Gāluega 27

Kua Kave ia Paulo e nā Fitafita ki Loma

1I te tonuga ko ki mātou e tatau ke folau ki Italia, oi tuku atu ai e ki lātou ia Paulo ma iētahi pagotā ki te kikilaga a Iulio, he takitaki o he vaegākau Loma tokalahi e fakaigoa “Ko te Vaegākau a te Kaihala.” 2Na hohopo ki mātou ki he vaka na hau mai Atalamuteno ma kua hāuni ka malaga ki nā taulaga o te itūmālō o Ahia, ma na tukuvaka ai loa ki mātou. Nae fakatahi ki mātou ma Alihitako, he tino Maketonia e hau i Tehalonika. 3I te aho na hohoko ai na pa ai ki mātou ki Haitonu. Ko Iulio nae agalelei ki a Paulo ma nae ia fakataga ke fano oi kikila ana uō, ke maua ai nā mea e ia fia maua ke ola ai. 4Na fakaauau te mātou malaga mai kinā, kae ona ko te matagi e nofo mai i te muāvaka, ko te mea ia na kui ai ki mātou i te itū ki lalo o te motu ko Kupulona. 5Na kui atu ki mātou i gātai o Kilikia ma Pamefulia, oi pa ai ki mātou ki Mula i Lukia. 6Ko kinā na maua ai e te takitaki o te vaegākau Loma he vaka mai Alehania ka folau ki Italia, oi fakaeke ai loa ki mātou ki luga.

7E faitau aho nae tele mālie lele ai to mātou vaka ona ko te matagi nae nofo mai i te muāvaka, ma na taunuku atu ki gātai o te kakai ko Kinito. E hēki toe mafai ki mātou ke hēleka ki mua i te itū tēnā ona ko te matagi, oi na fakaheke ifo ai ki mātou ki te itū loki o te motu ko Kelete, ma teka ma te Matāfenua ko Halamone. 8Na tele fakatafatafa atu ki mātou i te matāfaga, ma na faigatā lele foki te malaga, oi pa atu ai ki mātou ki he koga e takua ko te Taulaga Loki, e hē mamao ma Lahaia.

9Na mataloa te taimi nae i kinā ai ki mātou, ma na iku lava kua fakapokepoke ke fakaauau pea te malaga, ma kua teka foki te Aho Fakalāina.#27.9: Aho Fakalāina: Ātonu e fakaaga ki te Aho Fakamanatu mo te Fakamāgaloga o nā Agahala. Ko te aho tēnei e fakamanatu i te fakaikuga o Hetema pe ko te kāmataga o Oketopa. Ko he taimi e māhani kino lahi ai te tau ma fakapokepoke ke faimalaga ai i te koga iēnei. Oi na fautua vēnei atu ai ia Paulo ki a te ki lātou: 10“Taulelea, ko au e kikila ko te tātou malaga e kāmata atu i kinei ka fakapokepoke lele; ka fakakino lahi te uta vēnā foki ma te vaka, ma ka i ei foki ni tino e feoti.” 11Kae ko te takitaki o te vaegākau kua talitonu lava ki te kupu a te alikivaka ma te tino e o ia te vaka, kae kua hē fakalogo ki te mea e lea ai ia Paulo. 12Ko te taulaga tēnei e hē lelei ke taula ai ni vaka i te taimi o te taumālūlū; ko te tokalahiga la o nā tino na fofou ke tuku o lātou vaka ki gātai ma taumafai ke pa ki Foinika pe kāfai e mafai, ke fakatalitali i kinā ke uma te taumālūlū. Ko Foinika he taulaga e i Kelete, e fakahaga ki haute-hihifo ma mātū-hihifo.

Ko te Afā i te Moana

13Na kāmata oi agiagi mālū mai te matagi i te itū ki haute, oi vē ake ai nā taulelea ka mafai ke fakataunuku te lātou fuafuaga, oi na hihi ai te taula o to lātou vaka ma fakatele fakatafatafa atu i gātai o Kelete. 14Kae e hēki mataloa kae pa ifo te matagi mālohi — te matagi e takua ko te “Matagi o mātū-hahae” — e fanaifo mai gāuta o Kelete. 15I te agiga o te matagi na matuā hē mafai lava te vaka ke fakatūtū ki te matagi, ma ko te mea ia na tīaki ai loa a mātou taumafaiga kae kua tuku te vaka ke kave e te matagi. 16Na maua e ki mātou he tamā loki ina kua kui atu ki mātou i haute o te tamā motu ko Kauta. Na mafai ke toe faufau mau te tulula o te vaka i kinā, e ui lava nae fai hina faigatā. 17Na fufuti ake e ki lātou te tulula ki luga o te vaka, ma tamau ai i nā maea fakatakamilo i te vaka. Oi tuku ai ki lalo te la o te vaka ka kua tuku te vaka ke pūhia i te matagi, ona nae mātataku nā te vaka e kake i te kauāfua oneone e takua ko Huliti#27.17: Huliti ko te kauāfua tēnei e i gātai o Lipuē. 18Na agi pea lava te afā mālohi, ma i te aho na hohoko ai, oi kāmata ai oi toli e ki lātou ki te tai ni vāega o te uta a te vaka, 19ma i te aho alafaki na togi e lātou ki te tai iētahi kope o te vaka. 20E lahi nā aho na hē mafai ai ke ki mātou kitea te la, pe ko nā fetu, oi ko te matagi foki nae agi mālohi lele. Na iku lava kua hēai ho mātou fakamoemoe ko ki mātou e fakahaogia.

21Na mataloa te taimi na hēki mafai ai ke kakai nā tino nae i luga o te vaka, oi tū ai ia Paulo i mua o ki lātou ma lea vē atu, “Taulelea, na tatau lava koutou ke fakalogo mai ki a te au, i toku lea atuga ko ki tātou nahe folau kehe mai i Kelete; moinei ake e hēai he mea e fokotahi e fakakino pe māumau. 22Ka ko au la e aioi atu nei, ko koutou ke loto tetele! E hēai he tino fokotahi o koutou e māumau tona ola; kae nā ko te vaka oioti te māumau. 23Auā ko anapō na hau ai he agelu a te Atua, tē e a ia au, ma e tāpuaki au ki ei 24oi lea vē mai, ‘Paulo, ia koe nā mataku! Ko koe e tatau ke tū i mua o te Kaihala. Ko te agalelei o te Atua ki a te koe, kua fakahao ai ia ola o nā tino uma e faimalaga fakatahi koutou.’ 25Ko koutou la taulelea, loto tetele! Auā ko au e talitonu ki te Atua, ma ka taunuku lava nā mea e vē ona fakailoa mai e ia ki a te au. 26Kae ko te tātou vaka ka pūhia ma ake ki gāuta o he motu.”

27Kua pa ki te pō agafulumāfā, ka koi fefaiaki lava ki mātou e te afā i te Tai Metitelani. I te tau tūlua o te pō, oi vē ai kua hāfia e te kauvaka ko ki mātou kua pili ki he fenua. 28Oi togi ai e ki lātou he uka ma he mea mamafa e nonoa ki te pito, ma ki lātou iloa ai ko te loloto kua 40 mita; na mataloa mālie ake oi toe fai ai foki e ki lātou te mea tēnei, ma na iloa ai kua 30 mita te loloto. 29Na mātataku lele ki lātou auā te vaka i na pūhia ki luga o ni papa, ko te mea ia na tukutuku ai e ki lātou ki lalo nā taula e fa i te mulivaka, ma tatalo ke i na ōtea loa. 30Oi taumafai ai te kauvaka ke hōhola kehe ma te vaka; kua tukutuku e ki lātou te tulula ki te tai, oi fakatagā vē ai e olo oi togi ni taula i te taumua o te vaka. 31Kae kua lea atu ia Paulo ki te takitaki o te vaegākau ma nā fitafita, “Kāfai te kauvaka e hē nonofo pea i luga o te vaka, ko koutou uma lele e feoti.” 32Oi tipi ai e nā fitafita nā maea nae tau ai te tulula ma tuku ai ke tāfea.

33Kua tāli pa ki te vaveao, oi fakamālohi ai ia Paulo ki a te ki lātou uma ke kakai: “Kua fano nei te hefulufa aho e fakatalitali ai koutou, ma i te taimi kātoa tēnei ko hēki i ei lele he mea a koutou e kai. 34Ko au la e fakamālohi atu, kai ko ni autou meakai kae ke ola koutou. E hēai he lāulu e fokotahi i outou ulu ka māumau.”#27.34: he lāulu e fokotahi i outou ulu ka māumau: e hēai he tino e lavea pe āfāina. 35Kua uma atu tana kupu tēnā, oi tago ai ia Paulo ki ni falaoa, kua fakafetai ki te Atua i mua o ki lātou uma, kua tavaevae ma kāmata oi kai. 36Na fakalototelegia ki lātou, ma mafai ai ke kai ni meakai e ki lātou uma tau tokatahi 37E toka 276#27.37: 276; ko iētahi fakamaumauga e lea mai 275; ko iētahi e lea mai 76. ki mātou uma nae i luga o te vaka. 38Kua uma te kakai o ki lātou, oi toli ai e ki lātou te uta haito kātoa ki te tai ke fakamāmā ai te vaka.

Kua Tukia te Vaka

39E ōtea ake, e hē matea e te kauvaka te talafātai kua i ei ki mātou, kae kua ki lātou kitea atu he faga ma he matāfaga, ma tonu ai ia te ki lātou, kāfai e mafai, ko te vaka ka fakakake i kinā. 40Oi tatipi ai e ki lātou nā taula ma tuku ke gōgoto, kae tatala nā maea nae tamau ai nā foeuli. Oi fakatū ai te la i te taumua kae ke pūhia te vaka ki mua, ma fakatū ai loa ki mātou ki gāuta. 41Kae kua tatū te vaka ki he kauoneone ma kake ai; kua maupagī te taumua ma kua hē gāoioi, ka ko te taumuli kua tamoi likiliki i te mālohi o nā galu.

42Na fai te tonu a nā fitafita ke tāmate uma nā pagotā, kae ke nahe mafai ke faikaukau ki gāuta ma hōhola ai. 43Kae na fofou te takitaki o te vaegākau ke fakahao ia Paulo, oi na ia tāofia ai te lātou tonu na fai. Ka kua fakatonu e ia nā taulelea uma e iloa kakau ke tūtaoho muamua ki te tai oi kakau ki gāuta; 44ko nā tino e totoe, ka mulimuli atu e lagalagai i nā laupapa loloa pe ni vāega o te vaka kua malepe ma to kehe. Na vēnā la te auala na hao uma ai ki mātou ki gāuta.

Currently Selected:

Gāluega 27: TNT

Highlight

Copy