Gāluega 28

Ko te Mea na tupu ki a Paulo i Melite

1Kua taunuku haogalēmū ake ki mātou ki gāuta, oi ki mātou iloa ai ko te igoa o te motu tēnei ko Melite. 2Na alofagia ki mātou e tagata o te fenua. Na kāmata oi ua ma mālūlū, oi tafu ai e ki lātou he afi ma tali lelei ki mātou. 3Na ao mai e Paulo he fakaputuga mealākau ma e tuku atu e ia ki luga o te afi, kae totolo mai ki fafo he gata mai loto o te fakaputuga mealākau ona ko te vevela, ma kati tona lima ma mau ai lava ki ei. 4Kua kitea atu e nā tino o te fenua te gata e tautau i te lima o Paulo, oi lea vē ai tētahi ki tētahi, “Ko te tagata nei hōvē he tino tāmate tino, ka ko te atua o te faimeatonu ka he ia fakahaoagia ia, e tuha lava pe na hao mai i te tai.” 5Kae kua lūlū e Paulo te gata ki luga o te afi, e aunoa ma he mea kua tupu ki a te ia. 6Na fakatalitali nā tino ke puputa tona tino pe pakū fakafuaheki ki lalo kua mate. Kae ina kua mataloa te fakatali kae e hēai lele he hūiga e pa ki ei ia Paulo, oi na hui ai o lātou māfaufau ma lea vē, “Ko te tagata tēnei ko he atua!”

7Nae hē mamao ma kinā ni fatoaga e o Popilio, te aliki pule hili o te motu. Na talia fiafia ki mātou e ia, ma e tolu ia aho na nonofo ai ki mātou i tona fale. 8Ko te tamana o Popilio nae takoto i te moega e maua i te fiva ma te manava tatā. Oi fano ai ia Paulo ki te potu e i ei ai, kua tatalo ma fakaeke atu ona lima ki ona luga ma fakamālōlō ai mai ona tauale. 9I te tupuga o te mea tēnā, oi ōmamai ai nā tino tauale uma i te fenua, ma na fakamālōlō uma ki lātou e ia. 10E lahi a mātou meaalofa na ki lātou fōki maia, ma i te taimi ka malaga kehe ai ki mātou, na fakauta ake e ki lātou ki luga o te vaka nā mea uma nae manakomia e ki mātou mo te faiga malaga.

Mai Melite ki Loma

11E tolu māhina na nonofo ai ki mātou i kinā, oi malaga ai ki mātou i luga o he vaka mai Alehania e igoa ko “Te Māhaga Atua”, nae fakatalitali i te motu ke uma te taumālūlū. 12Na taunuku ki mātou ki Hulakuha, oi nonofo ai ki mātou i kinā i ni aho e tolu. 13Na fakaauau te mātou malaga mai kinā ma na taunuku atu ai ki te kakai ko Legiona. I te aho na hohoko ai ko te matagi na agi mai i haute, ma e lua ia aho kae pa ki mātou ki te taulaga ko Potioli. 14I kinā, na fetaui ai ki mātou ma ni tino Kelihiano na lea mai ke nonofo ki mātou ia te ki lātou i he vaiaho. Ma na olo ai loa lava ki mātou ki Loma. 15Kua logotala te kau Kelihiano i Loma e uiga ki a te ki mātou, oi na ōmamai ai mai nā tamā kakai, ke pa lava ki nā tamā kakai e tau mamao mālie kehe atu e vē ko te Māketi o Apiou ma nā Faletalimālō e Tolu, ke feiloaki ki mātou. I te kitea atuga e Paulo nā tino iēnei, oi fakafetai ake ai ki te Atua ma na matuā fakalototelegia ai ia.

Kua Tālaki te Tala Lelei i Loma

16I te taunuku atuga o ki mātou ki Loma, na fakataga ia Paulo ke nofo nā ko ia kae leoleo e he fitafita auā ei na hola kehe.

17Kua teka nā aho e tolu, oi kalaga ai e Paulo he lātou fono ma nā takitaki Iutaia i Loma. I te maopoopo maiga, oi lea vē atu ai ki ei, “Te kau uho, e ui lava e hēai haku mea hehē na fai ki o tātou tagata pe ki nā tū na ki tātou maua mai o tātou tupuna, ko au na fai ma pagotā i Ieluhalema, ma tukulima atu ki nā tino Loma. 18I na kua uma te hukehukegia o oku, na fofou nā tino Loma ke tatala au ma fakahaoloto, auā kua ki lātou iloa e hēai haku mea hehē na fai e tatau ai ke fakahala au i te oti. 19#Gāl 25.11Kae i te tetekega o nā tino Iutaia ki te mea tēnei, na fai tēnā ma mea na fakatagi ai au ki te Kaihala, e ui lava e hēki i ei he mōliga na kō faia e uiga ki oku lava tagata. 20Ko te mea ia kua lea atu ai au ko ki tātou ke feiloaki ma talanoa. Ko te mea moni lava, ko au e noanoa vēnei i nā filifili ona ko te tino tēia e fakamoemoe ki ei ia tagata o Ihalaelu.”

21Oi lea vē atu ai ki lātou ki a Paulo, “E hēki maua e ki mātou ni tuhi mai Iutea e uiga ki a te koe, oi e hēai foki he tino o nā tino o ki tātou na ōmamai mai kinā e hau ma he tala, pe he fakamatalaga e fakakino ai tō igoa. 22Kae ko ki mātou e fia fakalogo atu ki nā manatu o koe, auā e iloa e ki mātou ko nā tino i ho he koga lava, e teteke lele ki te fakalapotopotoga tēnā kua i ei koe.”

23Oi filifili ai e ki lātou ma Paulo he aho ke feiloaki ai, ma na tokalahi lele nā tino na ōmamai i te aho tēnā, ki te mea nae nofo ai ia Paulo. Mai te taeao ke pa ki afiafipō, nae fakamālamalama lava e Paulo ki a te ki lātou tana fekau e uiga ki te Mālō o te Atua, ma nā taumafai ke ia fakamāonia ki a te ki lātou te tala e uiga ki a Iehu, e ala i nā kupu e ia hiki maia i te Tūlāfono a Mohe, ma nā tuhituhiga a te kau pelofeta. 24E i ei nā tino na talitonu ki ana kupu, kae ko iētahi e hēki talitonu. 25Oi na fekehekeheaki ai lava ki lātou ma tākape ai lava, ka kua uma ai te lea vē atu o Paulo i te mea tēnei e fokotahi: “Kai te hako lele o te vāgana a te Agaga Paia ki nā tupuna o koutou, na kui mai i te pelofeta ko Ihaia! 26#Iha 6.9-10Na vāgana vē,

‘Fano oi lea ki tagata o te nuku tēnei:

Ka fakalogo ma fakalogo koutou, kae hē koutou hāfia;

ka kikila ma kikila koutou, kae hē koutou kitea,

27auā ko nā māfaufau o tagata o te nuku tēnei kua tuka,

ma kua ki lātou pupunia o lātou taliga

ma tapuni o lātou mata.

Auā moinei ake e kitea e o lātou mata,

e lagona e o lātou taliga,

e mālamalama o lātou māfaufau,

ma e liliu mai ki lātou ki a te au, kua vāgana ai te Atua,

ma kō fakamālōlōa ai ki lātou.’ ”

28-29Kua fakaiku te tautalaga a Paulo oi lea vē ai: “E tatau la ke koutou iloagia, ko te fekau e uiga ki te fakaolataga a te Atua, kua kave ki nā tino nukukehe! Ka fakalogo ki lātou ki ei!”#28.28-29Ko iētahi tuhituhi paia e fakaopoopo ki ei te f 29: Kua uma te lea atu o Paulo i te mea tēnei, o olo kehe ai nā tino Iutaia ma kua tauaikupu lava ki lātou.

30E lua ia tauhaga nae nofo totogi ai ia Paulo i he fale, ma nae talia fiafia e ia nā tino uma nae ōake oi āhi ake ia. 31Nae folafola atu e ia te fekau e uiga ki te Mālō o te Atua ma akoako atu e uiga ki te Aliki ko Iehu Keliho, i he agaga hē mataku ma haoloto.

Currently Selected:

Gāluega 28: TNT

Highlight

Copy