Loma 5

Kua Uma te Fakalelei o te va o ki tātou ma te Atua

1Nei la kua uma te fakalelei o te va o ki tātou ma te Atua e ala i te fakatuatua, kua maua ai e ki tātou#5.1 kua maua ai e ki tātou ko iētahi tuhituhiga e lea mai ke ia te ki tātou la. te fīlēmū i te māfutaga ma te Atua e ala i to tātou Aliki ko Iehu Keliho. 2Kua kaumai e ia ki tātou e ala i to tātou fakatuatua, ki te alofa tūnoa o te Atua, tēia e ola ai nei ki tātou. Ko ki tātou la e fāfifia#5.2e fāfifia pe tātou fāfifia la. ona ko te tātou fakamoemoe, ke i ei fakatahi ki tātou i te huhulu pupula mamalu o te Atua. 3Ko ki tātou foki e fāfifia#5.3 ki tātou foki e fāfifia pe Tātou fāfifia foki la. ki nā puapuagā e maua ai ki tātou, auā kua ki tātou iloa ko te puapuagā e tupu ai te onohai, 4ko te onohai e talia ai ki tātou e te Atua, ma ko te talia o ki tātou e te Atua, e tupu ai te fakamoemoe. 5Ko te fakamoemoe tēnei e hē fakanoanoa ai ki tātou, auā kua liligi mai e te Atua tona alofa ki o tātou loto e ala i te Agaga Paia, te meaalofa a te Atua ki a te ki tātou.

6Auā ka koi vāivai ki tātou ma hē mafaia he mea, ko Keliho na oti mo ki tātou nā tino kino, i te taimi na filifili lava e te Atua. 7Ko he mea e faigatā te oti o he tino ke hui ai he tino āmiotonu. Ma hōvē e i na i ei he tino e ono loto mākeke, ke oti ia ke hui ai he tino lelei. 8Ka kua fakaalia e te Atua tona alofa ki a te ki tātou — ko te taimi ka koi i te agahala ai ki tātou, na oti ai ia Keliho mo ki tātou. 9E ala i tona toto,#5.9 tona toto pe tona oti. kua fakalelei ai to tātou va ma te Atua, ma ka hē hili atu nei la te mautinoa ko ki tātou ka fakahao e ia mai te tōkahā o te Atua! 10Ko ki tātou nae fili ki te Atua, kae na ia faia ki tātou ma ana uō, e ala i te oti o tona Ataliki. Nei la ko ki tātou ni uō e a te Atua, ka hē hili atu nei la te mautinoa ko ki tātou ka fakahao e ala i te ola o Keliho? 11Kae e hē ko tēnā oioti; ko ki tātou e fiafia ona ko te mea na fai e te Atua e ala i to tātou Aliki ko Iehu Keliho, tē kua mafai ai ki tātou ke kavea ma uō a te Atua.

Ko Atamu ma Keliho

12 # Ken 3.6 Ko te agahala na hau ki te lalolagi i he tino e fokotahi, ma ko tana agahala na kaumai ai foki ma te oti. Ona ko te mea tēnei, kua pa ai te oti ki te lalolagi kātoa, auā ko tagata uma lele kua agahala. 13Nae i ei te agahala i te lalolagi ka ko hēki tuku maia ai te Tūlāfono; kae ko te mea e hē i ei he tūlāfono, e hē tūhia ai foki ni agahala. 14Kae mai te vāitaimi o Atamu ke pa ki te vāitaimi o Mohe, ko te oti nae pule kātoa ki tagata uma, ke pa lava kinā tino e hēki agahala i te auala na agahala ai ia Atamu, ina kua hē uhitaki ki te fakatonuga a te Atua.

I hētahi itū, ko Atamu e tāi vē oi tāi hē vē foki ko te tino na tuku e hau. 15Kae ko te meaalofa fōki fua e hē vē ko te agahala a Atamu. E hako e tokalahi na feoti ona ko te agahala a he tino e fokotahi. Kae ko te alofa tūnoa o te Atua e hili lele atu te lahi, ma vēnā tana meaalofa fōki fua mo te tokalahi o tagata e ala i te alofa tūnoa o he tino e fokotahi, ko Iehu Keliho. 16Ma e i ei te mea e kehekehe ai te meaalofa a te Atua, ma te agahala a he tino e fokotahi. I te umaga o te agahala o te tino e tokatahi, na fai ai tona ikuga e te Atua e “Hala”; kae i te umaga o te agahala o tagata e tokalahi, na maua mai ai te meaalofa e hēki tatau ke ki lātou maua, ko te “Hē hala.” 17E hako ko te agahala a he tino fokotahi te na kāmata ai oi pule te oti, ona ko te tino tēnā e fokotahi. Kae e hē hili atu nei la te lelei o te mea na fai e te tino e fokotahi, ko Iehu Keliho! Ko nā tino uma lele e maua e ki lātou te lahi o te alofa tūnoa o te Atua, ma e fakalelei fua to lātou va ma ia, ka fakaatili to lātou mālolohi e ala ia Keliho.

18Ko te mea ia, e vē ona fakahalagia ia tagata uma ona ko he agahala a he tino e fokotahi, e vēnā foki ona māgalo ia tagata uma ma maua e ki lātou te ola, ona ko he gāluega lelei a he tino e fokotahi. 19Ma e vē ona kavea te tokalahi o tagata ma tagata agahala ona ko te hē uhitaki o he tino e fokotahi, ka vēnā foki ona fakaleleia to lātou va ma te Atua, ona ko te uhitaki o he tino e fokotahi.

20Ko te Tūlāfono na tuku mai ke fakaatili ai te lahi o te holi tūlāfono; kae kāfai e lahi te agahala, ka hili atu la te lahi o te alofa tūnoa o te Atua. 21Ko te mea ia, e vē ona pule te agahala e ala i te oti, e vēnā foki ona pule te alofa tūnoa o te Atua e ala i te fakaleleia o to tātou va ma ia, ma takitaki ai ki tātou ki te ola fakavavau e ala ia Iehu Keliho to tātou Aliki.

Currently Selected:

Loma 5: TNT

Highlight

Copy