Kɛkolu 25

Jahudiyalu ka Pɔli jalaki Fɛsitusi ɲakɔlɔ teme

1Fɛsitusi k'i sii jamanatiiya la waate min nɔ, tele sawa timinnin, a ka bɔ Sezale ka taa Jelusalɛmu. 2Wo kɛ, Jahudiya salakalase kuntiibalu ni kɛmɔbalu ka na a fɛlɔ ka Pɔli makojiya. Ai do ka Fɛsitusi madiya, 3ko a ai madɛmɛn ka Pɔli lana Jelusalɛmu. Wo k'a talan, ai tɛɛ vɛ janva lasii a ma ko ai yi ben a kan siya la k'a faa. 4Fɛsitusi do k'ai javi, a vɛɛ: «Pɔli bilanin kaso la Sezale. A lɔ tɛnala mɛnna, ǹe gbu kɛtɔ seikɔla je. 5Wo le y'a ma, ài àiya ɲamɔɔ dɔlu lataa ǹ fɛ Sezale. Ni kɛ́ wo bannin ka kɛ koyon kɛla, ài y'a makojiya je.»

6Fɛsitusi wɔlinin tele sein niwotɛ tele tan kɛla ai fɛlɔ, a do ka seikɔ Sezale. Wo dusagbɛlon, a k'i sii kititɛɛya lɔ ka jamali di ko ai yi na Pɔli le. 7Pɔli nanin, Jahudiya minu tɛɛ vɛ bɔ Jelusalɛmu, wolu k'i lɔ a laminin nɔ k'a jalaki damina koyon ba siyama la, k'a talan ai ma se tuɲa jiyala ka bɛn wo suu suu ma. 8Wo kɔ, Pɔli k'a kumanɔbɔ, a vɛɛ: «M̀ ma koyon foi kɛ min yi kɛ Jahudiyalu ya seliya tiɲako le, ani min yi kɛ lɔhɔlɔmabonba lakɔsɔko le, niwotɛ ka kuma yon fɔ Lɔmu masakɛba ma.»

9Kɛɛ komi Fɛsitusi tɛɛ a fɛ ka Jahudiyalu ladiyananko le kɛ, wo le k'a kɛ, a ka Pɔli maɲininga, a vɛɛ: «Ai i jalakila ko minu la, i yi diɲale i yi taa Jelusalɛmu, fɔsa iya kiti yi tɛɛ ǹ ɲakɔlɔ je?»

10Kɛɛ Pɔli k'a javi, a vɛɛ: «Ǹ lɔnin Lɔmu masakɛba Sezale ya kititɛɛya le lɔ yi ne, ǹa kiti ka kan ka tɛɛ tɛɛminja. M̀ ma koyon pa kɛ Jahudiyalu la, iwo ile gbu k'a lɔn teme. 11Ni a k'a talan m̀'ɛ seliya dɔ tiɲa, ka ko dɔ kɛ min yi kɛ ǹ faa kun ne, ǹ tɛnala m̀ banna ǹ faako ma. Kɛɛ mɔɔ minu yi ǹ jalakila ko minu la yi ne, ni wolu tɛ tuɲa le, mɔɔ man kan ka ǹ don ai bolo. Wo lɔ saa, fɔ Lɔmu masakɛba Sezale gbu le yi ǹa kiti tɛɛ.»

12Fɛsitusi ni a lailibalu ka ban mingɛ ai kun bilinna i ɲɔɔ ma, a ka Pɔli javi, a vɛɛ: «Komi i y'a fɛ Sezale gbu le iya kiti tɛɛ, wo le kɛtɔ i taala Sezale fɛlɔ.»

Fɛsitusi ka Pɔli ya ko lase Masakɛ Agilipa ma teme

13Tele dana timinnin kɔ, Masakɛ Agilipa ni a dɔɔmoso Bɛlɛnisi ka na Sezale ka Fɛsitusi fo. 14Ai ka to je tele siyama kɔlɔ, Fɛsitusi ka Pɔli ya ko ɲafɔ masakɛ yɛ, a do vɛɛ a yɛ: «Felisi bɔnin jan ka kɛ́ dɔ to a kɔ kaso la. 15Ǹ na taala Jelusalɛmu waate min nɔ, Jahudiya salakalase kuntiibalu ni kɛmɔbalu ka kɛ́ wo makojiya, ka m̀ madiya ko ǹ'a latɔn. 16Ǹ k'ai javi, ǹ ko, ǹu Lɔmukalu deinin tɛ mɔɔ latɔnna, ni ale ni a jalakibalu ɲa ma bɔ gbɛ kelen nɔ, fɔsa a a jɛlɛ kumanɔbɔ. 17Wo lɔ, ai ka na ǹ fɛlɔ jan lon min na, m̀ ma tamala bila kititɛɛko lɔ, mafɔ ka ǹ sii kiti kunna wo dusagbɛlon, ka jamali di ko Pɔli yi na. 18Kɛɛ a jalakibalu k'i lɔ ka kuma mingɛ, ai ma a jalaki koyon suu suu la, ǹ jii tɛɛ minu ma. 19Mafɔ, ai tɛɛ Pɔli sɔsɔla ka bɛn ailu gbu ya diinakolu le ma, ani kɛ́ sanin dɔ min tɔɔ tɛɛ Isa, Pɔli n'a fɔla min ma ko a a nii la. 20Ǹ tɛɛ m'a lɔn ǹ'i ǹ tɛɛ sene ko min ɲabɔla. Wo lɔ, ǹ k'a maɲininga ni a yi diɲale ka taa Jelusalɛmu, fɔsa aa kiti yi tɛɛ je. 21Kɛɛ Pɔli k'a fɔ ko Lɔmu masakɛba Sezale gbu y'aa kiti tɛɛ. Wo ma, ǹ ka jamali di ko ai y'a lamala kaso la, haan fɔɔ ǹ'i ɲa sɔlɔn a ma k'a lataa Sezale ma.»

22Wo fɔ, Agilipa vɛɛ Fɛsitusi yɛ: «Ǹe gbu y'a fɛ ka ǹ tolomalɔ kɛ́ wo la.»

Fɛsitusi do vɛɛ: «Ale le wo le. I y'a lamɛnne sinin.»

23Wo kɛnɛbɔlon, Masakɛ Agilipa ni Bɛɛnisi ka na ladɛnbon na mɔɔbaya boloma, sɔdasi kuntiilu ni so ɲamɔɔlu vɛ ai fɛ. Fɛsitusi ka jamali di mingɛ, ai ka na Pɔli le. 24Fɛsitusi vɛɛ: «Masakɛ Agilipa ni minu yi mɔ fɛ jan, ài bɛ ɲa yi kɛ́ min nɔ yi ne, Jahudiyalu bɛ n'ai makasila ale le kan Jelusalɛmu ani jannɔ, ai vɛ gbanɔla ko a kà to a nii la. 25Ǹe do ma koyon suu suu ye a la min yi kɛ a faa kun ne. Kɛɛ komi a n'a fɔla ko fɔ masakɛba Sezale gbu y'aa kiti tɛɛ, wo le n'a kɛla, ǹ n'a latɛɛla, ǹ ko, k'a lataa wo ma. 26Kɛɛ m̀ m'a lɔn ǹ'i min sɛvɛ ka bɛn a ma k'a lataa ǹ kuntii ma. Wo lɔ, ǹ n'a lanala ài bɛ ɲakɔlɔ, ile Masakɛ Agilipa bɛlɛbɛlɛ, fɔsa mɔ vɛ banna a maɲiningala, ǹ'i ko dɔ sɔlɔn k'a sɛvɛ. 27Kamasɔlɔn a bɛnnin tɛ ǹ ɲana, ǹ'i kasoden lataa masakɛba ma, ni m̀ m'a jalaki kun lagbɛ.»

Currently Selected:

Kɛkolu 25: MBT2023

Highlight

Copy