahudiyalu bɛ k'a lɔn ǹ tɛɛ ǹa dunuɲalɔtɛɛ kɛla teme ǹ fɛso ni Jelusalɛmu, ka ta ǹ denniya waate ma. 5#Kɛkolu 23.6; Filipikalu 3.5.Ai do ka ǹ lɔn ka ta waate jaan ma. Ni ai do ka diɲa, ailu gbu yi sene seleya dila ko ǹ tɛɛ Falisi le le, min siya latelenko gbeleyanin ka timin maa diina siya bɛ la. 6Ǹ lɔnin kititɛɛya lɔ bi, kamasɔlɔn ǹ jei siinin Ala ya lahedi le la, a na min tala mɔ bemanu yɛ. 7Maa kabila tan ni fila (12) yi wo mafako le makɔnɔna, ai vɛ ai gbaladonna Ala batoko le su ni tele. Masakɛ, ǹ jalakinin Jahudiyalu bolo ka bɛn jeisii wo le ma. 8A yi di vɛ ài dɔlu yi milila ko Ala tɛ se fulenilu lawulila ka bɔ saya lɔ?
9 #
Kɛkolu 8.3; 22.4, 5. «Waate lɔ, ǹe gbu kunfanin tɛɛ ko ǹ'i ǹ senko kɛ ka Nazalɛtika Isa tɔɔ lasenko dansii. 10Ǹ tɛɛ wo le la Jelusalɛmu. Ǹe do ka seetiiya sɔlɔn salakalase kuntiibalu bolo ka muminin siyama mina, k'ai bila kaso la. Ai faako ka fɔ waate min nɔ, ǹe gbu ka diɲa wo ma. 11Ǹ ka taa Aladalibonnu la siɲa siyama lɔ, k'ai latɔn, ani k'ai lɔ kuma yon fɔla Isa ma fangamaya boloma. Mɔnɛya boloma ai kanma, ǹ tɛɛ taala jamana gbɛlɛ solu gbu la ai jangatako lɔ.
12«Lon dɔ, ǹ tɛɛ taala Damase so kɔnɔ dailu kelen wo la, salakalase kuntiibalu ya seetiiya ni fanga kɔlɔ. 13Ɛɛ masakɛ, ǹ ka to siya la telelatelen waate, ǹ ka nɔɔlɔ bɔtɔla ye sangbolo lɔ, min tɛɛ mɛnɛnna gbesekele ka timin tele la, ka ǹe ni ǹ taamaɲɔɔlu makɛ kala. 14Mɔ bɛ k'i ben duu ma. Wo kɛ, ǹ ka kumakan dɔ mɛn, a v'a fɔla ǹ yɛ Hebulukan nɔ, a vɛɛ: ‹Sawuli, Sawuli, mindɛ lɔ i yi ǹ jangatala? I i jɛlɛ madiminna, iwo nisi min y'a tii ya bele tuula.› 15Wo mɛn m̀ bolo, ǹ ka ɲiningali kɛ, ǹ ko: ‹Ǹ Tii, jene i le le?› A do vɛɛ: ‹Ǹe Isa le, i yi min jangatala. 16I wuli, i lɔ i sen na. M̀'ɛ bɔ gbɛ la i yɛ, fɔsa ǹ'i kɛ ǹa bɔiden ne ani ǹ sele le, ka bɛn i na ko min yena, ani ǹ kɛtɔ min jiyala i la. 17Ǹ kɛtɔ i lakisila k'i bɔ Jahudiyalu ni siboloma gbɛlɛlu bolo, ǹ'i lataala minu ma 18ai ɲa lakako lɔ, fɔsa ai yi bɔ divi lɔ ka na kɛnɛya lɔ, ani ai yi bɔ Soitana fanga kɔlɔ k'ai lasei Ala ma, alako aiya julumbulu lɔ yi koto. Wo vɛ kɛla, ai fɛ kɛtɔ kɛla Ala ya mɔɔlu la, minu vɛ sɛnɛya ka bɛn aiya limaniya ma m̀ ma.›
19«Wo lɔ saa, Masakɛ Agilipa, ko min la ka jɛlɛ ǹ ɲa ma ka bɔ haijɛnɛ, m̀ ma wo sɔsɔ feu. 20#Kɛkolu 9.20, 28, 29.Ǹ ka Damasekalu le kawani kunfɔlɔ le, wo kɔ, Jelusalɛmu ni Jude koovi bɛ, ani siboloma gbɛlɛlu. Ǹ ko ai bɛ y'ai dajoo mafalin k'ai fannɔsei Ala ma, k'ai kɛkolu kɛ minu bɛnnin ai dajoo mafalinko ma. 21Wo le n'a kɛla, Jahudiyalu ka m̀ mina lɔhɔlɔmabonba la ǹ faako lɔ. 22Kɛɛ Ala vɛ to m̀ madɛmɛnna haan fɔɔ ka na sii bi la. Wo lɔ, ǹ lɔnin jan ka seleya di mɔɔ bɛ ma, fandanni ni seetiilu bɛ. Nabi Musa ni kela tɔlu ka ko natɔ minu fɔ, ǹe do ma ko gbɛlɛ fɔ ka timin wolu la. 23#1 Kolɛntikalu 15.20.Wolu vɛɛ ko Alimasihu kɛtɔ tɔlɔya masɔlɔnna ka kɛ mɔɔ kunfɔlɔ le k'a wuli ka bɔ saya lɔ. Ai do vɛɛ kɔtunun ko a kɛtɔ Ala ya kɛnɛya lasena maa mɔɔlu ma, ani siboloma gbɛlɛ mɔɔlu fana.»
24Pɔli ka to a kumanɔbɔla, Fɛsitusi ka gbanɔ a ma, a vɛɛ: «Ɛɛ Pɔli, fa l'i lɔ! I vɛ kalan kɛ haan fɔɔ ka fa bila i lɔ!»
25Kɛɛ Pɔli k'a javi, a vɛɛ: «Ǹ kuntiiba Fɛsitusi, fa tɛ ǹ nɔ. Ǹ'i kuma sɔvɛ minu fɔla yi ne, tuɲa le wo bɛ le. 26Ado Masakɛ Agilipa ka ko wo bɛ lɔn. Wo lɔ, ǹ'i sene kumala a fɛ lafɛlɛ boloma. Ǹ layine a la ko wo suu suu ma kɛ a ɲina ma, kamasɔlɔn ko wolu ma kɛ doon nɔ. 27Masakɛ Agilipa, kelalu na min fɔla, i limaniyayine wo ma? Ǹ k'a lɔn i limaniyanin.»
28Agilipa k'a javi, a vɛɛ: «A y'i kɔnɔ ko i yi sene ka ǹ kɛ Isa kɔbiladen ne waate kulunni min nɔ?»
29Pɔli do vɛɛ a yɛ: «A ka kɛ waate kulunni le o, a ka kɛ waate jaan ne o, ǹ'i Ala dalila ile ni ǹ lamɛnbalu bɛ yɛ bi ka bɛn wo ma, fɔsa ài yi kɛ ǹ ɲɔɔzii le. Kɛɛ jɔlɔkɔ kà bila ài la.»
30Wo fɔ Pɔli bolo, masakɛ ni jamanatii k'i wuli, ani Bɛɛnisi ni mɔɔ minu siinin tɛɛ ai fɛ. 31Ai bɔnin je, ai vɛɛ i ɲɔɔ yɛ: «Kɛ́ min ma foi kɛ min yi kɛ a faa kun ne, niwotɛ aa kasolabila kun.»
32Masakɛ Agilipa vɛɛ Fɛsitusi yɛ: «Ni kɛ́ min tɛɛ ma aa ko lase masakɛba Sezale ma, mɔ tɛɛ sene a bilala bi.»
Currently Selected:
Kɛkolu 26: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
