Kɛkolu 27

Sɔdasilu ka taa Pɔli le Lɔmu teme

1Ai k'a latɛɛ mingɛ ko m'i taa Itali jamana lɔ kulunba kɔnɔ, ai ka Pɔli ni kasoden gbɛlɛlu don sɔdasi kuntii dɔ bolo, min tɔɔ tɛɛ ko Juliyusi. A fɛ tɛɛ sɔdasi kulu ba dɔ le la, ai tɛɛ a fɔla min ma ko masakɛba ya sɔdasi kulu. 2Mɔ ka kulun dɔ talan je, min bɔnin tɛɛ Adalimite so kɔnɔ. Kulun wo tɛɛ taala kɔɔji dafɛ solu la Esiya koovi lɔ. Mɔ ka don wo kɔnɔ ka taa. Ado Maseduwanika kɛ́ dɔ tɛɛ mɔ fɛ ka bɔ Tɛsalonika so kɔnɔ, min tɔɔ tɛɛ ko Alisitakusi. 3Wo dusagbɛlon, mɔ ka se Sidɔn so kɔnɔ. Mɔ lɔnin ka to je, Juliyusi ka kokein kɛ Pɔli yɛ ka diɲa a yi taa bɔ a tɔvalu ma, fɔsa ai y'a madɛmɛn. 4Mɔ bɔ je, komi mɔ ɲatiliminnin tɛɛ fɔɲɛ la, wo le k'a kɛ, mɔ ka timin Sipele kɔɔtɛmaduu fan dɔ lɔ, fɔɲɛ tɛɛ tɛ bɔla fan min nɔ. 5Kɔɔji fan min yi Silisiya ni Panfili koovilu dafɛ, mɔ ka wo lɔtimin ka taa se Mila so dafɛ, min yi Lisiya koovi lɔ. 6Sɔdasi kuntii ka kulunba dɔ ye je, min tɛɛ taala Itali ka bɔ Alɛzandele. Wo lɔ, a ka mɔ ladon wo kɔnɔ.

7Mɔ ka tele siyama kɛ kɔɔji kɔkan. Kulun taako gbeleyanin tɛɛ fɔɲɛ bolo, ado mɔ tɛɛ taala le dɔni dɔni. Mɔ tɛɛ vɛ sɛyɛ bubale jani mɔ ma tɛɛ sulunya Kinidi so la. Mɔ bɔnin woja, fɔɲɛ ka dansii kulun taako la ɲafɛ. Wo le k'a kɛ, kulun ka timin Salamone so la ka taa Kɛlɛti kɔɔtɛmaduu fan dɔ lɔ, fɔɲɛ tɛɛ tɛ bɔla fan min nɔ bubale. 8Mɔ timinko ka gbeleya kɔɔtɛmaduu wo la. Wo kɔ, mɔ ka taa se dingila dɔ ma, ai y'a fɔla min ma ko Kulun Lɔya Ɲuma, min yi Laseya so dafɛ.

9Komi mɔ tɛɛ vɛ waate jaan kɛ kulun kɔnɔ, ado Jahudiyalu ya sundon waate tɛɛ vɛ timin, wo le k'a kɛ, kulunbɔliko tɛɛ vɛ kɛ masuwako le waate suu wo lɔ. Wo ma, Pɔli k'ai lali, a vɛɛ: 10«Ǹ tɔvalu, m̀'ɛ a ye ko ka damina jannɔ ma, maa kulunnɔtaamanko kɛtɔ kɛla masuwako ba le le. Mɔ do bɔnɔtɔle maa donilu ni kulun na, ani ǹu gbu nunakili.» 11Kɛɛ kuluntii ni kulunbɔliba ka sɔdasi kuntii kunfa ka timin Pɔli kumakan na. 12Komi kulun lɔya wo bɛnnin tɛɛ tɛ nɛnɛbɔ waate lɔ, wo le k'a kɛ, ai siyama ka diɲa ko ai yi bɔ woja k'ai senko kɛ fɔsa ai yi se kulun lɔya dɔ ma Kɛlɛti kɔɔtɛmaduu lɔ, ai y'a fɔla tɛɛminja ma kɔ Fenikisi. Woja ɲatiliminnin teleben fan ne la ani bolokini fannɔ. Ai vɛɛ ko ni ai ka se je, ai kɛtɔ nɛnɛbɔ waate kɛla woja le.

Sanfɔɲɛ ba dɔ k'i wuli kɔɔji kɔkan teme

13Fɔɲɛni tɛɛ bɔla bolokini fannɔ mingɛ, a tɛɛ ai kɔnɔ ko ai yi sene k'a kɛ iwo ai n'a jatesiila teme. Wo lɔ, ai ka kulunlalɔnɛɛ lawuli, ai vɛ taala Kɛlɛti kawun dafɛ. 14Kɛɛ a lɔ ma mɛn, fɔɲɛ ba v'i wulila ka bɔ duu wo fannɔ ka to bɔla fanga la bolokini fɛ telebɔ fannɔ. 15Fɔɲɛ ka kulun lajaajaa bubale. Mɔ tɛɛ tɛ se mɔ ɲa tiliminna fɔɲɛ la mingɛ, mɔ ka mɔ jɛlɛ to fɔɲɛ bolo fɔsa a yi taa mɔ le. 16Mɔ ka taa se kɔɔtɛmaduu dɔɔmaninda dɔ kawun dafɛ, min tɔɔ yi ko Kawuda. Wo lɔ, fɔɲɛ lɔ ka suma dɔni ne. Mɔ do ka maa kulundenni ladon kulunba kɔnɔ, kɛɛ wo gbeleyayine tɛɛ bubale. 17Ai wɔlinin a ladonna, ai ka kulunba tɛsili julu la k'a lɔja kpekpe. Ai tɛɛ siyanna ko ai kana gbalin kɔɔkɔlɔkiɲɛ lɔ Libiya jamana kawun dafɛ. Wo lɔ, ai ka faaniba lajii min yi kulun lataala. Ai ka kulun to fɔɲɛ bolo ten ne, mɔ vɛ taala. 18Sanfɔɲɛ jamannin ka to mɔ lamaamaala, wo kɛnɛbɔlon, ai ka kulunkɔnɔ donilu lafili damina kɔɔji lɔ. 19A tele sawana lon, kulunbɔlibalu gbu ka kulun maɲɔlan dɔlu lafili kɔɔji lɔ. 20Mɔ ka tele siyama kɛ, mɔ ma tele ye niwotɛ lolonilu, ado sanfɔɲɛ jamannin ka to bɔla. Wo lɔ, mɔ bɛ jei ka tɛɛ mɔ kisiko lɔ.

21A lɔ tɛɛ vɛ mɛn, ai tɛɛ ma fen dɔn ba. Wo lɔ, Pɔli k'i lɔ ai tɛma k'a fɔ ai yɛ, a vɛɛ: «Ǹ tɔvalu, a tɛɛ fisayale ni ài tɛɛ ài tolomalɔ ǹ kumakan na, k'a fɔ ko mɔ kà bɔ Kɛlɛti. M'i tɔlɔya ni bɔnɔ min nɔ bi, ni ài tɛɛ vɛ ài tolomalɔla ǹ na, koyon min foi tɛɛ tɛ mɔ masɔlɔn. 22Kɛɛ ǹ'ài madiyala yi ne, ǹ ko, ài josolagbeleya. Mɔ bɔnɔtɔle kulun na, kɛɛ foi tɛnala kɛla ài suu suu nunakili la. 23Kamasɔlɔn ǹ'i Ala min ta le, ani ǹ'i baale kɛla min yɛ, wo ya mɛlɛka dɔ k'i lɔ ǹ dafɛ kunun su lɔ. 24A vɛɛ ǹ yɛ: ‹Pɔli, i kà siyan. Fɔ i lɔ masakɛba Sezale ɲakɔlɔ. Mɔɔ minu bɛ y'i fɛ kulun kɔnɔ, wolu bɛ kɛtɔ kisila ka bɛn Ala ya nɛɛma le ma.› 25Wo lɔ saa, ǹ tɔvalu, ài josolagbeleyanin yi to. Ǹ limaniyanin Ala ma ko a kɛtɔle iwo mɛlɛka n'a fɔla ǹ yɛ teme. 26Wo bɛ n'a kɛ, fɔ fɔɲɛ yi mɔ ta ka taa kulun lasii kɔɔtɛmaduu dɔ kawun na.»

27Mɔ tɛɛ vɛ tele tan ni sawa (13) le kɛ kɔɔji kɔkan. A tele tan ni naanina lon ka se, k'a talan fɔɲɛ tɛɛ taala kulun ne bene. Mɔ tɛɛ kɔɔji fan min kɔkan, ai y'a fɔla min ma ko Adiliyatiki. Sutala waate, kulunbɔlibalu ka sovi k'a fɔ ko mɔ masulunyatɔle gbele la. 28Wo le k'a kɛ, ai ka julu lajii kɔɔji lɔ a duunya lɔsumanko lɔ. Ai k'a ye ko a duunya tɛɛ mɛtɛlɛ bisawa ni wolowulan ne le (37). Kulun taanin ɲafɛ dɔni ne, ai ka julu lajii kɔtunun, ado ji duunya ka kɛ mɛtɛlɛ muan ni sein ne (28). 29Ai do ka siyan wo lɔ, ko kulun kana se kawa ma. Wo lɔ, ai ka kulunlalɔnɛɛ naani lajii kulun kɔfɛla lɔ, ka madaili kɛ ko kɛnɛ yi bɔ. 30Wo kɔ, kulunbɔlibalu ka kulundenni lajii kɔɔji kɔkan, k'a kɛ iwo ai taatɔ kulunlalɔnɛɛlu le lajiila kulun ɲafɛla lɔ, k'a talan ai tɛɛ bɔli bolo le ma. 31Pɔli do k'a fɔ sɔdasi kuntii ni aa mɔɔlu yɛ, a vɛɛ: «Ni mɔɔ wolu ma to kulun kɔnɔ, ài tɛnala kisila.» 32Wo fɔ, sɔdasilu ka kulundenni jululu tɛɛtɛɛ, fɔsa a tɛɛ taa ka tunun.

33Jani kɛnɛ tɛɛ bɔ, Pɔli ka mɔɔlu madiya ko ai bɛ yi dɔnni kɛ, a vɛɛ: «Bi y'a tele tan ni naanina le le, ài hangili siinin tɛ, ài do ma fen dɔn ba bene. 34Wo lɔ, ài jon jaani, ài yi dɔnni kɛ, fɔsa ài yi fanga sɔlɔn ka kisi, kamasɔlɔn ài lɔ mɔɔ den kelen tɛnala tununna, hali a kunsi kaali kelen gbu.»

35Wo fɔ Pɔli bolo, a ka bulu ta ka balika bɔ Ala yɛ ai bɛ ɲana k'a lɔkalikali k'a dɔ dɔn. 36Wo kɛ, ai bɛ sɛmɛ ka don ka dɔnni kɛ. 37Ǹu minu tɛɛ kulun kɔnɔ, mɔ tɛɛ mɔɔ kɛmɛ fila ni mɔɔ biwolowulan ni mɔɔ wɔɔlɔ le le (276). 38Ai bɛ ka dɔnni kɛ k'i fa mingɛ, ai ka sɛnɛfen kɛsɛ bɛ lafili kɔɔji lɔ fɔsa kulun yi feya.

Kulun tiɲako

39Kɛnɛ bɔnin, kulunbɔlibalu ɲanɔ ma to kawun wo ma, kɛɛ ai ka kiɲɛ kawun dɔ ye, kɔɔji lɔsumanin tɛɛ min dafɛ. Ai ka jatesii wo lɔ ko ai y'ai lɔja ka taa kulun ne woja k'a lalɔ kiɲɛ kɔkan. 40Wo lɔ, ai ka kulunlalɔnɛɛlu jululu lɔtɛɛtɛɛ ka wolu to kɔɔji lɔ. Kulunkala silinin tɛɛ julu minu le, ai ka wolu fɔlin, ka ban ka kulun ɲafɛla faaniba lajɛlɛ, fɔsa a tɛɛ fɔɲɛ ta teme. Wo kɛ, ai ka kulun lataa kiɲɛ kawun fannɔ. 41Kɛɛ kulun ka taa se kɔɔkɔlɔkiɲɛ ma, ado kulun ɲafɛla ka gbalin kiɲɛ lɔ. A ma se bɔla feu. Kulun lɔnin ka to ten, kɔɔji kilinkilin ka to gbasigbasila a la haan fɔɔ a kɔfɛla vɛ kalikalila.

42Sɔdasilu ka jatesii ko ai yi kasodennu faa, alako ai kana ai nɛɛ kɔɔ la ka bɔli. 43Kɛɛ komi sɔdasi kuntii tɛɛ a fɛ ka Pɔli lakisi, wo le k'a kɛ, a k'ai dansii wo la. A vɛɛ ko mɔɔ minu senin ai nɛɛla, ko wolu yi kɛ kɔɔ la kunfɔlɔ le, k'ai nɛɛ ka taa gbele ma. 44A k'a fɔ kɔtunun ko a tɔlu yi jilifɛlɛn ni kulunba kulunkulun dɔlu mina, k'ai la wolu kɔkan ka bɔ. Mɔ bɛ ka se gbele ma ka kisi ten ne.

Currently Selected:

Kɛkolu 27: MBT2023

Highlight

Copy