Loma Fakatomuaga
Fakatomuaga
Ko te Tuhi a Paulo ki nā tino i Loma na tuhi ke hāuniuni ai mo he malaga kua uma te fuafua e ia ke āhiāhi ki te Ekalehia i Loma. I tana fuafuaga, ko ia e galue i te mea e i ei nā tino Kelihiano i Loma mo hina taimi, oi fano ai ki Hepania. Na tuhi ke fakamālamalama ki a te ki lātou tona iloa e uiga ki te matākupu tau te fakatuatua faka-Kelihiano, ma te fakatinoga i ōlaga o te kau Kelihiano. Ko te tuhi tēnei e tūhia ai nā fakakupuga a Paulo e hili te kātoatoa, e uiga ki tana fekau.
E uma te fakafeiloakiga o nā tino o te Ekalehia i Loma ma te fakailoaga ki ei ko ia e tatalo mo ki lātou, oi tautala ai loa ia Paulo e uiga ki te matākupu kautū o tana tuhi: “Kua fakailoa mai e ala i te Tala Lelei te auala e fakalelei ai e te Atua te va o tagata ma ia: e ala i te fakatuatua mai te kāmataga ki te ikuga.” (1.17)
Oi kāmata ai loa oi fakalauaitele e Paulo te matākupu kautū. Ko tagata uma, nā tino Iutaia ma nā tino nukukehe, e tatau ke fakalelei to lātou va ma te Atua, auā e tutuha uma lava ki lātou, ei lalo o te pule a te agahala. Ko te va o tagata ma te Atua e fakaleleia e ala i te fakatuatua ki a Iehu Keliho. Hohoko ai ma te fakamatalaga e Paulo o te ola fou i te māfutaga ma Keliho, tēia e maua ona ko te hokotaga fou ma te Atua. Ko te tino e talitonu e ia te ia te fīlēmū o te Atua ma e fakahaoloto e te Agaga o te Atua mai te pule a te agahala vēnā ma te oti. I nā fuaikupu 5 — 8 e talanoa ai ia Paulo ki te ala na fai ai te Tūlāfono a te Atua ma te mana o te Agaga o te Atua i loto o te tino kua talitonu. Oi taumafai ai te kau apohitolo ke mālamalama pe vēhea oi mafai ke i loto uma o nā fuafuaga a te Atua, nā tino Iutaia ma nā tino nukukehe. I tana fakaikuga, na tākua ai e ia ko te teteke e tagata Iutaia o Iehu, ko he vāega o te fuafuaga a te Atua ke maua ai e tagata uma te alofa tūnoa o te Atua e ala ia Iehu Keliho. E i ei foki tona talitonuga e hē tūmau te teteke o tagata Iutaia ki a Iehu. Oi tuhi ai foki ia Paulo e uiga ki te ōlaga faka-Kelihiano e tatau ke ola ai ki lātou, kae maihe lava nā uiga alofa i te va o tētahi ki tētahi. E tākua e ia nā matākupu tāua e vē ko te tautua ki te Atua, nā tiute o tagata Kelihiano ki te mālō, ma tētahi ki tētahi, ma te fehili e uiga ki te lotofuatia. E fakauma tana tuhi i ni fakafeiloakiga ki nā tino tau tokatahi, ma nā kupu e vīkia ai te Atua.
Fakahologa o nā vāega o te Tuhi
Fakatomuaga ma te matākupu kautū 1.1-17
E manakomia e tagata uma te fakaolataga 1.18 — 3.20
Ko te auala o te fakaolataga a te Atua 3.21 — 4.25
Ko te ola fou ia Keliho 5.1 — 8.39
Ko Ihalaelu ei loto o te fuafuaga a te Atua 9.1 — 11.36
Ko te āmio a te Kelihiano 12.1 — 15.13
Fakaikuga ma fakafeiloakiga ki ni tino tau tokatahi 15.14 — 16.27
Currently Selected:
Loma Fakatomuaga: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.