Loma 6

Ko ki Tātou e Ola ona ko Keliho

1Ka vēhea ake nei la ki tātou? Ka fai pea lava e ki tātou te agahala, kae ke fakalahi ātili ai te alofa tūnoa o te Atua? 2E hē tatau! Kāfai ki tātou kua hē i lalo o te pule a te agahala — e vēhea la ona haga fai pea e ki tātou te agahala? 3E hē koutou iloa ko ki tātou uma e fakatahi ma Keliho Iehu e ala i te papatihoga, e fakatahi foki ma ia i tona oti? 4#Klh 2.12I te papatihoga la o ki tātou, ko ki tātou na oti ma na tanu fakatahi ma Keliho. Ko ki tātou na papatiho kae ke ola ai ki tātou i he ola fou, e vē ona toe fakatū ia Keliho ki te ola i te mana o te Atua te Tamana.

5Auā kāfai ki tātou na tahi ma ia i he oti e vē ko tona oti, ka mautinoa lelei lava la te tahi o ki tātou ma ia i he toetū e vē ko tona toetū. 6Ma e iloa e ki tātou ko o tātou tagata tuai kua tāmate fakatahi ma Keliho i luga o tona hātaulo, kae ke mafai ai o tātou tino agahala ke fakaumatia, ma hē toe kavea ai ki tātou ma pologa a te agahala. 7Auā kāfai ki tātou e oti, ko ki tātou e fakahaoloto mai te mālohi o te agahala. 8Ona ko ki tātou kua oti fakatahi ma Keliho, ko ki tātou foki la e talitonu, ko ki tātou ka ola fakatahi ma ia. 9Auā kua ki tātou iloa ko Keliho kua toe tū mai i te oti, ma ka hē toe oti lele — ka hē toe i ei he pule a te oti ki a te ia. 10Ko te mea ia, ona ko tona oti, kua hē toe i ei ai he pule a te oti ki a te ia; kae kua ola i te māfutaga ma te Atua. 11E tatau foki la ke ia te koutou te manatu, ko koutou kua oti e tuha ai ma te agahala, kae e ola i te māfutaga ma te Atua e ala ia Iehu Keliho.

12Ko te agahala e hē tatau ke pule ki outou tino e fano e pala, kae ke uhitaki ai koutou ki nā tuinanauga o koutou. 13Nahe tuku atua foki he itūtino o outou tino ke fakaaogā e vē ni mea faigāluega mo nā mea kino. Kae e tatau ke tuku atu koutou mo te Atua, e vē ko nā tino kua toe fakatutū mai te oti ki te ola, ma tuku kātoa atu outou tagata, ke fakaaogā ma mea faigāluega mo nā mea lelei. 14Nahe kavea te agahala ma pule o koutou; auā ko koutou e hē ola i lalo o te tūlāfono, kae e ola i lalo o te alofa tūnoa o te Atua.

Ko he Tiute e o ki tātou ke fai te mea e Tonu

15E vēhea la? Ka fai nei la e ki tātou te agahala meamanū ko ki tātou e hē i lalo o te tūlāfono, kae e i lalo o te alofa tūnoa o te Atua? Hēai! 16E hē koutou iloa, kāfai e tuku atu outou tagata ma pologa ke uhitaki ki he tino, ko koutou ni pologa ki te tino e uhitaki koutou ki ei — pe a te agahala, e iku ai ki te oti, pe a te uhitaki, e iku ai ki te fakaleleia o te va ma te Atua. 17Kae fakafetai ki te Atua, auā e ui lava nae i ei he taimi na fai ai koutou ma pologa a te agahala, ka kua uhitaki koutou ma te loto kātoatoa ki te tūlaga o nā akoakoga na maua e koutou. 18Ko koutou na fakahaoloto mai i te agahala ma kua kavea ma kaukauna a te Atua ke faia te mea e tonu. 19(E fakaaogā e au te gagana faigōfie, ona ko te hē lava o te koutou iloa.) E i ei he taimi kua teka atu, na tuku kātoa atu ai outou tagata ke fai ma pologa a te faiamio, ma fakaaogā ai ki nā mea kino. Ke vēnā foki la ona tuku kātoa atu i te taimi nei outou tagata ke fai ma pologa a te āmiotonu, ke fakaaogā mo nā mea e paia.

20I te taimi nae fai ai koutou ma pologa a te agahala, ko koutou nae haoloto e tuha ai ma nā mea e finagalo ki ei te Atua 21He ā nei la he mea lelei ma koutou na maua, i te kua koutou faia o nā mea kua toe māhiahi ai lava koutou i te taimi nei? Ko te ikuga o nā mea iēnā ko te oti! 22Kae i te taimi nei, ko koutou kua fakahaoloto mai te agahala, ma kua kavea ma pologa a te Atua. Ko te mea a koutou kua maua, ko he ōlaga tautua fakamāoni ki te Atua, ma ko te ikuga, ko te ola e fakavavau. 23Auā ko te totogi o te agahala ko te oti, ka ko te meaalofa fōki fua a te Atua, ko te ola e fakavavau, i te māfutaga ma Keliho Iehu to tātou Aliki.

Currently Selected:

Loma 6: TNT

Highlight

Copy